Politike

Dështon KP/ PS pranon hapjen 100% të listave me disa kushte, Opozita e Bashkuar kërkon ekspertizën e OSBE/ODIHR, Bylykbashi: Koalicionet&deputetët s’preken! Gjiknuri: Farsë për krizë artificiale (DRAFTI+ZHVILLIMET)

  • DRAFTI/ PS pranon hapjen me 100% të listave për deputetë, por shton votimin preferencial, kuota 30% për gratë e padiskutuar dhe 3%, pragu për koalicionet
  • Dështoi mbledhja e këshillit Politik pas propozimit të PS për hapjen me 100% të listës për kandidatët për deputetë, por me kushtëzimin që kandidatët do t'i nënshtrohen votës preferenciale. PD e LSI kërkojnë ekspertizën e OSBE/ODIHR, por maxhoranca thotë se ekspertiza merret në bazë të një produkti. Hajdari e quajti draftin e PS një show për t'i mbajtur listat të mbyllura.
    Featured image of article: Dështon KP/ PS pranon hapjen 100% të listave me disa kushte, Opozita e Bashkuar kërkon ekspertizën e OSBE/ODIHR, Bylykbashi: Koalicionet&deputetët s’preken! Gjiknuri: Farsë për krizë artificiale (DRAFTI+ZHVILLIMET) Perfaqesuesit e KP

    TIRANË- Ka dështuar sërish mbledhja e Këshillit Politik edhe për sot, ku palët kanë hyrë me radhë në Pallatin e Kongreseve për të diskutuar mbi ndasitë për hapjen e listave dhe formulën e garimit me koalicionet. Palët duken shumë larg konsensusit e madje edhe më të përçarë pas veprimit të fundit të Partisë Socialiste. Kështu sot, Partia Socialiste ka shkuar një hap më tej, duke pranuar kërkesën e opozitës për hapjen 100% të listave, por me kushtin që votuesi të ketë të drejtën e votimit preferencial të kandidatit, duke ndikuar kështu në renditjen finale të listës së deputetëve fituesë.

    Kjo për opozitën është e papranueshme, duke sjellë edhe bojkotin e mbledhjes. PD e LSI, përmes dy përfaqësuesve, Petrit Vasili dhe Oerd Bylykbashi, e kanë quajtur propozimin e PS “një ndërhyrje të njëanshme që ndryshon rregullat e lojës”.

    Opozita kërkoi ekspertizën e OSBE/ODIHR për këto mosdakordësi, pasi sipas saj, OSBE ka konfirmuar gatishmërinë për asistencë në diskutimet mes palëve, siç edhe u vendos në marrëveshjen e 14 janarit, ku përfaqësuesit u zotuan që për çdo mos-dakordësi do të kërkonin ndihmën e partnerëve të huaj.

    Për më shumë bëhu pjesë e grupit më viral në Facebook, Dosja.al

    Por për Damian Gjiknurin kjo është një kundërshti e stisur pasi sipas tij, PD kërkon një alibi për krizën e radhës, duke mos lejuar ndryshimet kushtetuese. Ndërsa Rudina Hajdari tha se PS me draftin e dorëzuar sot, kërkon të mos hapë listat. Me largimin nga Pallati i Kongreseve, opozita u rikthye në tryezë bashkë me Rudina Hajdarin por pa Damian Gjiknurin e PS. 

    (F.g/dosja.al)

    • 13:09

      Bojkoti i Këshillit Politik, Gjiknuri: Ky është një konflikt i stisur, PD do të mbajë peng ndryshimet kushtetuese! Te ODIHR duhet të shkojmë me një draft ligjor për ekspertizë

      “Ky është një konflikt i stisur. Opozita e bojkotoi mbledhjen që të mbajë peng ndryshimet kushtuese për të krijuar krizë artificiale për qendrimet e tyre. Përtej shtatorit ky proces nuk mund të shtyhet më pasi duhet të nisë organizimi i zgjedhjeve, pasi afati është i shkurtër. Ne kemi ide konkrete, le të vijnë me ide. Nuk është e vërtetë që në 5 qershor kishte sanksionim për koalicionet. Me ndryshimet kushteutese, ne duhet të flasim në Kod për koalicionet. Për ta kuptuar shqiptarët, PD nuk do vazhdimin e tryezës dhe dialogut. Halli i vërtetë është se nëse e ndjejnë veten të fortë elektoralisht le të fitojnë. Ejani të kontribuojmë të gjithë, ejani të diskutojmë mbi një draft të caktuar. Nëse shkelet parimi demokratik kjo është çështje tjetër. I kam pritur, por kërkojnë qiqra në hell, pasi kërkojnë ekspertizë kur ne skemi ende një produkt që më pas ta shohë ODIHR. Nuk pranon ODIHR produkte paraprake. S’është ODIHR-i si ato burrat e moçëm. Jo mo jo, ODIHR është me produkt. Jemi shtet serioz, si mund të vemi ne atje, kam  një hall, ku e ke hallin pyet ai”,-tha Gjiknuri. 

