Politike

Darka luksoze në Dubai! Rrjeti “masakron” ministrat, Rama i mbron: S’kanë paguar asgjë, u ftuan nga biznesmeni arab. Ndërhyn edhe Basha: U shtruan për 7 palë qejfe në restorantin më të shtrenjtë (ZHVILLIMET)

Darka e ministrave të qeverisë Rama me milionerin Samir Mane në Dubai ndez debatin në rrjet. Kryeministri Edi Rama mbron ministrat duke thënë se darka është paguar nga investitori arab, ndërsa Lulzim Basha thotë se kjo është papërgjegjshmëri në një situatë si kjo e përmbytjeve. Nesër pritet një konferencë e dy ministrave Ahmetaj e Balluku. 
Featured image of article: Darka luksoze në Dubai! Rrjeti “masakron” ministrat, Rama i mbron: S’kanë paguar asgjë, u ftuan nga biznesmeni arab. Ndërhyn edhe Basha: U shtruan për 7 palë qejfe në restorantin më të shtrenjtë (ZHVILLIMET) Sali Berisha, Lulzim Basha, Edi Rama dhe darka ne Dubai

DUBAI- Pamjet e publikuar mbrëmjen e djeshme nga Dosja.al kanë ndezur rrjetin. Qeveritarët shqiptarë duke ngrënë darkë në një prej restoranteve më luksozë në botë, atë të “Nusr-et”, janë kritikuar gjerësisht në rrjet duke sjellë edhe reagimin e liderëve kryesore të politikës shqiptare. Kryeministri Edi Rama, shkroi që herët në mëngjes përmes rrjeteve sociale, se darka e ministrave ishte paguar nga investitori arab, pronari i qiell gërvishtëses “Burj Khalifa”, Mohamed Alabbar. Ndërkohë që nesër pritet edhe një deklaratë për mediat nga dy ministrat protagonistë të videos, Arben Ahmetaj dhe Belinda Balluku.

Por kryedemokrati Lulzim Basha e sheh këtë darkë si papërgjegjshmëri të qeverisë. Në kohën kur vendi po përballet me përmbytjen, theksoi ai,ministrat e Ramës shtrohen për shtatë palë qejfe në restorantin më të shtrenjtë në Dubai.”

Ndërkohë as rrjeti nuk i ka kthyer duke i kthyer në “meme”, ku është vënë në pah vaniteti dhe luksi i shfrenuar i një darke, që edhe pse e paguar, për shumë qytetarë është e papranueshme. 

Për më shumë bëhu pjesë e grupit më viral në Facebook, Dosja.al

Por çfarë ka ndodhur? 

Në pamjet e publikuara dje, shiheshin ministrat Arben Ahmetaj, Arbjan Maznikun, Belinda Ballukun, Endri Fuga dhe shoqëruesit e tyre me miliarderin Samir Mane, në restorantin e njohur në të gjithë botën “Nusret”. Qeveria sqaroi se anëtarët e qeverisë Rama u nisën drejt Dubait për takime me zyrtarë të vendit, mes tyre edhe me pronarin e EMAAR, biznesmenin Mohamed Alabbar, që njihet edhe si pronari i qiell gërvishtëses “Burj Khalifa”, me të cilin pritet të nënshkruhen disa marrëveshje për investime me rëndësi në vendin tonë. 

(k.m;f.g/dosja.al)

  • 19:02

    Kim Mehmeti: Pushtetarëve të ‘Rilindjes’ ua kontrollon stomaku, trurin

    Qytetare, darka dhe Kim Mehmeti (foto ilustrim)

    Publicisti Kim Mehmeti ka komentuar darkën e ministrave të qeverisë Rama me biznesmenin Samir Mane në Dubai. Në një shkrim në rrjetet sociale, Mehmeti thotë se pushtetarët e harrojnë popullin që i “ushqen” dhe sulet në mish të pjekur. Ai shkruan se darkat e drekat e dhëna nga princi arab, jepen në nder të popullit e jo të pushtetarëve.

