Politike

Ndërtimet në Tiranë, Ina Zhupa reagon kundër Veliajt: Mashtrove, nuk janë punë publike, por kulla mbi 13 kate

Veliaj mbrëmë i ftuar në emisionin “Real Story” deklaroi se gjysma e lejeve të dhëna janë punë publike për Tiranën. Por kjo shifër për Ina Zhupën nuk është e saktë dhe ajo ka publikuar disa grafikë, ku tregon të kundërtën.
Featured image of article: Ndërtimet në Tiranë, Ina Zhupa reagon kundër Veliajt: Mashtrove, nuk janë punë publike, por kulla mbi 13 kate Erion Veliaj, Ina Zhupa dhe ndërtime në Tiranë

TIRANË- Zëdhënësja e Partisë Demokratike, Ina Zhupa, ka reaguar kundër një deklarate të Erion Veliaj për ndërtimet në Tiranë. Veliaj mbrëmë i ftuar në emisionin “Real Story” deklaroi se gjysma e lejeve të dhëna janë punë publike për Tiranën. Por kjo shifër për Ina Zhupën nuk është e saktë dhe ajo ka publikuar disa grafikë, ku tregon të kundërtën. “E vërteta është që 80% e lejeve të ndërtimit të Veliajt janë për ndërtesa mbi 13 kate që nuk kanë lidhje me punët publike!”, shkruan ndër të tjera zëdhënësja e PD.

Shifrat e publikuara nga Zhupa
REAGIMI I PLOTË

Mashtruesi serial Veliaj gënjeu publikisht kur deklaroi dje në emision me Sokol Ballën se gjysma e lejeve të ndërtimit janë punë publike! Veliaj që premtoi publikisht që nuk do jepte leje ndërtimi, ka dhënë mbi 780 në 4 vite. E vërteta është që 80% e lejeve të ndërtimit të Veliajt janë për ndërtesa mbi 13 kate që nuk kanë lidhje me punët publike! Ku vetëm në zonat pranë qendrës së Tiranës janë miratuar mbi 18 kulla me lartësi deri në 100 metra dhe volum sip. rreth 750.000 m2 ndërtim. Po ashtu bumi i lejeve të ndërtimit është në vitet 2018 dhe 2019, ndërsa lejet e punëve publike të mëdha të Tiranës nuk janë dhënë në këto vite!

Grafiku i publikuar nga Zhupa

Punët publike që përmendi Veliaj skanë lidhje me vitet e bumit e lejeve. Konkretisht për Bulevardin e Ri, leja e ndërtimit është dhënë nga Bashkia e Tiranës është në vitin 2013, koha e Lulzim Bashës! Leja për pazarin e ri në 2015 dhe leja për Sheshin Skënderbej në 2016! Veliaj mendon se qytetarët e Tiranës janë të verbër edhe nuk i shikojnë pallatet edhe kullat që ndërtohen çdo ditë, duke ju zënë rrugët, trotuaret, sipërfaqen edhe duke ju ndotur tmerrsisht ajrin. Por Veliajt nuk i interesojne qytetaret e Tiranes por oligarkët e ndërtimit!

Për më shumë bëhu pjesë e grupit më viral në Facebook, Dosja.al

ÇFARË  THA  VELIAJ  DJE?

Kryebashkiaku Veliaj tha se shumica e lejeve të ndërtimit të dhëna janë për vepra publike, kurse vetëm pas tërmetit të 26 nëntorit, lejet e dhëna e kalojnë shifrën 1 mijë, pasi janë leje për riparimin ose ndërtimin e shtëpive të qytetarëve të dëmtuar nga fatkeqësia natyrore. “Duhet të sqaroj disa gjëra. Sot kemi vetëm ndërtesa ikonike në zonën qendrore të Tiranës. Teksa flasim tani, nëse dalim nga kjo zyrë, po ndërtohet në rrugën e Kombinatit, po ndërtohet në rrugën “5 Maji”, kanë filluar punimet në zonën e “Blv. të Ri”… për një qytet që rritet me 30 mijë banorë në vit, pyetja është: Kush është ai që ka të drejtë të thotë – pas meje, asnjë tjetër? Ky qytet me 1 milionë banorë, sipas statistikave tona, vetëm 100 mijë mund të thonë që janë den-baba-den tironsa. 900 mijë të tjerët kanë ardhur nga diku tjetër dhe pyetja është: Kush është ai autoritet i cili thotë: tani që erdha unë, të mbyllet, të vihet trau për të tjerët. Ky qytet është i destinuar të rritet, për sa kohë që po rritet përtej unazës së 5-të. Sigurisht, një hotel me 5 yje do bëhet në qendër të Tiranës, se nuk mund të themi duam turizëm, por shkoni flini në Vorë”, u shpreh ai.

(A.B. Dosja.al)

Shto Koment