Aktualitet

Shqipëria 108 vite shtet/ Dita e Flamurit na gjen nën ‘kthetrat e pandemisë’, Rama, Meta, Basha e Kryemadhi bëjnë homazhe: Urime flamuri kuqezi, valëvitu krenar! SHBA: Jemi pranë Shqipërisë

Në këtë ditë, Ismail Qemali ngriti flamurin kuqezi në Vlorë, duke e shpallur vendin tonë, të pavarur. Po më 28 nëntor 1443, heroi ynë kombëtar Gjergj Kastriot Skënderbeu çliroi Krujën nga pushtimi osman dhe ngriti flamurin kombëtar mbi kalanë e saj.
Featured image of article: Shqipëria 108 vite shtet/ Dita e Flamurit na gjen nën ‘kthetrat e pandemisë’, Rama, Meta, Basha e Kryemadhi bëjnë homazhe: Urime flamuri kuqezi, valëvitu krenar! SHBA: Jemi pranë Shqipërisë Foto ilustruese

TIRANË– Sot data shënon 28-nëntor, një ditë e shënuar për të gjithë shqiptarët e cilësuar edhe si “Dita e Flamurit”. Shqipëria mbush sot 108 vite që nga shpallja e Pavarësisë, më 28-nëntor të vitit 1912. Në këtë ditë, Ismail Qemali ngriti flamurin kuqezi në Vlorë, duke e shpallur vendin tonë, të pavarur. Po më 28 nëntor 1443, heroi ynë kombëtar Gjergj Kastriot Skënderbeu çliroi Krujën nga pushtimi osman dhe ngriti flamurin kombëtar mbi kalanë e saj.

Kjo ditë që shënon dy ngjarjet më të rëndësishme historike në vend, dhe festohet nga të gjithë shqiptarët kudo në botë. Ngritja e flamurit në Vlorë nga i madhi Ismail Qemali, është konsideruar edhe si nëntori i dytë.

Ajo që e bën ndryshe sot këtë festë është fakti që vendin tonë e ka gjetur të mbërthyer nga pandemia e Covid-19. Kjo sigurisht i lë shqiptarët pa e nxjerrë entiziasmin për të ngritur flamujt kuqezi nëpër sheshe e për të brohoritur në emër të Pavarësisë së vendit, siç ka ndodhur çdo vit.  Kësaj here, i mbërthyer nga kthetrat e pandemisë, Shqipëria nuk do ta ndjerë erën e festës së Pavarësisë. Madje autoritetet u kanë bërë thirrje qytetarëve që të qëndrojnë nëpër shtëpië sot, duke shmangur grumbullimet, infektimet dhe njëkohësisht gjobitjen.

Për më shumë bëhu pjesë e grupit më viral në Facebook, Dosja.al

Por kjo nuk i ka ndaluar politkanët që të mbajnë homazhe. Basha zgjodhi Tiranë, ndërsa Rama, Meta e Kryemadhi shkuan në Vlorë, ku vendosën kurorat me lule në sheshin e flamurit. Moment pikant ishte kur Meta përshëneti Ramën dhe Gramoz Ruçin, por nuk iu kthye nga kreu i qeverisë.

(f.m/dosja.al)

  • 12:16

    28 Nëntori/ Presidenti rus uron shqiptarët, Vladimir Putin: Zhvillimi i marrëdhënieve ruso-shqiptare do t`u përgjigjej interesave të popujve të vendeve tona

    Vladimir Putin

    Në 108 vjetorin Pavarësisë së Shqipërisë urimi i veçantë ka ardhur dhe nga Rusia. Presidentit i Rusisë, Vladimir Putin, ka uruar shqiptarët përmes një telegrami urimi që i ka dërguar dërguar Presidentit Meta. Ai shkruan ndër të tjera se është i bindur se zhvillimi i marrëdhënieve ruso-shqiptare do t’u përgjigjej interesave të popujve të vendeve tona dhe tërë kontinentit Evropian. “I nderuar zoti President, pranoni urimet e sinqerta me rastin e festës kombëtare të Shqipërisë, Ditës së Flamurit. Jam i bindur se zhvillimi i marrëdhënieve ruso-shqiptare do t’u përgjigjej interesave të popujve të vendeve tona dhe tërë kontinentit Evropian. Ju uroj shëndet dhe suksese, ndërsa të gjithë bashkatdhetarëve tuaj lumturi dhe prosperitet. Me respekt, Vladimir Putin”, thuhet në mesazhin e Putin.  Mesazhi i tij është bërë publiknë faqen e ‘Facebook të ambasadës ruse në Tiranë.

  • 12:27

    Me flamurin kombëtar mbi shpinë/ Këngëtarja me famë botërore u uron shqiptarëve Ditën e Pavarësisë, Dua Lipa: Krenare që jam shqiptare

    Dua Lipa

    Artistja shqiptare me famë botërore, Dua Lipa u ka uruar festën e 28 nëntorit, të gjithë bashkëkombësve të saj. Në një fotogari që ka postuar në rrjetet sociale “ylli’ i muzikës shihet me flamurin kombëtar në shpinë. Dua krahas fotos që e ka realizuar gjatë vitit 2019 në Kosovë, në festivalin‘Sunny Hill’, u ka uruar të gjithë shqiptarëve festën e flamurit, duke shtuar se është krenare që është shqiptare. “28 nëntori! Dita e flamurit, krenare të jem shqiptare, urime dita e pavarësisë”, ka shkruar Lipa në Instagram.

