Aktualitet

Merr fund kaosi në Kakavijë/ Nga sot rregulla të reja për të kaluar kufirin. Majko: U zgjidh pasi negociova me Kryepeshkopin Janullatos. Rama: Shqiptarët hoqën siklet të madh!

  • Majko zbulon kush e zgjidhi krizën: Angazhimin ia kërkova Kryepeshkopit Janullatos
  • Merr fund kaosi në Kakavijë. Gjatë orëve të para të mëngjesit të sotëm ka përfunduar operacioni i kalimit të qytetarëve. Ministria e Mbrojtes bën me dije se gjatë 24 orëve të fundit kanë hyrë 3325 udhëtarë në tokën greke. Majko shprehet se kriza është zgjidhur pas komunikimit të tij me Kryepeshkopin Janullatos. Ndërsa, Rama u uroi shqiptarëve rrugë të mbarë.
    Featured image of article: Merr fund kaosi në Kakavijë/ Nga sot rregulla të reja për të kaluar kufirin. Majko: U zgjidh pasi negociova me Kryepeshkopin Janullatos. Rama: Shqiptarët hoqën siklet të madh! Kryepeshkopi Anastas Janullatos, Edi Rama dhe Pandeli Majko
    Përditësuar:

    TIRANË-Merr fund kaosi në Kakavijë. Ministria e Mbrojtjes njoftoi mëngjesin e sotëm se pas 5 ditësh është zhbllokuar pika kufitare e Kakavijës. Mësohet se në orën 00.40 të mëngjesit të sotëm përfundoi operacioni i kalimit të qytetarëve në këtë pikë doganore. Sipas ministrisë së Mbrojtjes gjatë 24 orëve të fundit në këtë pikë kufitare kanë kaluar 3325 qytetarë dhe 1629 mjete. Po kështu, situata paraqitet e qetë edhe në pikën kufitare të Kapshticës.

    Por kush e zgjdhi këtë krizë? Lajmin e ka dhënë sot, ministri për Diasporën, Pandeli Majko, i cili u shpreh se për zgjidhjen e krizës është angazhuar personalisht Kryepeshkopi Anastas Janullatos. Majko ka sqaruar se i ka kërkuar vetë ndihmë Janullatosit dhe pas ndërhyrjes së tij situata u normalizua.

    Ndërkohë, kryeministri Edi Rama nuk ka përmendur një fakt të tillë. Në reagimin e sotëm të tij ai u ka uruar rrugë të mbarë qytetarëve shqiptare dhe sipas tij kaluan një siklet të madh. Kreu i shtetit u bën thirrje të gjithëve udhëtarëve të tjerë që duan të kalojnë kufirin, që të ndjekin procedurën e shtetit greke, me qëllimin që të shmangen situata të tilla.

    Për më shumë bëhu pjesë e grupit më viral në Facebook, Dosja.al

    Sakaq,  duke filluar nga sot do të hyjnë në fuqi rregullat e reja për të kaluar në Greqi. Përveç testit të koronavirusit, që duhet të jetë kryer 72 orët e fundit, në kufi do të ketë një numër të limituar personash që do të futen në tokën helene. Nga pika kufitare e Kakavijës do të futen në shtetin helen vetëm 750 persona në ditë dhe nga pika doganore e Kashticës, do të kalojnë vetëm 300 persona në ditë.

    Kjo situatë u zgjidh 5 ditë, pasi mijëra shqiptarë qëndruan në radhë në këtë pikë doganore. Të lodhur, të stresuar, mes vapës, shqiptarët i bënin thirrje shtetit për zgjidhje të situatës. Ndërkohë, pala greke vijonte me procedurën e marrjes së tamponit, gjë që solli edhe radhët në doganë. Ndërsa dje, Policia Kufitare Shqiptare dhe ajo greke gjetën dakordësi, për mbajtjen hapur të kufirit edhe pas orës 22:00, me qëllimin që të zhbllokohej kjo pikë doganore. Drejtori i Kufirit të Janinës, Fotis Dijis dhe drejtoi i Policisë Kufitare greke, Thomas Betsis, dhanë dakordësinë, se puna do të vijonte edhe gjatë natës, në mënyrë që të kalonin të gjithë udhëtarët që ndodheshin në radhë.

    J.V/Dosja.al

    • 11:35

      Asnjë makinë në radhë, pika kufitare e Kakavijës boshatiset pas 5 ditësh kaosi

      Foto nga pika kufitare e Kakavijës

      Sot pas 5 ditësh është qetësuar situata në pikën kufitare të Kakavijës. Siç shihet edhe në foto, në këtë pikë doganore nuk ka asnjë makinë në radhë, është bosh. Tashmë pala greke dhe pala shqiptare po merr frymë, pas fluksit të madh.