    KOMENTI I PLOTË I KIM MEHMETIT:

    Mediat raportojnë për ahengun e qeveritarëve të ‘Rilindjes’ të shtruar në Dubai. Çfarë paturpësie dhe pandjeshmërie e pushtetarëve të cilët posa e ndiejnë  erën e mishit të pjekur, e harrojnë popullin që i ushqen, popullin që sot ‘mbytet’ nga rreshjet dhe dridhet nga i ftohti. E në ndërkohë thonë se drekën ua paska paguar ndonjë princ arab?!  Me çka tregojnë sa nuk e kanë kuptuar se edhe si mysafir të cilitdo mbreti, darkat e drekat u shtrohen për nderë të popullit e shtetit që përfaqësojnë, andaj nuk u ka hije të sillen si njerëz perverzë të cilëve nuk ua kontrollon truri barkun, por stomaku trurin. Po pra, sido që ta marrësh darka e pushtetarëve shqiptarë në Dubai shpalos dukjen e burrështetasve që nuk e kanë të zbrazur barkun, po trurin, gjë që i bënë të mos kenë turp e të jenë të pandjeshëm ndaj popullit që ua mundëson gjitha ato privilegje.

  • 17:58

    Darka e Dubait ndez debatin/ Dritan Hila: Prisni të hanë sufllaqe e të flenë në motele pa kondicioner?! Ema Andrea i përvishet: Të kalon poshtë ushqimi sa rroga që ushqen fëmijët? (REPLIKA)

    Ema Andrea dhe Dritan Hila
    Një reagim i gazetarit Dritan Hila se delegacionit zyrtare nuk mund të ushqehen me “sufllaqe”, referuar darkës së ministrave të qeverisë me biznesmenin Samir Mane në Dubai, ka sjellë një replikë nga aktorja Ema Andrea. Në një shkrim në rrjetet sociale, Hila e sheh si të pavend reagimin e qytetarëve nëpër rrjetet sociale, pasi pyet edhe shqiptarët se “Besoni që Berisha dhe Meta kanë marrë djathë e sallam” në darkat zyrtare, ndërsa më tej thotë se qeveritarët nuk mund të flenë në motele pa kondocioner.
    “Prisni qe delegacionet zyrtare te hane suvllaqe ose doner me vetesherbim ne vizitat qe bejne?! Besoni qe Berisha dhe Meta kane marre djathe e sallam me vete per te shtruar darkat zyrtare ne vizitat jashte? Kujtoni se Luli neser ne pushtet do filloje te haje sandëich? Ju duket cool te hash mish tek Nusreti? Ju çudit prania e biznesmeneve ne delegacionet zyrtare kur flitet per investime? Mendoni se duhet te flene ne motele autogrilli pa kondicioner? Mendoni qe keta qe ulerijne per darken tek Nusreti nuk mendojne te shkojne sapo ti jepet mundesia?! Pika ne muhabet. Tamam spirre fejsbuksish”-shkruan Hila në Facebook. 
    Por aktorja nuk është dakord. Në një reagim në rrjetet sociale, ajo shkruan se do t’i dukej normale që qytetarët të hanë me çmime të përballueshme, ndërsa pyet gazetarin “ do të të kalonte poshtë ushqimi që kushton sa rroga që merr për të ushqyer fëmijët?”. 
    REPLIKA E EMA ANDREAS: 
    Po, Z. Hila, Do me dukej normale,qe politikanet dhe delegacionet te hane vakte(pak rendesi ka çfare ka.ne pjate) me çmime qe mund te perballoheshin nga xhepi e nje qytetari shqiptar me ekonomi te mesme. Me duket e moralshme ne raport me shoqerine dhe economine e vendit qe drejtojne ata. Ne se nuk eshte takim privat por perfaqesi e vendit qe drejtojne,Po, duhet ta ndjejne por detyre te mos shtiren as ne haje. Me duket e deryrueshme te mos bejne te frustruarit prej luksit qe dikush tjeter,mund tja lejoje vetes. Kur perfaqeson vendin qe drejton, nuk ka rendesi çmimi I ushqimit por vertetesia dhe e verteta te ben dinjitoz. Askush ska problem çfare permban pjata,sufllaqe a suflé, dhe mos e banalizoni keshtu problemin ju lutem. Do te kalonte ty poshte,ushqimi qe kushton sa rroga qe merr per te ushqyer femijet? ‘Mjerim e krenari ‘ do thoshte dikush! Ps. Serish,komentet denigruese e fyese, do ti fshij, ndaj lutem mi kurseni.
  • 17:38

    Fatura e darkës së Nusretit!