    Postimi
  • 12:38

    Në Ditën e Pavarësisë, Edi Rama përkujton Adem Jasharin: Lindi dhe vdiq si legjenda e gjallë e flamurit më të bukur në botë

    Adem Jashari

    Kryeministri Edi Rama në ditën e 28 Nëntorit ka përkujtuar heroin shqiptar Adem Jashari. Rama përmes një postimi në “Facebook”, ka thënë se Adem Jashari erdhi në këtë botë pikërisht në Ditën e Flamurit Kombëtar dhe vdiq për të jetuar përgjithmonë, si legjenda e gjallë e flamurit më të bukur në botë. Rama ndër të tjera shkruan se Historia e vdekjes që i dha përjetësinë atij e trungut të prerë të familjes së tij, i tejkalon kufijtë e të besueshmes dhe i ngjan më shumë një versioni të legjendës së Gjergj Elez Alisë

    POSTIMI I PLOTË

    ADEM JASHARI erdhi në këtë botë mu në Ditën e Flamurit Kombëtar dhe iku nga kjo botë pasi e la trupin pa jetë si një monument të shtrirë në mesin e shtëpisë ku mbante flamurin kombëtar. Historia e vdekjes që i dha përjetësinë atij e trungut të prerë të familjes së tij, i tejkalon kufijtë e të besueshmes dhe i ngjan më shumë një versioni të legjendës së Gjergj Elez Alisë, ku plagët në trup janë më shumë se nëntë e janë vetë trupat e njerëzve të gjakut të heroit, copëtuar nga plumbat e një bajlozi të stërmadh sa një ushtri e tërë armike që mësyu mizorisht mbi shtëpinë ku zhvillohet rrëfimi mitologjik. Sikur ajo shtëpi e sharruar nga zjarri armik të mos ishte ende aty, sikur familjarët e vrarë të Adem Jasharit të mos ishin banorë të asaj shtëpie, që figurojnë një më një, në gjendjen civile të komunës Prekaz dhe sikur vetë Adem Jashari të mos ishte një njeri i gjallë deri në 7 marsin e vitit 1998, i cili figuron edhe si klient në regjistrin e hotelit “Arbëria” në Tiranë, do të ishte realisht e pamundur t’i besohej vërtetësisë së historisë mitike të komandantit legjendar të luftës së Kosovës. Madje edhe vetë Besarta, shtojzovallja e mbijetuar e asaj masakre të pabesueshme, do të dukej si rrëfimtarja e përhumbur e një përralle, nëse familja Jashari nuk do të kishte qenë aty, mes një komuniteti të tërë shqiptarësh të zakonshëm prej të cilit u nda, e gjitha, menjëherë, në terrin mes dy ditëve të zakonshme mbi pllajën baritore të Prekazit. Madje madje edhe ajo pllajë, e kthyer sot në një varrezë unikale dëshmorësh me një trung të vetëm familjar, nëse nuk do ishte aty, pjesë reale e gjeografisë së Kosovës, do të dukej si pejsazhi i krijuar nga peneli i imagjinatës për të qenë skena magjike e zhvillimit të gojëdhanës së lashtë, për një kreshnik me emrin Adem Jashari e familjen e tij. Mirëpo jo, e gjitha është thjesht e vërtetë, e vërteta e pabesueshme e kulmimit epik të Luftës së fundit Çlirimtare në mes të Europës, bash krejt në fund të shekullit XX, ku një popull i mohuar në të drejtën e tij për liri nga një diktaturë e urrejtjes etnike dhe i poshtëruar prej harresës së gjatë të botës demokratike, ngriti krye kundër urrejtjes e harresës dhe triumfoi kundër të gjitha paragjykimeve e parashikimeve.
    Adem Jashari lindi në 28 nëntor dhe vdiq për të jetuar përgjithmonë, si legjenda e gjallë e flamurit më të bukur në botë. 

  • 12:50

    “BE qëndron pranë popullit shqiptar!”/ Dita e Pavarësisë, Soreca: Këtë vit nderojmë viktimat nga COVID-19 dhe sakrificën e mjekëve

    Ambasadori i BE-së në Shqipëri, Luigi Soreca

    Në ditën e Flamurit, ambasadori i Bashkimit Evropian në Shqipëri Luigi Soreca u ka uruar shqiptarëve 108 vjetorin e shpalljes së Pavarësisë. Në një postim që ka bërë në ‘Twitter’, ai ka zgjedhur të kujtojë të gjithë personat që kanë humbur jetën nga koronavirusi dhe sakrificën e mjekëve dhe infermierëve shqiptarë. “Gëzuar Ditën e Pavarësisë Shqipëri! Këtë vit ne u bëjmë nderime shqiptarëve që humbën betejën e tyre kundër COVID19 dhe sakrificës së mjekëve dhe infermierëve shqiptarë që janë në vijën e frontit çdo ditë. BE qëndron pranë popullit shqiptar” – shkruan Soreca.

  • 16:01

    “Lumturi dhe prosperitet popullit shqiptar”/ Ministri rus uron Ramën për 108 vjetorin e Pavarësisë, Sergej Lavrov: Jam i bindur se…

    Edi Rama dhe

    Një tjetër mesazh urimi ka ardhu nga Rusia në 108-vjetorin e Pavarësisë. Së fundmi Ministri i Jashtëm rus Sergej Lavrov i ka dërguar një letër urimi kryeministrit Edi Rama, ku shkruan se aktivizimi i kontakteve midis ministrive të punëve të jashtme të vendeve tona do të kontribuojë në zhvillimin e marrëdhënieve ruso-shqiptare si edhe do t’i shërbejë përforcimit të paqes dhe sigurisë në Ballkan dhe në mbarë Evropën. “I nderuar zoti Kryeministër! Pranoni urimet e mia me rastin e festës kombëtare të Republikës së Shqipërisë, Ditës së Flamurit. Jam i bindur se aktivizimi i kontakteve midis ministrive të punëve të jashtme të vendeve tona do të kontribuojë në zhvillimin e marrëdhënieve ruso-shqiptare si edhe do t`i shërbejë përforcimit të paqes dhe sigurisë në Ballkan dhe në mbarë Evropën. Ju uroj suksese në punë, ndërsa popullit shqiptar  lumturi dhe prosperitet. Sergej Lavrov”, thuhet në mesazhin e Lavrov të publikuar nga ambasada ruse në Tiranë.

