Politike

Ndryshimet në Kodin Zgjedhor/ Venecia pranon kërkesën e Metës. Kryeministri s’bën hapa pas: Kuvendi do rishprehet, s’humbasim asnjë ditë. PD: Rama ka frikë nga ekspertiza e Komisionit

Ndryshimet në Kodin Zgjedhor kanë rihapur debatet në politikën shqiptare. Pas kërkesës së kryedemokratit Lulzim Basha, presidenti Ilir Meta i ka kërkuar mendim Komisionit të Venecias. Komisionieri për Zgjedhim, Oliver Varhelyi i kërkoi kryeministrit Edi Rama që të priste, ndërsa numri një i qeverisë u shpreh se Kuvendi nuk do të humbiste asnjë ditë.
Featured image of article: Ndryshimet në Kodin Zgjedhor/ Venecia pranon kërkesën e Metës. Kryeministri s’bën hapa pas: Kuvendi do rishprehet, s’humbasim asnjë ditë. PD: Rama ka frikë nga ekspertiza e Komisionit Edi Rama, Oliver Varhelyi, Lulzim Basha dhe Ilir Meta

TIRANË– Komisioni i Venecias ka pranuar kërkesën e Presidentit të Republikës së Shqipërisë Ilir Meta i cili kërkoi opinion për Ndryshimet në Kodin Zgjedhor. Në një prononcim për FaxNews, Komisioni bën të ditur se se kërkesa e Metës është marrë në dorëzim dhe do të shqyrtohet.

Ishte presidenti Ilir Meta ai që para gazetarëve lexoi 8 pyetjet që i kishte dërguar Komisionit të Venecias në lidhje me ndryshimet e miratuara nga Kuvendi.

Pas miratimit të tyre në Kuvend, kryedemokrati Lulzim Basha kërkoi nga kreu i shtetit që të kërkonte ndihmën e ndërkombëtarëve. Nuk vonoi shumë dhe Meta depozitoi relacionin me 18 faqe për “Venecian”, ndërkohë që ndryshimet pritet që të kalojnë këtë të enjtë në Kuvend.

Nuk vonoi shumë se pas konferencës për shtyp të presidentit, reagoi vetë Komisionieri për Zgjedhim, Oliver Varhelyi i ka kërkuar kryeministrit Edi Rama që të mos i kalojë këtë të enjte në Kuvend ndryshimet e Kodit Zgjedhor por të presë edhe vendimin e Venecias.

Komisioneri shtoi se  priste që Shqipëria në 25 prill të zhvillojë zgjedhje të lira dhe të ndershme. Por pavarësisht mesazhit të fortë që erdhi nga Brukseli, kreu i qeverisë nuk bëri hapa pas duke theksuar se Kuvendi do të kalojë sërish më 29 tetor ndryshimet që Meta i rrëzoi me dekret. Sipas Ramës, Shqipëria nuk ka kohë për të humbur nga një president që e krahasoi me një ekstremist. Megjithatë u shpreh i hapur për të dëgjuar rekomandimet. Pas reagimit të Ramës Sekretari i Përgjithëm i Partisë Demokratike Gazment Bardhi është shprehur se Rama ka frikë nga ekspertiza e Komisionit të Venecias.

Për më shumë bëhu pjesë e grupit më viral në Facebook, Dosja.al

Ndërsa vetë Basha, e përshëndeti reagimin e Varhelyit, duke shtuar se shpresonte që Komisioni i Venecias të adresonte të gjithë shqetësimet e opozitës në ndryshimet e bëra. Ndërkohë që nga faktorët e tjerë politikë në vend nuk ka ende asnjë reagim.  

