Gjukanoviç rrëzohet pas 30 viteve nga pushteti, Milatoviç shpallet Presidenti i ri i Malit të Zi, Abazoviç: Na pret një e ardhme e ndritur

Jakov Milatoviç dhe Milo Gjukanoviç

MALI I ZI- Pas fitores së thellë të Jakov Milatoviç, Mali i Zi ka shpërthyer në festë. Përkrahësit e Milatoviçit u mblodhën para selisë së PES në Podgoricë. Ata shpërthejnë fishekzjarre dhe këndojnë. Vetë Milatoviç ka folur për herë të parë si President.

“Sonte është nata që kemi pritur për më shumë se 30 vjet, Qofshim të gjithë të bekuar me këtë fitore,”- tha Milatoviç teksa bëri gëzuar në festën në Qendrën Universitare në Podgoricë.

Udhëheqësi më i gjatë në pushtet në Malin e Zi, Milo Gjukanoviç, pranoi humbjen.

"Mali i Zi ka bërë zgjedhjen e tij. Unë e respektoj atë zgjedhje dhe e përgëzoj Jakov Milatoviç," u tha Gjukanoviç, i cili do të qëndrojë në postin e tij deri në dorëzimin më 21 maj.

Kryeministri i Malit të Zi, Dritan Abazoviç ka reaguar për fitoren e Milatoviç.

 ‘Fitore! Përgëzoj Jakov Milatovic  për zgjedhjen si presidenti i parë evropian në historinë e Malit të Zi! Misioni ka përfunduar. Malin e Zi e pret një e ardhme e ndritur. Do të punojmë së bashku për një shtet evropian, qytetarë dhe ekologjik!”- shkruan ai në një postim.

Milo Gjukanoviç dhe Jakov Milatoviç

MALI I ZI- Milo Gjukanoviç është rrëzuar nga pushteti pas 30 viteve! Sekretari i Përgjithshëm i Lëvizjes Evropa Tani, Boris Pejoviç, ka bërë të ditur mbrëmjen e sotme se në bazë të të dhënave të shtabit të tyre zgjedhor, nga 41 përqind e elektoratit të procesuar, Jakov Milatoviç ka rreth 62 për qind, ndërsa Milo Gjukanoviç rreth 38 përqind.

"Projeksionet e rezultateve presim një shumicë prej dy të tretash në Pljevlje, Berane, Kolasin, Andrijevica, Pluzhine, Mojkovac, Zhabljak," tha ai.

Sipas tij, në rajonin qendror në Podgoricë, kryeson sërish Milatoviç.

"Presim që ai të ketë dy herë më shumë vota se Milo Gjukanoviç, mbi 40 mijë vota,"- tha Pejoviç.

Milo Gjukanoviç

MAL I ZI- Presidenti aktual i Malit të Zi, Milo Gjukanoviç, i cili synon një tjetër mandat, ka votuar sot në Podgoricë. Ai ishte nën shoqërimin e gruas Lidija dhe djalit Bllazha, të cilët u panë duke shkuar në një shkollë në Podgoricë për të votuar. Gjukanoviç foli për mediat, ndërsa tha se pret një proces zgjedhor të rregullt dhe beson se kjo është koha për rrugën evropiane të vendit që ai drejton.

“Është e rëndësishme që të gjithë qytetarët të mund të shprehin vullnetin e tyre dhe besoj se ashtu do të jetë. Është një moment i mirë që Mali i Zi të paralajmërojë rikthimin në rrugën e zhvillimit evropian, se po fillon një kohë e re më emirë ku Mali i Zi do të tregojë karakterin e vërtetë”, tha Gjukanoviç.

Mediat e pyetën Gjukanoviçin për raportet me Serbinë, kurse për këtë, kreu i Partisë Socialdemokrate tha:

“Marrëdhëniet me Serbinë do të jenë ashtu siç duhet dhe siç janë me fqinjët e tjerë. Sigurisht që mund të jenë më mirë, për sa më përket mua, ne kemi absolutisht një derë të hapur. Serbisë do t’i duhet të ndryshojë marrëdhëniet me fqinjët e saj, veçanërisht me Malin e Zi, ku po përpiqet të organizojë jetën e serbëve, por shteti i Malit të Zi duhet ta bëjë këtë. Asnjëherë nuk jemi përpjekur të ndërhyjmë në rregullimin e jetës së qytetarëve tanë në vende të tjera. Respektoni shtetin dhe atë që është dhe ju jeni të mirëseardhur këtu dhe do të merrni atë që prisni, por jo me koston e shtetësisë së Malit të Zi”, tha Gjukanoviç.

Dy kandidatet

MAL I ZI- Ditën e sotme, qytetarët malazez, iu janë drejtuar kutive të votimit për të zgjedhur presidentin e tyre të ardhshëm. Qendrat e votimit u hapën në orën 7 të mëngjesit dhe do të mbyllen në orën 20:00.

