Aktualitet

51 viktima, 913 të plagosur/ Vdes 20-vjeçarja tek Trauma, babai: Po të mos isha penguar, Xhesi do kishte shpëtuar

51 viktima, 913 të plagosur, 34 në spitalin në spitalin e Traumës, 3 të tjerë për mjekim jashtë vendit dhe 47 të shpëtuar. Ky është bilanci i tërmetit të rëndë të 26 nëntorit. Sot ka humbur jetën në spitalin e Traumës, Xhesika Biqiku, vajza 20-vjeçare që i ra tulla në kokë në Kombinat.
Featured image of article: 51 viktima, 913 të plagosur/ Vdes 20-vjeçarja tek Trauma, babai: Po të mos isha penguar, Xhesi do kishte shpëtuar Foto nga homazhet, qytetaret ne radhe per buke dhe tërmeti
Përditësuar:

SHQIPERI- 51 viktima, 913 të plagosur, 34 në spitalin e Traumës, 3 të tjerë për mjekim jashtë vendit dhe 47 të shpëtuar. Ky është bilanci i tërmetit të 26 nëntorit, i cili rezultoi tragjik. Paraditen e sotme në spitalin e Traumës humbi jetën Xhesika Biqiku . Ajo u godit nga një tullë gjatë daljes nga banesa e saj në Kombinat dhe pas 3 ditësh në koma nuk  mundi të jetonte.  Babai i saj, Ilia Biqiku bëri vazhdimisht lutje që vajza e saj të kurohej në Itali. Dy ditë më parë ai rrëfeu mes lotësh:  “Nëse nuk do të isha penguar teksa dilnim, Xhesika do të kishte shpëtuar”.

Ministria e Mbrojtjes në një njoftim zyrtar bën me dije se kërkimet në terren në zonën e Thumanës dhe Durrësit kanë përfunduar. Nga ministria theksoi se pati 50 viktima të cilat u nxorrën nga rrënojat për tre ditë.  Një njoftim zyrtar ka dhënë edhe Ministria e Shëndetësisë, ku thekson se të lënduar nga tërmeti ka pasur 913, 34 ende në spitalin e Traumës.

Për më shumë bëhu pjesë e grupit më viral në Facebook, Dosja.al

Po kështu kryeministri i vendit ka mbledhur sot që me mëngjes qeverinë dhe ka theksuar se do miratohet ligji, 7-15 vite burg për ndërtuesit, arkitektët dhe supervizorët që bëjnë ndërtime në shkelje. Ai premtoi pension të veçantë për pensionistët e prekur, bursa 15 mijë lekë në muaj për studentët dhe nxënësit. Sipas një trajtim të veçantë financiar do të kenë edhe personat që humbën familjet në këtë tragjedi.

(J.v;f.g/Dosja.al)

  • 15:49

    “Thuaj një llaf të mirë, ma ço në Itali”, babai i Xhesikës iu lut Ramës para se e bija të mbyllte sytë, fjala që i dha kryeministri

    Babai i Xhesika Biqikut, viktimës së 52 nga tërmeti i tmerrshëm iu lut kryeministrit Edi Rama mëngjesin e sotëm, pak orë para se e bija të ndërront jetë. Teksa Rama ishte në zonën e Kombinatit, Ilia Biqiku iu drjetua kryeministrit dhe iu lut t’ja çonin vajznë në Itali. “Kam gocën në spital. Është në gjendje të rëndë tek Trauma. Erdhi doktori italian, por është rëndë. Aman, thuaju një llaf të mirë të ma çojnë në Itali. Të më mbushë goca 20 vjeç. Kam edhe gocën e madhe të sakatuar,”- dëgjohet teksa i thotë babai i të ndjerës kryeministrit. Ndërsa Rama i dha fjalën duke i thënë se e kishte me merak vajzën e tij, si të ishte e vetja. Por pak orë më vonë, shpresat u shuan për Xhesikën që i ra një tullë në kokë, teksa dilte nga pallati ku banonte në Kombinat dhe e reja ndërroi jetë. 20-vjeçarja ishte parashikuar të nisej me helikopter drejt Italisë që dy ditë më parë, por gjendja e saj e rënduar e vështirësoi këtë proçes. Pasi mjekët italianë panë gjendjen e saj u shprehën se lëvizja më e vogël do të ishte fatale për jetën e Xhesikës.