  • 16:21

    “Fitorja për shëndetin do të jetë më e madhja”/ Manastirliu uron shqiptarët në festën e Pavarësisë: Patriot sot është kush qëndron në shtëpi

    Ogerta Manastirliu

    Ministrja e Shëndetësisë, Ogerta Manastirliu ka uruar shqiptarët për festën e pavarësisë. Përmes një video-mesazhi, Manastirliu thotë se sot  “patriot është ai qe rri në shtëpi”. Ndër të tjera ministrja thotë se, një ndër fitoret e mëdha të shqiptarëve do të jetë dhe ajo ndaj pandemisë së koronavirusit.

    Dua t’i uroj me zemër të gjithë shqiptarëve gëzuar ditën e pavarësisë! Por kam edhe një lutje për çdo qytetar. Këto festa na gjejnë përballë një sfide të shëndetit publik, që ndodh një herë në shekull. Patriot sot është kush qëndron në shtëpi, për të mbrojtur shëndetin e vetes, familjes dhe të afërmve Do të vij një kohë kur ndër fitoret më të mëdha që do të rendisim do jetë edhe kjo, fitorja për shëndetin”, shkruan ajo

  • 13:38

    Festohet në kushte pandemie 108-vjetori i Pavarësisë/ Forcat politike në Berat të ndara edhe në Ditën e Flamurit

    Ceremonia ne Berat

    Është përkujtuar ditën e sotme në memorialin e “Dëshmorëve të kombit” në Berat festa e 28 Nëntorit,një datë historike dhe mjaft e rëndësishme për mbarë kombin shqiptar. Pushtetarë vendorë, historianë, familjarë të firmëtarëve të aktit të Pavarësisë dhe qytetarë ishin të pranishëm në ceremoninë e kësaj feste. Për shkak të situatës së rënduar pandemike që po kalon vendi ynë, ceremonia përkujtimore e Ditës së Pavarësisë në Berat u organizua nën masa të rrepta sigurie dhe duke respektuar distancën. Ceremonia nisi nën tingujt e bandës frymore të qytetit,ndërsa më pas u kryen homazhe në Memorialin kushtuar Pamvarësisë,në lagjen ” Dëshmorë e Kombit”. Edhe në këtë ditë të shënuar,siç është Dita e Pamvarësisë, politika në Berat u nda sërish

    Përfaqësuesit e Partisë Demokratike dhe të partive të tjera opozitare,i zhvilluan homazhet dhe nderimet në Lapidarin kushtuar Pavarësisë 30 minuta pasi kishin përfunduar homazhet pushtetarët vendor. Në Kuvendin e Vlorës, Berati ka pasur delegatët e tij,të kryesuar nga Iliaz bej Vrioni, kryeministër i vendit,ministër i jashtëm dhe figurë mjaft e rëndësishme e jetës politike dhe sociale të Shqipërisë në vitet ’20-’30.
  • 13:52

    108 vjetori i Pavarësisë/ Vjen urimi i veçantë nga Kosova, Vjosa Osmani: 28 Nëntori, ditë krenarie e shprese për çdo shqiptar

    Vjosa Osmani

    Presidentja në detyrë e Kosovës, njehkohësisht dhe kryetare e Kuvendit të Kosovës, Vjosa Osmani, në 108 vjetorin e Pavarësisë ka uruar Presidentin e Shqipërisë, Ilir Meta për festën e Flamurit. Osmani shkruan se Flamuri kombëtar prek ndjenjën e ekzistimit të kombit në histori, duke shtuar se është trashëgimi e përjetësuar në simbol. Po ashtu, Osmani thekson se kjo ditë është ditë krenarie dhe shprese për çdo shqiptar. “Flamuri kombëtar prek ndjenjën e ekzistimit të kombit në histori. Ai është trashëgimi e përjetësuar në simbol. Qysh nga koha e Skënderbeut, ai i bën krenarë shqiptarët dhe i bashkon rreth një fryme. Prandaj, ata janë fort të lidhur për të, sepse, përveç tjerash, ua simbolizon lirinë. Kështu qe në Krujë, më 1443, në Vlorë më 1912 e në Prishtinë, më 1999. Prandaj, nuk është aspak rastësi që shqiptarët janë ndër të paktët popuj, i cili, duke treguar respektin e skajshëm ndaj këtij simboli, e ka lartësuar atë edhe në simbolin tjetër, himnin kombëtar. 28 Nëntori shënon ditë krenarie e shprese për çdo shqiptar. Ajo na mbledh përreth së kaluarës sonë dhe shndërrohet në shtysë të fuqishme për ta jetësuar vizionin tonë. Prandaj, tash kur vizioni i brezave për liri është kurorëzuar edhe me pavarësinë e Kosovës, lidhjet shpirtërore ndërmjet dy shteteve tona duhet të forcohen. Shqipëria dhe Kosova, njëra fëmijë i fillimshekullit XX e tjetra e fillimshekullit XXI, të dyja rrjedhojë e ngulmimit për vlerat e lirisë dhe e aleancave të fuqishme me qytetërimin perëndimor, po shndërrohen dalëngadalë në faktor stabiliteti e paqeje në rajon. Ato po ecin krahas njëra-tjetrës, si dy shtete sovrane, në procesin e integrimit evropian, duke e njohur dhe ndihmuar njëra-tjetrën”, përfundon telegrami i u.d. Presidentes Osmani dërguar Presidentit Meta.

  • 14:38

    Zhvillojnë homazhe para monumentit të Ismail Qemalit dhe të Adem Jasharit / Lëvizja Vetëvendosje u uron shqiptarëve Ditën e Pavarësisë

    Lëvizja Vetëvendosje në Shqipëri, ditën e sotme ka uruar shqiptarët për festën e Pavarësisë.Aktivistë dhe përfaqësues të Lëvizjes në Shqipëri zhvilluan sot homazhe përpara monumentit të Ismail Qemalit dhe monumentit të Adem Jasharit në Tiranë. Ato shkruajnë se shqiptarët duhet të ngrihen në vetëdijen më të lartë politike dhe shoqërore, pikërisht sepse gjenden në planin më të ulët të organizimeve qeveritare e shtetërore.

