Çfarë po ndodhë në veri të Kosovës/ Marrëveshja për targat kthehet sërish në fokus, BE: Përmbahuni

• Marrëveshja për targat duket se është rikthyer sërish në fokus, pasi të mërkurën pati pretendime se policë të Kosovës në pikat kufitare Jarinjë e Bërnjak, janë duke shkelur marrëveshjen për targat ilegale të arritur në nëntor mes Prishtinës e Beogradit. • Disa serbë nga komunat veriore të Kosovës janë ankuar për probleme në ditët e fundit kur kanë kaluar pikat kufitare në Jarinje dhe Bërnjak me veturat e tyre, për shkak se policia e Kosovës i ka ndaluar dhe paralajmëruar që nuk kishin të drejtë të përdornin veturat pasi kishin zgjatur afatin e regjistrimit pas 5 dhjetorit të vitit të kaluar. • Kujtojmë se çështja e targave solli shumë tensione në vend. • Megjithatë, Prishtina dhe Beogradi më në fund në nëntor 2022, u pajtuan që autoritetet e Kosovës do të pezullonin veprimet tjera sa i përket targave ilegale, ndërkohë që autoritetet e Serbisë nuk do të lëshonin targa të reja ilegale me emrat e qyteteve të Kosovës. • Sipas kësaj marrëveshjeje, vazhdimi i validitetit për targat e vjetra ilegale nuk duhej kontestuar. • Por, pas këtyre raportimeve ndryshe ka argumentuar ministri i Punëve të Brendshme të Republikës së Kosovës, Xhelal Sveçla, i cili përmes një postimi në Facebook, ka thënë se, Serbia ka shkelur marrëveshjen. • Ajo që mbetet e hapur në gjithë këtë situatë është nëse ekziston apo jo një datë fikse nga kur do të ndalohej ri-regjistrimi i targave ekzistuese. • Ndërkohë, derisa duket se marrëveshja është paksa e mjegullt, pas raportimeve të mediave serbe në Kosovë për ndalesat në pikat kufitare, tashmë të konfirmuara edhe nga ministri Sveçla, reagime ka pasur edhe nga ana e serbëve. • Një ndër personat e parë që ka folur, është edhe drejtori i të ashtuquajturës zyrë për Kosovën në Serbi, Petar Petkoviç, i cili ka thënë se bëhet fjalë për “shkelje brutale”, ndërsa e ka shfrytëzuar rastin që të krijojë pak dramë, duke thënë se Albin Kurti do që të krijojë tensione të reja.