Bota

Gjyqi/ Prokurori "piketon" Hashim Thaçin: Erdhi fshehurazi në Hagë mohoi rolin e tij gjatë luftës, çfarë donte të fshihte?

Prokurori pretendon se provat e tyre do të dëshmojnë se Thaçi ka gënjyer dhe i ka mohuar deklaratat e dhëna duke ngritur pikëpyetje.  

3 Prill 2023, 11:18 Nga k.m.
Gjyqi/ Prokurori "piketon" Hashim Thaçin: Erdhi fshehurazi
Hashim Thaçi dhe Alex Whiting

HAGË- Ish-presidenti Hashim Thaçi është piketuar nga prokurori Alex Whiting teksa ende po zhvillohet gjyqi në Hagë. Sot, në fjalën e tij, Whiting tha se Thaçi në disa intervista para ZPS-së në Hagë kishte mohuar rolin e tij në luftë dhe rolin e Shtabit të Përgjithshëm të UÇK-së.

“Hashim Thaçi erdhi disa herë fshehurazi në Hagë për t’ju dhënë prokurorëve intervistë të zgjatur dhe të video-incizuar. Gjatë këtyre intervistave, mes një sërë pranimesh të rëndësishme, ai mohoi shumëçka lidhur me rolin e tij gjatë luftës dhe lidhur me rolin e Shtabit të Përgjithshëm. Për shembull, z. Thaçi pretendoi se Shtabi i Përgjithshëm nuk kishte asnjë funksion deri në nëntor të ’98-ës dhe edhe pas kësaj date, ekzistonte vetëm në letër,”- tha ai.

Prokurori pretendon se provat e tyre do të dëshmojnë se Thaçi ka gënjyer dhe i ka mohuar deklaratat e dhëna duke ngritur pikëpyetje.  

“Provat që do të paraqiten në këtë gjykim, të nderuar gjykatës, do të tregojnë se këto pretendime ishin të rreme. Ato bien ndesh edhe me vetë deklaratat që z. Thaçi i ka dhënë herë të tjera, me deklaratat që kanë dhënë disa prej të akuzuarve dhe nga provat e shumta që do të paraqiten në këtë gjykim. Ndërkohë që do të dëgjoni provat e paraqitura gjatë këtij gjykimi, të nderuar gjykatës, ju sugjeroj t’ia bëni vetes këtë pyetje: përse z. Thaçi erdhi këtu në Hagë dhe i bëri këto pretendime të rreme sa i takon rolit të tij gjatë luftës dhe lidhur me UÇK-në? Nga çfarë donte të largohej? Çfarë po përpiqej të fshihte? Në fund, gjykimi që po fillon sot, do t’u japë përgjigje këtyre pyetjeve,”-shtoi ai. 

kosova ne hage

Sondazh

Poll

MË SHUMË