    POSTIMI I PLOTË: 

    Lëvizja VETËVENDOSJE! Qendra Shqipëri, i uron sot të gjithë shqiptarëve, anëmbanë trojeve dhe kudo në mërgatë, Ditën e Pavarësisë. Aktivistë dhe përfaqësues të Lëvizjes në Shqipëri zhvilluan sot homazhe përpara monumentit të Ismail Qemalit dhe monumentit të Adem Jasharit në Tiranë. 28 Nëntori është dita që u themelua nga një lëvizje e gjerë e që mbuloi disa dekada veprimtarie kombëtare, politike dhe lufte, letërsie dhe militance. Rreth kësaj date mblidhet dhe shprehet më qartë populli ynë, populli i një gjuhe. Në emër të Rilindjes nënshkuhet Lidhja e Prizrenit dhe Shpallja e Pavërësisë. Këto dy data kanë përcaktuar në mënyrën më të përkryer projektin kombëtar të Lëvizjes sonë. Ne nuk mund ta humbim më rrugën si popull, si komb dhe si shtetime. Kushtetutat tona, Kuvendet tanë, tërë veprimtaria e institucioneve tona duhet të regjistrohen mbi këto dy data dhe të pyetësojnë tërë zhvillimin e tyre lidhur me projektin që përcaktohet në aktet themeltarë të historisë sonë. Sot, shqiptarët duhet të ngrihen në vetëdijen më të lartë politike dhe shoqërore, pikërisht sepse gjenden në planin më të ulët të organizimeve qeveritare e shtetërore. Kjo është detyra më e pjekur e shoqërisë në Republikën tonë, të bëjë ç’është e mundur në përditësinë e vet për të ngritur një emocion të vërtetë politik nga buron ndershmëria dhe sinqeriteti i domosdoshëm i çdo pjesëmarrjeje kolektive. Kjo datë duhet të na kujtojë se përbërësit socialë dhe përfaqësues, ekonomikë dhe ushtarakë, duhet të rimëkëmben sa më shpejt të jetë e mundur. Vetëm duke qenë besnikë ndaj projektit kombëtar ne do të mund të numërojmë mirë vuajtjet dhe fitoret e njerëzimit shqiptar, luftën e shqiptarëve të Kosovës dhe pakicave tona në Serbi, Mal Të Zi, si dhe popullsinë tonë në shqiptarinë lindore. Vetëm kështu ne mund të vlerësojmë saktësisht shumën e dhimbjeve dhe guximit që kanë realizuar pavarësimin e Kosovës. Me ndershmëri, partitë politike dhe shoqëria mund të kuptojnë drejt dhe publikisht veprimet e ngutshme që i kërkohen Kuvendit të Shqipërisë në përcaktimin e drejtë të politikës mbarëkombëtare dhe kushtetuese të Republikës sonë. Vetëm nëse i referohen kthjelltësisë së datës 28 Nëntor 1912, subjektet politikë shqiptarë do të jenë në lartësinë e duhur që kërkon aktualiteti i gjendjes sonë. Le të ngulmojmë e urojmë që sa më shpejt Kuvendi i Republikës të miratojë Rezolutën që dënon hapur gjenocidin serb dhe që përcakton shprehjen më të qartë të politikës sonë të jashtme. Pa veprime të tilla, Kuvendi i Republikës dhe partitë politike që e përbëjnë nuk janë aspak në linjën e pavarësimit të shqiptarëve dhe urimi i tyre për festën e 28 Nëntorit mbetet hipokrizi dhe mashtrim. Sepse urimi i kësaj dite është programi i të gjithë akteve përmes së cilëve rritet pesha e shqiptarëve në rajon dhe botë.

    Urojmë ta ndjejmë e ta gëzojmë së bashku Ditën e madhe të Pavarësisë. Urojmë një ndjenjë më të lartë përgjegjësie dhe ndërgjegjje mbarëshqiptare.

    Gëzuar!

    Tiranë, 28 nëntor 2020

    Lëvizja VETËVENDOSJE!
    Qendra në Shqipëri

  • 15:20

    Dita e Flamurit/ Urimi i VEÇANTË nga NATO, poston foton e ushtarit shqiptar: Bashkohuni festës së aleatit tonë

    Me rastin e 28 Nëntorit, Shqipërisë i ka ardhur sot një urim i veçantë nga Organizata e Traktatit të Atlantikut të Veriut, NATO. Përmes një postimi në rrjetet sociale NATO ka postuar një fotografi të një ushtari shqiptar.

    Ndërkohë, krahas fotografisë,  fton që të gjithë t’i bashkohen festës së aleatit të tyre.

  • 15:32

    “Ishte ngjarja më e rëndësishme në Histori”/ Hoti uron Ramën e shqiptarët për 28 Nëntorin: Kjo ditë na i përkujton sakrificat dhe luftën e përhershme

    Avdullah Hoti

    Kryeministri i Republikës së Kosovës, Avdullah Hoti, me rastin e festës së Pavarësisë i ka dërgar letër Edi Ramës. Në emër të Qeverisë së Republikës së Kosovës, Hoti ai i ka shprehur urimet më të përzemërta me rastin e Ditës së Flamurit 28 Nëntorit. Po ashtu ai shkruan se Shpallja e pavarësisë së Shqipërisë, më 28 nëntor 1912, ishte ngjarja më e rëndësishme në historinë e kombit shqiptar që nga nëntori i Gjergj Kastriotit  Skënderbeut. Po ashtu ai thotë se kjo ditë kjo ditë na i përkujton sakrificat e mëdha dhe luftën e përhershme që kemi bërë gjatë gjithë historisë për ta ruajtur të paprekshme frymë e qenies sonë nacionale.