  • 14:59

    Tragjedia e 26 nëntorit/ Ja dokumentet që ju duhen për t’u strehuar në hotele, ndiqni këto hapa

    Të gjithë qytetarët e prekur nga tërmeti do të strehohen nëpër hotele! Kjo është deklarata që ka bërë vetë kryeministri Edi Rama ditët e fundit pas tragjedisë së 26 nëntorit, por edhe kjo procedurë kërkon disa hapa të nevojshme. Dosja.al njofton të gjithë qytetarët që e kanë të nevojshme të strehohen në hotele që të ndjekin disa hapa. Fillimisht duhet të drejtoheni tek njësia administrative dhe të merrni një vërtetim me vulë nga administratori që ndërtesa juaj është e pabanueshme dhe keni nevojë për strehim. Më pas me vërtetimin në dorë paraqituni në sportelin e bashkisë tuaj. Aty do të udhëzoheni dhe do të niseni në mënyrë të organizuar bashkë me familjarët tek një prej hoteleve që kanë zgjedhur të solidarizohen, duke hapur dyert e tyre për të gjithë të prekurit nga tërmeti. Kryeministri Edi Rama shtoi gjithashtu se nëpër çadra do të rrinë vetëm ata banorë që nuk dëshirojnë të strehohen në hotele pasi kanë bagëti dhe lidhje të ndryshme me tokën. Por edhe atyre, sipas kryeministrit do t’u sigurohen çadra të standarteve europiane.

  • 14:52

    “Një panine bukë na kanë dhënë", banorët e prekur nga tërmeti rrugëve të Durrësit: Na premtuan hotele, na kanë ofenduar, kemi që në mëngjes këtu... (VD)

    Gjimnazi “Leonik Thomeo”  është kthyer në një qendër grumbullimi për ndihmat që mblidhen për qytetarët, të cilët kanë mbetur të pastrehë pas tërmetit që goditi Shqipërinë. Por mesa duket situata nuk është edhe aq e qetë për shkak se banorët duken të revoltuar gjatë shpërndarjes së ndihmave. Situata sa vjen e bëhet më pak e menaxhueshme për shkak se banorë të shumtë kanë nevojë urgjente për ndihma, raporton për abcnews.al gazetarja, Ajgena Korbi. Banorët e pakënaqur dhe ndërkohë të revoltuar tregojnë se ndihmat nuk janë shpërndarë edhe pas pritjes së tyre të gjatë në dyert e gjimnazit.

    “Nuk ka kush na mban, na kanë ofenduar shumë nuk na japin ndihma. Po rri nga mëngjesi këtu, nuk mund të shkoj të strehohem të pallati i sportit sepse nuk ka kush të ruajë materialet që kam në shtëpi”, tha një banore.

    Ndërsa të tjerë banorë shprehen se “autoritetet nuk kanë shkuar ti strehojnë, edhe pse kanë marrë premtime se do ti dërgonin në hotel në Vlorë, por asnjë nuk ka shkuar deri tani”, tha qytetarja.

    Nga ana tjetër kryetari i Bashkisë së Durrësit është shprehur se një pjesë e qytetarëve janë pajisur me autorizim nga njësia përkatës për të marrë ndihma, por për përgjigje të saktë media duhet të drejtohet në Bashki”, raporton për abcnews.al gazetarja Ajgena Korbi.

