Politike

Mbledhja e ministrave të BE pa rezultat, Hahn: 3 vende kundër Shqipërisë e Maqedonisë, vendoset në 18 tetor

  • Negociatat për Shqipërinë, ministri gjerman Roth: Ju mbështesim, dihet pozicioni ynë
  • Ministrat e Jashtëm të Bashkimit Europian janë mbledhur sot në Luksemburg për të përgatitur draftin me konkluzionet kryesore në axhendë për samitin e 17-18 Tetorit, ku do të vuloset edhe fati i Shqipërisë dhe Maqedonisë nëse do të hapen apo jo negociatat. Mbledhja e sotme nuk ka pasur asnjë rezultat. Hahn tha se kundër janë tre vende dhe po punohet me to.
    Featured image of article: Mbledhja e ministrave të BE pa rezultat, Hahn: 3 vende kundër Shqipërisë e Maqedonisë, vendoset në 18 tetor

    LUKSENBURG- Mbledhja e Ministrave të Jashtëm të BE, ku në fokus ishte hapja e negociatave me Shqipërinë dhe Maqedoninë e Veriut përfundoi pa asnjë rezultat. Negociatat për vendin tonë dhe Maqedoninë e Veriut janë në dorë të tre vendeve dhe gjithçka do të vendoset në mbledhjen e liderëve në datat 17 dhe 18 tetor.

    Sot në Luksemburg u përgatit drafti me konkluzionet kryesore të axhendës, që do u kalohet më pas liderëve të vendeve të BE-së në samitin e 17-18 Tetorit ku do të vuloset edhe fati i Shqipërisë dhe Maqedonisë nëse do të hapen apo jo negociatat.

    Para mbledhjes ministri i Jashtëm gjerman, Michael Roth është shprehur se pozicioni i Gjermanisë është mjaft i qartë pasi e mbështet Shqipërinë dhe Maqedoninë e Veriut në lidhje me hapjen e negociatave.  Ndërsa nga Holanda janë shfaqur sërish nota skepticzmi. Ministri i punëve të jashtme Stef Blok ka deklaruar para nisjes së mbledhjes Shqipëria ka ende shumë punë për të bërë.

    Ndërkohë që nga mbledhja pritej shumë, nuk ka ndodhur pasi nuk është marrë një vendim përfundimtar. Ka qenë Komisioneri për Zgjerimin në BE, Johannes Hahn, ka treguar detaje nga mbledhja dhe tha se po punohet që të binden dhe vendet që janë kundër dritës jeshile. Ai u shpreh se dhe vendet kandidate duhet të përmbushin detyrimet e tyre, pasi bllokimi mund të vijë dhe nga çështjet e brendshme politike.

    Shqipëria dhe Maqedonia e Veriut kanë marrë një “PO” nga Gjermania për hapjen e negociatave në 18 tetor nga BE. Për Shqipërinë votuan 395 deputet pro, 188 kundër dhe 16 abstenim, të cilët kanë thënë se për Shqipërinë janë dhe 9 kushte që duhet plotësuar që të nisin negociatat me Bashkimit Evropian. Franca, Holanda, Spanja dhe Danimarka janë skeptike në lidhje me çështjen e negociatave.

    (A.B. Dosja.al)

    • 19:02

      Bushati: Hera e tretë në 16 muaj që po diskutohet për fillimin e negociatave

      Ish-ministri për Evropën dhe Punën e Jashtme, Ditmir Bushati, ka reaguar pas takimit të ministrave të Jashtëm të BE. Në një reagim në mediat sociale, Bushati shkruan se për Shqipërinë BE është mbledhur tre herë në 16 muaj. Sipas tij procesi ka marrë një dekad për të përfunduar dhe nuk po ndikon në procesin e reformave brenda BE-së.

      Ditmir Bushati, Ish-ministër për Evropën dhe Punët e Jashtme

      Është hera e tretë në 16 muaj që BE po diskuton për fillimin e bisedimeve të pranimit me Shqipërinë dhe Maqedoninë e Veriut. Një proces i cili ka të ngjarë të marrë një dekadë për të përfunduar dhe nuk ndikon as në procesin e reformave brenda BE-së, as nevojën për të përmirësuar strategjinë e pranimit me vendet e Ballkanit Perëndimor. Konsolidimi i projektit Evropian nuk mund të përfundojë pa Ballkanin Perëndimor. Zgjeruar BE perëndim, jug, veri, lindje. Vonesa e gjatë për të filluar me juglindje, bazuar në meritën, besueshmërinë dhe parashikueshmërinë. Ky është një provë lakmusi për BE-në si fuqi botërore në një botë të pasigurt!”, shkruan Bushati.

