Politike

"Rama ka rënë në rrjetë"/ Bardhi nxjerr pjesë nga dosja e AKSH-it: Agasi përfitoi 30.2 mln euro me 1 tender sekret

Me anë të një postimi në Facebook, Bardhi shkruan se në këtë dosje, dallohen përgjimet, ku Agasi i drejtohet Ramës si 'Kapo'.

21 Dhjetor 2025, 20:18 Nga I.A
"Rama ka rënë në rrjetë"/ Bardhi nxjerr pjesë
Gazment Bardhi

TIRANË- Kreu i Grupit Parlamentar të PD-së Gazment Bardhi ka publikuar sot një pjesë nga dosja hetimore e AKSH-it. Me anë të një postimi në Facebook, Bardhi shkruan se në këtë dosje, dallohen përgjimet, ku Agasi i drejtohet Ramës si 'Kapo'. 

Bardhi shkruan se për një periudhë prej 9 muajsh, Ergys Agasi ka përfituar 30.2 milion euro nga tenderat e AKSH-it. Në fund, Bardhi shkruan se Rama bashkë me grupin kriminal ka kryer një gjenocid ndaj Buxhetit të Shtetit.  

Postimi i plotë:

Nga “Palloshi i gjatë” i Belinda Ballukut, tek “Kapo” i Ergys Agasit! Edi Rama ka rënë në rrjetë dhe është në hall të madh. Largimi i tij i menjëhershëm është shpëtimi i vetëm për Shqipërinë dhe shqiptarët. Ai ka kryer genocid ndaj Buxhetit të Shtetit dhe parave të qytetarëve shqiptarë!

Dosja e AKSHI-t provon se skema korruptive e ndjekur është identike me atë që kemi parë edhe në çështjet e tjera. Paracaktim i kritereve, paracaktimi i fitueseve, dyfishimi i fondit limit, ndarja e parave mes kompanisë fituese dhe autoritetit që përcakton fituesin. Sepse korrupsioni nuk është një akt i izoluar i Belinda Ballukut apo dikujt tjetër, por skemë qeverisjeje e Edi Ramës.

Logjika që ndiqet është se, nëse shërbimi kushton 2 milion, fondi limit bëhet 4 milion. Pra, taksa e korrupsionit merret po nga paratë e Buxhetit të Shtetit, jo nga vlera e fitimit të kompanive private.

Sipas SPAK-ut vetëm për 9 muaj, për periudhën 11.12.2024-26.9.2025, përmes kësaj skeme, vetëm nga fondet e AKSHI-t, Ergys Agasi, krahu i djathtë i lidhjeve me krimin e organizuar i Edi Ramës, ka përfituar plot 30.2 milion euro. Po po, 30.2 milion euro për 9 muaj ka përfituar taksë korrupsioni vetëm nga AKSHI, për një tender sekret që fondin limit ia kanë caktuar 60 milion euro.

Kjo nuk është vjedhje! Ky është genocid ndaj Buxhetit të Shtetit. Prandaj nuk kanë fonde për të rritur pensionet dhe pagat. Prandaj nuk kanë fonde për t’u dhënë punonjësve të shtetit shpërblim për fundvit, prandaj s’kanë fonde për të ndihmuar njerëzit në nevojë.

Këta nuk janë Qeveri. Këta janë një bandë që ka marrë peng vendin përmes një Kryeministri të korruptuar dhe të lidhur me krimin e organizuar, që ndryshe nga Belinda Balluku që e quante “Palloshi i gjatë”, Ergys Agasi e respektonte dhe e quante “Kapo”! Prandaj, ka nisur pengimin e drejtësisë, sepse e ka kuptuar që ka rënë në rrjetën e drejtësisë, në mos si “Palloshi i gjatë”, ka rënë si “Kapo”!

gazment bardhi ergys agasi

Sondazh

Poll

MË SHUMË