    Gjithashtu edhe përfaqësuesit e bashkisë ndodhen në qendrën e shpërndarjes, por askush nuk jep shpjegim se si do të bëhet shpërndarja e ndihmave. Marrë nga abcnews.al

  • 14:47

    Rinisja e mësimit pas tërmetit, Shahini flet për dëmet në shkolla: Nesër njoftim zyrtar, universitetet ta vendosin vetë

    Ministrja e arsimit Besa Shahini ka njoftuar se ditën e nesërme do të bëhet e ditur nëse do të rinisë mësimi në shkolla ditën e hënë apo jo. Në një prononcim për Report Tv, Shahini u shpreh se në qytetin e Durrësit dhe të Kavajës janë inspektuar të gjitha shkollat dhe shumë prej tyre kanë probleme. Ministrja shtoi më tej se universitetet janë autonome dhe do ta vendosin vetë se kur do ta rinisn mësimin, sipas ekspertizës së bërë në godinat përkatëse. “Në Durrës janë kontrolluar të gjitha shkollat. Në zonat e tjera inspektimet sipas sinjalizimit të drejtorëve. Do të hapen vetëm ato shkolla 100% të sigurta. Nesër do të njoftojmë nëse do fillojë ose jo mësimi të hënën. Nesër bëjmë publike listën e shkollave të dëmtuara. Universitetet janë autonome, vendosin vetë për mësimin. Kontrolle në shkolla, kopshte e çerdhe, publike dhe private. Situata nga tërmeti, deri më tani janë kontrolluar 200 shkolla,”- tha ajo ndër të tjera.

  • 14:36

    'Rri në krevat, ra s'ra'/ Paloka harron vilën e Bashës dhe i sulet Ramës: I pafytyrë, edhe ne të kishim vilë s'lëviznim... (REAGIMI)

    Edi Rama dhe Edi Paloka

    Nënkryetari i Partisë Demokratike, Edi Paloka i është përgjigjur deklaratave të kryeministrit Edi Rama, që teksa përpiqej të qetësonte banorët e Kombinatit, iu tha se fati nuk ndryshohet, prandaj ai qëndron në krevat kur bie tërmet. Në një reagim në rrjetet sociale, Paloka e quan kryeministrin të pafytyrë që tallet me qytetarët, dhe se për vete qëndron në vilë, prandaj nuk ka frikë nga tërmeti.

    Reagimi i plotë:

    “I pafytyri! Në vend që tju jap zgjidhje apo të pakten ti qetësoje qytetarët që janë në hall e në panik (se për pergjëgjesitë e tjera as nuk bëhet fjalë), bën arrogantin dhe trimin…;” unë nuk leviz as nga krevati kur bie termet”-thotë. Sigurisht o i pafytyrë…edhe ne po të kishim vila betonarme si ty, “nuk do te leviznim nga krevati”.  Pak ditë më parë ju tha “rilindasve” se shtepi si e tija kishin gjysma e shqiptarëve! Sot ju shet mend i tall e i fyen! Nuk flenë rrugëve e nëpër makina nga qejfi shqiptarët, po sepse nuk kanë “shtëpi” si e jotja dhe nuk duan që ato pamje të tmerrshme të nënave përqafuar me femijët nën rrënoja, ti shohin e perjetojnë përseri.

    Mos mendo se meqë opozita ka vendosur të mos bej politike në këtë moment të ankthshëm, ti ke të drejtë të besh të papërgjegjshmin e ca më shumë arrogantin…Boll me teatrin e skenat me lot fallco, po të paktën në këto momente, ku gjithë bota është solidarizuar me shqiptarët, bëj minimumin e asaj që po bëjnë të tjerët për ne.”

    Në fakt, deklarata e Palokës është goxha kontradiktore, pasi nëse flasim për vila, të dy liderët politikë, si Edi Rama dhe Lulzim Basha, nuk janë për të ‘qarë hallin’. Vetëm një muaj më parë u zbulua në media, se kryedemokrati është zhvendosur në vilat luksoze të Agron Papulit, ndërsa Rama jeton i qetë prej vitesh në vilën e tij në Surrel.

  • 13:40

    VIDEO/ Braçe i bërtet me sa fuqi ka në kokë: Zoti kryeministër, është e ndaluar… Rama ‘trembet’: Më fal, ndjesë shoku Erion!