    Fatura e darkës së Nusretit

    E gjendur përballë zemërimit publik, që nxiti videoja ku shfaqeshin ministra dhe zyrtarë të lartë të qeverisë duke darkuar nën shoqwrinw e biznesmenit Samir Mane nw një restorant luksoz në Dubai, qeveria nxitoi të justifikohej menjëherë. Me drejtorin e propagandës të kapur gafil duke kafshuar biftekun e arte te Nusretit, Edi Rama u detyrua vetë të lëshojë një deklaratë qesharake në Tiranë, ku shfajësohej se kjo ishte një vizitë punë, se ministrat dhe zyrtarët e tjerë të qeverisë kishin shkuar në Dubai për hall dhe jo për qejf dhe se paratë e darkës së shtrenjtë nuk i pagoi buxheti, por mikpritësi i delagacionit shqiptar, grupi Emaar.

    Madje respekti i madh për Shqipërinë dhe vete Ramen personalisht, e kishte detyruar sheikun xhymert që të cënonte edhe besimin e tij fetar duke paguar edhe verën e shtrenjtë haram për zyrtarët e lartë nga Shqipëria. Por përtej shfajësimeve qesharake, deklarata e qeverisë ka një të vërtetë. Problemi i vertetë i videos nuk është ulja e ministrave për darkë në shoqërinë e biznesmenëve, sado e pamoralshme dhe në konflikt interesi të jetë kjo. Nuk është as fatura e shtrenjtë e restorantit ekzotik, edhe sikur të jetë paguar nga paratë e buxhetit. Problemi real është vetë vizita. Ose më saktë qëllimi i saj.

    Në 3 dhjetor Parlamenti i Shqipërisë miratoi pa zhurmë një ligj për bashkëpunimin ekonomik mes qeverisë së Shqipërisë dhe asaj të Emirateve të Bashkuara Arabe. I gjithë thelbi i ligjit është vetëm një nen; përjashtimi nga prokurimi publik i të gjitha projekteve që do të financohen nga kompanitë arabe në Shqipëri. Domethenë i jep qeverisë të drejtën të bëjë pazare me kompanitë nga Emiratet e Bashkuara pa asnjë kontroll dhe pa asnjë përgjegjësi ligjore. Opozita tuhafe brenda Parlamentit as nuk e kuptoi fare se ccfarë u votua. Opozita reale jashtë parlamentit po ashtu.

    Marrëveshja e bashkëpunimit ekonomik me EBA është një akt i paprecedentë juridik. Një ligj i tillë është tentuar disa herë në të shkuarën edhe nga kompani të vendeve të tjera, por në asnjë rast institucionet shqiptare nuk kishin lëshuar pe edhe përballë projekteve madhore. Deri një muaj më parë. Tashmë ligji kaloi dhe nga pas do të vijë fatura e kripur për vendin.

    Qëllimi kryesor i këtij ligji dhe vizitës së gjysmës së qeverisë në Dubai është një projekt okult në Portin e Durrësit, që do të zhvillohet nga grupi arab Ebaar. Sipas marrëveshjes, qeveria do t’u falë arabëve Portin e Durrësit dhe 100 hektarë tokë në zonën përreth. Në këmbim grupi Emaar do të investojë 2 miliardë dollarë për të ndërtuar pallate, hotele dhe një port turistik në tokën e falur. Ndërsa porti i ri i mallravë do të ndërtohet në Porto Romano, por jo nga kompania arabe, por nga lekët e qytetarëve shqiptarë.

    Ky është një projekt aventurier, përmes të cilit arabët do të aneksojnë 100 hektarë tokë në bregdet për të ngritur bizneset e tyre, ndërsa qytetarët shqiptarë do të humbasin Portin më të madh të vendit, i cili d të kërkojë qindra milionë euro të tjera për t’u ndërtuar sërish, nëse do të ndërtohet dhe nuk do të lihet rrugëve sicc e ka zakon qeveria me veprat publike. Madje për të vënë në jetë këtë projekt, qeveri ka hequr dorë edhe nga 60 milionë euro grante dhe kredi të buta nga Bashkimi Europian, për të cilat ka dy marrëveshje të nënshkruara nga Damian Gjiknuri.