    • 18:20

      Cakaj për Financial Times: Bllokimi i negociatave zvogëlon rolin e BE-së në rajon

       Gazeta prestigjioze “Financial times” i ka kushtuar një hapsirë mediatike hapjes së negociatave të anëtarësimit për Shqipërinë dhe Maqedoninë e Veriut. 24 orë para marrjes së vendimit nëse Shqipëria do të adeerojë në BE, artikulli i “Financial Times” i ka kushtuar një vëmendje të madhe asaj se çfarë është duke ndodhur në Luksemburg dhe asaj çfarë pritet të ndodhë në Bruksel.

      Në këtë artikull të saj evidentohet skepticizmi i Francës dhe i disa vendeve të tjera si Holanda apo Danimarka. Në një prononcim për Financial Times, Ministri në Detyrë per Evropën dhe Punët e Jashtme, Gent Cakaj është shprehur se bllokimi i negociatave do të sillte një ulje të rolit të BE-së në rajon.

      Gent Cakaj

      “Sipas Cakaj një ndërlikim i mëtejshëm i situatës do të sillte “ndarje” mes vendeve të cilat kundërshtojnë ndarjen e çështjeve të Shqipërisë dhe Maqedonisë së Veriut dhe të tjerë që mendojnë se Tirana duhet të paguajë çmimin për avancimin e rastit të Maqedonisë, një këndvështrim që gjen mbështetjen edhe të diplomatëve“,  thuhet në shkrim.

      Franca e cila ka qënë skeptike rreth zgjerimit të BE, thekson se procesi i anëtarësimit duhet të rishikohet para se të shqyrtohet pranimi i vendeve të tjera, pasiguri kjo që ministri Cakaj e quan “dileme false”.

    • 18:08

      Hahn i qartë për negociatat: Përmbyshni detyrimet, bllokimi vjen nga situata e brendshme politike

      Komisioneri për Zgjerimin, Johannes Hahn pas mbledhjes së minsitrave të Jashtëm të BE, ku u diskutua për Shqipërinë dhe Maqedoninë e Veriut, ka zhvilluar një konferencë për mediat duke thënë se sot nuk është arritur asnjë marrëveshje.

      I shoqëruar nga Ministrja e Jashtme e Finlandës, Tytti Tuppurainen, Hahn tha se negociatat mund të bllokohen nga çështjet e brendshme të vendeve kandidate. Hahn tha se për Shqipërinë deri tani janë 25 shtete dhe po punohet për të bindur shtetet tjera.

      Ndërkohë, Tytti Tuppurainen, tha se nuk është arritur marrëveshje dhe se diskutimet të enjtën mes krerëve të shteteve të BE do të vendosin gjithçka.

      Hahn shtoi më tej se: “Situata e brendshme nuk ishte shumë në favor të marrjes së vendimit. Mendoj që duhet të jemi të drejtë me njëri-tjetrin. Shpreh besimin për një vendim pozitiv. Nëse do të kishte një përgjigje negative nuk mund të përjashtohet që shkak të jetë zhvillimet e brendshme. Gjithësecili të jetë i angazhuar për të përmbushur detyrimet që ka”.

    • 17:52

      Hahn: Shqipëria dhe Maqedonia meritojnë negociatat, shpresojmë të bindim ata që s’janë dakord

      Pas mbledhjes së ministrave të Jashtëm të BE-së, komisioneri për zgjerim Johannes Hahn ka dalë në një deklaratë për mediat. Gjatë deklaratës së tij Hahn tha se është besimplotë që liderët e BE-së do të jenë largpamës.

      Shpresoi të bindim disa të cilët nuk janë dakord. Shqipëria dhe Maqedonia e Veriut meritojnë hapjen e bisedimeve për negociatat. Besoi se liderët e Bashkimit Europian do të jenë largpamës“, u shpreh ai.

      Gjithashtu Hahn u pyet nga gazetarët nëse mori ndonjë shenjë që Macron mund të ndryshojë mendje përnegociatat me Shqipërinë.

