Aktualitet

Dixhitalizimi i Kadastrës / Ahmetaj: Iku koha e maleve me letra me pluhur

16 Dhjetor 2021, 11:25 Nga DOSJA

Dixhitalizimi i Kadastrës / Ahmetaj: Iku koha e maleve me letra me pluhur

TIRANË – Zëvendëskryeministri Arben Ahmetaj, gjatë prezantimit të projektit që synon reformimin rrënjësor të sistemit të pronave në Shqipëri, foli në lidhje me lehtësimet burokratike që do të kenë qytetarët, falë avancimit të teknologjisë së informacionit.

Ahmetaj shtoi se tanimë ka ikur koha e maleve me letra me pluhur në fund të korridorit, pasi ky projekt, synon që qytetarët të kenë shkresën e pronës së tyre me një klikim në telefon.

Sipas numrit dy të qeverisë, aktualisht janë të dixhitalizuar 700 mijë prona dhe pritet që brenda dy viteve ky numër të shkojë në 4 milionë. Gjithashtu ai theksoi se gjatë vitit 2022 do të bëhet dixhitalizimi i të gjitha pronave në zonën e bregdetit.

“Qytetarët nuk do të kenë përballë kadastrën, por do të kenë një sistem, i cili në arkivat e veta dixhitale, i ka të gjitha transparente. Dhe me një klik ti do kesh shkresën e pronës në telefonin tuaj. Çfarë është kjo? Kjo është një betejë me të kaluarën. Betejat me të kaluarën nuk janë të thjeshta. Unë prapë i referohem arkivës. E patë Arkivën, dukej si një nga kështjellat e fundit të së kaluarës, si ato librat e vjetra të letërsisë së franceze ku profilizohej ai punonjësi me syze në fund të korridorit në një mal me letra me pluhur. Ato janë arkivat, nuk janë prekur prej 30-vitesh. Dikush do thotë po mburreni që po filloni t’i bëni tani? Jo nuk po mburremi aspak, thjesht po bëjmë punën tonë. Kemi filluar punën tonë për Shqipërinë 20-30, ku qytetarët të jenë të çliruar nga zinxhirët e burokracisë. Duhet ta pranojmë se shumë është bërë në teknologjinë e informacionit. 95% e shërbimeve janë online. Kur e nisëm këtë punë kishte shumë skeptikë që thoshin jo nuk bëhet, jo shqiptarët duhet të presin te dritarja e zyrës ta shohin punonjësin në sy, të prekin letrën, por ja ku jemi sot. Kultura e shoqërisë po shkon te lehtësimi I jetës së tyre përmes digjitalizimit. Kemi shumë punë për të bërë, do bëhet në dy faza, në vitin 2022 do marrim gjithë vijën e bregdetit dhe do ta dixhitalizojmë të gjithë arkivë e asaj pjese, gjithashtu paralel po bëhet përmirësimi I sistemit që të kalojmë nga 700 mijë prona të kalojmë në 1 milion e 700 mijë dhe brenda dy viteve të kalojmë në 4 milionë prona”, tha ministri Ahmetaj në fjalën e tij në këtë takim.

Ndërkohë, kreu i Kadastrës Shqiptare, Artan Lame, tha se arkiva përmban rreth 4 milion pasuri, por vetëm 2.8 milion të tilla janë trashëguar në Kadastrën Shqiptare, kjo për shkak të mungesave të shumta në regjistrimet nga viti 1996. Sipas Lames, nga 2.8 milion pasuri, vetëm 700,000 e kanë të plotë dokumentacionin, ndërsa shtoi se janë rreth 56 milion dokumenta që do të skanohen. Lame vijoi më tej duke shtuar se, ky projekt përfshin skanimin e të gjitha këtyre dokumentave historike. Dhe faza e dytë është skanimi i kartelave të pasurisë, ndërsa bëri me dije se ky projekt do të zgjasë dy vjet.

“Po të merremi sot me digjitalizimin e Arkivit, ka një zakon që çdo drejtues thotë se si e gjeta dhe unë sot po bëj çudira. Po mundohem t’i shmangem kësaj. Mora rastin konkret të të dhënave të shtëpisë time. Është kartela, hartografia dhe të gjitha dokumentat vit pas viti të objektit. Bëhet fjalë për një arkivë me 4,073,000 pasuri. Bëhet fjalë për dokumenta nga periudha e kohës osmane. Por Kadastra trashëgon vetëm 2.8 milion referenca që është absurdre. Kjo ka ndodhur për disa arsye, nga ’96 regjistrimet që janë bërë kanë qenë decifitare, në fshat është punuar duke mos hapur fare referenca për pasuritë, ose në raste të veçanta vetëm një referencë për të gjithë fshatin. Ndërsa pasuritë shtetërore nuk regjistroheshin fare, ose nuk hapej fare kartelë. Nga këto 2.8 milion vetëm 700,000 e kanë të plotë dokumentacionin. Këto janë hedhur pas vitit 2014. Për rreth 1 milion pasuri të tjera është kryer vetëm skanimi i dosjes historike dhe digjitalizimi i kartelës. Mbeten për t’u skanuar 2.8 milion referenca që përmbajnë rreth 56 milion dokumenta historike të arkivës, kontrata shit-blerje, vendime gjyqi, trashëgimie, vendime bankash. Projekti përfshin skanimin e të gjitha këtyre dokumentave historike. Dhe faza e dytë është skanimi i kartelave të pasurisë. Ky projekt do të zgjasë dy vjet.”, u shpreh ndër të tjera në fjalën e tij kreu i Kadastrës, Artan Lame.

(E.H/Dosja.al)

Cila mendoni se është alternativa më e mirë:

View Results

aktualitet aktualitet arben ahmetaj artan lame dixhitalizimi i kadastres kadastra arben ahmetaj artan lame dixhitalizimi i kadastres kadastra