Përshkallëzohet situata në Lindjen e Mesme/ Rrëzohet marrëveshja Iran-SHBA, ndërsa sulmet sa vijnë dhe shtohen

Foto ilustruse

IRAN- Irani ka njoftuar pezullimin e të gjitha detyrimeve të tij sipas Memorandumit të Mirëkuptimit me Shtetet e Bashkuara, duke përmendur shkeljet e mëparshme të marrëveshjes nga pala amerikane. Zëvendësministri i Jashtëm i Iranit, Kazem Garibabadi, tha se vendimi u mor sepse sipas Teheranit, Uashingtoni tashmë ka shkelur dhe pezulluar të gjitha angazhimet e tij. Siç argumentoi ai, Irani nuk po zbaton më detyrimet që kishte marrë sipas marrëveshjes.

"Ne ishim në negociata, por vetë amerikanët ndërmorën veprime agresive, duke shkelur angazhimet e tyre", tha zyrtari iranian, duke shtuar se prioriteti i vendit tani është të mbrohet nga zhvillimet. Mediat shkruajnë se Irani nisi sulme me raketa dhe dronë kundër objektivave në Kuvajt, Bahrein dhe Jordani, duke goditur objektet e lidhura me forcat amerikane.

Shtetet e Gjirit Persik dënuan sulmet iraniane ndaj infrastrukturës civile, duke i quajtur ato krime lufte dhe një shkelje serioze të ligjit ndërkombëtar dhe Kartës së OKB-së. Irani ka thënë se nuk planifikon të rifillojë bisedimet me Uashingtonin, duke i dhënë përparësi mbrojtjes së vendit dhe hakmarrjes për sulmet amerikane./Dosja.al

Pamje

IRAN- Sekretari i Përgjithshëm i Këshillit të Bashkëpunimit të Gjirit (GCC), dënoi sulmet iraniane ndaj infrastrukturës civile në Bahrein, Jordani dhe Kuvajt, duke i cilësuar ato si “krime lufte”. Ai kërkoi që përgjegjësit të mbajnë përgjegjësi dhe paralajmëroi për pasojat e sulmeve ndaj objekteve civile në rajon.

"Veprimet e Iranit përbëjnë një përshkallëzim jashtëzakonisht të rrezikshëm, një shkelje serioze të së drejtës ndërkombëtare dhe Kartës së Kombeve të Bashkuara, dhe krime lufte (...) duke pasur parasysh shënjestrimin e qëllimshëm të infrastrukturës dhe objekteve civile", tha Jassem Mohammed Al-Budaywi në një deklaratë.

Irani nisi sulme të mëtejshme ndaj aleatëve të Uashingtonit në Gjirin dhe Jordanisë të martën pasi SHBA- të kryen një natë të shtatë radhazi sulmesh ndaj objektivave ushtarake iraniane, duke përshkallëzuar luftën një javë pasi një marrëveshje armëpushimi u shemb. Kuvajti ka qenë shënjestër e sulmeve të përsëritura, me një impiant desalinimi të goditur, ndërsa Aeroporti Ndërkombëtar i Kuvajtit ka pezulluar operacionet për shkak të kërcënimeve të përsëritura nga raketat dhe dronët.

Mediat e huaja raportojnë se Korpusi i Gardës Revolucionare tha se kishte goditur një qendër mbështetjeje ushtarake amerikane në Kampin Arifjan dhe kishte shkatërruar një instalim radari në Bazën Ajrore Ali Salem. Korporata e Naftës së Kuvajtit më vonë tha se një nga objektet e saj të naftës ishte goditur nga sulme të përsëritura iraniane, duke shkaktuar dëme dhe lëndime të konsiderueshme, sipas agjencisë shtetërore të lajmeve. Forcat e armatosura të Kuvajtit thanë se kishin kapur raketa balistike dhe dronë iranianë herët këtë mëngjes, duke shtuar se zjarrfikësit dhe punëtorët e naftës u plagosën si pasojë e sulmeve. Irani është përgjigjur ndaj sulmeve amerikane ndaj urave, objekteve energjetike dhe infrastrukturës tjetër. 