    • 13:15

      Bojkoti për Këshillin Politik/ Rudina Hajdari: Show, truk i PS-së për ti mbajtur listat e mbyllura

      Rudina Hajdari pas daljes nga mbledhja e Këshillit Politik është shprehur se ajo që u diskutua brenda ishte thjesht një truk politik nga ana e Partisë Socialiste për ti mbajtur listat e mbyllura. ‘Listat do të jenë totalisht të mbyllura, i bëj thirrej Partisë Demokratike pasi po bën një hap mbrapa. Ajo që po bëjnë sot është një truk për ti mbajtur listat e mbyllura, i them PS-së që të reflektojë për propozim. Ndjsë por është një gjë që duhet ccuar deri në fund. Po luftoj që listat të jenë të hapura. Ajo që është e rëndësishme këtu është që të të çojmë përpara betejën për listat e hapura. Jam në këshill për këtë qëllim‘- është shprehur Hajdari.

    • 12:54

      Mosmarrëveshjet në KP/ Vasili: Ne po ruajmë marrëveshjen e 5-qershorit dhe 14 janarit nga bojkoti dhe imponimi i PS

      Nënkryetari i Lëvizjes Socialiste për Integrim, Petrit Vasili tha sot jashtë dyerve të Pallatit të Kongreseve se Partia Socialiste po minon progresin e bërë deri më tani në Këshillin Politik. Pas braktisjes nga opozita të KP, Vasili tha se Opozita po ruan marrëveshjen e 14 janarit dhe 5 qershorit nga PS.  “Kërkesa parimore e opozitës së bashkuar ndërton dialog dhe konsensus. Sot jemi para faktit që PS të mos bojktojë në mënyrë të njënashme dhe të shkatërrojë konsesusin e 14 janarit dhe 5 qershorit. Ky është një shans i madh për PS, jo për opozitën e bashkuar që s’ja ndal njeri mundësitë. Opozita në këtë këshill, sikundër edhe me 5-qershorin, sërish po bën të pamundurën për të ruajtur Këshillin nga bojkoti i PS, dhe imponimi i PS. Ky është thelbi i problemit”,-tha Vasili. 

    • 12:54

      Bylykbashi del nga takimi i KP/ S'tërhiqemi nga kërkesa jonë! Koalicionet kështu siç janë, dhe lista 100% realisht të hapura!

      Partia Demokratike kërkoi asistencën e OSBE/ODIHR për mosdakordësitë e Këshillit Politik. Pasi doli nga mbledhja, Oerd Bylykbashi i shoqëruar nga përfaqësuesi i LSI-së, Petrit Vasili, tha se nuk është PD që po bojkoton Këshillin, si dhe vuri edhe “pikat e kuqe” që nuk preken. Koalicionet e pandryshuara dhe listat 100% të hapura, janë dy kërkesat e PD, dhe një ekspertizë nga OSBE/ODIHR, siç edhe është rënë dakord më herët.

      “Ne sollëm sot kërkesën zyrtare të opozitës për zgjidhjen e mekanizmit përmes marrëveshjes së 14 janarit, ku thuhet se kur palët nuk gjejnë zgjidhje kërkojnë një ekspertizë nga OSBE/ODIHR. PS kërkon të ndryshojë gjithçka që ka qenë gjithnjë njësoj. Kërkesa është zyrtare, ne e presim sot. I japim kohën për të reflektuar. Sapo Gjiknuri të reflektojë ne jemi këtu. Koalicionet të qendrojnë siç janë derisa të japë një rekomandim OSBE/ODIHR. Kemi bërë një kërkesë zyrtare. 14 janari është themeli i Këshillit. Në mbledhje Gjiknuri tha se nuk jemi dakord për OSBE/ODIHR”.,-tha Bylykbashi.

      I pyetur për draftin e ri të PS, Bylykbashi tha se listat duhet të hapen “realisht 100%”.

      “Nëse nuk ka konsensus i drejtohemi OSBE/ODIHR. Koalicionet siç janë dhe lista 100% realisht të hapura. Këtu s’jemi në parlament që të vendosin ata!”,-tha Bylykbashi.

