Sport

Ronaldinho, turnetë klandestinë, roli i Decos: Brazili ‘zbulon’ talentin Raphinha…

15 Tetor 2021, 16:57 Nga DOSJA

BRAZIL – “Uroj që kjo natë të mos përfundojë kurrë, do ta kem të vështirë të fle. Po kthehem në Leeds dhe shpresoj të vazhdoj kështu që të thirrem përsëri.” Emocioni i Raphinha është mjaft i kuptueshëm, pas dy golave të tij të parë me Brazilin në 4-1 ndaj Uruguajit në mëngjesin e sotëm. Goli i pare erdhi nga një goditje e thjeshtë pas një shtytje disi të vështirë nga Muslera, ndërsa i dyti në shpejtësi për të mbyllur një aksion në fushë të hapur, në një asistim nga Neymar.

Anësori sulmues i lindur në ’96, që luan për Leeds, u thirr nga Tite për herë të parë në këtë raund kualifikues për Kupën e Botës “Katar 2022” dhe ai i bindi të gjithë: hyri dhe bëri debutimin e tij në 1-0 kundër Venezuelës dhe prodhoi dy asistime; pastaj 29 minuta në 0-0 kundër Kolumbisë dhe për të përfunduar paraqitjen e shkëlqyer, me dy gola kundër “Celesteve”. Me pak fjalë, Brazili ka zbuluar se ka një armë tjetër brenda arsenalit të tij tashmë të madh ofensiv.

Raphinha shkruhet, por shqiptohet “Rafinha”. Emri i tij i plotë është Raphael Dias Belloli, i lindur në Restinga (favela e Porto Alegre) nga një baba italian dhe një nënë braziliane. Idhulli i tij Ronaldinho gjithashtu u rrit atje. “Unë gjithmonë kam dashur të jem ai”. Babai dhe xhaxhai i tij ishin muzikantë në një grup samba dhe u thirrën për të luajtur në ditëlindjen e Dinhos, para se ai të transferohej në Barcelonë. Rafaeli i vogël, në moshën 7 vjeç, nuk e humbi rastin: “Kur më pa, më mori në krahë dhe bëmë një shëtitje së bashku. Isha i mbërthyer nga emocionet,”- thotë ai për “The Players Tribune”.

Një lloj bekimi, sepse që atëherë të dy u takuan disa herë dhe tani ata janë miq: “Ai më tha se i ka parë lojërat e mia dhe admiron mënyrën se si unë luaj”. Shkurtin e kaluar ai shënoi nga një goditje dënimi kundër Southampton dhe hoqi fanellën e tij, poshtë së cilës shkruhej: “Pusho në paqe, Dona Miguelina”, një homazh për nënën e Ronaldinhos, e cila vdiq disa ditë më parë.

Deri në moshën 17-vjeçare ai ende luante në turnetë “futebol de várzea”, liga klandestine pa organizim ku mblodhi para për të ndihmuar familjen e tij. Qëllimi ishte të hynte në akademitë rinore të një klubi të madh. Por, së pari, në Gremio (klubi i idhullit Ronaldinho) dhe më pas te Internacional, ai u refuzua: “Ai është shumë i vogël, shumë i brishtë”. Gjithmonë e njëjta histori. Goditjet e para në një skuadër të vërtetë ai i dha në Udinese Futebol Clube, pastaj kaloi në Avaí, në Serinë B braziliane.

Në një ndeshje të vitit 2015 ai tërhoqi vëmendjen e Decos, që ishte edhe pika e vërtetë e kthesës në karrierën e tij. Ai u transferua menjëherë në Portugali, së pari në Vitoria Guimarães dhe më pas në Sporting, ku bëri një shfaqje së bashku me Bruno Fernandes, një mik brenda dhe jashtë fushës. Ai më pas i shitet Rennes për 21 milionë euro në vitin 2019, ku luajti vetëm një sezon, 8 gola dhe 7 asistime, gjë që e bëri të kalojë te Leeds.

Raphinha, duke pasur pasaportën e dyfishtë, gjithashtu mund të luante për Italinë: “Kishte një presion të fortë të federatës vitin e kaluar,”– tha Deco për “Globo Esporte”. Megjithatë, ai zgjodhi “Seleçaon” që ëndërronte gjithmonë. Vitet e fundit ai nuk ka bërë gjë tjetër veçse është rritur dhe përmirësuar. Interesimi i fortë nga Liverpool për të, i cili e kërkon atë si trashëgimtar të Salah, është vetëm një demonstrim.