Aktualitet

Përcillet mes lotëve në banesën e fundit babai i tre fëmijëve, ditë zie kombëtare për major Tanushin

Major Klodian Tanushi është përcjellë sot mes lotëve për në banesën e fundit. Majori u plagos për vdekje më 6 maj dhe humbi jetën katër ditë më pas në spital. Në nder të ushtarakut u mbajtën homazhe tek Muzeu Kombëtar dhe iu akordua titulli “Dëshmor”. Të përlotur gjatë ceremonisë së lamtumirës ishin edhe Rama, Xhaçka e Lleshaj.
Përditësuar:

TIRANË– Mes lotëve dhe dhimbjes është përcjellë për në banesën e fundit, babai i tre fëmijëve, major Klodian Tanushi.

Në nder të tij tek ambientet e Muzeut Kombëtar u zhvillua ceremonia e lamtumirës ku të pranishëm ishin edhe tre fëmijët e mitur, përfshirë edhe vajzën 1 vjeçe e gjysmë.

Gjatë homazheve një fjalim të shkurtër mbajtën gjenerali i FA-ve, Bardhyl Kollçaku, ministrja e Mbrojtjes Olta Xhaçka dhe kryeministri Edi Rama. Të gjithë të prekur dhe me lot në sy premtuan para arkëmortit të majorit se do të kujdeseshin për familjen e tij, veçanërisht për fëmijët.

Menjëherë pas përfundimit të ceremonisë shtetërore, arkivoli me trupin e major Tanushit u vendos në shtrat topi dhe u përcoll në Varrezat e Dëshmorëve.

Pas apelit të fundit, Garda palosi edhe flamurin kuqezi me të cilin ishte mbështjellë për herë të fundit arkëmorti i majorit që humbi jetën pas shpërthimit në Letoni.

Duke falenderuar për nderimet ushtrakun që i solli flamurin dhe kapelen e të birit, babai i major Tanushit i mori dhe i puthi.

Nën muzikë funebre, arkivoli i Dëshmorit Klodian Tanushi u përcoll për në banesën e fundit, ku ritet e fundit mortore ia kreu myftiu i Tiranës, Ylli Gurra.

 

 

 

 

Në nder të komandantit të kontigjentit shqiptar në Letoni sot është shpallur ditë zie kombëtare. Në të gjitha institucionet publike e private, flamuri kombëtar do të ulet në gjysmështizë.

Major Klodian Tanushi u plagos më 6 maj në Letoni gjatë një stërvitjeje në Camo Adazi në Letoni. Nga shpërthimi i një bombe, humbi jetën nëntetarja Zarife Hasanaj, dhe përveç majorit Tanushi u plagos edhe nëntetari Julian Kapaj.

Tanushi ndërroi jetë në spital, më datë 10 maj ndërkohë që trupi i nëntetares Hasanaj përcollej për në banesën e fundit, në “Varrezat e Dëshmorëve.”

(k.m & a.s/dosja.al)

  • 13:59

    Momenti kur babai i major Tanushit merr flamurin dhe kapelen e të birit

    Pas apelit të fundit, babai i major Klodian Tanushit ka marrë flamurin kuqezi me të cilin ishte mbështjellë edhe arkëmorti. 

    Mbi flamur ishte vendosur edhe kapela e majorit që humbi jetën në Letoni. 

    Pas dorëzimit, babai i tij mori flamurin duke falendruar edhe ushtarakun që e solli për gjithë nderimet. 

  • 13:47

    'Varrezat e D⌂shmorëve'/ Mbërrin në banesën e fundit arkëmorti i major Tanushit

    Mbërrin tek “Varrezat e Dëshmorëve” arkëmorti i major Klodian Tanushit, i cili u nda nga jeta më 10 maj pas një shpërthimi në Letoni. 

  • 13:12

    Gjenerali i premton major Tanushit se do kujdesej për fëmijët, djali 11-vjeçar shkrehet në vaj

    Gjatë fjalës së gjeneralit Bardhyl Kollçaku, djali 11-vjeçar është shkrehur në lot. 

