Politike

Presidenti/ Alibeaj s’tërhiqet: Na takon ne propozimi. Balla: I kemi votat, e zgjedhim vetë (DEBATET)

Deputeti Enkelejd Alibeaj deklaroi se PD do të marrë pjesë në zgjedhjen e Presidentit. Kreu i grupit parlamentar i PS-së, Taulant Balla paralajmëroi se nëse PD nuk sjell propozime do të negociojnë me grupet e tjera parlamentare.

26 Maj 2022, 08:26 Nga DOSJA
Presidenti/ Alibeaj s’tërhiqet: Na takon ne propozimi. Balla: I kemi
Enkelejd Alibeaj, Jorida Tabaku, Gazment Bardhi

TIRANË- Deputeti Enkelejd Alibeaj deklaroi se Partia Demokratike do të marrë pjesë në procesin e zgjedhjes së Presidenit të vendit. Edhe pse u raportua në orët e para të mëngjesit, se brenda mbledhjes së grupit parlamentar të PD-së, deputetët me përjashtim të Emilja Koliqit, nuk ishin dakord për procesin, Alibeaj shprehu të kundërtën. Pas përfundimit të mbledhjes, përballë gazetarëve në selinë blu, deputeti sqaroi se PD nuk është kundër bojkotit e se i qëndron ende draftit që kanë paraqitur e se edhe në 12 të natës nëse Partia Socialiste ndryshon mendim. Po ashtu, Alibeaj tha se PD do të marrë pjesë në proces në mënyrë që të jetë gjithëpërfshirës. Nga ana tjetër, kreu i grupit parlamentar i Partisë Socialiste, Taulant Balla paralajmëroi PD se nëse nuk sjell emrat kandidatët deri të dielën në orën 16:00 për president të vendit do ta zgjedhin vetë pasi i kanë votat e mjaftueshme. Po ashtu, Balla tha se PS e ka legjitimitetin ta zgjedhë presidentin e se nëse nuk funksionon me PD do të vijojnë negociata me grupet e tjera parlamentare.

Në mbledhjen e nisur në orën 10:30 në PD, debate ka pasur mes deputetëve Enkelejd Alibeaj, Gazment Bardhit, Jorida Tabakut, Ferdinant Xhaferrajt dhe deputetes së Shkodrës, Emilja Koliqit. Kjo e fundit ishte e vetmja e cila doli kundër tyre, pasi kërkoi që edhe Partia Demokratike të paraqiste një emër për president të vendit.

Pak orë më pas përmes një deklarate, grupi parlamentar i PD u shpreh se mbetet i angazhuar në vullnetin e tij për një proces gjithëpërfshirës dhe konsensual për zgjedhjen e Presidentit të Republikës.

Gjithsej në Kushtetutë janë parashikuar pesë raunde votimi. Në tre të parat nevojitet një shumicë prej tre të pestash, ndërsa në dy raundet e fundit presidenti zgjidhet me shumicë të thjeshtë e mbetet në duart e maxhorancës. Deri më tani këta të fundit nuk kanë propozuar asnjë emër. Ndërsa në mbledhjen e fundit të demokratëve, dolën me një listë pre 8 emrash: Leonard Demi; Arben Çejku; Dritan Demiraj; Visar Zhiti; Rexhep Uka; Halim Kosova; Dashamir Shehu dhe Leka Zogu.

Ndërkohë po ashtu, paralel me mbledhjen e thirrur nga Alibeaj, edhe Berisha zhvilloi mbledhje me grupin e 'Rithemelimit' në lidhje me kryesinë e Partisë Demokratike.

(a.b)/dosja.al

Sondazh

Poll

MË SHUMË