"Meqenëse nuk ka institucion ndërkombëtar për të parandaluar brutalitetin e forcave të armatosura amerikane, nuk kemi zgjidhje tjetër veçse të ndjekim urdhrin kuranor: Kushdo që ju sulmon, sulmoni me të njëjtën monedhe", tha Garda në një deklaratë, duke paralajmëruar aleatët e SHBA-së në rajon të presin më shumë sulme. 

Ministria e Shëndetësisë e Iranit tha të hënën se 50 persona ishin vrarë dhe më shumë se 500 të plagosur në sulmet amerikane në tre javët e fundit. Garda shënjestroi një strukturë në Bahrein që strehon avionë luftarakë amerikanë në Bazën Ajrore Sheikh Issa dhe një qendër të dhënash inteligjence. Garda tha gjithashtu se kishte shkatërruar të paktën dy avionë luftarakë amerikanë dhe tre avionë të tjerë në një sulm me raketa dhe dronë në mëngjes herët në bazën amerikane në Al-Azraq, Jordani, sipas televizionit shtetëror iranian.

Irani gjithashtu nisi sulme ndaj Arabisë Saudite për herë të parë në rreth tre muaj, sipas dy personave të njohur me çështjen, duke shkaktuar alarme paralajmëruese të hershme në Al-Kharj, në lindje të kryeqytetit Riad, dhe në Yanbu në bregdetin e Detit të Kuq të vendit./Dosja.al

Foto

KUVAJT- Kuvajti është vënë në shënjestër të sulmeve iraniane, të cilat kanë shkaktuar zjarre në disa zona të vendit dhe kanë plagosur disa zjarrfikës. Departamenti i Zjarrfikësve të Kuvajtit njoftoi se ekipet e emergjencës ndërhynë pas dy zjarreve të shpërthyera në lokacione të ndryshme, menjëherë pas sulmeve të fundit.

Sipas autoriteteve, një nga zjarret shkaktoi plagosjen e disa zjarrfikësve dhe një punonjësi, të cilët u dërguan për trajtim mjekësor. Ndërkohë, një tjetër sulm iranian goditi një central energjie dhe shkripëzimi, duke shkaktuar zjarr dhe duke detyruar mbylljen e disa njësive të prodhimit.

Mediat e huaja bëjnë me dije se ky ishte sulmi i dytë ndaj një impianti të tillë në Kuvajt brenda pak ditësh, duke rritur shqetësimet për sigurinë e infrastrukturës energjetike në rajonin e Gjirit, në një kohë tensionesh të larta mes Iranit dhe vendeve të tjera të Lindjes së Mesme. Në një deklaratë, Ministria e Energjisë Elektrike, Ujit dhe Energjisë së Rinovueshme tha se sulmi, i cili u krye si pjesë e sulmit të urryer iranian, shkaktoi një zjarr në një nga seksionet e centralit, duke bërë të nevojshme miratimin e masave paraprake në lidhje me funksionimin e tij.

Ushtria iraniane tha në orët e para të mëngjesit se kishte shënjestruar objektiva ushtarake në Kuvajt dhe Jordani në hakmarrje për sulmet ajrore amerikane mbi Republikën Islamike, sipas televizionit shtetëror. Forcat e armatosura iraniane thanë se shënjestruan bazën ushtarake Al Udiri dhe bazën Ali Ash Salem në Kuvajt dhe bazën ajrore Al Azraq në Jordaninë lindore./Dosja.al

SHBA- Shtetet e Bashkuara i kanë zgjeruar sulmet kundër Iranit herët në mëngjes të shtunën, duke kaluar nga pika e nxehtë e Ngushticës së Hormuzit në disa vende të tjera në Iranin qendror dhe jugor. Ndërkohë, Irani ka vazhduar t’i godisë aleatët e SHBA-së në Gjirin Persik, duke e dobësuar edhe më tej armëpushimin e brishtë.

Komanda Qendrore e Shteteve të Bashkuara (CENTCOM) njoftoi se forcat e saj "nisën një valë sulmesh kundër Iranit... për natën e shtatë radhazi. Sulmet synojnë ta vazhdojnë dobësimin e kapaciteteve ushtarake iraniane, sipas urdhrit të Komandantit të Përgjithshëm".