    Kjo është arsyeja që e detyroi gjysmën e qeverisë të zbarkojë në Dubai. Për fatin e keq të Belinda Ballukut, pikërisht ditën kur gjysma e Shqipërisë është nën pushtetin e ujit dhe banesat e mijëra familjeve gjenden të përmbytura. Por punët në qeveri kanë prioritete. Në fillim pazari 2 miliardë dollarë, që do të zhvillojë Shqipërinë duke asgjësuar Portin e Durrësit dhe aneksuar 100 hektarë tokë në zonën më të lakmuar të bregdetit. Më pas, Ministria e Infrastrukturës do të vihet menjehërë në krye të punëve për të ndihmuar familjet e përmbytura, që rrezikojnë jetën nga vërshimi i ujit.

  • 17:10

    FOTOT/ Berisha sulmon ministrat e qeverisë Rama por harron të përmendë Samir Manen... edhe Basha nuk e pa biznesmenin në video?!

    Ish-kryeministri Sali Berisha e sheh si të papranueshme darkën e ministrave të qeverisë Rama në restorantin e kuzhinierit turk Nusret në Dubai. Berisha ka shpërndarë një pasazh nga videoja në faqen e tij në Facebook, ku thotë se ndërsa mijëra familje kalojnë natën nën ujë, “derrat” e qeverisë hanë tek Nusreti. Sakaq, në foto shihen vetëm Arbjan Mazniku, Endri Fuga, Arben Ahmetaj dhe Belinda Balluku. 

    “Mijra familje kalojne naten nen uje ne mjerim. Grykesat, derrat e kenaqur te narkoqeverise Ahmetaj, Balluku, Fuga dhe Mazniku etj ne luks ne darka tek El Nusret qe kushtojne 13000 euro! Foto qe paraqesin mat derrat e kenaqur! sb”,-shkruan Berisha. 

    Fotoja e postuar nga Berisha:

    Por a janë vetëm këta personazhe në video?

    Ne pamë që jo. Siç edhe Dosja.al ka raportuar në 24 orët e fundit, në videon e ministrave shqiptarë në Dubai, shoqëruesi ‘kryesor’ i tyre është biznesmeni i akuzuar për lidhje të forta me qeverinë, Samir Mane. Por çuditërisht, ish-kryeministri nuk e ka parë. Në tekstin dhe etiketimin bashkëngjitur, emri i Samir Manes nuk është. E njëjta gjë edhe në reagimin zyrtar të kryedemokratit Lulzim Basha. Edhe pse më i “kujdesshëm”, Basha ka ndarë një fotomontim, ku shihen tri zyrtarët e qeverisë dhe pamje nga përmbytjet në vend. Por edhe këtu, Samir Mane mungon.

    Fotoja e postuar nga Basha:

    Në reagimin e kryedemokratit, shihet se edhe në tekst, ai shkruan se “ministrat” e Ramës darkojnë në Dubai, duke mos e përmendur biznesmenin Mane.

    “Ndërkohë që vendi është nën ujë, mijëra familje po kalojnë dimrin e dytë në çadra, shqiptarët janë pa asnjë ndihmë përballë krizës ekonomike dhe shëndetësore, ministrat e Ramës shtrohen për shtatë palë qejfe në restorantin më të shtrenjtë në Dubai.  Ka ardhur koha për një qeveri që kujdeset për njerëzit, dhe jo këtë që e ka mendjen vetëm për veten e saj.”,-shkruan Basha. 

  • 17:03

    Mediat pranë PD fshehën Samir Manen nga darka? Arlind Qorri: Shihni heshtjen, pas zgjedhjeve ndërrohen hajdutët, por jo hajdutëria…(KOMENTI)

    Pedagogu Arlind Qori, njëherazi drejtues i “Lëvizja për Universitetin”, ka komentuar në rrjetet sociale, raportimin e portaleve pranë Partisë Demokratike, për darkën e ministrave të qeverisë Rama dhe biznesmenit Samir Mane në Dubai. Qori thotë se raportimi i portaleve pranë PD, ku vërehet se nuk është shtuar emri i Manes, tregojnë për qeverisjen në rast se demokratët vijnë në pushtet pas 25 prillit. Sipas tij, do të ndërrohen hajdutët, por jo hajdutëria.

