Aktualitet

Filmoi përplasjen me huliganët, efektivët i marrin aparatin gazetarit, nisin hetimet

Pas lajmit të publikuar nga Dosja.al ka ardhur edhe reagimi nga Policia e Shtetit.

25 Maj 2022, 17:17 Nga DOSJA
Filmoi përplasjen me huliganët, efektivët i marrin aparatin
Gent Shkullaku dhe Sali Berisha

TIRANË- Gent Shkullaku, fotoreporteri i Light Studio Agency (LSA) është dhunuar një natë më parë nga efektivët e Policisë së Shtetit teksa ishte në terren e shkrepte foto nga përplasja mes uniformave të shtetit e huliganëve. Denoncimi u bë fillimisht nga kryetari i Partisë Demokratike Sali Berisha, por u konfirmua nga vetë Shkullaku për Dosja.al.

Në një prononcim për Dosja.al, Shkullaku u shpreh se ka qenë në krye të detyrës në momentin që efektivët i kanë kërkuar të mos shkrepte më foto pasi në këtë mënyrë po ‘nxinte’ imazhin e Shqipërisë dhe i kanë marrë aparatin. Pas një komunikimi të reporterit me zëdhënësin e policisë së Shtetit, efektivët ia kanë kthyer aparatin Shkullakut, por me një kusht, të mos bënte më foto e të fshinte ato që kishte.

Pas lajmit të publikuar nga Dosja.al ka ardhur edhe reagimi nga Policia e Shtetit. Në një reagim zyrtar, drejtori Gledis Nano shkruan se ka urdhëruar nisjen e hetimeve për të parë nëse ka pasur apo jo tejkalim kompetencash. Për pasojë, një grup i posaçëm nga Drejtoria e Standardeve Profesionale dhe Departamenti për Sigurinë Publike po kryen të gjitha veprimet. Në njoftim Nano thekson se gjatë takimit të zhvilluar mesditën e djeshme, u ka dhënë porosi të veçantë drejtuesve të strukturave policore të angazhuara me shërbim në Tiranë, për mbarëvajtjen e aktivitetit, që gazetarëve dhe reporterëve, vendas e të huaj, t’u krijohen të gjitha lehtësirat, me qëllim që ata të përmbushin misionin e tyre. 

(f.m/dosja.al)

Sondazh

Poll

MË SHUMË