Rreth gjashtë orë e gjysmë më vonë, në orën 05:00 sipas kohës së Iranit, CENTCOM njoftoi se vala e sulmeve kishte përfunduar.

CENTCOM theksoi se kishte goditur "objekte të vëzhgimit, infrastrukturë të logjistikës ushtarake, depo nëntokësore armësh dhe kapacitete detare. Forcat amerikane përdorën avionë luftarakë, dronë ajrorë, anije luftarake dhe mjete të tjera ushtarake".

Ndërkohë, thuhet se trafiku në Ngushticën strategjike të Hormuzit është ndalur pothuajse plotësisht, për shkak të veprimeve të shumta të forcave amerikane dhe lëshimit të raketave nga pala iraniane.

Të shtunën, media shtetërore iraniane raportoi për disa sulme nga forcat amerikane – përfshirë me avionë luftarakë – përgjatë Ngushticës së Hormuzit, por edhe në vende larg kësaj rruge ujore të rëndësishme, përfshirë qytetin Yazd në Iranin qendror, qytetin jugperëndimor Ahvaz dhe provincën Khuzestan në skajin verior të Gjirit Persik.

Mediat iraniane raportuan se "disa rrugë transporti" në zonat e provincës Hormozgan – e cila kufizohet me Ngushticën e Hormuzit – ishin bllokuar si pasojë e sulmeve të "armikut" ndaj rrugëve kryesore, të paktën dy urave dhe një tuneli rrugor.

Një ditë më parë, media shtetërore iraniane kishte raportuar se të paktën pesë ura ishin goditur në jug të vendit.

Shtatë njerëz u tha se u vranë nga sulmet mbi urat në portin jugor Bandar Khamir, ku u godit gjithashtu edhe stacioni hekurudhor.

Gjithashtu u tha se ishte goditur një aeroport më në lindje dhe larg bregdetit, në qytetin Iranshahr, në një provincë që kufizohet me Pakistanin.

Agjencia e lajmeve Reuters tha se pamjet që kishte verifikuar tregonin rrënoja, parmakë të thyer dhe një automjet të dëmtuar mbi një urë të shkatërruar në Bandar Khamir.

Ministri i Jashtëm iranian, Abbas Araqchi, tha se tre njerëz u vranë teksa po kalonin urën.

CENTCOM nuk shpalosi caqet e sulmeve të saj dhe shumë prej pretendimeve të Iranit nuk mund të verifikohen në mënyrë të pavarur.

Ndërkohë, gjeneralmajori iranian, Mohsen Rezaei, kërcënoi se Teherani është gati të rifillojë "operacione sulmuese në shkallë të plotë" nëse sulmet amerikane vazhdojnë edhe për dy ose tre ditë të tjera.

Rezaei, këshilltar i lartë ushtarak i udhëheqësit suprem iranian, Mojtaba Khamenei, tha: "Irani nuk do të kufizohet më në përgjigje të barabarta hakmarrëse... dhe asnjë kufi politik nuk do të jetë i sigurt".

Këtë deklaratë ai e bëri sipas agjencisë iraniane të lajmeve IRIB.

Shtetet arabe të Gjirit, aleate të SHBA-së, raportuan për raketa dhe dronë iranianë që po afroheshin, me sulme që shkaktuan të plagosur dhe dëme në objekte të infrastrukturës civile.

Agjencia iraniane Tasnim raportoi të premten mbrëma se marina e Korpusit të Gardës Revolucionare Islamike (IRGC) kishte "shënjestruar" një anije me flamur tajlandez që po përpiqej të kalonte nëpër Ngushticën e Hormuzit.

Irani njoftoi gjithashtu sulme ndaj vendeve të Gjirit që strehojnë baza ushtarake amerikane, përfshirë Bahrejnin, Katarin dhe Kuvajtin, si dhe ndaj një anijeje amerikane në pjesën veriore të Oqeanit Indian.