    Gjenerali i premtoi major Klodian Tanushit se do të kujdesej për tre fëmijët e tij dhe për familjen. 

    Djali i major Klodian Tanushit
  • 13:01

    I puth dorën djalit të Tanushit, momenti prekës kur rreshteri i plagosur Julian Kapaj vjen në ceremoni (FOTO)

    Momente prekëse vijnë nga Muzeu Historik Kombëtar, aty ku personalitete, miq, e të afërm u mblodhën për të respektuar figurën e majorit të vrarë në Letoni, Klodian Tanushi. Një moment prekës nga kjo ceremoni, ishte edhe pjesëmarrja e rreshterit të plagosur, Julian Kapaj.

    Kapaj i puthi dorën djalit të vogël dhe u përkul mbi arkivolin e shokut të tij. Me një patericë, dhe babain që e shoqëronte, Julian Kapaj nuk i mbajti dot lotët.

    Julian Kapaj, është rreshteri i tretë që fatmirësisht shpëtoi gjatë shpërthimit të minave në Letoni.

  • 12:50

    "Do puthte dorën e nënës, do përkëdhelte kokën e fëmijëve", Rama preket për Klodian Tanushi: Flamuri kombëtar sot mbështjell një hero

    Kryeministri Edi Rama

    Kryeministri Edi Rama është prekur sot sërish në ceremoninë për nderimin e major Klodian Tanushit. Rama tha se ai kishte një mision fisnik, por nuk u kthye siç familja do të donte, por si nje hero i mbështjellë nga flamuri kombëtar.

    Pjesë nga fjala e Ramës

    Flamuri kombëtar sërish sot ka mbështjellë një hero. Major Tanushi kishte një detyrë të vështirë. Misioni i Major Tanushit, jetëshpëtues. Ishte një njeri i përkushtuar dhe fisnik dhe tejet i respektuar. I kuptoj lotët për shefin e shtabit, apo zërin e dridhur të ministres. Për shumë pak kohë ai do të kthehej në atdhe sërish dhe do të përkëdhelte fëmijët, do të puthte dorën e nënës, do të ishte krenari për babain. Por u kthye i mbështjellë me flamurin kuqezi, jo për të shkuar në shtëpi, por për t’u bashkuar në banesën e fundit, aty ku kombi ka mbledhur të gjithë ata që dhanë jetën për të. Duke njohur familjet e dy dëshmorëve, nuk është e vështirë të kuptohet se dinjiteti dhe pasioni për t’i shërbyer atdheut në këtë vijë shumë të hollë mes jetës dhe vdekjes është edhe trashgimi brezash, është edhe kultivim vlerash familjare. 

  • 12:43

    Me zërin e dridhur dhe me sytë me lot, Xhaçka: Shpresohet se majori do t'ja dilte mbanë

    Ministrja Olta Xhaçka

    Ministrja e Mbrojtjes, Olta Xhaçka e përlotur ka mbajtur një fjalim në nder të majorit Klodian Tanushit, i cili u nda nga jeta më 10 maj.

    “Më 6 maj humbëm nëntetaren Zarife Hasanaj. Fatkeqsisht pak ditë më pas dhimbja na u shtua përsëri. Vdekja e Major Tanushi është aq e rëndë sa vështirë të gjesh fjalët e duhurua për të ngushëlluar. Në këtë dhimbje jemi pranë familjarëve dhe tre fëmijëve të saj me premtimin se ata do të kenë gjithmonë mbështetjen tonë. Shpresoja se do t’ja dilte mbanë. Ai nuk ia doli duke na dhënë një boshllëk të madh. Është e vështirë që këtë dhimbje ta përshkruash me fjalë. Tanushi zgjodhi t’i shërbente atdheut atje ku rreziku përgjon çdo hap dhe çdo sekond. Ai e përmbushi me nder duke sakrifikuar edhe jetën e tij. Jeta jote ishte një luftë betejën me të cilën nuk e fitove por fitove atë me përjetësinë. Prehu në paqe heroi ynë.”

