Politike

Largimi i tri drejtorëve në Vlorë, Lame: Këto probleme janë kudo, por aty s’ka “Durim”

Lame i pyetur nga mediat se çfarë po ndodh në Vlorë, ku drejtorët po dorëhiqen dhe ka akuza nga disa pronatë tokash, ka thënë se ky është një problem që do zbulohet dhe në qytete të tjera. 

ELBASAN– Drejtuesi i Kadastrës Artan Lame ka folur sot për herë të parë në lidhje me situatën e krijuar në Vlorë. Lame i pyetur nga mediat se çfarë po ndodh në Vlorë, ku drejtorët po dorëhiqen dhe ka akuza nga disa pronatë tokash, ka thënë se ky është një problem që do zbulohet dhe në qytete të tjera. Kreu i Kadastrës, problemin e Vlorës e quajti një gjë normale duke thënë se  dorëheqje do ketë sërish dhe në Vlorë, Durrës e Shkodër, pasi nuk mbulojnë dot shkeljet e bëra në 28 vite.

Problemi si ky i Vlorë do dëgjoni dhe në qytete të tjera. Sot jemi në Elbasan dhe këtu do dëgjoni problem të tillë, dhe në Shkodër, në Durrës e Sarandë. Por problemi i Vlorës në krahasim me qytetet e tjera është se në këtë qytet nuk gjen dot një njeri që quhet Durim, prandaj është ndryshe. Probleme të tilla do gjeni kudo, për një arsye të thjeshtë. Kanë rënë piramidat e vjetra të pushtetit dhe nuk i mbulon dot askush këto që janë bërë në 28 vite“, u shpreh Lame.

Deklarata e Lames vjen pas dorëheqjes së tretë brenda muajit në Kadastër. Pas dorëheqjeve të para, dje ka dhënë dorëheqjen edhe drejtoresha e Kadastrës në Vlorë,  Elona Hodaj dhe zv/drejtori, Krenar Xhemali.

Konflikti për pronën në Jalë

Në 12 shkurt, gjykata e Apelit në Vlorë ka vendosur që t’i japë pronën familjes Gjoka, dhe të lejojë regjistrimin e pronës. Procesi ka vijuar, dhe pronarët jo vetëm që kanë marrë pronën, po kanë bërë edhe shitje në palë të treta, duke zbatuar vendimin e Apelit. Ndërkohë një vendim i gjykatës së Lartë më 6 qershor, bën që palët të hyjnë në një tjetër konflikt. Gjykata e Lartë ka vendosur anulimin e vendimit të Gjykatës së Apelit Vlorë, por palët tashmë kishin nisur zbatimin e vendimit të Apelit. Dosja.al zbuloi e para se prona për të cilën palët kanë hyrë në konflikt është trualli në të cilin është ndërtuar kompleksi “Folie Marine”.

Shkarkimet në Kadastrën e Vlorës

Deri më tani, janë tri drejtorë të larguar nga Kadastra e Vlorës, bashkë me tri nëndrejtorë të kësaj kadastre. Drejtorët e larguar pretendojnë se vendimi i Gjykatës së Lartë, është i pavlefshëm dhe nuk mund të zbatohet, pasi palët e kanë zbatuar vendimin e Gjykatës së Apelit. Javën e shkuar, për të njëjtën pronë, drejtoresha që u largua sot, Elona Hodaj dhe zv.drejtori Taulant Canameti u përplasën me njëri-tjetrin. Me disa bodigardë, Canameti shkoi dhe firmosi zbatimin e Gjykatës së Lartë, ndërsa Hodaj e anuloi me arsyetimin se Canameti s’kishte tagër për të bërë një urdhër të tillë.

(A.B. Dosja.al)

Shto Koment