Gjithashtu dhe Eurodeputeti për Shqipërinë, David Lega ka reaguar për Ndryshimet në Kodin Zgjedhor ku është shprehur plotësisht dakort me Komisionerin Varhelyi. Ai ka thënë se Parlamenti dhe Rama duhet që të presin mendimin e Venecias për Ndryshimet në Kodin Zgjedhor. Edhe Zëvendës Presidenti i PPE në Parlamentin Europian, Andrey Kovatchev ka rënë dakort me Komisionerin Varhelyi.

Por cilat janë ndryshimet e Kodit Zgjedhor kaq shumë të kontestuara nga opozita? 

Ndryshimet e Kodit Zgjedhor përcaktuan një prag kombëtar 1%, një rirenditje të listës të ndarë në dy pjesë, në pjesë e parë, bazuar tek vota preferenciale, me një prag brenda listës prej 10 mijë votash, për kandidatët që duhet të thyejnë listën e parë, një e drejtë për kryetarin e Partisë që të garojë në 4 zona, e po ashtu edhe kandidimin e partive në një listë të përbashkët dhe ndalimin e koalicioneve tradicionale. 

(k.m/dosja.al)

  • 20:02

    Zvendës Presidenti i PPE mbështet qëndrimin e Komisionerit Varhelyi mbi Kodin Zgjedhor: Unë i bëj thirrje Kryeministrit Rama dhe Kuvendit të Shqipërisë që ta respektojnë këtë

    Zëvendës Presidenti i PPE në Parlamentin Europian, Andrey Kovatchev mbështetur Komisionerin Oliver Varhelyi, në lidhje me ndryshimet që do të bëj Qeveria Rama, Kodit Zgjedhor. Ai u shpreh se Parlamenti shqiptar duhet që të presë njëherë opinionin e Venecias pasi kjo e fundit duhet që të jetë në përputhje me Kodin Zgjedhor.

    “Mbështes qëndrimin e Komisionerit OliverVarhelyi!  Kodi Zgjedhor duhet të jetë, në çdo rast,  në përputhje me Opinionin e Komisionit të Venecias, pasi do të ishte në favor të demokracisë në Shqipëri.  Unë i bëj thirrje Kryeministrit Rama dhe Kuvendit të Shqipërisë që ta respektojnë këtë,” është shpreur Kovatchev.

  • 17:20

    Kërkoi opinion për Ndryshimet në Kodin Zgjedhor/ Venecia: Kemi pranuar kërkesën e Presidentit Ilir Meta

    Komisioni i Venecias ka pranuar kërkesën e Presidentit të Republikës së Shqipërisë Ilir Meta i cili kërkoi opinion për Ndryshimet në Kodin Zgjedhor. Në një prononcim për FaxNews, Komisioni bën të ditur se se kërkesa e Metës është marrë në dorëzim dhe do të shqyrtohet.

  • 16:41

    Rama refuzon pritjen e opinionit të Venecias/ Partia Demokratike: Kryeministri ka frikë nga ekspertiza e Komisionit, interesi i mafies është mbi interesin e Shqipërisë

    Gazment Bardhi,

    Partisë Demokratike i është përgjigjur Edi Ramës, pasi ky i fundit tha se nuk do pres opinionin që do të jap Komisioni i Venecias për ndryshimet në Kodin Zgjedhor dhe se Kuvendi nuk do të humbiste asnjë ditë për të miratuar ndryshimet. Sekretari i përgjithshëm i Partisë Demokratike Gazment Bardhi në një reagim që ka bërë në rrjetet sociale ka thënë se Kryeministri ka frikë nga ekspertiza e Komisionit të Venecias. Ndër të tjera ai thotë se refuzimi që ka bërë Rama ndaj apelit të Komisionerit për Zgjerimin në BE Oliver Varhelyi, sipas tij është një tjetër dëshmi se interesi i mafies është mbi interesin e Shqipërisë.

