Politike

Avdullah Hoti përfundon vizitën në Tiranë, ‘merr bekimin’ e liderëve shqiptarë për vijimin e dialogut Kosovë-Serbi

VIDEO
  • Rama i prerë për dialogun me Serbinë: Kosova është shtet sovran, Vuçiç të shkojë edhe në hënë
  • Meta: Mbështes dialogun Kosovë-Serbi, të normalizohen marrëdhëniet mes dy vendeve
  • Ruçi: Të vazhdojë dialogu me Serbinë, në koordinim me partnerët strategjikë
  • Basha: Diskutuam për sfidat e Kosovës në integrimin europian dhe atlantik
  • Kryeministri i Kosovës, Avdullah Hoti ka zhvilluar sot një vizitë në Tiranë. Prej orës 10, Hoti ka takuar Ramën, Ruçin, Metën, Bashën dhe Veliajn. Gjatë takimeve intensive Kryeministri i Kosovës është shtyrë për vijimin e dialogut me Serbinë. Kreu i Qeverisë së Kosovës prezantoi tre planet ekonomike, mes tyre ndërtimi i një HEC-i dhe një hekurudhe. Rama në konferencën për mediat u tregua i ashpër me ndërkombëtarët dhe Vuçiçin, kërkoi njohjen e Kosovës dhe liberalizimin e vizave.
    Featured image of article: Avdullah Hoti përfundon vizitën në Tiranë, ‘merr bekimin’ e liderëve shqiptarë për vijimin e dialogut Kosovë-Serbi Avdullah Hoti dhe takimet me zyrtarët në Shqipëri
    Përditësuar:

    TIRANË– Kryeministri i Kosovës, Avdullah Hoti ka zhvilluar sot një vizitë zyrtare në Tiranë. Fillimisht Hoti është takuar me homologun e tij, Edi Rama me të cilën mbajti edhe një konferencë për shtyp; ku paraqiti edhe tre projektet madhore për bashkimin e mëtejshëm të dy vendeve. Hoti bëri me dije se ka nisur puna për unifikimin e dokumentacionit për portin e Durrësit.

    Së shpejti të gjithë shqiptarët e Kosovës nuk do të duhet që t’u drejtohen për dokumentacion edhe institucioneve shqiptare pasi të gjithë do të jenë të unifikuara. Më tej Hoti ka shprehur ambicjen për ndërtimin e një HEC-i në Shqipëri, energjia e prodhuar e të cilit të shkojë për të furnizuar Kosovën. Brenda këtij viti, Hoti ka bërë me dije se do të gjenden edhe fondet për të ndërtuar edhe një hekurudhë për të lidhur Kosovën dhe Shqipërinë.

    Por nuk kanë munguar as deklaratat politike, të cilat i mori “përsipër” kryeministri Edi Rama. Hoti tha vetëm se do të shkojë në SHBA për dialog sa herë që t’i kërkohet pasi ka si synim njohjen e Kosovës. Ndërsa kryeministri Edi Rama është treguar i ashpër ndaj ndërkombëtarëve në atë që ai e ka quajtur “izolimin” e Kosovës duke mos i liberalizuar vizat. Duke përdorur të njëjtën “alibi” si me çeljen e negociatave për Shqipërinë, Rama tha se e gjitha ishte një luftë elektorale brenda BE-së. Nuk ka mbetur pa u diskutuar as projekti i “Shengenit Ballkanik”, ku Rama nuk e fshehu se një ftesë i kishte shkuar edhe kryeministrit Hoti. Megjithatë ky i fundit nuk e komentoi pjesëmarrjen e tij, duke e lënë ende në pikëpyetje.

    Për më shumë bëhu pjesë e grupit më viral në Facebook, Dosja.al

    I ashpër Rama ishte edhe me presidentin e Serbisë, Aleksandër Vuçiç, duke iu referuar një deklarate të fundit të tij, në të cilën shprehej se dialogun e bënte me ndërkombëtarët dhe se nuk do ta njihte kurrë Kosovën. Duke marrë shkas nga fjalët e tij, kreu i qeverisë shqiptare bëri thirrje për bashkim mes shqiptarëve për të mbrojtur interesat e vendit dhe kërkuar që të mos bien në grackën e teorive konspirative, duke përmendur atë të shkëmbimit të territoreve.

