Aktualitet

Policia në "errësirë" për gjurmët e Vis Martinajt/ Vlora "distancohet", Rrumbullaku: Heton prokurori

Një përngjarje me rastin e zhdukjes së Radoje Zvicer në Serbi, për të cilin gjithashtu nuk dihet asgjë, po e kthen rastin e Martinajt në një "telenovelë". 

12 Tetor 2022, 11:57 Nga f.g
Policia në "errësirë" për gjurmët e Vis
Muhamet Rrumbullaku dhe Gentian Berberi

TIRANE- Kur kanë kaluar gati 63 ditë nga zhdukja e të shumëkërkuarit Ervis Martinaj, Policia e Shtetit heziton të japë qoftë edhe një copëz deklarate se ka informacion mbi gjurmët e fundit apo me skenarin e zhdukjes apo inskenimit. Në kohën kur në media vazhdojnë të dalin dëshmi dhe informacione mbi kontaktet e fundit të Martinajt me persona të botës së krimit dhe gazetarët ndajnë detaje për takimet e fundit, Policia deklaron se nuk ka asnjë informacion. Ndryshe nga sa u deklarua disa javë më parë, kur Drejtori i përgjithshëm i Policisë së Shtetit, Muhamet Rrumbullaku deklaroi se Policia do të flasë shumë shpejt me prova dhe fakte.

“Strukturat kundër kriminalitetit janë të angazhuara maksimalisht. Do të flasim shumë shpejt me fakte dhe prova”, u shpreh kreu i Policisë së Shtetit më 23 shtator 2022. 

Por javët kanë kaluar dhe asnjë provë nuk është deklaruar se posedohet nga autoritetet e zbatimit të ligjit. Ndërkohë që në media, skenarët vazhdojnë të vërtiten. Një përngjarje me rastin e zhdukjes së Radoje Zvicer në Serbi, për të cilin gjithashtu nuk dihet asgjë, po e kthen rastin e Martinajt në një "telenovelë". 

I pyetur sot nga gazetarët, Drejtori i Policisë së Vlorës, Gentian Berberi deklaroi se struktura e Vlorës nuk ka dijeni dhe nuk i takon të japë informacion. Drejtori konfirmoi kontrollet por vetëm kaq. 

“E vërtetë që FNSH ka qenë prezent ne qytetin e Vlorës. Ka një plan të detajuar nga shërbimet e policisë, e kemi pasur dhe mbështetjen e tyre. Këto kontrolle do vijojnë e në javët në vijim ne lidhje me procedimet qe kane ngritur skuadrat e hetimit. Është një çështje që nuk i përket qarkut të Vlorës”, tha ai.

Ndërkohë që më i ftohtë ishte drejtori i Përgjithshëm i Policisë së Shtetit, Muhamet Rrumbullaku. I pyetur nga gazetarët sot, se a ka policia informacionin e pritshëm, Rrumbullaku tha: Kemi struktura të veçanta që po ndjekin rastin, na ka deleguar prokurori detyrat është një hetim miks. S’kam për të deklaruar asgjë më tepër”.

Errësira e Policisë vazhdon ndërsa teoritë konsipirative kanë marrë rinovim për të vazhduar tjerrjen në rrjet./Dosja.al

 

muhamet rrumbullaku ervis martinaj gentian berberi

Sondazh

Poll

MË SHUMË