    POSTIMI I PLOTË I ARLIND QORIT:

    Mjafton të shohësh si kanë heshtur mediat e PD për praninë e Samir Manes në darkën luksoze të Dubait për të kuptuar se në zgjedhjet e ardhshme ne mund të ndërrojmë hajdutin, por jo hajdutërinë. Kushdo të fitojë, zotër të Shqipërisë do të mbeten oligarkët, qeveritarët do të vjedhin bashkë me ta, ndërsa mediat do të mbyllin sy e veshë.
    #3parti1oligarki

  • 17:00

    Darka e ministrave dhe Samir Manes në Dubai/ Basha: Vendi në ujë, ndërsa njerëzit e Ramës shtrohen për shtatë palë qejfe në restorantin më të shtrejtë të botës

    Kryetari i Partisë Demokratike, Lulzim Basha ka reaguar në lidhje me darkën e ministrave të qeverisë Rama dhe biznesmenit Samir Manes në restorantin e kuzhinierit turk Nusret në Dubai. Në një reagim në rrjetet sociale, teksa poston një foto-montazh ku shihen tri zyrtarët, Arbjan Mazniku, Endri Fuga dhe Arben Ahmetaj, Basha thotë se i gjithë vendi është nën ujë për shkak të motit të keq, ndërsa ministrat e Ramës shtrohen për shtatë palë qejfe në restorantin më të shtrenjtë në Dubai.Basha thekson se ka ardhur koha për një qeveri që kujdeset për njerëzit, ndërsa bie në sy fakti se kryedemokrati nuk e ka përmendur as në reagim dhe as në foton bashkëngjitur postimit, biznesmenin Samir Mane që ishte bashkë me ta në Dubai.REAGIMI I PLOTË I BASHËS:

    Ndërkohë që vendi është nën ujë, mijëra familje po kalojnë dimrin e dytë në çadra, shqiptarët janë pa asnjë ndihmë përballë krizës ekonomike dhe shëndetësore, ministrat e Ramës shtrohen për shtatë palë qejfe në restorantin më të shtrenjtë në Dubai. Ka ardhur koha për një qeveri që kujdeset për njerëzit, dhe jo këtë që e ka mendjen vetëm për veten e saj.

  • 12:07

    Darka e ministrave tek ‘Nusr-eti’/ Paloka: E imagjinoni… në kulmin e fatkeqësive për shqiptarët

    Edi Paloka

    Ish-deputeti i Partisë Demokratike, Edi Paloka ka komentuar videon ku shfaqen ministrat e kryeministrit Edi Rama teksa konsumojnë një darkë në një nga restortantat më të shtrenjta në botë, krah biznesmenit Samir Mane. Paloka ka përmendur edhe njëherë të gjithë akuzat për shpenzimet marramendëse që janë përballur më herët Rama dhe të zgjedhurit e tij, duke ironizuar lidhur me situatën në vend.

    “Kjo qeveri ka ministra si Etilda qe paguajne 700 euro naten ne hotel, po ka dhe ministra qe paguajne 700 dollare nje pjate . Ka ministra qe vetem xhupi ju kushton 3 mije euro po ka dhe ministra si Balluku qe mbajne varese 10 mije dollare ne qafe… E imagjinoni qe keta mbledhin vetem grimcat e vjedhjeve qe le lubia ne krye te qeverise. Ai qe merr charterin 100 mije euro per te bere foto me Cristiano Ronaldon apo per tu zderhallur neper bote here per te hapur ekspozitat e tij , here per te pare ndeshje te NBA e here tjeter ( si rastin e fundit) thjesht per shooping ne Fifth Avenue te Neë York-ut. Te gjitha keto mundesisht ne kulmin e fatkeqesive per shqiptaret, kur njerzit jane nen rrenojat e termetit apo nen ujin qe i ka permbytur. Pandemia qendron ne sfond! Ju duhet dhe nje mandat tjeter…,”-shkruan Paloka.

  • 11:30

    Rama sqaron prapë shqiptarët për darkën në Dubai: Ministrat e kanë të ndaluar të venë me pushime, zgjidh gjellë pasanikësh ose… (KOMENTI)

    Duket se kryeministrit Edi Rama nuk i del ‘e keqja’ nga videoja e publikuar në rrjetet sociale, ku shfaqen ministrat e tij duke konsumuar një darkë në një prej restoranteve më luksoze në vend. Duke i kthyer përgjigje një prej komentuesve të tij në Facebook, Rama përsëriti edhe njëherë se ka qënë ai vetë personi që e ua ka ndaluar pushimet jashtë vendit.

