Politike

VD-Meta ia nxjerr të gjitha Bashës: Kishte frikë nga dhuna, do të ndodhte hataja

22 Nëntor 2021, 16:45 Nga DOSJA

VD-Meta ia nxjerr të gjitha Bashës: Kishte frikë nga dhuna, do

TIRANË– Presidenti Ilir Meta ka bërë me dije prapaskena nga takimi që ka bërë me kryedemokratin Lulzim Basha në Gjermani, duke u shprehur se numri një i opozitës ishte i tmerruar nga protesta e 8 qershorit dhe nga përgjegjësitë ligjore që do të duhej të mbante. Gjatë një konference për shtyp, Meta tha se ai kishte anuluar datën e zgjedhjeve duke mos u konsultuar as me kryeparlamentarin, asokohe Gramoz Ruçi dhe as me kryeministrin Edi Rama. Po ashtu, Meta tha se shqetësimi i Bashës se në vend do të ndodhte “hataja”, e kishin trazuar edhe vetë atë, duke e ndikuar për të ndërmarrë aktin e anulimit të zgjedhjeve lokale të vitit 2019.

“Sipas Bashës, protesta që vetë Basha kishte organizuar do të degradonte në dhunë dhe se nuk e kontrollonte dot popullin opozitar. I trembur dhe i panikosur para popullit opozitar, duke i premtuar se në 8 qeshor do të ndodhte hataja dhe i frikësuar nga përgjegjësitë ligjore Basha iu ul në gjunjë presidentit duke iu lutur që të anulonte dhe të shtynte zgjedhjet e 30 qershorit. Meta anuloi datën e zgjedhjeve duke marrë përgjegjësi, për t’i dhënë një rrugëdalje Bashës dhe aktorëve të tjerë politikë në vend. Ky vendim nuk ishte i lehtë për mua, aq më tepër pa u konsultuar nga kreu i Parlamentit. E mora në telefon, por ishte në jug të vendit. Aq më tepër me kryeministrin që s’mund të ishte i lumtur për një vendim të tillë. Ishte kulmi i lojës për ndryshimin e kufijve në Ballkan. Duke mospatur kohë por duke pasur shqetësim përderisa ai vetë që thërriste vendin në protesta, ishte vetë i shqetësuar. Të mos harrojmë që në të 7 protestat, dhjetra qytetarë e policë kishin pësuar lëndime të rënda. Meta kërkoi dialog për një datë të re. Presidenti më pas miratoi datën 13 tetor si ditë zgjedhjes,”-tha Meta ndër të tjera.