    Postimi i plotë:

    Edi Rama duhet të shpjegojë pse ka frikë nga ekspertiza e Komisionit të Venecias dhe pse i trembet zgjedhjeve demokratike sipas standarteve europiane. Shqiptarët nuk i kanë borxh Edi Ramës pengmarrjen e Shqipërisë. Refuzimi brutal i Edi Ramës ndaj apelit të Komisionerit për Zgjerimin në BE z. Oliver Varhelyi është një tjetër dëshmi që për Partinë Socialiste interesi i mafias është mbi interesin e Shqipërisë. Asnjë Kryeministër më parë nuk ka vënë në rrezik integrimin europian të Shqipërisë dhe nuk ka sfiduar hapur Bashkimin Europian për llogaritë e tij politike të ditës.

  • 15:55

    Reagon David Lega për Kodin Zgjedhor në Venecia: Zgjedhje të lira dhe të ndershme në prill të vitit 2021

    Eurodeputeti për Shqipërinë në Parlamentin Europian, David Lega ka reaguar pas kthimit në Kuvend për rishqyrtim, të ligjit për disa ndryshime në Kodin Zgjedhor. Në një postim në Twitter ai ka shpërndarë reagimin e Komisionetrit për Zgjerimin e BE-së, Oliver Varhely, i cili ka thënë se Parlamenti para se të veprojë duhet që të presë patjetër përgjigje nga Komisioni i Venecias.

    Ai ka shkruar se është plotësisht dakort me Komisionerin Varhelyi, ku Qeveria dhe Kuvendi duhet që të presin mendimin e Komisionit të Venecias pasi kjo quhet demokraci. Lega gjithashtu ka folur edhe për zgjedhjet që do të mbahen në vitin 2021 ku ka deklaruar se duhet që të jenë të lira dhe të ndershme.

    “Pajtohem me Komisionerin OliverVarhelyi. Parlamenti dhe Kryeministri Rama duhet të presin mendimin e Komisionit të Venecias, kjo do të ishte qasja demokratike. Zgjedhje të lira dhe të ndershme në prill të vitit 2021!” shkruan Lega.

    Postimi i Lega-s
  • 14:11

    Rama nuk bën prapakthehu: Kuvendi do rishprehet pa HUMBUR asnjë ditë! Opinioni i Venezias mirësetëvijë

    Edi Rama

    Kryeministri Edi Rama ka zgjedhur që të bëjë prapaktheu në lidhje me kalimin në Kuvend të ndryshimeve në Kodin Zgjedhor. Pas kërkesës së Komisionierit për Zgjerim që ndryshimet të kalojnë pasi të merret opinioni i Venecias, Rama iu përgjigj se Kuvendi nuk do të humbiste asnjë ditë për të miratuar ndryshimet. Duke përmendur procedurën ligjore pas rrëzimit të dekretit nga presidenti, Rama e cilësoi këtë të fundit i një ekstremist por që nuk merrte dot asnjë institucion të vendit peng, veçse atij të Presidencës. 

    Mendimi i Venecias është gjithnjë i mirëseardhur, por për një ligj të votuar dhe të refuzuar nga Presidenti, procedura është e qartë: Refuzimi i Presidentit pranohet ose rrëzohet nga parlamenti! PARLAMENTI DO TË RISHPREHET PA HUMBUR ASNJË DITË! Ky President i angazhuar si një ekstremist kundër Parlamentit dhe Qeverisë Shqiptare, s’merr dot peng askënd dhe asgjë përveç institucionit që fatkeqësisht ka marrë peng! Opinioni i Venezias mirësetëvijë kur të vijë, por koha për këto zgjedhje s’pret asnjë ditë jashtë procedurave,”-shkruan kryesocialisti. 

  • 14:02

    Basha përshëndet komentin e Varhelyit për dërgimin e Kodit tek Venecia: Kur foli? Tani që ishim LIVE?