    “Patjetër që e kam parë dhe ia ku e ke edhe përgjigjen, shumë e thjeshtë! Dhe me këtë rast mësoje se qyshse kam ardhur unë në qeveri, ministrat e kanë të ndaluar të shkojnë me pushime jashtë shtetit, përfshirë edhe mua natyrisht! Kështu që zgjidh e merr, o faktet, o përrallat me gjellë pasanikësh!,”-shkruan Rama.

  • 10:40

    DY MOMENTET! Shqipëria nën ‘pushtetin’ e ujit, ministrat darkë me fleta ari, si u përsërit ‘gabimi’ i Fatos Nanos për tragjedinë e 9 janarit (S’I PRANOI KURRË)

    Shqipëria prej 5 ditësh është ‘pushtuar’ nga moti i keq që ka shkaktuar probleme të mëdha në vend dhe përmbytje. Disa ditë më parë, Instituti i Gjeoshkencave, Energjisë, Ujit dhe Mjedisit, i cili paguhet me taksat e qytetarëve, lajmëroi për ditë me radhë marrjen e masave pasi Shqipëria do të përballej nga mot i keq dhe reshje të dendura shiu që do të rrezikonin daljen nga shtrati të lumenjëve në vend.  Edhe pse alarmi u dha disa ditë rresht, asnjë masë nuk u mor nga ana e qeverisë, teksa kryeministri bashkë me ministrat ishte nisur për në Turqi, ku e priste një “tur” dy ditor me mikun e tij, presidentin Recep Tajip Erdogan. Ndërsa më pas, nga Turqia u largua për në Greqi për të biseduar lidhur me rajonin dhe çështje “të rëndësishme”, jo si përmbytjet në Shqipëri. Edhe personi që la pas për ta zëvëndësuar, Erion Braçe nuk e ‘ndriti’ me deklaratën e tij, pasi u shpreh se përmbytje nuk kishte sepse ishin pastruar kanalizimet. Me të parë “meme-t” që krijoi në rrjet deklarata e zëvendësit të tij, Rama u kthye me urgjencë për në Shqipëri, në mënyrë që të merrte vetë situatën nën kontroll, por kanë kaluar 5 ditë dhe vendi është ende nën ujë, dhjetra rrugë e ura janë prishur duke izoluar jetën e familjeve të tëra.  E gjitha vetëm sepse nuk merreshin dot masa për të përballuar situatën, ndërkohë që Rama kishte dalë nga vendi për pak ‘turizëm.’ Por nuk mbaron këtu, ministrat e tij, Arben Ahmetaj e Belinda Balluku janë filmuar duke drekuar në restorantin e Nusr-etit, bashkë më biznesmenin Samir Mane. Ndërkohë që ministrja Balluku dhe Ahmetaj duhet të jenë të parët në vijën e ‘luftës’ për shkak të situatës me të cilën po përballet vendi. Por mesa duket ka marrëveshje dhe argëtim më të rëndësishme.  Kjo ngjarje kthen pas 17 vite, në kohën kur ish-kryeministri Fatos Nano, ishte larguar njësoj si pasardhësi i tij për pushime në Turqi, ndërkohë që në media dhe publikisht nuk e pranoi kurrë se çfarë kishte ndodhur. Teksa vendi përballej me tragjedinë e 9 janarit, ku 28 shqiptarë u mbytën në ujrat e detit Jon duke tentuar që të largoheshin për në Itali. I pyetur në një konferencë për mediat, Nano nuk e pranoi kurrë por u justifikua se ishte në spital, duke luajtur edhe ‘blofin’ për pasaportën.

    “Kam qënë në spital, në Stamboll. Doni të dini edhe diagnozën?,”-u përgjigj Nano.

    Ndërsa dje, ministrat kanë hedhur pak kripë mbi mishin e mbuluar me ar…Të prekurit e tërmetit le të presin ende në çadra, me shpresën se do të dalë dielli. 

  • 10:28

    Darka luksoze në Dubai, Rama iu shpjegon shqiptarëve: Ministrat s’kanë vajtur për qejf, lekët i kanë paguar të tjerët

    Edi Rama

    Kryeministri Edi Rama u ka dalë në mbrojtje ministrave të tij, dhe këshilltarit Endri Fuga për darkën që u filmuan duke ngrënë në një nga restorantët më të shtrenjta, bashkë me biznesmenin Samir Mane, në Dubai. Numri një i qeverisë i ka kthyer përgjigje një prej komentuesëve të tij, duke i shpjeguar se ministrat e tij nuk kishin paguar asgjë, pasi fatura ishte marrë nga pala mikpritëse. Për ta bërë edhe më të besueshme, Rama ka përmendur edhe faktin që bëhet fjalë për investitiorin Mohamed Alabbar, që njihet edhe si pronari i qiell gërvishtëses “Burj Khalifa”.