      Ndërkohë, dje radha e makinave shkonte në disa kilometra dhe shqiptarët shpresonin që të futeshin sa më parë në tokën helene.

      Mësohet se operacioni i kalimit të qytetarëve ka përfunduar gjatë orëve të para të mëngjesit të sotëm. Ministria e Mbrojtes bëri me dije se gjatë 24 orëve të fundit kanë hyrë 3325 udhëtarë dhe 1629 mjete në tokën greke. Sa i përket zgjidhjes se krizës në kufi, ministri për Diasporën Pandeli Majko deklaroi se ndodhi pasi negociatave të tij me kryepeshkopin Janullatos. Ndërkohë, Rama u shpreh se ky ishte një siklet për shqiptarët.

    • 11:03

      Hyjnë në fuqi rregullat e reja për kalimin drejt Greqisë, asnjë makinë në radhë në Kapshticë

      -Edhe pse situata në Kapshticë nuk ishte alarmante si në Kakavijë, situata në këtë pikë kufitare është tashmë e normalizuar. Aktualisht në doganën e Kapshticës nuk ka asnjë makinë në radhë.

      Në Kapshticë gjatë ditëve të Krizës, radha shkoi deri në 3.5 km. Gjithashtu pati edhe disa momente tensione kur pala greke ndërpreu punën, teksa shoferët që prisnin në radhë, nisin t’i binin borive.

      Dogana e Kapshticës sot

      Pala greke kishte bërë me dije se do të linte vetëm 300 makina në ditë të kalonin doganën, por mbrëmjen e djeshme limiti u hoq, në mënyrë që të kalonin të gjithë makinat që ndodheshin në radhë. Ndërkohë policia vendosi postblloqe në fshatrat pranë kufirit, për të mos lejuar kalimin e udhëtarëve, të cilët nuk kishin rezultativ negativ të testit për COVID, të certifikuar.

    • 11:06

      As Kryeministri e as Ministria e Jashtme, Majko zbulon kush e zgjidhi krizën: Angazhimin ia kërkova Kryepeshkopit Janullatos

      Kryepeshkopi Anastas Janullatos dhe Pandeli Majko

      Ministri për Diasporën Pandeli Majko, ka reaguar në Facebook në lidhje me krizën e emigrantëve në Kakavijë. Në një postim në Facebook, ministri shkruan për zgjidhjen e krizës është angazhuar personalisht Kryepeshkopi Anastas Janullatos, të cilit Majko i kërkoi ndihmë.

      Gjithashtu Majko ka falenderuar edhe të gjithë strukturat shtetërore, të angazhuara për përmbylljen e emergjencës humanitare.

      Postimi i plotë:

      Falenderim për të gjitha strukturat shtetërore të angazhuara për përmbylljen e emergjencës humanitare vecanërisht për trupën ushtarake dhe policore të angazhura në kufirin me Greqinë fqinje, nën drejtimin e kolegëve Olta Xhacka dhe Sandër Lleshi. Ndaj si më të vecantë, që pavarësisht moshës, angazhimin të cilin ja kërkova kryepeshkopit Anasatas Janullatos, në ndërmjetësimin që kriza të përmbyllej sa më shpejt. Të tjerat, janë fjalë për “lugën” e atyre që dinë vec cfarë nuk duan. 

    • 07:20

      Olta Xhaçka: Ka përfunduar procesi i kalimit të qytetarëve, 3325 udhëtarë kanë hyrë në tokën greke

      Radha në Kakavijë dhe Xhaçka

      Ministrja e Mbrojtjes, Olta Xhaçka ka falënderuar Forcat e Armatosura, Policinë e Shtetit, mjekët dhe infermierët që morën pjesë operacion e kalimit të kufirit të qytetarëve shqiptarë.

      “Live nga Kakavija, ku përfundoi procedura e kalimit për qytetarët e fundit. Mirënjohje të thellë për të gjitha strukturat e angazhuara në këto ditë të vështira. Mirënjohje për efektivët e Forcave të Armatosura, Policisë së Shtetit, mjekëve e infermierëve dhe drejtues e punonjës të pushtetit vendor, të cilët me këmbëngulje, durim e punë në grup ia dolën!” shprehet ministrja në Facebook, teksa publikon edhe një foto nga Kakavija.