    Lulzim Basha

    Kryetari i Partisë Demokratike, Lulzim Basha u pyet nga gazetarët për komentin e Komisionit për Zgjerimin në Parlamentin Evropian, Oliver Varhelyi, për dërgimin nga Presidenca të ligjit me ndryshimet në Kodin Zgjedhor tek “Venecia”. Gjatë bashkëbisedimit me gazetarët, Basha shfrytëzoi kohën edhe për t’u njohur me këtë mesazh të Varhelyit, duke qenë se ndodhi në kohën kur kryedemokrati po mbante deklaratën.

    Sapo e lexoi, Basha e përshëndeti komentin. “Kur ka ardhur reagimi? Tani që ishim live? Atëherë po… e përshëndes këtë reagim të Komisionerit në emër të Bashkimit Evropian. Të shpresojmë që Venecia do të sjellë opinionin ku janë edhe problemet e ngritura nga opozita.”-tha Basha. 

  • 13:40

    Presidenti Meta dërgoi tek “Venecia” Kodin Zgjedhor, Oliver Varhelyi mesazh direkt Ramës: Prisni opinionin e Komisionit…

    Oliver Varhelyi

    Komisioneri për Zgjerim, Oliver Varhelyi i ka kërkuar kryeministrit Edi Rama që të mos i kalojë këtë të enjte në Kuvend ndryshimet e Kodit Zgjedhor. Me anë të një reagimi në Tëitter, Varhelyi, pak pas deklaratës për shtyp të presidentit Ilir Meta, i cili lajmëroi se kishte kërkuar mendimin e ndërkombëtarëve, tha se priste që Shqipëria në 25 prill të zhvillojë zgjedhje të lira dhe të ndershme.

    “Ndryshimet në Kodin Zgjedhor; Besoj se Komisioni i Venecias do të sigurojë këshilla të shpejta për palët e interesuara shqiptare mbi zbatimin e Ndryshimeve Kushtetuese të 30 korrikut. Parlamenti duhet të marrë në konsideratë pritjen e rivotimit të ndryshimeve për të marrë parasysh dhe këshillat e tyre. Pres zgjedhje të lira dhe të ndershme në prill 2021,”-shkruan komisioneri në reagimin e tij.

  • 12:31

    Ndryshimet në Kodin Zgjedhor, Meta kërkon opinionin e Venecias: 8 pyetjet që i kam bërë Komisionit të Venecias për ndryshimet në Kodin Zgjedhor

    Ilir Meta

    Presidenti Ilir Meta ka dalë konferencën e radhës për shtyp me gazetarët, ku edhe ka paraqitur pyetjet që i ka drejtuar Komisionit të Venecias për ndryshimet në kodin Zgjedhor.  Kreu i shtetit ka bërë me dije se ka dërguar në Komisionin e Venecias ndryshimet në Kodin Zgjedhor.

    “Është momenti i duhur se kam kërkuar për një opinion urgjent mbi procesin e ndryshimit të njëanshëm të Kushtetutës dhe Kodit Zgjedhor, drejtuar Komisionit të Venecias. Presidenti pas paraqitjes së një kërkesë zyrtare të opozitës së bashkuar dhe në funksion të shmangies së një krize tjetër për të kontribuuar për stabilitetin e vendit, iu drejtua Komisionit të Venecias me një kërkesë për të dhënë opinionet e mëposhtme,”-tha Meta.

    PYETJET

    1. A mund të ndryshohen në mënyrë të njëanshme rregullat themelore që rregullojnë konkurrencën zgjedhore, veçanërisht rregullat në lidhje me transformimin e votave në mandate midis konkurrentëve, pasi të ketë filluar procesi zgjedhor, dhe vetëm 6 muaj para datës së zgjedhjeve? Sa e rëndësishme është qëndrueshmëria e legjislacionit zgjedhor dhe njohja e ligjit nga konkurrentët zgjedhorë mjaftueshëm kohë përpara zgjedhjeve, për vet cilësinë dhe besueshmërinë e zgjedhjeve?