    Në fund, Rama shprehur edhe njëherë mbështetjen e tij në përballjen e presidentit Hashim Thaçit dhe Kadri Veselit me drejtësinë ndërkombëtare, duke bërë thirrje që “peshorja” të balanconte dy anët. Numri një i maxhorancës shqiptare nuk harroi pa përmendur edhe njëherë se në luftë, Kosova ishte viktima. Në fund, palët kanë paralajmëruar edhe një takim mes dy qeverive në Durrës, por që mund të zhvillohet në shtator ose në nëntor, datë që varet nga zhvillimi i pandemisë së koronavirusit. 

    Pas takimit me Ramën, Hoti është takuar dhe me presidentin Ilir Meta, kryeparlamentarin Gramoz Ruçi, kryebashkiakun Erion Veliaj dhe kryedemokratin, Lulzim Basha. Në takimet që ka zhvilluar sot Hoti ka “marrë bekimin” për vijimin e dialogut mes Kosovës dhe Serbisë. 

    (K.M. J.V. A.B. Dosja.al)

    • 17:53

      Hoti takohet dhe me Veliajn, merr “Çelësin e qytetit” nga kryebashkiaku

      Kryeministri i Kosovës, Avdullah Hoti, ka zhvilluar dhe takimin e fundit në kuadër të vizitës së tij në Tiranë. Hoti ka shkuar në zyrën e kreut të Bashkisë Tiranë, Erion Veliajt, i cili i ka dhuruar  “Çelësin e qytetit”, si simbol i një dere të hapur për të gjithë.

      Avdullah Hoti dhe Erion Veliaj

      Hoti, falenderoi Veliajn për këtë nderim dhe shprehu vlerësimet për punën e tij në mirëmenaxhimin e qytetit. “Jam vërtet i nderuar në 100 vjetorin e Tiranës edhe si dikush që ka punuar në pushtetin lokal ju kam zili për pasionin që keni për punën. Ju uroj çdo të mirë edhe sukses”, tha Hoti. Veliaj dhe Hoti biseduan edhe për krijimin e lehtësirave për studentët në të dyja anët e kufirit.

    • 17:04

      Meta pret në takim Hotin: Mbështes dialogun Kosovë-Serbi, të normalizohen marrëdhëniet mes dy vendeve

      Presidenti Ilir Meta ka pritur sot në një takim Kryeministrin e Republikës së Kosovës, Avdullah Hoti. Në një njoftim për mediat nga Presidenca, bëhet me dije se Meta e uroi Kryeministrin Hoti për detyrën e re dhe për sa më shumë suksese në të mirë të Kosovës, popullit të saj dhe të ardhmes europiane.

      Avdullah Hoti dhe Ilir Meta

      Meta dhe Hoti diskutuan rreth intensifikimit të bashkëpunimit ndërmjet dy vendeve tona, proceseve të përbashkëta integruese në Bashkimin Europian, si dhe zhvillimeve në rajon. Po ashtu bëhet me dije se  Kreu i Shtetit theksoi se Shqipëria mbështet dialogun Kosovë-Serbi, për normalizimin e marrëdhënieve mes dy vendeve.

      Avdullah Hoti dhe Ilir Meta

      Në këtë kuadër janë të mirëpritura përpjekjet e Shteteve të Bashkuara të Amerikës dhe Bashkimit Europian, për rifillimin e dialogut mes Republikës së Kosovës dhe Republikës së Serbisë. Është e rëndësishme që të gjitha forcat politike të Kosovës të jenë të bashkuara rreth një platforme gjithëpërfshirëse në këtë proces”, mësohet të ketë thënë Meta.

      Presidenti është shprehur në takim se liberalizimi i vizave për qytetarët e Kosovës është një domosdoshmëri që duhet të ndodhë sa më parë dhe i premtoi Kryeministrit Hoti se edhe kësaj vere do të promovojë më kënaqësi bukuritë natyrore të Kosovës dhe shprehu besimin se më shumë turistë nga Kosova do ta vizitojnë Shqipërinë.

    • 16:19

      Avdullah Hoti zbulon premtimin e Bashës: Kam zotimin e tij për heqjen e taksës së Rrugës së Kombit

      Kryeministri i Kosovës, Avdullah Hoti u takua sot me kreun e PD, Lulzim Basha në selinë blu. Hoti në fund të deklaratës së përbashkët, u pyet për heqjen e taksës së Rrugës së Kombit. Ai konfirmoi se taksa ka qenë një nga temat e diskutuara, dhe se kishte marrë zotimin e Bashës, për heqjen e saj.