Në një postim në platformën X, ushtria e Kuvajtit citoi një zëdhënës të Ministrisë së Mbrojtjes, i cili tha: "Agresioni mëkatar iranian rezultoi në goditjen e disa objekteve dhe kampeve të ushtrisë së Kuvajtit me dronë armiqësorë, duke shkaktuar plagosjen e një numri ushtarësh të forcave tokësore kuvajtiane gjatë kryerjes së detyrës".

Ushtria e Kuvajtit tha gjithashtu se një zjarr shpërtheu dhe shkaktoi dëme në njësitë e prodhimit të energjisë në një central të energjisë elektrike dhe të desalinizimit të ujit, megjithëse koha e saktë e këtij sulmi nuk ishte e qartë.

Marina iraniane lëshoi një raketë lundruese bregdet-det drejt asaj që e quajti anije armiqësore amerikane në pjesën veriore të Oqeanit Indian, raportoi agjencia shtetërore IRNA.

Sipas marinës iraniane, lëshimi i raketës shkaktoi "frikë dhe panik" dhe detyroi anijen të largohej jashtë rrezes së veprimit të forcave detare iraniane.

Një zëdhënës i Kombeve të Bashkuara tha se sekretari i Përgjithshëm, Antonio Guterres, është i shqetësuar për përshkallëzimin më të fundit, duke përmendur në mënyrë të veçantë "sulmet ndaj infrastrukturës civile në Iran dhe në gjithë rajonin".

CENTCOM deklaroi gjithashtu se gjatë tri ditëve të para të bllokadës së rinovuar të porteve iraniane, forcat amerikane kanë devijuar katër anije tregtare, kanë çaktivizuar një tjetër dhe kanë hipur në bord të një anijeje për të "siguruar respektimin e plotë" të bllokadës.

Sipas kompanisë së të dhënave Kpler, transporti detar përmes Ngushticës së Hormuzit – përmes së cilës para luftës kalonin rreth 20 për qind e furnizimeve botërore me naftë bruto dhe gaz – është ndalur pothuajse plotësisht pas rifillimit të shkëmbimit të sulmeve.

Vetëm tetë anije kaluan nëpër ngushticë më 16 korrik, shifra më e ulët në tri javë. Një ditë më parë kishin kaluar 15 anije, ndërsa dy javë më parë numri ishte 48, sipas Kpler.

Para fillimit të luftës, mesatarisht më shumë se 100 anije kalonin çdo ditë përmes kësaj rruge ujore strategjike./REL

Pamje

IRAN- Përplasja ushtarake midis Shteteve të Bashkuara dhe Iranit po hyn në një fazë të re, më të rrezikshme, ndërsa sulmet ajrore vazhdojnë për të shtatën natë radhazi, ndërsa tensionet rriten rreth Ngushticës së Hormuzit, një nga korridoret më të rëndësishme të transportit të naftës në botë. Mësohet se sulmet e fundit amerikane goditën objektiva në provincën Hormozgan, në Iranin jugor, duke vrarë tre persona dhe duke plagosur tetë të tjerë. 

Teherani u përgjigj pothuajse menjëherë, duke njoftuar sulme ndaj objektivave ushtarake amerikane në vendet fqinje. Garda Revolucionare tha se kishte goditur një bazë ajrore të përdorur nga SHBA-të në Bahrein. Dronët iranianë që mbanin eksplozivë goditën hangarë avionësh dhe parkingje të përdorura nga Forcat Ajrore Amerikane në bazën Sheikh Issa, e cila konsiderohet një nga qendrat më të rëndësishme operacionale dhe logjistike të Forcave Ajrore Amerikane dhe Marinës Amerikane në rajon.

Sipas raportimeve të huaja, forcat iraniane goditën gjithashtu instalimet ushtarake amerikane në Kuvajt dhe Jordani.  Një central i dytë elektrik dhe desalinimi u shënjestrua nga një sulm iranian, i cili shkaktoi një zjarr dhe ndërpreu funksionimin e disa njësive të prodhimit, një ditë pas një sulmi të ngjashëm në një central tjetër që gjithashtu shkaktoi dëme. Ministria e Energjisë Elektrike, Ujit dhe Energjisë së Rinovueshme tha se ky sulm shkaktoi një zjarr në një nga seksionet e centralit, gjë që bëri të nevojshme marrjen e masave parandaluese në lidhje me funksionimin e tij. 