    2. Nëse rregullat, veçanërisht ato që kanë të bëjnë me transformimin e votave në mandate midis konkurrentëve, ndryshohen në mënyrë të njëanshme dhe shumë afër datës së zgjedhjeve, në mënyrë që të sigurojnë avantazh për partinë që ka paraqitur ndryshimet, a dëmtojnë ose ndikojnë këto ndryshime parimet e qëndrueshmërisë së ligjit, sigurisë juridike dhe rregullave të barabarta të lojës (konkurrimit), të cilat janë kyçe për të përmbushur angazhimet e OSBE së për zgjedhje demokratike? A e komprometojnë këto ndryshime procesin zgjedhor ? A e kompromentojnë ato gjithashtu stabilitetin politik nëse bëhen në kundërshtim me konsensusin e 24 janarit dhe 5 qershorit të arritur nga shumica e partive politike?

    3. A shkelet përfundimisht parimi i garancive procedurale nëse ndryshime të tilla në ligjin zgjedhor të miratuara njëanshmërisht dhe me nxitim bëhen në mungesë të një Gjykate Kushtetuese funksionale e cila mund të kontrollojë pajtueshmërinë e tyre me Kushtetutën dhe me standardet e Konventës Evropiane të të Drejtave të Njeriut?

    4. Ndërsa ndryshimet e njëanshme në Kushtetutë dhe Kodin Zgjedhor të 30 korrikut dhe 5 tetorit nuk ishin pjesë e rekomandimeve të hershme të OSBE/ODIHR për Shqipërinë, a është procedura urgjente një motiv i ligjshëm për të justifikuar ndryshimet e njëanshme nga një
    Parlament i kontestuar, që nuk ka kuorumin kushtetues prej 140 deputetësh? A kishte ndonjë nevojë shtrënguese sipas standardeve ndërkombëtare për t’i modifikuar ato në mënyrë të
    njëanshme?

    5. A është dispozita e futur rishtazi në Kodin Zgjedhor, për të drejtën e Kryetarit të një partie politike për të kandiduar në 4 qarqe zgjedhore, në përputhje me standardet ndërkombëtare dhe veçanërisht me parimin e mos-diskriminimit midis kandidatëve dhe votuesve?

    6. A e pengojnë rregullat aktuale në për mbledhjen e votave dhe shndërrimin e tyre në mandate midis konkurrentëve, veçanërisht ato në lidhje me koalicionet zgjedhore dhe formulën përkatëse për ndarjen e mandateve, futjen e listave të hapura për përzgjedhjen e kandidatëve nga votuesit? Në rast se legjislacioni miraton listat e hapura, ndërsa mekanizmi ekzistues i koalicioneve zgjedhore dhe formula përkatëse për ndarjen e mandateve për koalicionet mbeten ashtu siç janë aktualisht në fuqi, a do të ishte legjislacioni përkatës shqiptar në përputhje me angazhimet e OSBE-së?

    7. A i dëmton të drejtat e partive politike dhe elektoratit të tyre, imponimi i njëanshëm i ndryshimeve në Kodin Zgjedhor në lidhje me koalicionet parazgjedhore për të kandiduar me një listë unike? (vota e barabartë e kandidatëve të partive të ndryshme politike brenda një koalicioni; e drejta e përfaqësimit ligjor për të mbrojtur interesin e tyre gjatë procesit zgjedhor; e drejta për kohën e transmetimit dhe qasja në media; e drejta e përfaqësimit në komisionet vendore zgjedhore; e drejta dhe transparenca e financimit)?

    8. Duke patur në konsideratë situatën, cila do të ishte një zgjidhje e pranueshme për të siguruar një proces zgjedhor në përputhje me angazhimet e OSBE-së dhe standardet europiane për zgjedhje demokratike dhe të dakordësuara nga të gjithë aktorët kryesorë politikë dhe subjektet zgjedhore, në mënyrë që të shmanget një krizë tjetër zgjedhore dhe politike?

Shto Koment