      Gazetari: Keni pasur bisedime për taksën e Rrugës së Kombit?

      Hoti: Kemi nda të gjitha shqetësimet, përfshirë dhe taksën e rrugës, kam zotimin e zotit Basha që do të heqë taksën e rrugës.

      Basha: Do të jetë vendimi  i parë, për të ndihmuar edhe turizmin. Në këtë kaudër , në bashkëpunim me qeverinë e Kosovës, do të ndihmojmë në afrimin e turistëve kosovarë drejt plazheve tona. Do të jetë një nga vendimet e para heqja e taksës së Rrugës së Kombit.

    • 16:15

      Basha tregon detaje nga takimi me Hotin: Diskutuam për sfidat e Kosovës në integrimin europian dhe atlantik

      Kreu i Partisë Demokratike, Lulzim Basha, priti sot në selinë blu kryeministrin e Kosovës, Avdullah Hoti. Në përfundim të takimit, Basha tregoi detaje nga takimi me Hotin. Kryedemokrati u shpreh se gjatë takimit diskutoi me Hotin për çështje të rëndësishme, si sfidat e Kosovës në integrimin Europian dhe Atlantik, si dhe daljen nga kriza ekonomike të shkaktuar nga COVID-19.

      Kam kënaqësinë e veçantë t’i uroj mirëseardhjen kryeministrit të Republikës së Kosovës, dr Avdullah Hotit dhe t’i uroj në emrin tim, të Partisë Demokratike, opozitës së bashkuar të gjithë qytetarëve të republikës së Shqipërisë punë të mbarë dhe suksese në misionin e tij në drejtimin e qeverisë së Kosovës Kemi diskutuar për një sërë çështje të rëndësishme dhe sfidat e Kosovës në rrugëtimin e saj drejt integrimit europian dhe integrimin atlantik. E kam përshëndetur për vendimin e kryeministrit Hoti për ngritjen e këshillit të ekspertëve, si një shenjë e qartë e vullnetit të qeverisë së re për të ngritur një bazë solide të kohezionit politik të partive politke, përparimit dhe dialogut mes Kosovës dhe Serbisë, ku Partia demokratke mbështet objektivat e republikës së Kosovës, njohjen reciproke të vendeve dhe përfitimet e ndërsjella për qytetarët e dy vendeve.  Së dyti dëgjova me interes nga kryeministri Hoti që vjen me kredenciale dhe background dhe përvojë të jashtëzakonshme shkencore në fushën e ekonomike, mbi planin e tij ekonomik sa i përket situatës së ekonomisë dhe të punësimit në Kosovë, qoftë mbi pasojat e menjëhershme të pandemisë Covid dhe vitin e ardhshëm. Dua të them se për ne si opozitë përbën shembull sesi qeveria po përgatitet për përballimin e pasovajve, për të letësuar problemet që kanë shkaktuar tek qytetarët e Kosovës dhe për t’u foksusuar tek zhvillimi ekonomik dhe punësimi që janë kthyer në sfida për gjithë rajonin. Dua të shpreh besimin tim se në drejtimin e kryeministrit Hoti dhe me iniciativën e tij, Kosova do të dijë t’ja dalë mbanë me gjithë përvojën, mençurinë të ecë përprara drejt një synimi të përbashkët që është një shtet demokratik, i fortë, sovran dhe i pavarur në kufij, anëtar i NATO-s dhe Bashkimit Europian. Dua të thkesoj se në këtë 30 vjetor të deklaratës kushtetuese, do të thoja si bashkëmoshatar i Hotit, është një kënaqësi e madhe të shoh se 30 vjet pas gurit thermeltar Kosova është e pavarur, ka institucione të konsoliduara ka politikanë të zotë dhe me idealet e presidentit Ibrahim Rugova, janë kalitur në sfidat e panumërta të luftës së UÇK e janë pajisur me dijet moralin dhe mendësinë e institucioneve të perëndimit, mishërimi i të cilave është edhe kryeministri Hoti, të cilit nga zemra i uroj çdo sukses në sfidat e vështira që do të drejtojë gjatë sfidave të tij si kryeministër ”, tha Basha ndër të tjera.