    LETRA

    I dashur kryeministër Rama,

    Në emër të Qeverisë së Republikës së Kosovës, ju shpreh urimet më të përzemërta me rastin e Ditës së Flamurit – 28 Nëntorit.

    Shpallja e pavarësisë së Shqipërisë, më 28 nëntor 1912, ishte ngjarja më e rëndësishme në historinë e kombit shqiptar që nga nëntori i Gjergj Kastriotit – Skënderbeut. Në këtë ditë të shënuar, prijësit e të gjitha viseve shqiptare, në Vlorën e bekuar, e shpallën njëzëshëm Shqipërinë shtet më vete, të lirë dhe të mosvarur. Që nga ajo kohë, shqiptarët kudo janë e kanë mbajtur lart e me krenari Flamurin Komtar, që është simbol i unitetit, paqes dhe dashurisë së përjetshme në mes nesh. Dita e Flamurit – 28 Nëntori është ditë e secilit shqiptar, pavarësisht ku jeton a punon. Kjo ditë na i përkujton sakrificat e mëdha dhe luftën e përhershme që kemi bërë gjatë gjithë historisë për ta ruajtur të paprekshme frymë e qenies sonë nacionale. Sot, Republika e Shqipërisë krenohet me të arriturat e saj, veçmas me anëtarësimin në NATO dhe me afrimin drejt integrimit në Bashkimin Evropian, Këto të arritura janë frymëzim edhe për Republikën e Kosovës, që edhe ne të punojmë me vendosmëri për plotësimin e standardeve të kërkuara për anëtarësim në këto institucione. Përmbyllja e këtij procesi do të shënonte kthimin e kombit shqiptar në shtratin e vet të natyrshëm shpirtëror, kulturor edhe politik evropian.
    Duke ju ripohuar ndjenjën e konsideratës sime më të lartë, i dashur Kryeministër, uroj që Republika e Shqipërisë të ketë përherë vetëm mbarësi dhe suksese!
    Me respekt,
    Avdullah Hoti,
    Kryeministër i Republikës së Kosovës.

  • 15:51

    Dita e Flamurit nuk njeh Covid-19/ Shqiptarët e Kosovës festojnë 28-nëntorin në Vlorë: Koronavirusi nuk mund të na ndalojë çështjen kombëtare

    Dita e shpalljes së Pavarësisë nuk njeh Covid-19, të paktën për shqiptarët e Kosovës. Ditën e sotme dhjetëra shqiptarë të Kosovës kanë udhëtuar drejt Vlorës për të festuar ditën e Flamurit. Në një video të siguruar nga Abcnews qyetarët shprehen se e kanë të pamundur që në një ditë të tillë të qëndrojnë në heshtje dhe larg Shqipërisë. Ato thonë  se nuk ka koronavirus që i ndal për të festuar ditën e Flamurit një ndër ngjarjet më të mëdha kombëtare për shqiptarët.“Për një festë kaq të madhe siç është 28 nëntori ja vlen që ne të gjithë shqiptarët të jemi në vendin e flamurit në Vlorë”, është shprehur një qytetar nga Kosova.

    Si çdo herë, Covid nuk mund të na ndalojë çështjen kombëtare dhe ditën e Flamurit. Unë vij thuajse çdo vit. Unë mendoj që komandatët që kanë qenë në luftë populli por gabimet që kanë bërë pas luftës i kanë individuale, ndaj dhe komandantët tonë duhet të përballen në gjyqin e Hagës”, shton një tjetër.

  • 11:10

    28-nëntori/ Basha homazhe në varrezat e Deshmorëve të Kombit, vë një kurorë me lule në Monumentin “Nënë Shqipëri

    Kryetari i Partisë Demokratike, Lulzim Basha zhvilloi homazhe në varrezat e Deshmorëve të Kombit, në përkujtimin e ditës së Pavarësisë dhe Çlirimit të Atdheut. Basha vuri një kurorë me lule në Monumentin “Nënë Shqipëri”. Në fjalën e tij, Basha tha se këtë vit kjo festë na ka gjetur ndryshe, pasi Shqipëria dhe shqiptarët po përballen me sfidën e tejkalimit të pandemisë, e cila na ka marrë qindra bashkëqytetarë duke lënduar shumë familje.

    “Sot, në Ditën e Pavarësisë dhe Festës së Flamurit, dua t’ju uroj të gjithë qytetarëve dhe bashkëkombasve të mi kudo ku janë, gëzuar festën më madhështore të kombit tonë. Sot kujtojmë me nderim dhe përkulemi me respekt para veprës dhe sakrificës të gjithë bijve dhe bijave të kombit tonë që sakrifikuan gjithçka në altarin e lirisë dhe të pavarësisë kombëtare. Sot është një ditë feste dhe gëzimi, por ajo na gjen ndryshe nga çdo vit tjetër. Shqipëria dhe shqiptarët po përballen me sfidën e tejkalimit të pandemisë, e cila na ka marrë qindra bashkëqytetarë duke lënduar shumë familje, ndërkohë që mijëra të tjerë po vuajnë pasojat shëndetësore dhe shumë më shumë pasojat ekonomike dhe sociale të pandemisë. Në këto kushte, kjo ditë dhe kjo festë është një kujtesë e fuqisë dhe forcës së kombit tonë. Unë jam i bindur në fuqinë dhe forcën e qytetarëve shqiptarë, në fuqinë dhe forcën tuaj për të qenë së bashku dhe për të tejkaluar së bashku pasojat e kësaj krize dhe pandemie dhe për të dalë më të fortë, më të bashkuar e më të vendosur. Jam i bindur se 28 nëntori tjetër do të na gjejë me një Shqipëri më të shëndetshme, më të mirë dhe më afër Europës. Ju uroj nga zemra gëzuar ditën e Pavarësisë! Gëzuar Ditën e Flamurit,”- tha Basha ndër të tjera.

