Rajoni

Takimi për ‘Shengenin ballkanik’/ Kurti i përgjigjet Ramës: Shqipëria duhej të priste formimin e qeverisë së Kosovës

Albin Kurti u shpreh se lëvizja ishte e gabuar pasi dy vendet e para që duhet të bashkëpunonin në Ballkanin do të duhet të ishin Shqipëria dhe Kosova.
Featured image of article: Takimi për ‘Shengenin ballkanik’/ Kurti i përgjigjet Ramës: Shqipëria duhej të priste formimin e qeverisë së Kosovës Edi Rama dhe Albin Kurti

TIRANË– Kryetari i Lëvizjes Vetëvendosje, Albin Kurti i ka kthyer përgjigje kryeministrit Edi Rama lidhur me “Shengenin e Ballkanit”. Në reagimin e tij, Kurti u shpreh se lëvizja ishte e gabuar pasi dy vendet e para që duhet të bashkëpunonin në Ballkanin do të duhet të ishin Shqipëria dhe Kosova.

“Nuk nisë me Serbinë kjo punë, nisë Kosovë-Shqipëri vazhdon Kroaci-Bullgari, vazhdon Sarajevë zyrtare, Podgoricë zyrtare dhe Shkup zyrtar e Beogradi në fund sepse i tillë çfarë është ai, i papenduar për luftërat dhe krimet e shkaktuara, në filtrim të vazhdueshëm me Moskën e (Vladimir) Putinit nuk mund të ketë prioritet, rrjedhimisht mendoj se edhe mbledhja e Novi Sad-it dhe mbledhja e Ohrit ishin gabim në hapa”, tha zoti Kurti.

Më pas, kryeministri i ardhshëm i Kosovës u shpreh se Shqipëria më së paku duhet të kishte pritur krijimin e qeverisë së re për t’i ftuar edhe ata si përfaqësues. Kurti shprehu dyshime lidhur me vendimin për një mbledhje aq të nxituar.

“Meqenëse ka pritur Shqipëria zyrtare një qeveri të re dhe të denjë të Kosovës shumë vite, ka mundur të pres edhe pak javë që të formohet kjo qeveri dhe të bashkëpunojmë të gjithë ne. Unë nuk e kuptoj pse kjo nguti, pse ky nxitim me Novi Sad, me Ohër e nesër me Durrës kur jemi në prag të formimit të qeverisë së Republikës së Kosovës. Pra nëse kanë pritur shumë vite është dashur të presin edhe pak javë”, tha zoti Kurti. 

Më herët Kurti deklaroi se Shqipëria fillimisht duhet të hiqte taksën e rrugës së Kombit para se të unifikohej me vendet e tjera të rajonit. Ndërsa kreu i qeverisë shqiptare Edi Rama i ka kthyer përgjigje Kurtit, duke u shprehur se ishte i vendosur ta heqë kufirin mes Shqipërisë dhe Kosovës.

Autoritetet e Shqipërisë, Serbisë, Maqedonisë dhe Malit të Zi zhvilluan pak ditë më parë një takim në Ohër lidhur me Shengenin Ballkanik. Kosova ka refuzuar që të dërgojë përfaësues pasi Serbia dhe Bosnja e Hercegovina nuk e njohin pavarësinë, ndërsa kritikët e kanë cilësuar një nismë të tillë “Jugosllavia e Re”. 

(k.m/dosja.al)

Shto Koment