    • 15:17

      Ruçi pret në zyrë Hotin: Të vazhdojë dialogu me Serbinë, në koordinim me partnerët strategjikë

      Kryetari i Kuvendit, Gramoz Ruçi, priti sot Kryeministrin eKosovës, Avdullah Hoti, dhe delegacionin qeveritar, i cili po zhvillon një vizitë zyrtare në Shqipëri. Sipas një njoftimi nga Kuvendi bëhet me dije se Ruçi dhe Hoti janë shprehur se marrëdhëniet dypalëshe midis Shqipërisë dhe Kosovës janë vëllazërore dhe të shkëlqyera.

      Takimi në Kuvend

      Bashkëpunimi midis dy vendeve është strategjik, stabilizues për rajonin dhe orientues për perspektivën euro-atlantike. Shqipëria po konkretizon partneritetin strategjik e gjithëpërfshirës me Kosovën, duke e bërë atë një model dhe inkurajim për bashkëpunimin rajonal”, vijohet më tej.

      Ruçi, vlerësoi programin e ri të Qeverisë së Kosovës dhe nënvizoi nevojën e marrjes së  përgjegjësive për të çuar përpara procesin e dialogut me Serbinë, në koordinim me partnerët strategjikë të Kosovës, Bashkimin Evropian dhe Shtetet e Bashkuara të Amerikës, duke hequr kështu çdo pengesë për rinisur dialogun Kosovë-Serbi.

      Shqipëria mbështet fuqishëm Dialogun Kosovë-Serbi, të ndërmjetësuar nga BE-ja. Rezultati përfundimtar duhet të jetë një Marrëveshje e detyrueshme ligjore, që mundëson njohjen e ndërsjellët mes dy vendeve, anëtarësimin e Kosovës në OKB dhe BE, si dhe trajtim të drejtë të minoriteteve, në përputhje me Kushtetutën e Kosovës. Është shumë i rëndësishëm arritja e një konsensusi të brendshëm përsa i takon qëndrimit ndaj Dialogut. Mendojmë se procesi duhet të jetë gjithëpërfshirës, në funksion të forcimit të pozitave negociuese të Kosovës me Bashkimin Europian. Duhet të kemi e të tregojmë besim ndaj partnerëve strategjikë, Shteteve të Bashkuara të Amerikës dhe Bashkimit Europian”, theksoi kreu i Kuvendit.

      Nga ana tjetër Kryeministri Avdullah Hoti, vuri në dukje se “Qeveria e Kosovës do të thellojë e zgjerojë bashkëpunimin me Shqipërinë, duke synuar konkretizimin e marrëveshjeve të nënshkruara midis të dy qeverive. Koha kërkon prej nesh qëndrime të matura e me qetësi, prandaj ne do të vazhdojmë dialogun me Serbinë dhe po përgatitemi seriozisht për Samitin e Parisit.”

    • 12:37

      ‘Mos prisni që Vuçiç të njohë Kosovën”/ Rama bën thirrje për bashkim: Biem në gracka, duhet paqe për fëmijët tanë. Vendi nuk ndahet “mçeftas”, ku do e fuste Thaçi…në bagazh?

      Kryeministri i vendi, Edi Rama ka bërë thirrje për bashkim kombëtar për të mbështetur Kosovën në procesin e dialogut me Serbinë. Rama ka bërë thirrje që shqiptarët të mos bien pre e teorive konspirative, duke përmendur edhe atë të shkëmbimit të territorit mes Kosovës dhe Serbisë. Ndër të tjera, kreu i qeverisë shqiptare ka theksuar rolin e dialogut, duke bërë thirrje për paqe në kuadër të të ardhmes së fëmijëve. Ndërsa homologu i Kosovës, Hoti bëri me dije se do të shkonte në SHBA për të vijuar dialogun, me ose pa presidetin Hashim Thaçi.

      PJESË NGA KONFERENCA:

      PYETJE: Për Ramën; a do ta përkrahni një iniciativë nga Kosova për paditje për genocid ndaj Serbisë? A keni folur me Vuçiç për Gjykatën Speciale? Për Hotin; a shkoni në SHBA pa Thaçin? Më 9 korrik ka protestë, a përkrahni idenë?