  • 11:50

    Monika Kryemadhi shkon në Vlorë për 28-nëntorin, fton Luan Ramën në tapetin e kuq: Hajde ecim këtu! Meraku mos i rrëzohet kurora dhe biseda me vogëlushen që i kërkoi foto: Patjetër, ku e do, të rujt Zoti

    Kryetarja e Lëvizjes Socialiste për Integrim, Monika Kryemadhi ka shkuar sot në Vlorë për ceremoninë e 28-nëntorit. Në emër të LSI-së ajo vendosi një kurorë në shenjë nderimi dhe respekti për Ismail Qemalin. Në momentin që shkon të vendosë kurorën, Kryemadhi dëgjohet të ftojë Luan Ramën në tapetin e kuq.

    “Do ecim këtu Luan,”- thotë ajo dhe ai i bashkohet.

    Më pas të dy vendosin kurorën me shumë merak se mos u rrëzohet.

    “S’ka ku rri, do na rrëzohet…ja ta rregullojmë,”- thotë Kryemadhi dhe e sistemojnë disi kurorën.

    Rastësisht pranë Kryemadhi afrohet një vajzë e vogël me emrin Amar dhe i kërkon foto. E veshur me bluzën me shqiponjë, vogëlushja kërkon foto me Kryemadhin dhe kjo e fundit nuk ia mohon. “Pa patjetër, ku e do…dalim atje? E do që të dalin dhe kurorat…si e ke emrin Amar? Uaa sa e bukur. Hajde ta bëjmë dhe një tjetër. Çfarë do bëhesh kur të rritesh? Doktoreshë, ua sa mirë se na kanë ikur doktoreshat. Të rujt Zoti,”- thotë Kryemadhi pas takimit me miken e vogël dhe më pas mban fjalën për mediat.


    Fjala e plotë

    Gëzuar festën të gjithëve! Më shumë se ju në Vlorë që e ndjeni, ndjejmë edhe ne këtë kënaqësi dhe prezencë në këtë ambient të jashtëzakonshëm. Do të dëshiroja që të falënderoja të gjithë popullin vlonjat, për shkak të mikpritjes që i bëri Ismail Qemalit dhe të gjithë firmëtarëve të pavarësisë, ku ata ishin mikpritësit dhe krijuan këtë ditë të shenjtë për Shqipërinë, që është 28 Nëntori, dita e Pavarësisë, ku 108 vite më parë, burra dhe gra, por mbi të gjitha të gjitha mendjet e ndritura që bashkuan të gjithë shqiptarët, sfiduan të keqen e asaj kohe, që ishte lufta më e madhe përballë pushtimit, por mbi të gjitha ishte ajo që ne e quajmë fitore mbi të keqen dhe për të krijuar çdo lloj identiteti kombëtar, në mënyra nga më të ndryshmet kërkonin të zhduknin ekzistencën shqiptare. Ne sot në emër të LSI-së kemi vendosur një kurorë, në shenjë nderimi dhe respekti. Por jo vetëm kaq. Nëpërmjet këtij evenimenti dhe kësaj date të shënuar, ne duam të rikujtojmë edhe njëherë se është shumë më e rëndësishme se çdo gjë tjetër ajo që themi, bashkimi i të gjithë shqiptarëve kudo që janë. Bashkimi i të gjithë shqiptarëve nuk do të thotë thjesht bashkim si individ, por do të thotë bashkim vlerash, bashkim idesh, bashkim dashurie, solidaritet me njëri tjetrin, aq më shumë në këtë vit të mbrapshtë, që është viti i kësaj situate që ka shkaktuar pandemia. Aq më shumë, por jo më larg se dy ditë më parë u bë një vit nga tërmeti i 26 nëntorit, ku shumë shqiptarë humbën jetën. Dhe sot më shumë se kurrë ne kemi nevojë për bashkimin, solidaritetin, vëllazërinë për njëri tjetrin, për t’iu dhënë njerëzve shpresë, për t’iu dhënë njerëzve mundësi më shumë për të jetuar dhe për ta kthyer Shqipërinë shtëpinë e të gjithë shqiptarëve.

    Sot më shumë se kurrë kjo ditë ka simbolikën e saj jo vetëm për sa i përket identitetit tonë kombëtar, por sot më shumë se kurrë kjo ditë duhet të na ndërgjegjësojë të gjithëve për të ndaluar njëherë e përgjithmonë këtë shpopullim të mbrapshtë që ka nisur në Shqipëri, ku me qindra e mijëra të rinj e të reja po largohen nga Shqipëria. Detyra e të gjithë politikanëve pa dallim të flamujve të tyre politikë, vetëm në një flamur “Kuq e zi”, t’u bëjmë thirrje të gjithë vajzave dhe djemve tanë, kudo që janë në të gjithë botën, të kthehen në Shqipëri. Sot Vlora është shtëpia e të gjithë shqiptarëve në këtë ditë flamuri, në këtë ditë të mrekullueshme, si 108 vite më parë, që të gjithë mendjet e ndritura të Shqipërisë u kthyen për të përballuar atë evazion të së keqes në Shqipëri, sot më shumë se kurrë edhe ne duhet të bëhemi të gjithë bashkë, për të përballuar këtë evazion të shpopullimit dhe këtë mbytje të varfërisë dhe të mungesës së shpresës, me bashkimin të gjithë bashkë, për t’i dhënë shqiptarëve mundësinë që ta bëjmë Shqipërinë shtëpinë e shqiptarëve. Ju faleminderit, gëzuar festat, mbarësi të gjithëve. Zoti ju bekoftë ju dhe të gjithë shqiptarët kudo që janë!