Rezultati i zgjedhjeve ka të ngjarë të përcaktojë balancën e fuqisë në vendin ballkanik përpara zgjedhjeve parlamentar që pritet të mbahen në qershor, pas muajve të bllokimit pas rënies së qeverisë në gusht.

Rreth 540,000 njerëz kanë të drejtë të votojnë në Malin e Zi, një vend me 620,000 banorë që ndodhet në gadishullin Ballkanik dhe buzë detit Adriatik.

Gjukanoviç, 61 vjeç, ka dominuar Malin e Zi si president apo kryeministër për 33 vjet, që nga fillimi i kolapsit të Jugosllavisë federale tashmë të zhdukur. Ai udhëhoqi Malin e Zi drejt pavarësisë nga Serbia në vitin 2006. Nën udhëheqjen e Gjukanoviçit dhe partisë së tij, Mali i Zi u bashkua me NATO-n, nisi procesin e negociatave për anëtarësimin në BE dhe u largua nga ndikimi i Rusisë.

Rivali i Gjukanoviqit është Jakov Milatoviç, 37 vjeç, një ish-ministër i ekonomisë, që është zotuar të frenojë korrupsionin, të përmirësojë standardet e jetesës dhe të forcojë lidhjet me Bashkimin Evropian dhe ish-republikën jugosllave Serbinë.

Gjukanoviç në raundin e parë fitoi 35.37 për qind të votave më 19 mars, ndërsa Milatoviç me 28.92 për qind, duke bërë të nevojshme një balotazh sepse asnjëri nuk fitoi një shumicë prej 50 për qind. Analistët kanë parashikuar një garë të ngushtë në balotazh./Dosja.al

Jakov Milatoviç

MAL I ZI- Kandidati për presidentit të Malit të Zi, Jakov Milatoviç, kishte shkuar në orët e para të mëngjesit për të votuar. Megjithatë ai duket se kishte harruar ta marrë me vete letërnjoftimin që të mund të votojë.

Pasi e kishte kuptuar se nuk e kishte me vete, Milatoviç është kthyer në shtëpi ndërsa bashkëshortja e priti para vendvotimit.

E me një dozë humori u tha gazetarëve se një gjë e tillë ndodhë, kur në momentet e fundit e ndërron kostumin. Kjo batutë e tij u përcoll me të qeshura nga të pranishmit dhe shumë gazetarëve që ishin prezent./Dosja.al

Vota

MAL I ZI- Deri më tani, 2.9 për qind e votuesve të regjistruar ose rreth 15.480 votues kanë hedhur votën e tyre në zgjedhjet presidenciale. Kjo është e njëjta pjesëmarrje si në raundin e parë të zgjedhjeve presidenciale të mbajtur më 19 mars.

Në veri të vendit, 6.1 për qind e votuesve kanë votuar deri në orën 9 të mëngjesit dhe 5.8 për qind e votuesve në raundin e parë. Në rajonin qendror votuan 7,9 për qind dhe në raundin e parë 8,3 për qind. Në jug votuan 5.7 për qind e votuesve dhe në raundin e parë votuan 5.6 për qind e votuesve.

Parregullsi:

-Në Podgoricë, 30 metra larg qendrës së votimit, është një tabelë që reklamon kandidatin Jakov Milatoviç. Ligji e ndalon vendosjen e simboleve të partive politike dhe materialeve tjera propagandistike, të cilat mund të ndikojnë në vendimin e votuesve në vendvotim dhe në 100 metra nga qendra e votimit.

-Një parregullsi tjetër është shënuar në Nikshiq kur një anëtar i komisionit të votimit ka shqiptuar me zë të lartë emrin dhe mbiemrin e votuesit.

-Qendra për Monitorim rikujtoi se në përputhje me nenin 69 të Ligjit për Zgjedhjen e Këshilltarëve dhe Deputetëve (ZIOP), anëtari i Komisionit Zgjedhor që bën identifikimin e zgjedhësve, si dhe anëtarë të tjerë të Komisionit Zgjedhor, i ndalohet shpallja në çfarëdo forme, veçanërisht me zë të lartë, emri dhe mbiemri i zgjedhësit, si dhe numri rendor i tij në listën e zgjedhësve.

Këto janë zgjedhjet e katërta presidenciale që nga ripërtëritja e pavarësisë së Malit të Zi dhe të shtatat që nga futja e sistemit shumë-partiak. Të drejtë vote në rundin e dytë të zgjedhjeve për president të Malit të Zi kanë 542.154 qytetarë, që është numër i njëjtë i votuesve sikurse në raundin e parë. Më së shumti votues ka në Podgoricë, 143,608, ndërkaq më së paku në Shavnik, 1.777 votues, që gjendet në veri të vendit. Fitues në raundin e dytë zgjedhor të zgjedhjeve presidenciale do të jetë kandidati që do të fitojë numrin më të madh të votave nga zgjedhësit. Mandati i presidentit zgjat pesë vjet./Dosja.al