Kosova nënshkruan aplikimin për anëtarësim në BE, Osmani dhe Kurti: Ditë historike për vendin tonë

Kurti

KOSOVË- Kryeministri i Kosovës, Albin Kurti pasi firmosi aplikimin për anëtarësim në Bashkimin Evropian, u shpreh se ky është një moment historik për vendin.

“Bazuar në aspiratat dhe përkushtimin e pathyeshëm të popullit tonë për paqe, liri, barazi dhe drejtësi, orientimin tonë të qartë evropian e euroatlantik dhe konsensusin shoqëror e politik se e ardhmja e vendit tonë është brenda BE-së, sot po bëjmë hapin e parë drejt anëtarësimit në organizatën më të madhe të paqes dhe prosperitetit në Evropë”, ka thënë Kurti.

Kurti ka bërë të ditur se aplikimi do t’i dorëzohet Presidencës Çeke të BE-së në Pragë për të vijuar më tej me procedurën e shqyrtimit të saj.

“Aplikimi në BE i nënshkruar sot nga krerët e Republikës tonë, do t’ia dorëzojmë presidencës çeke të Këshillit të BE-së në Pragë. Ky është moment historik për vendin tonë që synon hapjen e një kapitulli të ri për shtetin dhe shoqërinë tonë”, ka thënë Kurti.

Konjufca

KOSOVË- Kryeministri i Kosovës Albin Kurti, presidentja Vjosa Osmani dhe kryeparlamentari Glauk Konjufca kanë nënshkruar sot aplikimin për anëtarësim në Bashkimin Europian.

Gjatë fjalës së tij kryeparlamentari Konjufca tha se sot janë mbledhur për një ditë të rëndësishme për Kosovën, duke thënë se anëtarësimi në BE është i rëndësishëm jo vetëm për Kosovën, por edhe rajonin.

“Respektimi i të drejtave të njeriut, barazia, konkurrenca e ndershme, lëvizja e lirë janë në thelbin e saj, një Union që e stimulon rritjen ekonomike dhe mirëqenien e tyre. Ky është hapi parë zyrtar në rrugën e anëtarësim të Kosovës drejt BE-së, një rrugë e gjatë dhe aspak e lehtë”.- tha Konjufca.

Konjufca shtoi se Kosova e meriton të marri statusin kandidat dhe të nisë rrugëtimin e saj për në BE. Ai po ashtu shtoi se kjo është një fazë që synojnë ta arrijnë në një kohë sa më të shpejtë.

Kryeparlamentari iu bëri thirrje institucioneve të BE-së që ta pranojnë aplikimin e Kosovës dhe ta përkrahin atë.

“Për këtë arsye e ftojmë Parlamentin Europian, Komisioni Europian dhe Këshillin e BE-së që ta demonstrojnë përkushtimin dhe përkrahjen e tyre ndaj Kosovës, duke e miratuar unanimisht kërkesën e Kosovës për anëtarësim dhe të na inkurajojnë të gjithëve për t’i marrë reformat për përparimin e Kosovës, që e kanë kuptimin e interesit për qytetarët dhe jo për politikanët. Ta forcojmë sigurinë ne Europë”.- përfundoi ai.

Konjufca, Osmani dhe Kurti

KOSOVË- Presidentja e Kosovës Vjosa Osmani foli pas firmosjes së kërkesës së Kosovës për anëtarësimin e saj në Bashkimin Europian.

Osmani u shpreh se kjo ditë është një nga momentet më historike të Kosovës pasi vijon rrugëtimin dhe synimin euro-atlantik të saj.

“14 dhjetor ka rëndësi të dyfishtë për historinë e Kosovës. Në njërën anë po aplikojmë për anëtarësim në Bashkimin Evropian dhe në anën tjetër po shënojmë përvjetorin e themelimit të ushtrisë sonë. Dy akte që shkojnë në drejtim të realizim të vizion tonë, integrimit euro-atlantik”, tha Osmani.

Presidentja shtoi se ky është një hap vendimtar drejt jetësimit të ëndrrës kolektive dhe ambicies së tyre të patjetërsueshme drejt Europës.

Konjufca, Osmani dhe Kurti

KOSOVË- Është mbajtur sot ceremonia e nënshkrimit të aplikimit për anëtarësim në Bashkim Evropian. Në këtë ceremoni kanë marrë pjesë presidentja Vjosa Osmani, kryeministri Albin Kurti dhe kryeparlamentari Glauk Konjufca.

Lajmin e ka njoftuar disa ditë më parë vetë kryeminstri Kurti i cili theksoi se në krahasim me disa vende të tjera, të cilat kanë aplikuar më parë, Kosova i ka plotësuar të gjitha kushtet.

Pas firmosjes së kërkesës nga ana e Kurtit, Osmani dhe Konjufcës, të tre do të mbajnë një konferencë për shtyp për gazetarët ku do të bëjnë dhe deklaratat përkatëse.