  • 12:36

    "Më shpn shpirti nga dhimbja", mesazhi prekës i Gjeneral Kollçakut: Major Klodi, do na mungojë zëri yt

    Bardhyl Kollçaku, gjeneral i FA

    Gjeneral Bardhyl Kollçaku ka lëshuar një mesazh prekës në ceremoninë e homazheve që është zhvilluar tek Muzeu Historik Kombëtar.

    Pjesë nga fjala e Gjeneralit

    Ti Klodian do mbetesh krenaria dhe nderi i këtij vendi. Shqipëria shënon, dëgjon dhe nuk harron. Vepra e dëshmorëve, është amaneti ynë. Asgjë s’mund të kalojë dhembjen tuaj. Më shpon shpirti për atë që po kaloni. Është ndjenja e të gjithëve, por duhet të bëhemi të fortë. T’i gjendemi pranë fëmijëve dhe gruas. Klodiani sakrifikoi për ta. Nuk do t’ju lemë vetëm. I dimë rreziqet dhe vështirësitë, në emër të së ardhmes së fëmijëve tuaj, dhe Shqipërisë do të jemi gjithnjë gati. Klodi, do të na marrë malli për zërin tënd, shërbimi yt do të mbetet i shenjtë. Po të përcjellim pranë martirëve, tek të pavdekshmit e kësaj toke. 

  • 10:52

    Në ceremoninë e homazheve edhe ministri Sandër Lleshaj (FOTO)

    Sandër Lleshaj, ministër i Brendshëm

    Ministri i Brendshëm, Sandër Lleshaj ka marrë pjesë në ceremoninë e homazheve që po zhvillohet për major Klodian Tanushin tek Muzeu Kombëtar.

    Lleshaj ka takuar familjarët e Tanushit, të cilëve iu ka shprehur ngushëllimet më të thella, si edhe ka vendosur kurorë me lule në arkivolin e Dëshmorit të Atdheut.

  • 10:31

    Fotoja prekëse/ Dy djemtë e major Tanushit pranë arkivolit të major Tanushit, i japin lamtumirën të atit

    Në ceremoninë e lamtumirës së major Klodian Tanushit, të pranishëm janë edhe tre fëmijët e tij të mitur. 

    Një foto është shkrepur në momentin kur dy djemtë e tij, 14 dhe 11 vjeç janë afruar pranë arkëmortit. 

    Dy djemtë e major Tanushit
  • 10:31

    Ceremonia e lamtumirës për major Tanushin, presidenti Meta kryen nderimet e fundit

    Presidenti Ilir Meta ka marrë pjesë në ceremoninë e lamtumirës së major Klodian Tanushit, i cili do të përcillet sot për në banesën e fundit. 

    Meta takoi familjarët dhe i kreu nderimet e fundit majorit të rënë në Riga të Letonisë. 

    Presidenti Ilir Meta
  • 10:09

    E dhimbshme! Tre fëmijët përcjellin në banesën e fundit major Tanushin (Foto)

    TIRANË– Të pranishëm në homazhet për major Klodian Tanushin janë edhe tre fëmijët e tij. 

    Dy djemtë, 14 dhe 11 vjeçarë, po ashtu edhe vajza 1 vjeç e gjysmë, e cila mbahet në krahë nga e ëma. 

  • 9:59

    'Kapela e vendosur mbi arkivol'/Nisin homazhet për major Tanushin

    TIRANË– Nisin homazhet për major Klodian Tanushin, i cili humbi jetën pas një shpërthimi të ndodhur në Letoni. 

    Të pranishëm në ceremioni janë familjarë, të afërm dhe kolegë, të cilët janë mbledhur për t’i dhënë lamtumirën e fundit. 

    Në nder të komandantit të kontigjentit shqiptar në Letoni sot është shpallur ditë zie kombëtare. Në të gjitha institucionet publike e private, flamuri kombëtar do të ulet në gjysmështizë.

Shto Koment