Kulture

Arti shqiptar në zi, ndahet nga jeta regjisori Gjergj Xhuvani

Regjisori Gjergj Xhuvani është ndarë nga jeta në moshën 56-vjeçare. Xhuvani vuante nga një sëmundje e rëndë.
Featured image of article: Arti shqiptar në zi, ndahet nga jeta regjisori Gjergj Xhuvani
Përditësuar:

ITALI– Arti shqiptar në zi, ndahet nga jeta në moshën 56- vjeçare regjisori Gjergj Xhuvani.

Xhuvani vuante nga një sëmundje e rëndë dhe kishte shkuar në një klinikë në Romë për t’u kuruar, aty ku humbi edhe jetën.

Gjergj Xhuvani është i njohur si regjisor, skenarist dhe producent shqiptar. Ai lindi në vitin 1963 në Tiranë.

Në vitin 1986 u diplomua në Akademinë e Arteve në Tiranë dega Artet dramatike. Që nga viti 1986 deri në vitin 1990, ai punoi si asistent regjisor në shumë filma dhe në vitin 1991 realizoi filmin e tij të parë “Bardhë e zi”.

Ndër filmat e tij më të spikatur përmendim: I dashur armik – (2004); Parullat -(2001) apo edhe Hije që mbeten pas – (1985). Zhuvani qe i pari që mundi të çojë Shqipërinë në Kanë përmes filmit “Parrullat” në vitin 2001.

Po ashtu ai ka interpretuar si aktor në “Edhe ne luftuam” dhe “Hije që mbeten pas”. Ndërkohë që para se të ndahej nga jeta, Xhuvani po punonte për realizimin e fundit “Liqeni im”.

E pandarë me të ishte edhe aktorja Luiza Xhuvani, e cila ka marrë pjesë në shumë prej filmave të tij në shumë role kryesore.

(k.m/dosja.al)

  • 19:19

    Ardit Gjebrea i prekur për vdekjen e regjisorit Xhuvani: Iku pa kthim dhe më trishton. Paqe për ty!

    Kantautori dhe moderatori Ardit Gjebrea ka reaguar pas ndarjes nga jeta të regjisorit të njohur Gjergj Xhuvani.

    Me anë të një postimi në rrjetet e tij sociale, Gjebrea shkruan se e ka marrë vesh me trishtim lajmin për shokun e tij të Universitetit.

    “Trishtim! Gjergj Xhuvani, mik që tek Artet studentë bashkë, admirim i mëpasshëm për suksesin dhe talentin, mëndjen dhe unicitetin e tij – iku… Është ajo ikja pa kthim që të trishton! Paqe për ty, artist i papërsëritshëm si ty”,-shkruan moderatori.

  • 19:19

    Rama i pikëlluar për ndarjen nga jeta të regjizorit Xhuvani: U deshën minuta të tëra ta besoja

    Edi Rama

    Kryeministri Edi Rama ka reaguar lidhur me ndarjen nga jeta të regjisorit të njohur Gjergj Xhuvani.

    Me anë të një postimi në rrjtet e tij sociale, Rama shkruan i ishin dashur disa minuta që të besonte se regjisori ishte ndarë nga jeta.

    “O Zot! U deshën minuta të tëra ta besoja se ishte i vërtetë lajmi i humbjes së Gjergjit. Sa shumē gjëra për të thënë e sa pak fjalë mblidhen bashkë në këtë moment… Miku i shtrenjtë dhe i mirë qysh nga kohët më të vjetra, regjizori Gjergj Xhuvani, nuk i çeli më sytë, pasi mbrëmë përfundoi në Romë, filmin e tij të ri. S’kam fjalë…”-shkruan kryeministri.

  • 18:26

    “Do iki të bëj filmin”, si e gënjeu regjisori i ndjerë Xhuvani familjen, gunga në këmbë që e çoi drejt Italisë

    Familja Xhuvani

    Regjisori i ndjerë Gjergj Xhuvani që ndërroi jetë mesditën e sotme e kishte mbajtur të fshehtë gjendjen shëndetësore nga familja e tij. Ai ishte nisur vërtet drejt shtetit fqinj për të xhiruar filmin e ri ‘Liqeni im’, një bashkëproduksion italiano-shqiptar.

    Xhuvani qëndroi në Itali edhe dy ditë më tepër pas përfundimit të xhirimeve të filmit. Regjisorin kishte filluar ta shqetësonte një gungë në këmbë dhe nuk i kishte treguar asgjë familjes së tij.