  • 11:03

    Krisje dhe në ceremoninë e Pavarësisë, Meta përshëndet Ruçin e Ramën në Vlorë, kryeministri e ‘injoron’ dhe vazhdon rrugën

    Kryeministri Edi Rama ia ka lënë ‘seen’ Presidentit Ilir Meta edhe në ditën e Pavarësisë së Shqipërisë. Të njohur për konfliktin mes tyre, dyshja nuk i kanë lënë mëritë pas as për ditën e sotme, gjatë ceremonisë shpalljes së Pavarësisë në Vlorë. Siç shihet edhe në video, pas përfundimit të ceremonisë Meta ngre dorën dhe përshëndet të pranishmit, mes tyre Gramoz Ruçin e Ramën.

  • 10:12

    Ceremonia për rastin e 108-vjetorit të Pavarësisë, ‘kokat’ e shtetit zbresin në Vlorë me kurora me lule, Meta prin me maskë të bardhë, Rama: Gëzuar për Thaçin dhe luftëtarët

    108-vjetori i shpalljes së Pavarësisë së Shqipërisë ka bërë që të gjithë liderët politikë të shkojnë në qytetin e Vlorës, aty ku dhe është ngritur flamuri kuqezi nga Ismail Qemali. Më kurora me lule në duar, të gjithë rresht shkojnë në sheshin e flamurit për të kryer ritet tradicionale. I pari që u prin është Presidenti Ilir Meta, veshur me një pallto teksa mban dhe një maskë të bardhë.

    Ndërsa kryeministri Edi Rama ka veshur një kostum ngjyrë blu dhe mban maskë të kuqe. Ai ka mbajtur edhe një fjalë për mediat pas ceremonisë, ku ka uruar Shpalljen e Pavarësisë. “Gëzuar Ditën e Flamurit Kombëtar të gjithë shqiptarëve, e posaçërisht Presidentit Hashim Thaçi dhe bashkëluftëtarëve të tij, që sot nuk janë në shtëpi pranë familjeve të tyre,”- tha Rama ndër të tjera.

  • 09:53

    28-nëntori/ Pompeo: Urime Shqipëri, këtë vit festojmë edhe vendimin e Bashkimit Evropian për të hapur negociatat

    Mike Pompeo ka uruar Shqipërinë për ditën e shpalljes së Pavarësisë. Përmes një statusi në rrjetet sociale, Pompeo shkruan se SHBA-ja do të jetë gjithmonë pranë Shqipërisë. Ai shton më tej se në këtë ditë, festohet edhe vendimi i Bashkimit Evropian për të hapur negociatat e anëtarësimit për Shqipërinë, një shenjë e përparimit të rëndësishëm që Shqipëria ka bërë në zbatimin e reformave të nevojshme për anëtarësimin në BE. “Ndërsa Shqipëria feston Ditën e saj të Pavarësisë, unë ju dërgoj urimet në emër të qeverisë së Shteteve të Bashkuara dhe popullit amerikan. Këtë vit, ne festojmë edhe vendimin e Bashkimit Evropian për të hapur negociatat e anëtarësimit për Shqipërinë, një shenjë e përparimit të rëndësishëm që Shqipëria ka bërë në zbatimin e reformave të nevojshme për anëtarësimin në BE. Ne e përgëzojmë Shqipërinë për udhëheqjen e saj si kryesuese e OSBE-së për 2020-ën dhe vlerësojmë gjithçka që ajo ka bërë për të shfaqur përkushtimin e saj ndaj komunitetit Transatlantik. Shqipëria luan një rol qendror në ndihmesën për sigurimin e paqes dhe stabilitetit si pjesë e Aleancës së NATO-s, dhe Shtetet e Bashkuara qëndrojnë pranë Shqipërisë  si një aleate e palëkundur. Uroj mirëqënie dhe shëndet për popullin shqiptar, ndërsa punojmë së bashku për të kapërcyer sfidat me të cilat na përballi pandemia COVID-19,”- shkruan Pompeo

  • 9:32

    28-nëntori/ Yuri Kim uron Shqipërinë: Jetë të gjatë shpirtit kurajoz të Qemalit dhe Skënderbeut

    Ambasadorja e SHBA-ve Yuri Kim ka uruar Shqipërinë për ditën e shpalljes së Pavarësisë. Përmes një statusi në rrjetet sociale, Kim shkruan dhe i uron një jetë të gjatë shpirtit kurajoz të Ismail Qemalit dhe Skënderbeut. “Më 28 nëntor 1912 Ismail Qemali ngriti flamurin #kuqezi, duke e shpallur të pavarur nga Perandoria Osmane. Jetë të gjatë Shqipërisë së Pavarur! Jetë të gjatë shpirtit kurajoz të Qemalit & Skënderbeut! Gëzuar Ditën e Pavarësisë, miq të dashur shqiptarë!”- shkruan Kim.

  • 9:54

    108 vite më parë/ Ismail Qemali ngre flamurin kuqezi në Vlorë dhe shpall Pavarësinë e Shqipërisë, si u zgjodh Pleqësia, firmosja e aktit më të rëndësishëm juridik

    Sot 108 vjet më parë në Vlorë përfaqësues të Vilajeteve shqiptare e shpallën Pavarësinë e Shtetit Shqiptar. Kuvendi Kombëtar i Vlorës mbledhjen e tij të parë e mbajti u mbaj më 28 nëntor 1912, me delegatët nga Gjakova, Plava, Gucia, nga Peja, Ohri dhe Struga, nga Tetova, Çamëria, nga Mitrovica dhe sipas disa të dhënave, në këtë Kuvend kishte delegatë dhe nga pakicat kombëtare, që jetonin në trojet shqiptare, proklamoi Pavarësinë e tokave Shqiptare, që deri në atë datë ishin nën pushtimin e Perandorisë Otomane dhe u ngrit flamuri Kombëtar Shqiptar. Shpallja e Pavarësisë së Shqipërisë ishte kurorëzim i përpjekjeve shekullore dhe luftërave të pareshtura që bënë shqiptarët për çlirimin e vendit. Pjesëmarrja e delegatëve nga mbarë trojet shqiptare në Kuvendin Historik të vitit 1912, e saktësoi zyrtarisht vazhdimësinë e Flamurit Kombëtar Shqiptar, ashtu siç ishte pranuar po ky flamur, në Kuvendin e Lezhës me 2 mars 1444, me vendimin që mori për krijimin e Lidhjes Shqiptare të Lezhës me kryekapedan Skënderbeun dhe me flamur prijës të ushtrisë arbërore, flamurin e derës së Kastriotëve.