    Kryeministri Edi Rama ka inspektuar banesat e dëmtuara nga tërmeti në Bubq të Krujës, ku ka takuar banorët e pranishëm dhe ka parë vetë nga afër dëmet. Teksa po inspektonte dëmet, Rama ishte i shoqëruar nga zv.kryeministri Erion Braçe, i cili I bërtiti pasi Rama hyri brenda shkollës së dëmtuar.

    Biseda Braçe- Rama:

    Edi Rama: Kush e ka bërë këtë?

    Erion Braçe: Ekspertët e Ministrisë së Arsimit, i ka marrë Ministria.

    Edi Rama: Të merren me strukturën

    Erion Braçe: Pa hekër, pa kolona, pa asgjë. Shihni si është hapur vrimë ajo aty.

    (Rama hyn vetë, tenton të hapë derën).

    Bërtet Braçe: Zoti kryeministër, është e ndaluar të hysh brenda

    Edi Rama: Më fal, ndjesë, shoku Erion…

  • 13:29

    REPLIKAT/ ‘O Zemër, ta sjell doktorin në dhomë, eja në hotel, Rama grindet me banorët në Bubq, akuzat: Kemi 3 ditë jashtë o lali

    Kryeministri Edi Rama ka parë nga afër dëmet në fshatin Bubq në Krujë. Gjatë takimeve me banorët, ata i janë ankuar kryeministrit për mungesën e çadrave dhe vëmendjes për ta.

    Replikat e plota:

    Banori: O ti lali, kemi 3 ditë jashtë ne.

    Rama: Ne jemi këtu

    Banorja 2: Zoti kryeministër shkoj e vij në spital, na duhet çadër

    Rama: O zemër, o zemër, ti edhe të jesh si kokrra e mollës, duhet të jesh brenda. Eja pra në hotel, nëse je në shtëpi dhe s’ke punë, eja të sjell doktorin unë tek dhoma.

    Banorja 2: Në hotel s’vij dot

    Banori 3: Zoti kryeministër, këlyshët e tu prishin gjithçka

    Rama: Jo jo, më dëgjo pak

    Banori 3: Ata, ata këlyshë e kanë fajin, se nuk të lenë ty të punosh, se ti je adapt për atë punë

    Rama: Kam dy djem, një 30 një të vogël, ke ndonjë vërejtje për ta? Ata janë këlyshët e mi, s’kam këlyshë të tjerë

    Banori 3: Ata e kanë fajin, ti je adapt, s’ke ç’bën ti se ty nuk të lenë. Je adapt.

    Rama: Monstra e rrugëve mos mi hidhni mua. Ata janë përgjegjës për veten e tyre, unë kur i kap, e di vetë ç’a bëj. Mua mos më thuaj më këlyshët e mi.

  • 13:16

    Si të marrim veten pas tërmetit? Një manual për shëndetin mendor

    Foto ilustruese

    Të gjithë jemi të tronditur nga lëkundjet e tokës këto ditë. Është mëse normale dhe njerëzore që të na mbërthejë ankthi për sigurinë, tonën apo të familjes dhe të njerëzve të afërm, sidomos nëse qëndron në një zonë të prekur nga tërmeti. E po ashtu është mëse normale që të ndjehemi të frikësuar dhe shqetësuar vazhdimisht.

    Kjo është gjendja që na bashkon në këto momente, ndërsa ndasitë janë se gjithsecili ka mënyra të ndryshme sesi ta përballojnë këtë situatë. Hapi i parë, që sipas Fondacionit për Shëndetin Mendor, një fondacion neozelandez, është pranimi i ndjenjës së pasigurisë, frikës, ankthit dhe shqetësimit. Veç kësaj, përmes një broshure të shkurtër, ky fondacion jep disa këshilla ndihmëse, sidomos për shëndetin mendor të fëmijëve.

    Flisni me të miturit dhe adoleshentët për ndjenjat e tyre dhe sesi janë ndikuar nga tërmeti. Përdorni gjithmonë fjali pyetëse të shkurtëra dhe të thjeshta.