      Rama: Ne jemi një komb, një familje por jetojmë në dy shtëpi të ndryshme. Mesa unë di, një shtet nuk bën padi për një shtet tjetër. Në të gjitha rastet unë besoj se kjo që ka ndodhur me presidentin e Kosovës, nuk mundet të përballohet duke bërë sikur por intisifikojmë luftën me Serbinë. Bërja sikur duke filluar nga fletë-rrufetë për atë që ka ndodhur vetëm dobëson pozicionin e Kosovës. Nganjëherë në situata të tilla, aleatat më të mëdhenj janë ata që bëjnë sikur e luftojnë kundërshtarin më fort. Fqinjin nuk e zgjedh, e ke aty. Kur zgjedh të lësh armët, duhet të vësh paqe jo për fqinjin por për fëmijët e tu. Në një proces si ky duhet bërë pyetja sot se çfarë duhet të presim ne. Shqiptarët nuk kanë qënë kurrë më mirë sesa në gjithë historinë e tyre, sa më shumë sfida e paqes komplikohet aq më shumë shohim të prevalojnë instiktet e vjetra. Nuk ka problem të jemi të ndarë reformën Zgjedhore, apo administrimin e pandemisë por nuk mund të jemi të ndarë për interesin strategjik. Nuk mund të jemi të përçarë për njohje përfundimtare. Presim që presidenti i Serbisë të njohë Kosovën? Mos i pritni këto.Nuk kanë për të ndodhur kurrë. Është shah, jo boks. E kemi të lehtë të biem në gracka fare banale siç është edhe gracka e një grupi që është angazhuar për ta ndarë Kosovën, jo nga jashtë por nga brenda. U gjetën armiqtë dhe u ndërtua historia. Kjo është tallja më e madhe që mund të bëhet me popullin por mbi të gjitha me fëmijët e Kosovës. Si u ndaka Kosova “mçeftas”? Një grup njerëzish me në krye Hashim Thaçin do ta ndanin Kosovën, ku do ta çonin në shtëpi, apo do ta fusnin në bagazh të makinës siç doli edhe lajmi për Behxhet Pacollin? Do ta sillnin në Kuvend. Do të duhet ta kalonin me referendum. Por teoria e konspiracionit na ka bërë shumë dëme në histori. Mund të na bëjë një dëm shumë të madh sot. Kemi dy çështje të mëdha; domosdoshmëria që drejtësia ndërkombëtare të mos deformohet duke u kthyer në padrejtësi kombëtare dhe që në këtë proces kombësie të vihet në fokus që Kosova i ka qënduar strikt të gjitha angazhimeve për drejtësi dhe dialogu. Serbia ka interes që të mos ketë dialog dhe konflikti të mos zgjidhej. Kush është i intersuar që Kosova të jetë e njohur dhe e panjohur? Serbia! Kushdo që nxit historitë e konspiracionit me Facebook, thjesht bën ha bukën e *si kujtohet shprehja. Hë more Qemal se t’i i di këto shprehje. Ha bukën e shpisë dhe bën duvanë e kojshisë.

      Hoti: Dialogu nuk ka alternativë. Sa herë të ftohem do të shkoj për të përfaqësuar Kosovën. E drejta për protestë është por duhen respektuar obligimet ndërkombëtare. Organet e rendit e nisin një çështje, nuk është e udhës që t’i pnegojmë.

    • 12:48

      E rekomanduat ju futjen e Hotit në qeverisje? Rama: S’jam dhe aq i zgjuar, ka politikanë që duan të drejtojnë gjithë Ballkanin, por unë s’jam…


      Kryeministri Edi Rama është shprehur se mund të ketë politikanë që duan të drejtojnë të gjithë Ballkanin por që nuk e shikon veten si një prej tyre. Gjatë fjalës së mbajtur në konferencën e tij të përbashkët me Avdullah Hotin, Rama tha se nuk mendon se është edhe aq i zgjuar dhe se nuk është detyra e tij që të komandojë politikën në Kosovë.

      Pjesë nga konferenca

      Pyetje: I rekomanduat Hotit për përfshirjen në qeverisje?