    Pas shpalljes së Pavarësisë, më 28 nëntor 1912 u formuan edhe organet shtetërore, Pleqësia dhe Qeveria e dal nga Kuvendi i Vlorës. U ngritën forcat e armatosura dhe ato të rendit dhe nisi puna për konsolidimin e arsimit, shëndetësisë, administratës, etj. Qeveria e Vlorës vuri gurët e parë për krijimin e një sistemi gjyqësor sipas modeleve evropiane. Gjuha shqipe u shpall si gjuhë zyrtare dhe u vendos hapja e shkollave shqipe prej vjeshtës 1914. Akti më i rëndësishëm juridik që nxori Qeveria e përkohshme e Vlorës ishte “Kanuni i përkohshëm i administratës civile të Shqipërisë”, që u botua në nëntor 1913.

    Por solidarizimi dhe mbështetja e mbarë popullit shqiptar është e shfaqur hapur, duke treguar se shpallja e pavarësisë ishte aspiratë dhe vepër e mbarë shqiptarëve. Konka e ngjarjeve në njohjen dhe mbështetjen e Qeverisë së Vlorës është e pasqyruar në dokumente e kronika të kohës. Kuvendi Kombëtar i Vlorës zgjodhi edhe Pleqësinë që duhej të kryente funksionet një organi këshillues e mbikëqyrës të qeverisë, me kryetar Vehbi Agolli.

    Qeveria e Vlorës:

    Ismail Qemali, kryetar i Qeverisë dhe ministër i Punëve të Jashtme.

    Dom Nikoll Kacërri, Zv.Kryeministër

    Mufid Bej Libohova, Ministër për Punët e Brendshme

    Abdi bej Toptani, Ministër për Financat

    Mehmet Pashë Deralla, Ministër për Luftën (Mbrojtjen)

    Petro Poga, Ministër për Drejtësinë

    Luigj Gurakuqi, Ministër për Arsimin

    Mit’hat bej Frashëri, Ministër për Punët Botore

    Pandeli Cale, Ministër për Bujqësinë

    Lef Nosi, Ministër i Post-Telegrafit.

  • 08:38

    VIDEO- Emocionuese/ Ushtarë nga e gjithë bota urojnë Shqipërinë për Ditën e Flamurit, simboli kuqezi valëvitet krenar përmes heronjve me uniformë

    Ushtarë nga e gjithë bota, aty ku edhe Shqipëria ka zgjedhur të çojë misionin e saj, kanë uruar vendin tonë për 28-nëntorin, ditën e Pavarësisë së Shqipërisë. Videoja emocionuese, tregon se si heronjtë me uniformë, në SHBA, Gjermani, Francë, SHBA, Itali, Afrikë, Afganistan, urojnë vendin tonë për ditën e shpalljes së Pavarësisë. “Gëzuar pavarësinë Shqipëri,”- janë fjalët që dalin nga goja e tyre dhe në shumë raste jo të shqiptuara mirë.

  • 08:28

    28-nëntori/ Meta poston foton me flamurin kuqezi: Valvitet krenar në këto troje, i pastër dhe i paprekur, njësoj si gjaku i derdhur për të

    Presidenti Ilir Meta ka uruar të gjithë qytetarët shqiptarë për festën e shpalljes së Pavarësisë, 28-nëntorin. Përmes një statusi në Facebook, Meta shkruan se kjo ditë është e shënuar dhe se duhet të punojmë dhe angazhohemi çdo ditë për ta mbrojtur simbolin tonë të shenjtë dhe përbashkues, të valvitet krenar në këto troje, i pastër dhe i paprekur, njësoj si gjaku i derdhur për të, nga bijat e bijtë më të mirë të kombit. “Gëzuar Ditën e Flamurit Kombëtar, Ditën e Pavarësisë së Shqipërisë! Të punojmë dhe angazhohemi çdo ditë për ta mbrojtur simbolin tonë të shenjtë dhe përbashkues, të valvitet krenar në këto troje, i pastër dhe i paprekur, njësoj si gjaku i derdhur për të, nga bijat e bijtë më të mirë të kombit. 108 vite janë mjaftueshëm për të dëshmuar pjekurinë dhe seriozitetin e një shteti modern, për përmbushjen pa vonesë të aspiratës popullore dhe misionit të nisur në 28 nëntor 1912, nga Ismail Bej Vlora dhe gjithë etërit e Pavarësisë, për ta bërë Shqipërinë si gjithë Europa. Urime për 28 Nëntorin e Gjergj Kastrioti Skënderbeut, Ismail Qemalit dhe Isa Boletinit!  Zoti e bekoftë Flamurin Kombëtar dhe shqiptarët kudo ndodhen!”- shkruan Meta.

  • 08:17

    28-nëntori/ Rama e nis mëngjesin me fjalët e Ismail Qemalit: Flamuri ynë, n’athdhenë t’onë të lirë

    Kryeministri Edi Rama e ka nisur këtë të shtunë me thënie të Ismail Qemalit, njeriut që 108 vite më parë ngriti flamurin kuqezi në Vlorë dhe e shpalli Shqipërinë të pavarur. Në një foto të publikuar në Facebook Rama shkruan: Flamuri ynë, n’athdhenë t’onë të lirë. Rroftë Flamuri! Rroftë Shqipëria! Krah kësaj shprehjeje bashkëngjitet dhe fytyrae Qemalit. “Fjalë të çmuara!”– shton Rama krah fotos.

Shto Koment