Zbulohen rreth 4 mijë rrënjë kanabis në banesën e drejtorit të IEVP Rrogozhinë/ Vetëdorëzohet në polici Bilal Hasa, në kërkim përgjegjësi i OSHEE-së (VIDEO)

TIRANË- Drejtori i Burgut të Rrogozhinës, Bilal Hasa është vetëdorëzuar në polici. Hasa u shpall në kërkim nga autoritetet pasi u zbuluan rreth 4000 bimë kanabisi në një banesë në pronesi të tij. Gjatë kontrolleve të ushtruara në fshatin Kurtaj, njësia administrative Gjocaj, policia  zbuloi dy ambiente të përshtatura posaçërisht për kultivimin e kanabisit me anë të llambave.

Nga hetimet paraprake rezultoi se ambienti është në pronësi të shtetasit Bilal Hasa i cili tashmë u dorëzua në polici. Bëhet me dije se, Hasa ka hedhur poshtë akuzat e ngritura në njoftimin policor, duke deklaruar se nuk ka asnjë lidhje me veprimtarinë e paligjshme të zbuluar në godinë. 

Sipas tij, ai nuk ka shkuar në atë objekt prej disa kohësh dhe se nuk ka pasur dijeni për veprimtarinë që ushtrohej në banesë. Në këto ambiente u gjetën dhe u sekuestruan rreth 4 mijë bimë kanabisi, si dhe pajisje të ndryshme elektrike, përfshirë llamba dhe neonë./Dosja.al

foto nga banesa e pershtatur per kultivim te bimeve narkotike

RROGOZHINË- Një operacion i befasishëm i Policisë së Shtetit ka zbuluar ambientet private të kreut të Institucionit të Ekzekutimit të Vendimeve Penale (IEVP) Rrogozhinë.

Pamjet e siguruara tregojnë momentin kur forcat e rendit hyjnë në ambientet e përshtatura enkas për kultivimin e bimëve narkotike./Dosja.al

PEQIN- Policia e Peqinit ka dalë me një zyrtar lidhur me operacionin e koduar “Kurtaj”, ku u gjetën rreth 4 mijë rrënjë kanabis në banesën e drejtorit të burgut të Rrogozhinës, Bilal Hasa, i cili është shpallur në kërkim dhe pezulluar nga detyra. 

Policia njofton gjithashtu se ka shpallur në kërkim edhe përgjegjëshin e OSHEE për Peqinin, i cili akuzohet për shpërdorim detyre. Gjatë operacionit të policisë, u zbuluan 2 ambiente të përshtatura për kultivimin e bimëve narkotike, me anë të llambave. Në cilësinë e provës materiale, u sekuestruan rreth 4000 bimë kanabisi, llamba, neonë dhe pajisje të tjera elektrike.

Njoftimi i policisë:

Peqin/Finalizohet operacioni policor i koduar “Kurtaj” për goditjen e kultivimit të bimëve narkotike në ambiente të mbyllura me anë të llambave. Operacioni u zhvillua nga Drejtoria për Krimet në Volum në Drejtorinë e Përgjithshme të Policisë së Shtetit, në bashkëpunim me DVP Elbasan dhe Komisariatin e Policisë Peqin, nën drejtimin e Prokurorisë Elbasan.

Zbulohen 2 ambiente të përshtatura për kultivimin e bimëve narkotike. Sekuestrohen rreth 4000 bimë kanabisi, llamba, neonë dhe pajisje të tjera elektrike.

Shpallet në kërkim pronari i ambientit. Në kërkim edhe përgjegjësi i OSHEE-së për Peqinin, për shpërdorim detyre.

Në vijim të planit të masave për evidentimin dhe goditjen e kultivimit të bimëve narkotike në ambiente të mbyllura, bazuar edhe në informacionet e siguruara në rrugë operative, shërbimet e Policisë në kuadër të operacionit policor të koduar “Kurtaj”, ushtruan kontroll në fshatin Kurtaj, njësia administrative Gjocaj.

Gjatë kontrollit, në bodrumin e një magazine, u konstatuan 2 ambiente të përshtatura për kultivimin e bimëve narkotike me anë të llambave, ku ishin kultivuar rreth 4000 bimë kanabis.

Nga veprimet hetimore rezultoi se ambienti është në pronësi të shtetasit B. H., i cili u shpall në kërkim.

Në vijim të veprimeve, për veprën penale “Shpërdorimi i detyrës”, u shpall në kërkim edhe shtetasi E. M., me detyrë përgjegjës i OSHEE-së për zonën e Peqinit.

Shërbimet e Policisë vijojnë punën për kapjen e tyre. Operacioni, nën drejtimin e Prokurorisë Elbasan, vijon, ndërsa po punohet intensivisht për identifikimin dhe nxjerrjen përpara përgjegjësisë penale të personave të tjerë të përfshirë në këtë veprimtari kriminale./Dosja.al

PEQIN- Drejtoria e Përgjithshme e Burgjeve ka pezulluar nga detyra drejtorin e Burgut të Rrogozhinës, Bilal Hasa, pasi në banesën e tij u gjetën 4 mijë rrënjë kanabis. Me anë të një njoftimi zyrtar, Drejtoria e Përgjithshme e Burgjeve njofton se distancohet nga çdo veprim që bie ndesh me ligjin dhe thekson se mbështet plotësisht hetimin e plotë dhe transparent të rastit.

Njoftimi zyrtar:

Drejtoria e Përgjithshme e Burgjeve është vënë në dijeni nga mediat lidhur me rastin e drejtorit të IEVP Rrogozhinë, Bilal Hasa.

Në vijim të informacionit të marrë, Drejtoria e Përgjithshme ka ndërmarrë masa administrative të menjëhershme për pezullimin e tij nga detyra, deri në zbardhjen e plotë të ngjarjes nga organet kompetente.

Gjithashtu, Drejtoria e Përgjithshme e Burgjeve distancohet nga çdo veprim që bie ndesh me ligjin dhe thekson se mbështet plotësisht hetimin e plotë dhe transparent të rastit./Dosja.al

PEQIN- Policia ka zbuluar një shtëpi bari në Peqin. Bëhet me dije se ambienti, i cili ishte përshtatur për kultivimin e kanabisit, është në pronësi të drejtorit të burgut të Rrogozhinës, Bilal Hasa.

Ky i fundit është shpallur në kërkim, ndërsa mbi 3000 rrënjë kanabis janë sekuestruar në ambientin e përshtatur për kultivimin e bimëve narkotik./Dosja.al