Aktualitet

Shembja e shpatit të malit në Dragostunjë, reagon drejtori i ARRSH: Është një fenomen natyror, nuk lidhet me punimet që po kryhen në këtë segment rrugor

Ai theksoi se, pavarësisht se trasa e re kalon mbi malin ku ndodhi rrëshqita, ndërhyrjet nuk kanë ndikuar në destabilizimin e masivit shkëmbor.

1 Shkurt 2026, 17:56 Nga E.d
Shembja e shpatit të malit në Dragostunjë, reagon drejtori i
Ami Kozeli

LIBRAZHD- Qindra automjete ndodhen të bllokuara prej më shumë se tetë orësh si pasojë e shëmbjes së shpatit shkëmbor në zonën e njohur si Kthesat e Dragostunjës, në aksin rrugor Librazhd–Prrenjas. Në lidhje më këtë situatën ka reaguar drejtori i Autoritetit Rrugor Shqiptar (ARRSH), Ami Kozeli.

Ai deklaroi se shembja është një fenomen natyror, i shkaktuar nga mbingopja e malit me ujë, dhe se nuk lidhet me punimet që po kryhen në këtë segment rrugor. Ai theksoi se, pavarësisht se trasa e re kalon mbi malin ku ndodhi rrëshqita, ndërhyrjet nuk kanë ndikuar në destabilizimin e masivit shkëmbor. Kozeli tha se kontraktori po bën pastrimin dhe se synimi është që të hapen të dyja korsitë.

”Ne kemi një shpat që për shkak të reshjeve të shumta është i mbingopur me ujë. Kjo ka shkaktuar edhe këtë rrëshqitje. U bë rrëzimi i komanduar pasi kishte rrezik. Dhe tashmë kontraktori po bën pastrimin dhe shpresojmë që të lirohet për 20-30 minuta.

Synimi është që të hapen të dyja korsitë por është edhe një masiv shumë i madh që do të dojë punime me matrapik. Kemi konstatuar edhe me sy të lirë se mali është i mbingopur nga uji, çka ka sjellë shembjen e shpatit. Nuk ka asnjë lidhje me punimet që po kryhen në këtë segment,” deklaroi drejtori i ARRSH, duke iu përgjigjur shqetësimeve të ngritura nga qytetarët dhe mediat.

Autoritetet  përkatëse po vijojnë punën për pastrimin e rrugës dhe stabilizimin e zonës, ndërsa Policia Rrugore ndoshet në terren, ku po ndihmon drejtuesit e mjeteve të përdorin akse alternative në drejtim të Korçës dhe Elbasanit./Dosja.al

ami kozeli librazhd–prrenjas arrsh

Sondazh

Poll

MË SHUMË