Interesi më i madh në transportin detar ndërkombëtar është përqendruar në zhvillimet rreth Ngushticës së Hormuzit. Garda Revolucionare pretendoi se dy tankerë shpërthyen dhe u ndezën në flakë  kur hynë në një rrugë detare të minuar në jug të Ngushticës, duke ia atribuar incidentin udhëzimeve mashtruese nga agjencitë amerikane. Pala iraniane nuk dha informacion mbi flamujt e anijeve, kompanitë e menaxhimit apo ndonjë viktimë. Ky version u hodh poshtë nga Komanda Qendrore e SHBA-së, e cila mohoi se një incident i tillë ndodhi ose se kishte ndonjë përfshirje të forcave amerikane.

Në të njëjtën kohë, Garda Revolucionare njoftoi se kishte sekuestruar katër anije cisternë, duke pretenduar se po përpiqeshin të kalonin nëpër Ngushticën e Hormuzit me mbështetjen e Shteteve të Bashkuara. Deri më tani, nuk është bërë publik asnjë informacion mbi identitetin e anijeve apo fatin e ekuipazheve të tyre, ndërsa nuk ka konfirmim të pavarur të pretendimeve përkatëse. Zhvillimet e fundit intensifikojnë shqetësimet e komunitetit ndërkombëtar detar, pasi çdo përshkallëzim i ri ushtarak në rajon rrit rrezikun për sigurinë e lundrimit dhe lëvizjen e ngarkesave të energjisë përmes Ngushticës së Hormuzit./Dosja.al

IRAN-  Forcat amerikane kryen sulme ndaj Iranit për natën e shtatë radhazi të premten. Në një deklaratë të postuar në X, Komanda Qendrore e Shteteve të Bashkuara tha se forcat e saj goditën vendet e mbikëqyrjes, infrastrukturën logjistike ushtarake, depot nëntokësore të armëve dhe kapacitetet detare.

“CENTCOM vazhdon ta mbajë Iranin përgjegjës sipas udhëzimeve të Komandantit të Përgjithshëm, ndërsa zbaton plotësisht një bllokadë detare kundër porteve iraniane”, tha ushtria në një deklaratë.

Agjencia shtetërore e lajmeve Fars e Iranit raportoi se forcat iraniane ishin përgjigjur duke sulmuar aleatët dhe bazat e SHBA-së në rajon, përfshirë bazën ajrore Ali Al Salem në Kuvajt dhe një numër vendesh komunikimi në Bahrein.

Ushtria e Kuvajtit njoftoi të shtunën në mëngjes se mbrojtja ajrore lokale po përballej me "sulme armiqësore me raketa dhe dronë". Ushtria e Jordanisë thuhet gjithashtu se kishte kapur 10 raketa iraniane herët të shtunën.

Euronews raporton se, trafiku detar në Ngushticën e Hormuzit, një nga pikat kryesore të tranzitit të naftës dhe gazit në botë, mbetet në nivele të reduktuara për shkak të konfliktit të vazhdueshëm. Ngushtica ka qenë një pikë qendrore e tensioneve midis Uashingtonit dhe Teheranit, me Iranin që në fakt e mbylli rrugën ujore pas shpërthimit të konfliktit në shkurt, duke shkaktuar turbulenca në tregjet e energjisë.

Të dy kombet me sa duket kishin rënë dakord për një marrëveshje për të rihapur kalimin si pjesë e memorandumit të mirëkuptimit të qershorit, por luftimet e rifilluara kanë bërë që bisedimet e paqes të pengohen.

Sipas kushteve të marrëveshjes së përkohshme , SHBA-të dhe Irani kishin rënë dakord të ndërprisnin armiqësitë. SHBA-të do të hiqnin bllokadën detare ndaj Iranit, ndërsa Teherani do të rihapte Ngushticën e Hormuzit dhe do të riafirmonte se nuk do të sigurojë ose zhvillojë armë bërthamore. Memorandumi u dha të dyja palëve 60 ditë për të arritur një marrëveshje përfundimtare./Dosja.al