    Përgatituni për të dëgjuar e diskutuar të njëjtat detaje më shumë se një herë. Sigurohuni që fëmijët të kuptojnë se nuk është faji i tyre se përse janë të frikësuar dhe në ankth. Shpjegojuni që edhe ju, të rriturit nuk jeni në gjendje që të kuptoni pse ndodhin disa gjëra. Bëni maksimumin që të jeni mbështetës, të dashur, të thjeshtë, të qetë dhe të parashikuar.

    Inkurajojini fëmijët që të angazhohen në aktivitete e ushtrime fizike.

    Reagimet e njerëzve ndryshojnë. Dikush mund të flasë më pak dhe të përqëndrohet më shumë tek detyrat e thjeshta. Një tjetër mund të flasë më shumë. Veproni sipas mënyrës që ju vjen natyrshëm, por duke patur parasysh që të jeni sa më shumë në kontakt me të afërm, miq apo njerëz të tjerë.

    Komuniko vazhdimisht me familjarët, miqtë, fqinjët dhe kolegët. Fol me ta për mendimet dhe ndjenjat, edhe për frikën e ankthin.

    Ruaj ekuilibrin e jetës, mes nevojave personale, punës dhe detyrimeve familjare. Menaxho zotimet si normalisht, megjithëse të thuash “jo” ndonjëherë nuk ka asgjë të keqe

    Ushqehu me kujdes. Përdor një dietë të shëndetshme me ushqime që veprojnë si mburojë natyrale kundër stresit

    Ushtro sa më shumë që të jetë e mundur aktivitet fizik

    Gjej gjithmonë kohën për qetësim, duke marrë frymë thellë, apo teknika e metoda të tjera për reduktimin e ankthit dhe stresit

    Ruaj rutinën ditore, sa më shumë që të jetë e mundur, përfshirë këtu edhe fjetjen me orët e nevojshme

    Gjej diçka për t’u marrë. Kujdesu për të tjerët, ndonjëherë ndihmon për të harruar telashet tona. Të gjitha pyetjet “po sikur” janë më të lodhshme sesa të ndihmosh të tjerët. Mundohu të realizosh gjëra të vogla, që ju ndihmojnë të jeni pozitivë

    Qesh sa më shumë. Reflekto mbi gjërat e mira të jetës

    Tregohuni të duruar me veten. Nguliteni në kokë se vetëm ju e keni në dorë që të rifitoni ekuilibrin e jetës

    Reagimi fizik ndaj tërmeteve

    Truri ynë prodhon adrenalinë në situata stresi. Kjo shkakton mungesë përqëndrimi dhe gjendje ankthi. Në vetvete, ky është një paralajmërim që organizmi ynë na jep që të jemi të kujdesshëm dhe gati për të vepruar. Këto ndjenja mund të largohen, por nëse lëkundjet zgjasin mund të kërkojnë më shumë kohë. Tre këshilla:

    Mundohu të ruash rutinën
    Merr frymë ngadalë dhe me hundë
    Kujtohu se frika pritej dhe hiqni tutje paniku
    n

    Je vetëm ti?

    Jo! Ndonjëherë, kur e keni të vështirë që të dilni me miqtë dhe njerëzit e tjerë rreth jush, mendo që të flasësh me persona të tjerë të panjohur, qoftë edhe online. Dëgjo muzikë dhe fol në telefon, mbase mund të ndihmosh të tjerët. Marrë nga Gazeta Si

  • 12:37

    Shkon në 51 numri i viktimave nga tërmeti, humb jetën në spital 20-vjeçarja që i ra tulla në kokë në Kombinat (EMRI)

