Aktualitet

Incidenti i Ramës me gazetaren Meta, Rrjeti SafeJournalists: Akt i papranueshëm dhe alarmues

Po ashtu theksohet se ky incident bën pjesë në një model shqetësohes ku Rama tregon përçmimin ndaj gazetarëve.

19 Mars 2024, 15:08 Nga I.A
Incidenti i Ramës me gazetaren Meta, Rrjeti SafeJournalists: Akt i
Rrjeti SafeJournalists

TIRANË- Rrjeti i SafeJournalists ka reaguar për incidentin e ndodhur ditën e sotme të kryeministrit Edi Rama me gazetaren Ambrozia Meta.  Me anë të një njoftimi për mediat, SafeJournalists e ka quajtur tentativën e Ramës për të prekur fytyrën e Metës si akt të paranueshëm dhe alarmues. Po ashtu theksohet se ky incident bën pjesë në një model shqetësohes ku Rama tregon përçmimin ndaj gazetarëve.

Reagimi i SafeJournalists:

Në konferencën e sotme për shtyp, kryeministri Edi Rama nuk pranoi t’u përgjigjej pyetjeve të gazetares Ambrozia Meta dhe tentoi në mënyrë të papërshtatshme t’i prekte faqen. Pas një takimi me drejtuesit politikë të rretheve në selinë e Partisë Socialiste, kryeministri Rama mbajti një konferencë të improvizuar për shtyp. Gjatë kësaj ngjarje, ai u mor në pyetje për një projekt investimi në zonën e Sazanit dhe Zvërnecit, i lidhur me Jared Kushner, dhëndrin e ish-presidentit Donald Trump. Ambrozia Meta kërkoi përgjigje për përfitimet e projektit për shqiptarët, procedurat e kontraktimit, ekzistencën e një studimi fizibiliteti dhe nëse do të zbatoheshin zbritje tatimore të ngjashme me ato për investimin në Portin e Durrësit. Refuzimi i Kryeministrit për t’iu përgjigjur këtyre pyetjeve me interes publik, i ndjekur nga komenti i tij nënçmues – “injoranca nuk është argument” – dhe kontakti fizik duke tentuar t’i prekte faqen, është i papranueshëm dhe alarmues.

Ky incident është pjesë e një modeli shqetësues ku Kryeministri Rama ka shfaqur përçmim ndaj gazetarëve, veçanërisht grave, që bëjnë pyetje sfiduese. Historia e tij e shmangies së pyetjeve, e shoqëruar me veprime hakmarrëse si ndalimi i gazetarëve nga konferencat e shtypit dhe kërkesa për “riedukim” nënvizon një mohim të lirisë së medias dhe integritetit gazetar (Sulm i mëparshëm ndaj Ambrozia Meta dhe Sulm ndaj Klevin Muka). Rrjeti SafeJournalists e konsideron një sjellje të tillë si një kërcënim drejtpërdrejt për parimet e transparencës dhe përgjegjësisë që mbështesin një shoqëri demokratike. Frikësimi me të cilin përballen gratë gazetare, në veçanti, jo vetëm që minon të drejtat e tyre profesionale, por gjithashtu përjetëson një kulturë frikësimi ndaj grave dhe pjesëmarrjes së tyre në hapësirën publike.

Ne kërkojmë që Kryeministri Rama të japë një kërkesë publike për falje për Znj. Meta dhe komunitetin e medias në përgjithësi. Ne insistojmë për një angazhim të respektshëm dhe konstruktiv me median, duke njohur rolin themelor që gazetarët luajnë në monitorimin e pushtetit dhe në nxitjen e diskursit publik. Ne do të vazhdojmë ta monitorojmë nga afër këtë situatë, duke mbrojtur të drejtat dhe sigurinë e gazetarëve. Ne i kujtojmë të gjithë palëve të interesuara se një shtyp i lirë është thelbësor për demokracinë, duke shërbyer si një monitorues për shoqërinë dhe një zë kritik për t’i mbajtur ata në pushtet përgjegjës. Rrjeti SafeJournalists do të informojë palët e interesuara përkatëse kombëtare dhe ndërkombëtare për këtë rast.

Kryeministri Edi Rama është përfshirë në një incident ditën e sotme me gazetaren Ambrozia Meta, e cila po i bënte pyetje.  Rama teksa është larguar nga gazetarët, ka tentuar që të prek në faqe gazetaren, ndërkohë që kjo e fundit i ka kërkuar që të mos e bëj këtë gjë.  

rrjeti safejournalists

Sondazh

Poll

MË SHUMË