      Rama: E di që ka politikanë që duan të drejtojnë gjithë Ballkanin, por unë nuk jam ndër ata. Unë nuk kam asnjë të drejtë dhe nuk marr përsipër që t’ju tregoj miqve dhe kolegëve në Kosovë se çfarë duhet të bëjnë për atë që është detyra e tyre. Nuk mendoj se jam aq i zgjuar. Edhe pse duhet ta pranoj se në hapësirën shqiptare ka shumë individë kanë zgjuarsi supreme që mund të drejtojnë edhe botën. Është e drejta dhe detyra e tyre. A e zgjerojnë, a e ngushtojnë qeverinë, është e drejta dhe detyra e tyre. Nuk jap mend për këtë punë dhe të bëj komente në këtë drejtim. Kam komentuar dhe mund të komentoj veprime dhe vendime të caktuara kur lidhen me marrëdhëniet apo interesat e shqiptarëve në aspektin e përballjes me Serbinë në këtë luftë të ftohtë politike.

    • 12:09

      Avdullah Hoti në Tiranë: Konsiderojmë ndërtimin e një HEC në Shqipëri për të furnizuar Kosovën, të dy vendet duhet të kenë një hekurudhë lidhëse

      Kryeministri i Kosovës Avdullah Hoti është shprehur se mes Shqipërisë dhe Kosovës duhet të ekzistojë një linjë hekurudhore që të lidhë të dy vendet. Gjatë fjalës që mbajti në konferencën e përbashkët mes tij dhe kryeministrit Edi Rama, Hoti tha se po konsiderohet edhe ndërtimi i një HEC-I në Shqipëri që të furnizojë Kosovën. “Fillimisht iu falenderoj për vizitën në Prishtinë. Besoj që kemi maturinë për t’u përballur, por kujdesi juaj është shumë me vlerë. Tani duhet të kalojnë në terma të bashkëpunimit tonë. Dëshiroj të përmend tre projekte madhore: porti i Durrësit ku unë kam punuar me ish-ministrin e Financave që të kemi një pikë doganore, në fushën e energjisë, konsiderojmë ndërtimin e një HEC në Shqipëri për të furnizuar Kosovën dhe lidhja e dy vendeve me hekurudhë. Besoj që brenda këtij viti do të gjenden fondet,”– tha Hoti ndër të tjera.

    • 12:04

      Edi Rama: Turp për BE-në që mban peng një popull, Kosova i ka plotësuar të gjitha detyrimet për liberalizimin e vizave

      Kryeministri Edi Rama ka ashpërsuar gjuhën ndaj Bashkimit Europian në lidhje me mos liberalizimin e vizave të Kosovës. Gjatë fjalës së tij në kofnerencën e përbashkët mes tij dhe kryeministrit të Kosovës, Avdullah Hoti, Rama tha se është një trup për BE-në që e mban peng këtë popull dhe nuk i lë të lëvizin të lirë. “Ne nuk marrim vendime për Kosovën, ne flasim për Kosovën dhe jo në emër të saj. Harmonizimi është domosdoshmëri. Është turp për BE që mban peng një popull që të lëvize lirisht pasi si shtet i ka plotësuar të gjitha detyrimet për liberalizimin e vizave. E dimë shumë mirë pse. Arsyeja nuk gjendet në Kosovë, detyrimet janë përmbushur dhe janë njohur. Arsyeja është në Europë dhe në arsyet e brendshme të BE. Kur marrin vendime për ne, nisen nga kalkulimet për qëndrimeshmërinë elektorale të forcave që qeverisin. Turp është që Kosova nuk lëviz e lire,”- tha Rama ndër të tjera.

    • 11:59

      Rama: Hyrje-dalje pa kontroll mes Shqipërisë dhe Kosovës, duhet të bëjmë njehsimin e dokumentave