    • 12:26

      Mosdakordësia për listat dhe koalicionet, opozita dorëzon kërkesën në Këshillin Politik: Të merret ekspertiza e OSBE/ODIHR, PS kërkon të ndryshojë rregullat e lojës

      Përfaqësuesit e Opozitës së Bashkuar në Këshillin Politik, Petrit Vasili dhe Oerd Bylykbashi kanë dorëzuar kërkesën në Këshill, për të marrë ekspertizën e OSBE-ODIHR, në lidhje me propozimet e Partisë Socialiste. Opozita thotë se propozimi i PS për të ndryshuar mekanizmin e garimit duke i kthyer votat në mandate, e po ashtu edhe koalicionet është i njëanshëm, është i papranueshëm për Opozitën, sepse ai ndryshon rregullat bazë të garimit dhe shpërndarjes së mandateve të mbledhura në garën zgjedhore, pa shkak të ligjshëm dhe vetëm 4 muaj para fillimit të regjistrimit të subjekteve zgjedhore. Prandaj, duke shfrytëzuar edhe një nga pikat kryesore të marrëveshjes së janarit mes palëve, ku thuhej së për çdo mos-dakordësi palët mund t’i drejtohesin për opinion, OSBE/ODHIR-it, PD e LSI kërkojnë mendimin e ekspertëve të huaj.

      KËRKESA E PLOTË E OPOZITËS NË KËSHILL: 

      Drejtuar: Këshillit Politik

      Të nderuar kolegë,

      Këshilli Politik është ngritur dhe funksionon mbi bazën e Marrëveshjes Politike të 14 Janarit 2020 dhe në themel të tij ka konsensualitetin. Zbatimi i plotë dhe joselektiv i kësaj marrëveshje garanton githëpërfshirjen në realizimin e një Reforme Zgjedhore konsensuale. Nëse palët nuk i qëndrojnë marrëveshjes dhe i imponojnë njëra-tjetrës akte të njëanshme, Këshilli Politik e humbet funksionin e tij.

      Marrëveshja e 14 Janarit 2020 përmban një klauzolë themelore për zgjidhjen e mosmarrëveshjeve mes palëve. Sipas kësaj klauzole, në rast mosdakordësie për çështje të caktuara, do të kërkohet opinioni dhe asistenca nga ekspertiza ndërkombëtare e OSBE/ODIHR, me qëllim gjetjen e një zgjidhjeje të pranueshme. Kjo pikë përcakton qartë që në Këshill kriteri themelor është konsensusi dhe se çdo zgjidhje duhet te jetë e pranueshme nga palët. Kjo klauzolë mundëson marrjen e opinionit dhe ndihmës së specializuar mbi çështjet e debatuara përpara se ato të draftohen bashkërisht me konsensus.

      Partia Socialiste propozon ndryshimin e mekanizmit të garimit zgjedhor dhe të formulës përkatëse që kthen votat në mandate, e që përfshin edhe koalicionet. Ky propozim i njëanshëm, është i papranueshëm për Opozitën, sepse ai ndryshon rregullat bazë të garimit dhe shpërndarjes së mandateve të mbledhura në garën zgjedhore, pa shkak të ligjshëm dhe vetëm 4 muaj para fillimit të regjistrimit të subjekteve zgjedhore. Duke qenë se Presidenti i Republikës ka dekretuar datën e zgjedhjeve dhe procesi zgjedhor ka filluar, kjo përbën ndryshim të rregullave në mes të procesit zgjedhor.

      Argumenti i Partisë Socialiste se ndryshimet e njëanshme kushtetuese të 30 Korrikut, diktojnë ndërhyrjen në Kodin Zgjedhor në lidhje me formulën e koalicioneve dhe atë të shpërndarjes së mandateve, është tërësisht i pabazë. Këto ndryshime nuk kanë hequr nga Kushtetuta koalicionin si formë organizimi politik në garën zgjedhore. Kjo formë vazhdon të mbetet në fuqi në Kushtetutë. Formulimet e Kodit Zgjedhor në fuqi, përfshirë ato të dakordësuara mbi bazën e marrëveshjes së 5 qershorit 2020 dhe të miratuara më 23 Korrik, janë plotësisht në përputhje me Kushtetutën dhe standartet e OSBE-së dhe Këshillit të Europës.