    Informohu që të mos flasësh mbrapsht, sepse as nuk kanë shkuar për qejf, pasi nuk kanë shpenzuar asgjë nga taksat e tua në këtë rast pasi të gjitha shpenzimet janë mbuluar nga pala mikpritëse që është një ndër grupet më të mëdha të botës, i interesuar për të investuar në Shqipëri!,”-shkruan Rama.  

  • 9:48

    Darkë me mish të mbuluar në ar! Qeveria: Ministrat dhe Samir Mane ishin në Dubai për punë, darkën e pagoi investitori arab

    Ditën e djeshme, videoja e ministrave shqiptarë dhe zyrtarëve të tjerë të lartë që darkonin në një prej restoranteve më luksozë në botë. Vetëm disa orë më pas ka ardhur edhe një reagim zyrtar nga ana e qeverisë, ku sqarohet se është në praktikën e grupit Emaar që përpara hyrjes në një vend ku kryen investime, të ftojë përfaqësues të qeverisë, pushtetit vendor e medias, si edhe biznesit për t’u njohur nga afër me investimet e kryera nga ky grup në qendrën e tij në Dubai. Ndaj ku ka qenë edhe rasti, ku edhe është xhiruar videoja, duke sqaruar se edhe kush ka paguar. Megjithatë për më shumë detaje, parashikohet që të hënën të mbahet një ‘konferencë’ sqaruese për publikun.

    Ditën e hënë të dy përfaqësuesit e qeverisë, do të informojnë publikun për vizitën, por në kushtet kur videoja “fajtore” kërkon një shpjegim imediat, bëjmë me dije se të gjitha shpenzimet e qëndrimit në Dubai janë mbuluar nga pala mikpritëse,”-shkruhet ndër të tjera.

    REAGIMI ZYRTAR: 

    Ministrja e Infrastrukturës dhe Energjisë, Ministri për Rindërtimin dhe delegacioni i grupeve të punës, zhvilluan një vizitë dy ditore në Emiratet e Bashkuara Arabe, me ftesë të grupit të mirënjohur Emaar, i cili në emër të Princit të Kurorës dhe në vijim të marrvëshjes së nënshkruar mes dy qeverive, ka vendosur Shqipërinë në hartën e investimeve të veta. Është në praktikën e grupit Emaar që përpara hyrjes në një vend ku kryen investime, të ftojë përfaqësues të qeverisë, pushtetit vendor e medias, si edhe biznesit po ashtu në bazë të përzgjedhjes së vet, për t’u njohur nga afër me investimet e kryera nga ky grup në qendrën e tij në Dubai. Pjesë e këtij spedicioni jo te zakonshëm nga Shqipëria ishin përveç personave të nxjerre në videon “fajtore” edhe Zv. Ministri i Infrastrukturës dhe Energjisë, Nën/Kryetari i Bashkisë Tiranë, Sekretari i Përgjithshëm i Ministrisë së Financave si edhe gazetarë nga Televizioni Publik Shqiptar dhe Televizionet Kombëtare Klan dhe Top Channel. Grupi Emaar, i cili do të zbatojë projektin e Rindërtimit në Durrës, ku do të ndërtojë 2000 apartamente në zonën e Spitalles dhe që ka paraqitur një projekt për rivitalizimin e Portit të Durrësit dhe ndërtimin aty të marinës më të madhe në Adriatik, ka shprehur interes të qartë edhe për disa investime të tjera. Ditën e hënë të dy përfaqësuesit e qeverisë, do të informojnë publikun për vizitën, por në kushtet kur videoja “fajtore” kërkon një shpjegim imediat, bëjmë me dije se të gjitha shpenzimet e qëndrimit në Dubai janë mbuluar nga pala mikpritëse.