      Kryeministri Edi Rama ka komentuar edhe Shengenin Rajonal. Gjatë fjalës së tij në konferencën e përbashkët mes tij dhe kryeministrit të Kosovës Avdullah Hoti, Rama tha se nuk ka nevojë për dy palë demokrate dhe se mes Koovës e Shqipërisë duhet të bëhet njehsimi i dokumentave të të dy vendeve që të mos ketë kontrolle të mëtejshme. Rama shtoi se kjo gjë vlen si për njerëzit ashtu edhe për mallrat. “Dua të them që kemi diskutuar për të gjithë elementët për zbatueshmërinë e disa marrëveshjeve kyçe. Kjo është diçka e dakordësuar. Ajo që kryeministri Hoti ka ngritur është thelbi i marrëveshjes. Është stacion i vetëm në Durrës ku hyrja e të gjitha mallrave për në Kosovë, nga pikëpamja legjislative duket të trajtohet si hyrje në Kosovë. Pra na duhet detajim teknik i marrëveshjes për të mos lejuar që burokracia të pengojë zbatimin. Kemi folur edhe për njësimin e dokumentacionit, të kenë gjuhë të njësuar që të mos i kërkojnë eskortuesëve të Kosovës që të kenë dokumenta edhe të Shqipërisë dhe Kosovës. Nëse eksportuesi nëse ka dokumentin në Kosovë, dmth e ka të pranuar edhe në Shqipëri. Pa pasur nevojë ta çojë në dy palë demokratë. Këtu për ta mbyllur. Unë kam ripërsëritur qëndrimin tim të njohur se në kushtet e nevojës për të përparuar më shpejt në kohezionin strategjik, në këndvështrimin tim shqiptarët këtej dhe andej duhet të shohin interesin strategjik. Nëse futemi në Shengenin rajonal, askush nuk na pengon që të hapim kufirin pa asnjë kontroll. Ç’ka thashë për doganën do të vlejë për njerëzit. Ndërkohë ministria e Brendshme ka përparuar për të krijuar bazën e përbashkët të të dhënave,”- tha Rama ndër të tjera.

    • 11:44

      Rama: Do caktojmë një datë të re për mbledhjen e dy qeverive

      Kryeministri Edi Rama komentoi sërish aktakuzën ndaj Presidentit të Kosovës Hashim Thaçi dhe ish0luftëtarëve të UÇK-së. Gjatë fjalës së tij në konferencën e përbashkët me kryeministrin e Kosovës, Avdullah Hoti, Rama shtoi se me këto aktakuza po bëhet një padrejtësi ndaj Kosovës dhe UÇK-së. Ai u shpreh se do të caktohet një tjetër datë për të mbledhur dy qeveritë, por gjithmonë duke parë situatnë e Covid-19. “U takuam 48 orë më parë në Prishtinë. Por sidoqoftë sot kemi mundësi të flasim më në detaje lidhur me të gjitha aspektet e bashkëpunimit dhe do të vazhdojmë edhe pas conference që të diskutojmë ndërkohë që jemi dakortësuar për të përcaktuar një afat të ri, për mbajtjen e mbledhjes së Shkodrës mes dy qeverive, me shpresën që situatën jo të lehtë. Ashtu sikurse jemi dakordësuar për një mbledhje dhe event tjetër të rëndësishëm që do të mbahet në Tiranë. Do të mbahet në Pallatin e Brigadave, është kongresi i parë. Do të caktojmë një datë të re për mbledhjen e dy qeverive. Shpresojmë që kjo situatë të kalojë sa më shpejt. Deformohet duke u transformuar në proces padrejtësie ndaj Kosovës dhe UÇK-së. janë të pritshme keqinterpretimet qoftë mes nesh. Qoftë edhe në mjedsin anglishtfolës. Duke ngatërruar thelbin. Ky qëndrim nuk ka përpjekje për të penguar procesin e drejtë ligjor por ka të kundërtën. Në këtë pikë nuk ka mundësi për kompromis. Unë i kam parë dhe i kam ndjekur jo pa shqetësim deklaratat ndërkombëtare inkurajuese për drejtësinë.Me demek konsiderohet si akt pozitiv. Do të çojmë më tej procesin e bashkëpunimit. Është ogur i m irë që kryeministri Hoti vjen si një ndër protagonistët e kësaj rrugë bashkëpunimi, pasi ka mbuluar role kyçe institucionale. Ka mbuluar aspekte të financave dhe ekonomisë. Nga eksperienca e tij, me siguri do të jetë një vlerë e çmuar,”- tha Rama ndër të tjera.

    • 11:10

      Vizita e parë zyrtare, Avdullah Hoti vjen në Tiranë, Rama ndan FOTO nga takimi me të

      Kryeministri i Kosovës, Avdullah Hoti ka zhvilluar vizitën e tij të parë zyrtare në Tiranë, ku së pari ka takuar homologun e tij, Edi Rama. Ka qënë ky i fundit që ka ndarë foto nga takimi me të në rrjetet e tij sociale, megjithatë nuk ka ndarë detaje nga diskutimet që kanë zhvilluar me njëri-tjetrin. Pas pak të dy do të dalin në një konferencë për shtyp.

    Shto Koment