      Meqë mazhoranca kërkon të ndryshojë rregullat pa shkak të ligjshëm dhe në mënyrë të njënashme dhe ky propozim nuk pranohet nga Opozita, për shkak se bie ndesh me standartet e OSBE-ODIHR dhe Këshillit të Europës, ndodhemi përpara një mosdakordësie. Rrjedhimisht, sipas Marrëveshjes së 14 Janarit të nënshkruar nga të dy palët, Këshilli Politik duhet të kërkojë paraprakisht opinionin e ekspertëve të OSBE/ODIHR-it dhe të pranojë asistencën e tij. Publikisht, OSBE-ODIHR ka rikonfirmuar gatishmërinë për të dhënë ekspertizë për Këshillin Politik, me qëllim gjetjen e një zgjidhje të pranueshme.

      Për këtë qëllim, në përputhje me pikën 2, paragrafi i tretë, të Marrëveshjes për kornizën e bashkëpunimit për Reformën Zgjedhore të 14 Janarit 2020, në emër të Opozitës kërkojmë që Këshilli Politik t’i kërkojë zyrtarisht OSBE/ODIHR-it asistencë për gjetjen e një zgjidhje të pranueshme për palët, në përputhje me standartet e OSBE-ODIHR dhe Këshillit të Europës për zgjedhje të lira dhe demokratike.

      Opozita është e gatshme të japë kontributin e saj për dërgimin pa vonesë të kërkesës për asistencë, në mënyrë që Këshilli Politik të përmbushë në kohë detyrën e tij.

      Me respekt,

      ANËTARËT E KËSHILLIT POLITIK

      Përfaqësues të Opozitës së Bashkuar Oerd Bylykbashi​​​​​Petrit Vasili

    • 12:26

      DRAFTI- Formula e deputetëve me LISTA TË HAPURA/ PS propozon hapjen 100% në parim, por emrat që vendos kryetari janë të favorizuar për t’u zgjedhur

      Partia Socialiste propozon hapjen 100% të listave të kandidatëve për deputetë. Dosja.al ka siguruar amendamentet e plota në draftin që Damian Gjiknuri iu ka dërguar sot anëtarëve të Këshillit Politik, ku kandidatët për deputetë do të votohen përmes votimit parapëlqyes, e duke patur votuesi edhe të drejtën për të ndruyshuar renditjen e kandidatit të preferuar. Po ashtu, PS propozon pragun 3% të votave në rang vendi për koalicionet ose për partitë që garojnë jashtë koalicioneve, kuotën jo më pak se 30% për gratë në Kuvend, edhe në listat e hapura. PS propozion gjithashtu, që koalicioni dhe partia depoziton në KQZ jo më vonë se 50 ditë para datës së zgjedhjeve, listën e përbashkët shumëemërore. Emrat janë në rend numerik që nga numri një, ndërsa theksohet rirenditja e kandidatja në bazë të votave parapëlqyese të votuesve. PS gjithashtu kërkon që përllogaritja e mandateve të bëhet në bazë të renditjes finale të kandidatëve, bazuar në tri kritere, së pari, renditjen e tyre në listën e dorëzuar paraprakisht në KQZ nga subjekti; së dyti, numrin e votave parapëlqyese të secilit kandidat; dhe së treti, numrin e votave që i janë dashur subjektit për të nxjerrë një mandat deputeti në këtë zonë zgjedhore.

      PROPOZIMI I PLOTË I PARTISË SOCIALISTE NË KËSHILLIN POLITIK: 

      Kuvendi i Republikës së Shqipërisë ka miratuar në datën 30.07.2020 ligjin nr. 115/2020 “Për disa ndryshime në ligjin nr. 8417, datë 21.10.1998 “Kushtetuta e Republikës së Shqipërisë.” Këto ndryshime të Kushtetutës kanë hyrë në fuqi në datën 7 Shtator 2020.  

      Është detyrë dhe përgjegjësi kushtetuese e Kuvendit të miratojë ndryshimet përkatëse në Kodin Zgjedhor që të zbatojnë përcaktimet kushtetuese në fuqi për çështjet e zgjedhjeve. Amendamentet e propozuara paraqiten dhe kanë pikërisht këtë qëllim.

      Në vlerësimin e Partisë Socialiste këto amendamente përbëjnë platformën më të mirë të mundshme, të konsensusit sa më të gjërë mes mazhorancës qeverisëse, opozitës parlamentare dhe opozitës jashtëparlamentare, për shkak se plotësojnë çdo kërkesë të artikuluar prej tyre.