      Unë nuk kam tregues precizë, nëse e shikoni nga prespektiva politike mendoi që nuk duhet përjashtuar presidenca. Ajo çfarë na duhet është një sinjal pozitiv për të dhënë dritën jeshile për të përgatitur hapjen e negociatave. Ne nuk nisim marrëveshjen të enjten dhe të nisim negociatat të premten. Do nisim me kapitujt 23-24 që kanë të bëjnë me shtetin ligjor. Për të hapur këtë duhet të kemi unanimitet nga të gjitha vendet anëtare. Ka kohë të mjaftueshme për secilin vend. 25 vende janë në favor të hapjes së negociatave“, u përgjigj Hahn.

    • 13:49

      Rama del me urgjencë LIVE për negociatat: Macron s’do zgjerim, kërkon reformim… por dielli do dalë prapë

      Nga kryeministria, me mjekër edhe më të gjatë e të zbardhur, në një pozicion thuajse shtrirë, kryeministri Edi Rama doli sot në një komunikim urgjent për shqiptarët. Përmes faqes së tij në Facebok, Rama tha se debati në Bashkimin Europian për çështjen e negociatave me Shqipërinë dhe Maqedoninë e Veriut sapo ka nisur. Rama tha se Macron nuk do që BE të zgjerohet pa u reformuar njëherë fillimisht, por s’harroi të thoshte se cilido që të jetë vendimi, pas 18 tetorit dielli do të dalë sërish.

      Fjala e Kryeministrit Edi Rama:
      Përshëndetje, vijon intesivisht debati brenda Bashkimit Europian për t’u dakordësuar lidhur me Shqipërinë dhe Maqedoninë e Veriut. Tanimë dihet ajo që unë e kam ndarë me ju shumë kohë më parë. Shumica e vendeve janë pro, për të dyja vendet, edhe për Shqipërinë edhe për Maqedoninë e Veriut. Gjermania, që sot udhëheq fronin e “PO” ka zgjedhur një pozicion të ndryshëm nga ai i shumicës së vendeve anëtare. E ka lidhur “PO” me disa kushte që janë të arsyeshme për ne, dhe jo të parëndësishme për të afruar Francën dhe ato 2-3 vende që janë në pozicion të pafavorshëm për ne. Franca dhe ato 2-3 vende, sidoqoftë deri më tani në një pozicion përfundimtar, siç është plotësisht e mundur që të mos lëvizin deri në fund nga pozicioni i tyre, ashtu është edhe i mundur që të pranohet një vendim kompromis. Presidenti francez ka qasje tjetër për një reformim të thellë të unionit, para zgjerimit. Emmanuel Macron s’është i gatshëm të shtyjë më fortë integrimin e Ballkanit Perëndimor. Është qasje e shkëputur nga tradiocionalja e frontit të “PO”, por kjo s’është qasje kundër Shqipërisë. Asgjë s’mund të përjashtohet deri në minutën e fundit, dhe askush s’duhet të harrojë patatet e nxehta që do diskutohen nga BE. Por fjala e fundit ende s’është thënë. Se di as unë vetë si do përfundojë kjo Odise. Por ja çfarë di me siguri. Vendimmarrja e 18 tetorit s’ka lidhje me atë që kemi bërë ne. Situata e tyre do të ishte po njësoj, dhe po të ishte vend tjetër. Vendimmarrja ka të bëjë me atë që duan vendet. Cilido që të jetë vendimi, dielli do të dalë sërish të nesërmen e 18 tetorit. Europën e duam për fëmijët tanë, për shqiptarët dhe gjeneratat e tjera.

    • 13:25

      Negociatat me Shqipërinë dhe Maqedoninë e Veriut, DW: Franca mund të vendosë veton

      Foto ilustruese

      Ministrat e Jashtëm të BE që diskutojnë të martën (15.10) në Luksemburg për fillimin e bisedimeve të anëtarësimit me Shqipërinë dhe Maqedoninë e Veriut ndoshta do të kenë një diskutim jo fort të gjatë. Franca ka paralajmëruar se do të pengojë me veto fillimin e bisedimeve të anëtarësimit. Ky vend është i mendimit, se reformat e Shqipërisë dhe Maqedonisë së Veriut nuk janë të mjaftueshme, shkruan gazeta gjermane “Handelsblatt”. Presidenti francez, Emmanuel Macron kërkon më parë një reformim të thellë të procesit të anëtarësimit si kusht për të dhënë miratimin e tij.