    Xhesika Biqiku

    Shkon në 51 numri i personave që humbën jetën nga tërmeti i 26 nëntorit. Dosja.al mëson se një vajzë e re ka humbur jetën në spitalin e Traumës, aty ku po mjekohej prej disa ditësh. Mësohet se ka humbur jetën Xhesika Biqiku, e cila ishte prej 3 ditësh në gjendje kome. 20-vjeçarja u aksidentua në momentin e tërmetit, teksa po tentonte të largohej i ra një tullë në kokë. Ngjarja ndodhi në banesën e saj në një pallat në Kombinat. Xhesika doli me familjarët e saj nga banesa pas tërmetit të fuqishëm, por teksa babai nëna dhe motra shpëtuan duke pësuar dëme më të lehta, ajo mori një goditje të fortë në kokë nga tulla që i ra nga lart. Kjo godite i dëmtoi shumë kokën. Kryefamiljari, Ilia Biqiku apelonte para kryeministrit Rama, ditën e sotme që ta niste drejt Italisë vajzën e tij, pasi kishte marrë dëmtime të rënda në tru. Vetëm 2 orë më parë ai i kërkoi mes lotësh kryeministrit Edi Rama, i cili ndodhej në Kombinat, ndihmë për ta dërguar jashtë vendit për kurim vajzën e tij.

    Lutja para Ramës sot:

    “Kam gocën në spital, në reanimacion. Tani po rrinë doktorët, italiani dhe shqiptari, faleminderit shumë, po u përmend një çikë, thonë italianët, direkt ne do ta çojmë në Itali. Kam gocën e madhe, Sabinën, jashtë rrezikut është sakatu (qan). Po ashtu fol ndonjë llaf të mirë të ma çojnë gocën jashtë, të mbushë 20 vjeçe”, tha i ati i Xhesikës mes lotësh.

    Rrëfimi dy ditë më parë për Report Tv:

    “Tullat zunë gruan të parën, pastaj çunin, pastaj Xhesin. Xhesi do të kishte shpëtuar nëse unë nuk do të isha penguar. Unë u pengova aty dhe rashë nga tre metër larg. Aty tullat i kishin rënë gocës në kokë. Kur kthehem i thërras gruas thashë nuk cohem më kanë rënë tullat, i them gocës tjetër, më kanë rënë tullat. I marr dalë pas pallatit, pastaj del një makinë një çift, një çun dhe goc e re më çuan në spital direkt. Xhesika ka dëmtime në kokë. Na kanë thënë se ka dëmtime në tru dhe ka çarje nga llamarina. Trurin e  ka shumë të dëmtuar thanë mjekët.”

  • 12:28

    PAMJE SHOKUESE/ 'Hape derën o të qr', qindra vetë në radhë për një copë bukë në Durrës, qytetarët të uritur zihen me njëri-tjetrin

    Në të njëjtën kohë kur kryeministri njofton se situata është në një menaxhim optimal, nga Durrësi, Dosja.al sjell pamje shokuese. Qindra qytetarë të ngelur jashtë pas tërmetit, qëndrojnë në radhë në pritje për të marrë “triskën” e tyre të ushqimit. Pamjet janë të trishta në Shqipërinë e vitit 2019, të ngjashme me ato të Shqipërisë së vitit 1991 apo 1997…

    “Hape derën o të qr, hape derën”,-dëgjohen të bërtiturat e një prej qytetarëve që ndodhen në këtë zonë të Durrësit,ndërkohë që nuk e dimë pse këta qytetarë kanë refuzuar ofertën e kryeministrit për të shkuar në hotel.

  • 11:00

    Tërmeti/ Ambasada amerikane: USAID ka nisur ekspertë për vlerësimin e dëmeve dhe banesave

    Ambasda amerikane

    Ambasada amerikane ka njoftuar këtë mëngjes se USAID ka nisur drejt Shqipërisë ekspertë do të ndihmojnë në koordinimin e ekipeve ndërkombëtare në vlerësimin e dëmeve, për të përcaktuar nëse ndërtesat dhe infrastruktura kritike në zonat e prekura janë të sigurta.

    “Si pjesë e mbështetjes së vazhdueshme të qeverisë së Shteteve të Bashkuara në përpjekjet për rimëkëmbjen pas tërmetit, USAID ka nisur dje për në Shqipëri ekipe emergjencash nga Departamenti Zjarrfikës dhe Shpëtues i kontesë Fairfax dhe Departamenti Zjarrfikës i kontesë së Los Angeles. Këta ekspertë do të ndihmojnë në koordinimin e ekipeve ndërkombëtare në vlerësimin e dëmeve, për të përcaktuar nëse ndërtesat dhe infrastruktura kritike në zonat e prekura janë të sigurta. #ShbaQendronKrahShqiperise”, thuhet në njoftimin e ambasadës.

