Aktualitet

522 mijë euro në autobus, burg për Elidon Çelën, lirohen punonjësit, dëshmia: Pushtetarët vjedhin e lirohen! I kam të pastra

Para togave të zeza, i riu ka rrëfyer se askush nuk kishte dijeni për paratë që ai kishte në autobus, pasi kishte frikë se mund t'ia grabisnin. Çela tha se me ato para do të merrte toka me qira dhe do të investonte në mbjelljen e grurit, pasi kishte blerë dhe farën në Itali.

25 Tetor 2022, 10:01 Nga F.M
522 mijë euro në autobus, burg për Elidon Çelën,
Elidon Çela

DURRËS- Elidon Çela, pronari dhe drejtuesi i autobusit të kompanisë së transportit "Buon Aventura" që u kap me 522 mijë euro të padeklaruara në mjet është lënë në masën e sigurisë ‘arrest me burg’. Ai ka dalë para trupit gjykues ditën e sotme bashkë me dy ndihmësit e tij, Dritan Kamberi e Anold Cankja, të cilët u liruan dhe u lanë në masën ‘detyrim paraqitjeje’.

I pyetur në lidhje me paratë, Çela është shprehur se ka biznes të rregullt dhe se eurot ishin kursime të familjes preh 26 vitesh. Çela tha se me ato para do të merrte toka me qira dhe do të investonte në mbjelljen e grurit, pasi kishte blerë dhe farën në Itali, por nuk i ka kursyer akuzat. Teksa ndodhej në 'kafaz', Çela pretendoi se paratë e tij janë të pastra dhe e krahasoi situatën me shumë persona të tjerë që inkriminohen, por vijojnë të jenë të lirë. Ai madje tha se ka pushtetarë në vend që kanë miliona euro nga korrupsioni e krimi, por nuk burgosen. 

"Mallrat janë të emigrantëve që jetojnë në Itali, i deklarova në doganën e Barit. Askush nuk e dinte për paratë që kisha në autobus, kisha frikën e një grabitjeje të mundshme. Paratë janë kursimet e familjes time prej 26 vitesh, do investoja në toka që do merrja me qira për biznes. Ka pushtetarë që ia vjedhin shtetit 4 milion euro dhe lëvizin të lirë, ndërsa unë në burg me paratë e mia,"- tha Çela.

Avokati i Çelës, Gramoz Lika tha se ky vendim do të ankimohet në Gjykatën e Apelit. Çela u arrestua në Portin e Durrësit, teksa kthehej nga Bari i Italisë. Atij iu gjetën 522 mijë euro në tavanin e autobusit të mbushur dhe me mallra kontrabandë.

 

elidon cela 522 mije euro ne durres

Sondazh

Poll

MË SHUMË