Tritoli në Kamëz/ Pronari nuk pranoi tu jepte 500 mijë € ‘gjobëvënësve’, 3 në pranga, mes tyre ish-efektivi që shoqëroi Martinajn! Në kërkim Ervis Lami

TIRANË- Ervis Lami 31-vjeç është personi që është shpallur në kërkim nga policia, pasi dyshohet se është njëri prej autorëve të tritolit në një restorant në Kamëz. Lami është një emër i njohur për policinë. Ai ishte shpallur në kërkim për vrasjen e postierit Lulzim Visha, ngjarje e ndodhur në janar të këtij viti.

Lulzim Visha u qëllua me pistoletë me silenciator, ndërsa makina Porsche e autorëve u gjet e djegur në Zall Herr, bashkë me armën e shkrumbuar. Shkak i kësaj ngjarje të rëndë për hetuesit u dyshua se ishte konflikti për pronat.

Në atë kohë, policia shkoi për kontroll në shtëpinë e Ervis Lamit, por nuk e gjeti aty. Në një ambient pranë shtëpisë së tij, gjeti një armë zjarri automatike me silenciator me 15 fishekë, një sëpatë, një thikë, një këllëf pistolete “Glok” dhe në oborrin e banesës u gjetën 4 gëzhoja arme. Për këto, policia e shpalli në kërkim 31 vjeçarin dhe arrestoi kushëririn e tij, Eduart Lami, pasi kishte dyshime se armët përdoreshin nga të dy.

Ngjarja në Kamëz

Tre persona janë arrestuar dhe një tjetër është shpallur në kërkim të dyshuar si autorë të shpërthimit të ndodhur ditën e djeshme në restorantin ‘Perla e Detit’ në zonën e Kamzës. Jeton Lami 31 vjeç, Florin Domi 30 vjeç dhe Flogert Mezhika 34 vjeç, janë personat e arrestuar ndërsa në kërkim është shpallur Ervis Lami, i cili po ashtu në fillim të vitit kërkohej për vrasjen e postierit Lulzim Visha, po në Kamëz.

Jeton Lami është ish-oficer i forcave Operacionale, i liruar nga burgu në nëntor të vitit 2023, i dënuar për ‘shpërdorim detyre’ teksa dyshohet se ka shoqëruar me makinë të shumëkërkuarin Ervis Martinaj në Durrës, para se ky i fundit të zhdukej pa lënë gjurmë.

Shkak për hedhjen e eksplozivit në pjesën e jashtme të biznesit, mësohet të jetë bërë shuma e 500 000 eurove, gjobë kjo që autorët i kishin vendosur pronarit Saimir Sina ndërsa ky i fundit kishte refuzuar që t’ia jepte.

Nga shpërthimi nuk ka pasur të lënduar, por vetëm dëme materiale. Godina e restorantit është në pronësi të Saimir Sinës, por i marrë me qira nga 2 kunetërit Klodjan Murati dhe Benard Elezi. Këta të fundit deklaruan ditën e djeshme se nuk kanë konflikte me njeri./Dosja.al

Foto ilustruse

TIRANA-Detaje të reja vijojnë të dalin në lidhje me ngjarjen e një ditë më parë, ku u vendos një sasi eksplozivi në një lokal në zonën e Kamzës. Bëhet me dije se lokali ishte marrë me qira nga dy kunetër, Klodjan Murati dhe Benard Elezi, por lokali ishte në pronësi të Saimir Sinës, i cili jeton në Itali.

Për këtë ngjarje policia ka arrestuar tre persona, Jeton Lami ish polic i operacinales që shoqëroi Ervis Martinajn para se të zhdulej, Florin Domi dhe Flogert Mezhika. Ndërsa në kërkim është Ervis Lami. Autorët dhe dy kunetërit që kishin marrë lokalin me qira kanë qenë pjesë e të nijetit grup gjobvënësish, por pas konflikteve janë ndarë.

Pra tre të arrestuarit mes të cilëve edhe ish-oficeri Jeton Lami i kishin vendosur gjobë 500 mijë euro pronarit të lokalit, Saimir Sina, ky i fundit jetonte në Itali. Arsyeja ka qenë pasi ata i kërkonin që lokalin të mos ua linte me qira dy kunetërve Klodjan Muratit dhe Benard Elezit. Dhe për këtë arsye e kishin paralajmëruar se nëse nuk largonte ata nga lokali do të duhet tu jepte atyre gjobën prej 500 mijë eurosh.-Dosja,al

Foto ilustruse

KAMËZ- Policia e Tiranës ka zbardhur shpërthimin me tritol të vendosur një ditë më parë në zonën e Kamzës në një lokal. Blutë bëjnë me dije se në pranga kanë vënë tre persona dhe kanë shpallur në kërkim një tjetër, të cilët vendosën tritolin në biznes.

Në  pranga kanë rënë, Jeton Lami 31 vjeç, Florin Domi 30 vjeç dhe Flogert Mezhika 34 vjeç, në kërkim është shpallur E. L., 31 vjeç, të gjithë banues në Kamëz. Jeton Lami është ish-oficer i forcave Operacionale, i liruar nga burgu në shtator të vitit 2023, i dënuar për ‘shpërdorim detyre’ teksa dyshohet se ka shoqëruar me makinë të shumëkërkuarin Ervis Martinaj në Durrës, para se ky i fundit të zhdukej pa lënë gjurmë.

Gjithashtu nga hetimet dyshohet se të arrestuarit kanë hedhur lëndë eksplozive në pjesën e jashtme të biznesit, duke shkaktuar dëme materiale. Kjo për shkak të mosdhënies së një shume prej 500 000 euro, të kërkuar në formë gjobëvënieje ndaj pronarit të biznesit. Policia po heton më shumë mbi rastin.

Njoftimi i Policisë

“Tiranë/ Finalizohet operacioni policor i koduar “Motivi”. Zbardhet brenda 24 orëve dhe dokumentohet, si rezultat i aplikimit të metodave proaktive, ngjarja e ndodhur ditën e djeshme në Kamëz, ku një biznesi iu vendos lëndë plasëse. Identifikohen 4 autorët e dyshuar. Vihen në pranga 3 prej tyre, ndërsa vijon puna për kapjen e shtetasit tjetër. Specialistët e Seksionit për Hetimin e Krimeve të Rënda kundër Personit dhe Pronës të DVP Tiranë, në bashkëpunim me Komisariatin e Policisë Nr. 5 dhe nën drejtimin e Prokurorisë, si rezultat i informacioneve të siguruara dhe aplikimit të metodave proaktive, zbardhën dhe dokumentuan ngjarjen e ndodhur ditën e djeshme, në bulevardin “Nënë Tereza”, Kamëz.

Në kuadër të operacionit “Motivi” u vunë në pranga për veprat penale “Shkatërrimi i pronës me eksploziv” dhe “Shtrëngimi me anë të kanosjes ose dhunës për dhënien e pasurisë”, shtetasit: J. L., 31 vjeç, F. D., 30 vjeç, F. M., 34 vjeç, si dhe u shpall në kërkim shtetasi E. L., 31 vjeç, të katërt banues në Kamëz. Nga hetimet dyshohet se këta shtetas kanë hedhur lëndë eksplozive në fasadën e jashtme të biznesit, duke shkaktuar dëme materiale, për shkak të mosdhënies së një shume prej 500 000 euro, të kërkuar në formë gjobëvënieje ndaj pronarit të objektit, shtetasit S. S. Vijon puna intensive për kapjen e shtetasit të shpallur në kërkim, si dhe për identifikimin e personave të tjerë që mund të jenë përfshirë./Dosja.al