    Gunga nuk e lejonte të mbante protezën që Gjergj Xhuvani kishte prej kohësh, pasi regjisorit i mungonte një këmbë. Familaj e tij është njoftuar ndërkohë që ishin nisur nga pushimet në Sarandë drejt Tiranës.

    Ata ishin përgatitur për të pritur familjarin e tyre në aeroport, që duhet të mbërrinte rreth orës 22:30 të mbrëmjes së sotme. Por fatkeqësisht në vend të Gjergjit familja mori lajmin e kobshëm për vdekjen e tij.

  • 17:56

    Konstandin Xhuvani kërkon lirinë, pas vdekjes të së atit i dërgon letër drejtorisë së Burgjeve

    Djali i regjisorit Gjergj Xhuvani, Kostandini i dënuar për vrasjen e katër personave ka kërkuar leje për të marrë pjesë në varrimin e të atit.

    Kërkesa për të dalë nga qelia në ditën e varrimit të të atit është dërguar menjëherë për në Drejtorinë e Përgjithshme të Burgjeve.

    Ende nuk dihet nëse atij do t’i aprovohet kërkesa për shkak të dënimit të tij. Në raste të tilla, i dënuari shoqërohet nga forca policore dhe pas disa orësh rikthehen në qeli për të shlyer dënimin.

  • 16:59

    U nisën me urgjencë drejt Tiranës, si e morën vesh lajmin për vdekjen e Xhuvanit gruaja dhe vajza

    Gjergj dhe Luiza Xhuvani

    Ditën e sotme u nda nga jeta në moshën 56 vjeçare regjisori i njohur Gjergj Xhuvani.

    Burime për Dosja.al bëjnë me dije gruaja e tij Luiza Xhuvani së bashku me vajzën kanë qenë në bregdetin në Dhërmi.

    Me urgjencë nënë e bijë janë nisur drejt Tiranës për t’u marrë menjëherë me proceduarat.

  • 16:10

    Humbja e regjisor Xhuvanit, Meta: Na la pas një trashëgimi të jashtëzakonshme

    Ilir Meta

    Presidenti Ilir Meta ka reaguar lidhur me vdekjen e regjisorit Gjergj Xhuvani.

    Në rrjetet e tij sociale, Meta shkruan se ikja e parakohshme e Xhuvani është një humbje e madhe për artin dhe kinematografinë shqiptare.

    “Gjergj Xhuvani na la pas një trashëgimi të jashtëzakonshme artistike, që nderohet me respekt nga të gjithë e do të mbahet mend gjithmonë. I përjetshëm kujtimi i Tij!,”-shkruan Meta.

    Postimi i plotë:

  • 16:07

    ‘Mos më largoni nga familja’, si kërkoi Konstandin Xhuvani të ishte pranë të atit, letra që i dërgoi ministres Gjonaj

    Kostandin Xhuvani

    TIRANË– Ditën e sotme regjisori Gjergj Xhuvani u nda nga jeta në një klinikë në Itali për shkak të një sëmundjeje të rëndë. 

    Për gjendjen e të atit ishte në dijeni edhe i biri, Konstandini, i cili ndodhet në burgun e Fushë-Krujës pasi është dënuar për një vrasje të katërfishtë.

    Vetëm pak ditë më parë, Konstandini i dërgoi një letër Ministres së Drejtësisë, Etilda Gjonajt, ku edhe i kërkonte që të mos e largonte nga burgu i Fushë-Krujës.

    Kjo pasi ishte vendosur transferimi i tyre në burgun e Peqinit ose në atë të Korçës, gjë që ka revoltuar të dënuarit.  

    “Duke qenë se transferimi jonë në Peqin dhe Korçë do të krijonte një distancë të madhe me familjarët dhe rrethin tonë shoqëror, një ngarkesë më të madhe ekonomike dhe një shkëputje nga programet trajnuese të organizatave jo-fitimprurëse, transferimi jonë do të binte në kundërshti të plotë me interesat e shoqërisë për riedukimin dhe rehabilitimin tonë”.

    Në vitin 2014, Konstandin Xhuvani u dënua me 35 vjet burg pasi më 4 nëntor të po atij viti vrau në lokalin e natës në rrugën e Elbasanit në kryeqytet shtetasit Enea Xhaja, Edison Jaho, italianin Gimapaolo Azzolo si dhe shokun e tij Arbër Demiraj.

    Mbetet për t’u parë nëse Xhuvani do të mund të marrë leje që të dalë nga burgu ditën e varrimit të të atit.

    (k.m/dosja.al)

Shto Koment