  • 11:00

    Tërmeti/ Ministria e Shëndetësisë: 913 të lënduar, 34 pacientë të shtuar tek spitali i Traumës

    Ministria e Shëndetësisë ka dhënë sot informacion për nurmin e personat të lënduar nga tërmeti i 26 nëntorit, i cili shkaktoi 50 viktima.  Në njoftim theksohet se numri i të plagosurve ka shkuar në 913. “Ndërsa mbi 700 persona kanë marrë shërbimin mjekësor pranë kampit të emergjencës në Thumanë dhe pikave të ngritur në Durrës. Me ekipet e ngritura në terren është siguruar pajisja me medikamente për të sëmurët kronikë.  Të gjitha spitalet dhe qendrat shëndetësore pranë zonave të prekura nga tërmeti vijojnë të jenë në gatishmëri të përforcuar.”, thuhet në njoftim.

    Njoftimi:

    Gjatë 24 orëve të fundit në Spitalin e Traumës janë paraqitur 13 qytetarë me lëndime të lehta dhe aktualisht 34 pacientë janë të shtruar në këtë spital si pasojë e lëndimeve nga tërmeti. Gjendja e të lënduarve paraqitet e mirë, me përjashtim të një vajze në gjendje të rëndë, e cila sipas mjekëve nuk mund të transferohet jashtë vendit. Ndërsa tre pacientë janë transferuar në Itali për një trajtim më të specializuar. Në spitalin e Durrësit aktualisht po marrin trajtim vetëm tre pacientë, në gjendje të stabilizuar. Janë 913 të lënduar si pasojë e tërmetit që kanë marrë trajtim në spitale. Përpos qytetarëve që po marrin trajtim në spitale, janë rreth 1500 vizita mjekësore të kryera për banorët e prekur nga tërmeti në qendrat shëndetësore 24/7 të hapura pranë zonave të prekura. Ndërsa mbi 700 persona kanë marrë shërbimin mjekësor pranë kampit të emergjencës në Thumanë dhe pikave të ngritur në Durrës. Me ekipet e ngritura në terren është siguruar pajisja me medikamente për të sëmurët kronikë. Të gjitha spitalet dhe qendrat shëndetësore pranë zonave të prekura nga tërmeti vijojnë të jenë në gatishmëri të përforcuar.

  • 11:00

    Ministria e Mbrojtjes: Kërkimet në Thumanë dhe Durrës kanë përfunduar, humbën jetën 50 persona

    Foto nga tërmeti.

    Për tërmetin e 26 nëntorit që goditi vendin dhe shkaktoi 50 viktima Ministria e Mbrojtjes ka dhënë shifrat zyrtare për këtë tragjedi.

    Njoftohet se pati 50 viktima dhe se me kërkimet e fundit në Mira Mare nuk është gjetur asnjë viktimë. Theksohet se kërkimet në terren kanë përfunduar.

    “Zyrtarisht operacioni i kerkim shpetimit ne zonat Durres e Thumane, me te demtuarat nga termeti i 26 nentorit ka perfunduar. Ne 3 dite u nxorren nga rrenojat 50 viktima, permes operacionit ku moren pjese rreth 250 efektive te kerkim shpetimit nga Shqiperia, Kosova, Italia, Greqia, Mali i zi, Serbia, Kroacia, Franca, Turqia, Zvicra, Rumania, Maqedonian e Veriut, BE, Shtetet e Bashkuara te Amerikes etj. Po behen saktesimet e fundit te gjeneraliteteve te viktimave permes familjareve te tyre per te dale me pas me listen perfundimtare emerore. Lidhur me kerkimet e fundit ne MiraMare nuk eshte gjetur asnje trup. Pas kerkim shpetimit ne terren, eksperte shqiptar e vendas nisin punen per verifikimet e demeve ne terren.”, thuhet nga ministria.

Shto Koment