      Më konkretisht, amendamentet e propozuara parashikojnë:

      1.  LISTA E KANDIDATËVE të partisë apo të koalicionit zgjedhor do të jetë 100% E HAPUR. Të gjithë kandidatët në listë i nënshtrohen votimit parapëlqyes nga zgjedhësit. Çdo zgjedhës ka të drejtën që krahas partisë apo koalicionit zgjedhor të vendosë shenjën edhe tek emri i një kandidati/kandidateje të preferuar. U jepet e drejta zgjedhësve që të ndryshojnë renditjen e kandidatëve dhe respektivisht ndarjen e mandateve duke vlerësuar ata kandidatë që demonstrojnë që gëzojnë një mbështetje të madhe, edhe mbi vet renditjen e partisë që i propozon. Një parim i tillë aplikohet në një sërë vendesh me sistem të ngjashëm elektoral ku zgjedhësit kanë të drejtë të ri-rëndisin kandidatët e rrjedhimisht mandatet e fituara elektorale. Në vëmendje mund të sjellim shembujt e Austrisë, Kroacisë, Republikës Çeke, Suedisë.

      2.  PRAGU MINIMAL PËR NDARJEN E MANDATEVE për Kuvendin, mes koalicioneve dhe/ose partive garuese jashtë koalicioneve (subjekte elektorale) është 3% E VOTAVE TË VLEFSHME NË SHKALLË VENDI. Ky prag i propozuar bazohet në standardet më të mira demokratike në fushën e zgjedhjeve dhe është pranuar edhe nga Komisioni i Venecias në një sërë opinionesh të tij.

      3. GJINIA MË PAK E PËRFAQËSUAR garantohet se do të jetë JO MË PAK SE 30% e përbërjes së Kuvendit edhe në kushtet e zbatimit të listave të hapura plotësisht. Një në tre emra të njëpasnjëshëm i përkasin gjinisë më pak të përfaqësuar, si në listën paraprake të depozituar nga subjekti zgjedhor ashtu edhe në listën përfundimtare të mandateve të fituara nga subjekti zgjedhor.

      4.  KOALICIONI ZGJEDHOR parashikohet si SUBJEKT ZGJEDHOR QË KONKURON NË ZGJEDHJE. Pragu elektoral për koalicionet zgjedhore është 3 % dhe është i njëjtë me pragun elektoral që duhet të plotësojë një parti politike që konkuron e vetme në zgjedhje. Në momentin e regjistrimit, koalicioni duhet të deklarojë partinë politike udhëheqëse të koalicionit. Marrëdhëniet midis partive pjestare të koalicionit dhe detyrimet reciproke midis tyre rregullohen në marrëveshjen e koalicionit, e cila është pjesë e dokumentacionit që depozitohet nga koalicioni në KQZ.

      5. PARTIA POLITIKE OSE KOALICIONI ZGJEDHOR, që është regjistruar në KQZ si subjekt zgjedhor për zgjedhjet në Kuvend, DEPOZITON NË KQZ LISTËN SHUMËEMËRORE të kandidatëve të tij për çdo zonë zgjedhore jo më vonë se 50 DITË PARA DATËS SË ZGJEDHJEVE.

      6. Emrat në listën shumemërore të subjektit zgjedhor paraqiten të renditura sipas rendit shifror, duke filluar nga numri një. SUBJEKTI ZGJEDHOR NUK MUND TË NDRYSHOJË renditjen e kandidatëve të listës pas regjistrimit të saj. KANDIDATËT RI-RENDITEN VETËM NË ZBATIM TË PËRLLOGARITJES SË VOTAVE PARAPËLQYESE dhe plotësimit të kushtit ligjor për kuotën gjinore

      7. Pas ndarjes së mandateve të fituara mes koalicioneve dhe/ose partive garuese jashtë koalicioneve (subjekte zgjedhore), KQZ përllogarit shpërndarjen e mandateve për kandidatët fitues për secilin subjekt zgjedhor (koalicion zgjedhor ose parti garuese jashtë koalicioneve). Shpërndarja e mandateve fillon pas RI-RENDITJES FINALE TË KANDIDATËVE DUKE PATUR PËR BAZË TRE ELEMENTË: së pari, rënditjen e tyre në listën e dorëzuar paraprakisht në KQZ nga subjekti; së dyti, numrin e votave parapëlqyese të secilit kandidat; dhe së treti, numrin e votave që i janë dashur subjektit për të nxjerrë një mandat deputeti në këtë zonë zgjedhore.

      Amendamentet ruajnë koalicionet dhe garantojnë garën e ndershme zgjedhore. Formula e ndarjes së mandateve brenda partive të koalicionit, sipas marrëveshjes së koalicionit, përcaktohet në bazë të votave që merr çdo kandidat i listës së koalicionit dhe formulës së përcaktuar në ligj si për të gjithë kandidatët e tjerë të partive që garojnë më vete. Ky është modeli që kanë të gjtha vendet evropiane që kanë sistem proporcional rajonal me votë preferenciale.

    Shto Koment