      Josef Janning, drejtues i zyrës së Berlinit të Këshillit Europian për Marrëdhëniet e Jashtme që i kushtohet politikës së jashtme europiane, e kupton shqetësimin e Francës. “Francezët kanë qenë gjithmonë të shqetësuar se Bashkimi Europian përmes shtimit të anëtarëve do të dëmtohej dhe në fund do të mbetej vetëm tregu, e nëse mbetet vetëm tregu, atëherë as ai nuk do të mbetej një ditë… Po të hedhësh vështrimin pas, mund të thuash, se kjo frikë nuk ishte aq e paargumentuar”, thekson Janning për radion gjermane, “Deutschland Funk”.

      Shqipërisë dhe Maqedonisë së Veriut i duhet perspektiva e anëtarësimit

      Megjithatë eksperti nuk sheh rrugë tjetër për BE, veç çeljes së negociatave. “Duhet parë edhe ana tjetër, nëse nuk ka një qëllim, një perspektivë të besueshme anëtarësimi, atëherë për aktorët politikë aty bëhet e vështirë, për të mos thënë se bëhet shumë e vështirë t’i qëndrojnë kursit për t’i afruar vendet e tyre në mënyrë konsekuente në drejtim të BE.” Sipas tij, fillimi është i lehtë, por më pas puna bëhet serioze dhe pikërisht në këtë fazë duhet vullneti i fortë politik për t’iu mbetur besnik reformave. Në këtë kuptim ndihmon shumë perspektiva e anëtarësimit, thotë Janning.

      Jo vetëm inkurajimi për reforma që i duhet dhënë këtyre vendeve në rrugën e afrimit me standartet e BE është një argument pro çeljes së tyre për ekspertin gjerman. Josef Janning shikon edhe një interes të BE për zgjerimin me Shqipërinë dhe Maqedoninë e Veriut në drejtim të sigurisë. “Për BE shtrohet pyetja a mundet ajo t’i mbajë larg ato demokraci europiane që duan të futen brenda saj. Këtë ajo nuk mund ta bëjë, pa dorëzuar idenë se është vatër e të gjitha demokracive në Europë”, thekson Janning.

      Roth: Kushtet janë përmbushur që të fillojnë negociatat

      Krahas Francës, hezituese është edhe Holanda, e cila më shumë është për t’i thënë po çeljes së negociatave me Maqedoninë e Veriut. Me Shqipërinë ky vend sheh më shumë probleme, u shpreh kryeministri holandez, Mark Rutte në një takim të fundit me kancelaren Merkel në Berlin. Edhe Danimarka është skeptike.

      Në BE veç vendeve të lartpërmendura ekziston një frymë pozitive për çeljen e negociatave, pas rekomandimit pozitiv të dhënë një vit më parë nga Komisioni Europian. Gjermania e mbështet çeljen e negociatave, pas disa kushteve imediate që vendosi Bundestagu, të cilat duhen realizuar deri në konferencën e parë të anëtarësimit, por edhe kushteve të tjera afatgjata.

      Në bisedimet në Luksemburg të martën, Gjermania përfaqësohet nga ministri i shtetit për Europën në Ministrinë e Jashtme, Michael Roth, i cili është një përkrahës i bindur i çeljes së negociatave. Në një intervistë të mëparshme për Deutsche Wellen, Michael Roth theksoi se kemi nevojë për unanimitet në Këshillin Evropian. “Të dyja vendet kanë bërë përparime të jashtëzakonshme. Nga këndvështrimi ynë, kushtet janë përmbushur që të fillojnë negociatat e pranimit. Por, natyrisht, ka ende shumë për të bërë në drejtim të sundimit të ligjit, pavarësisë së gjyqësorit. Edhe çështja e pajtimit në rajon është ende sprovë, jo vetëm për Maqedoninë e Veriut dhe Shqipërinë, por edhe për pjesën tjetër të Ballkanit Perëndimor. ”

      Por nëse thirrjet e Michael Roth, se duhet të dërgojmë mesazhe inkurajuese pozitive në drejtim të Ballkanit Perëndimor do të dëgjohen nga vendet skeptike, kjo është më se e pasigurtë.