  • 13:28

    I ‘larë’ në flori! 275 dollarë për një biftek, sa kushtoi darka e ‘shefave’ shqiptarë në Dubai (SHEMBUJT)

    Restoranti i “Salt Bae” është bërë ‘hit’ në ditën e fundit në Shqipëri, pasi Dosja.al ka siguruar një video ku dy ministrat Arben Ahmetaj e Belinda Ballukun, Arbjan Maznikun, Endri Fuga dhe shoqëruesit e tyre me miliarderin Samir Mane, konsumojnë ushqim në një prej restoranteve më luksoze në të gjithë botën. Edhe pse nuk duken pamje nga darka për të parë porosinë, sërish një ‘ide’ sesa e gjitha ka kushtuar mund ta krijojmë përmes shkrimeve në internet. Revista të njohura botërore, i kanë dedikuar shkrime restorantit, duke i bërë edhe ‘review’ për ushqimin dhe koston me të cilën e servir. Sipas “Observer”, në restorantit ‘SaltBae’ biftekët kushtojnë nga 70 deri në 275 dollarë, ndërsa ka edhe artikuj të tjerë që flasin për çmime edhe më të larta e marramendëse për realitetin shqiptar.

    “Menuja në Nusr-et është e kufizuar dhe absurde e shtrenjtë. Një sallatë kushton 25 dollarë. Biftekët, ndërkohë, kushtojnë midis 70-250dollarë, për shiritat e fijes pa kocka, dhe 275 dollarë,“-shkruan Joshua David Stein për “GQ”.

    Po për “delegacionin” shqiptar vallë sa ka kushtuar? Jo për gjë, po shpresojmë mos t’i ketë kushtuar shumë sheikut Mohamed Ali Alabbar, i cili njihet si pronari i qiell gërvishtëses “Burj Khalifa”.

  • 7:31

    Darkë super-luks në Dubai! Rrjeti shpërthen në ‘meme’, kritika pa fund, ‘viktima’ e preferuar… Arben Ahmetaj

    Videoja e publikuar dje në Dosja.al, ku shihen zyrtarë të lartë të qeverisë dhe Partisë Socialiste u filmuan teksa darkonin në restorantin e njohur të Nusret në Dubai në një kohë kur vendi është në pushtetin e ujit.

    Duke darkuar shihen ministrat Arben Ahmetaj dhe Belinda Balluku; nënkryetari i Bashkisë së Tiranës, Arbian Mazniku; biznesmeni Samir Mane dhe këshilltari i Edi Ramës, Endri Fuga. Sigurisht për këtë video nuk kanë munguar as ‘memet’, ku personazh kryesor ishte zgjedhur ministri Ahmetaj. Të paktën ky i fundit ka qenë gjithmonë simpatizant i memeve.

5 Komente në “Darka luksoze në Dubai! Rrjeti “masakron” ministrat, Rama i mbron: S’kanë paguar asgjë, u ftuan nga biznesmeni arab. Ndërhyn edhe Basha: U shtruan për 7 palë qejfe në restorantin më të shtrenjtë (ZHVILLIMET)

  1. e kuptoni ne kete vend ka humbur cdo sens ligjor e rregull moral?!! po mire nese e ka paguar princi sheik dreken e neser ky princi vjen ne Shqiperi me kontrata e investime a k ndopak konflikt interesi?! rryshfet meqe e do turqisht beu Rama

  2. E quajmë të mirëqenë atë që thua ti z Rama por a nuk është shkelje ligji të marrësh ryshfet apo të të paguhen dreka dhe darka si dhe udhëtime nga investitorët
    Jo zotëri nuk mbulohet dielli me shoshë
    Ky është një nga turpësitë e shumta të kësaj rivdekje se nuk mund të ju quaj ndryshe

  3. Saimir Mane vetëm pak ditë më parë fitoi një tender ruge 5 milion euro më shumë se oferta më e ulët.

    Kjo e shpjegon praninë e tij me Ballukun etj hajdutë.

    Vdekje hajdutëve të votuar nga popullli më injorant i globit.

    Vdekje edhe këtyre injorantëve që votojnë hajdutët.

  4. Keta te pd u dhemb populli Keta jane vrases Keta buk po han ju keni ngrënë Koka e popullit i keni vrare

  5. Kur HA dhe paguan tjeterkush, ti je i korruptuar!

    Po ti keshtu e ke nisur: sapo hyre ne kryeministri, pretendove se e riparove falas, pa asnje leke nga Shteti…!

    Prej asaj dite jo vetem ti, tere Qeveria Familiare, u korruptua…

    Meraku eshte se po korruptoni Shtetin…

Shto Koment