    • 07:55

      Sot hyjnë në fuqi rregullat e reja/ Kush futet në tokën greke duhet të ketë test COVID-i negativ me vete, do qëndrojë 7 ditë në karantinë

      Foto nga pika doganore e Kapshticës

      Ditën e sotme, hyjnë rregulla të reja në fuqi për të gjithë ata që duan të futen në tokën helene nga pikat doganore, si Kapshtica dhe Kakavija. Që prej ditës së sotme, nga pika kufitare e Kakavijës do të futen në shtetin helen vetëm 750 persona në ditë. Ndërsa, nga pika doganore e Kashticës, do të kalojnë për në shtetin grek vetëm 300 persona në ditë. Çdo person duhet të ketë me vete testin e COVID-19 dhe duhet të jetë negativ, si dhe të ketë plotësuar formularin PLF. Po kështu, çdo shqiptar që futet në tokën greke do të qëndrojnë 7 ditë në karantinë.

      RREGULLAT: 

      Gjithashtu, nisur që nga dita e hënë, dt. 17 gusht 2020, nga pika kufitare e Kakavijës do të kenë mundësi të kalojnë vetëm 750 persona në ditë, ndërsa nga ajo e Kapshticës vetëm 300 persona në ditë, në fashën orare 06:00 deri në orën 22:00, konform rregullave të vendosura nga pala greke, si pasojë e situatës së krijuar nga COVID-19. Të gjithë ata shtetas të cilët plotësojnë kriteret e vendosura për të udhëtuar drejt Greqisë (qytetarët me shtetësi greke, personat që kanë leje qëndrimi në Greqi, personat me kartë minoritari, personat që kanë vendbanimin e tyre kryesor në Greqi, si dhe ata që e kanë të domosdoshme të udhëtojnë për arsye profesionale-pas marrjes së lejes së posaçme) nga dita e hënë, duhet të paraqesin në kufi edhe dokumentacionin sa më poshtë:

      – Testin negativ të COVID-19 (RT-PCR), i cili duhet të jetë kryer deri 72 orë para mbërritjes në pikën e kalimit kufitar, nga laboratorët publike apo private të certifikuara në Shqipëri. Ky rregull nuk vlen për shoferët e kamionëve që transportojnë mallra dhe fëmijët nën 10 vjeç.
      – Vërtetimin diagnozë të përkthyer në anglisht, në të cilin duhet të jenë të shënuara emri, mbiemri dhe numri i pasaportës/numri i kartës së identitetit të individit.
      – Vërtetimin e plotësimit të formularit të posaçëm PLF, me kodin QR (nga adresa elektronike https://travel.gov.gr)

    • 7:34

      Merr fund makthi në Kakavijë/ Rama-shqiptarëve: Hoqët siklet të madh, rrugë të mbarë dhe ruani veten nga virusi

      Edi Rama

      Kryeministri Edi Rama ka reaguar pas përfundimit të operacionit të kalimit të qytetarëve në pikën kufitare të Kakavijës. Nëpërmjet një postimi në Facebook, kreu i qeverisë u ka uruar shqiptarëve rrugë të mbarë dhe thekson se duhet të ruajnë veten nga COVID-19. Ndërkohë, Rama iu bën thirrje të gjithëve udhëtarëve të tjerë që duan të kalojnë kufirin, që të ndjekin procedurën e shtetit greke, me qëllimin që të shmangen situata të tilla.

      Postimi i plotë.

      FALEMINDERIT të gjithë atyre që kontribuan për zgjidhjen e ngërçit të rëndë në pikën kufitare të Kakavisë; qytetarëve në radhë të parë, që në shumicën dërrmuese patën mirëkuptim e durim megjithë hallin e madh; Emergjencave Civile, forcave të ushtrisë e të policisë, trupës së Urgjencës Shëndetësore dhe strukturave vendore, që u gjendën pranë njerëzve me përkushtim e pa orar; të gjithë atyre në vendin fqinj që u përfshinë pa rezervë në përpjekjen për ta lehtësuar situatën, në kushtet kur regjimi i ri kufitar e bënte punën për zgjidhjen e saj tejet të vështirë🇦🇱🤝🇬🇷 U uroj nga zemra një qetësim sa më të shpejtë dhe rifillim normal të jetës së përditshme, të gjithë bashkëqytetarëve që e hoqën atë siklet të madh dhe u lutem të tjerëve në vijim, të ndjekin me vëmendje kriteret e përcaktuara në shtetin fqinj për kalimin e kufirit, e të mos nisen pa u siguruar se mund ta kalojnë kufirin pa siklete të ngjashme. Rrugë të mbarë udhëtarëve të fundit dhe ruani veten e të tjerët nga virusi i rrezikshëm Covid19.

    Shto Koment