    • 12:23

      Negociatat me Shqipërinë, Hahn: Në mbledhjen e ministrave do ketë diskutime të vështira

      Johannes Hahn ka deklaruar se sot në mbledhjen e ministrave të  Jashtëm të vendeve anëtare të Bashkimit Evropian do të ketë diskutime të vështira për çështjen e negociatave me Shqipërinë.

      “Diskutime të vështira, shpresojmë për ditën e gjelbër. Sot është një provë besueshmërie për Bashkimin Europian”, është shprehur Johannes Hahn.

    • 11:41

      Stef Blok flet para nisjes së mbledhjes: Shqipëria ka shumë punë për të bërë

      Steven Blok

      Ministri i punëve të jashtme të Holandës Stef Blok ka deklaruar para nisjes së mbledhjes së ministrave të jashtëm të BE se Shqipëria dhe Maqedonia e Veriut do të vendosin në bazë të meritave.  Për Shqipërinë ai theksoi se ende ka shumë punë për të bërë.

      “Qëndrimi hollandez është se çdo vend duhet të vlerësohet në bazë të meritave. Të dyja vendet kanë bërë shumë përpjekje. Lidhur me Maqedoninë e Veriut ne konsiderojmë se duhet të ndërmerret një hap i rëndësishëm siç është ligji për Prokurorinë Speciale dhe nëse ky kusht përmbushet atëherë ne mendojmë se negociatat e anëtarësimit mund të fillojnë. Lidhur me Shqipërinë, ne mendojmë se ka ende punë për të bërë dhe se vendi nuk është gati për hapjen e negociatave.”, u shpreh ai. 

    • 11:40

      Çelja e negociatave/Ministrja franceze: Nuk jemi për veto, duhet reformimi i BE-së

      Ministrja franceze Amelie de Montchalin

      Ministrja franceze Amelie de Montchalin, deklaroi sot para nisjes së mbledhjes së Ministrave të Jashtëm të BE në Luksemburg se Franca nuk do të vendosë veton për çeljen e negociatave. Montchalin tha se para nisjes së bisedimeve me Shqipërinë dhe Maqedoninë e Veriut, duhet të riformohet vetë Bashkimi Europian.

      Nuk jam sot këtu për të vendosur veto, por në një frymë shkëmbimi mendimesh mbi dy parime. Së pari, hapja e negociatave kërkon përgatitje nga Bashkimi Europian dhe ne konsiderojmë sot që ne duhet të rishikojmë në thellësi procesin e negociatave të anëtarësimit.

      Procesi i zgjerimit është zhgënjyes, i gjatë për vendet përkatëse dhe nuk krijon besim te vendet anëtare, sepse tretet në kohë. Pra, së pari, ne duhet të diskutojmë mbi reformën e procesit të zgjerimit. Kapitujt që hapen e mbyllen si një telenovelë pa fund nuk i përgjigjen pritshmërisë së qytetarëve në rajon. Ne kemi parë fluks migracioni nga vendet që kanë përfunduar negociatat dhe janë bërë anëtare, si Rumania, Bullgaria apo Kroacia. Pra, është një çështje qasje mbi procesin. A është ky proces efikas? Përgjigjja është jo dhe ne kemi shumë vende që e mbështesin këtë qasje lidhur me riorganizimin e negociatave të anëtarësimit. Së dyti, duhet të sigurohemi se reformat që janë kërkuar për t’u zbatuar si kushte për hapjen e negociatave të jenë reale.  Që të jenë votuar, por edhe zbatuar. Këtë do diskutojmë sot, Por, dua të theksoj, se Franca nuk i kundërvihet perspektivës europiane të vendeve të Ballkanit”, u shpreh de Montchalin.

    • 9:54

      Negociatat për Shqipërinë, ministri gjerman Roth: Ju mbështesim, dihet pozicioni ynë

      Ministri gjerman Michael Roth ka reaguar në lidhje me hapjen e negociatave për Shqipërinë. Në një deklaratë për mediet, Roth është shprehur se pozicioni i Gjermanisë është mjaft i qartë pasi e mbështet Shqipërinë dhe Maqedoninë e Veriut në lidhje me hapjen e negociatave. “Pozicioni ynë dihet. E mbështesim Shqipërinë dhe Maqedoninë e Veriut në çeljen e negociatave,”- është shprehur ai.

    Shto Koment