Aktualitet

HARTA-LIVE: Shqipëria vishet me të bardha/ Dëbora mbulon edhe Tiranën, MAS mbyll shkollat për 3 ditë: Mësim online! ARRSH-shoferëve: Mbani zinxhirë! (VD-FT)

Pjesa më e madhe e vendit është gdhirë këtë të shtunë, nën “pushtetin” e reshjeve të dëborës. Moti i keq dhe veçanërisht reshjet e dëborës kanë shkaktuar problemet e para në qarkun e Elbasanit, Shkodrës, apo Korçës.
Featured image of article: HARTA-LIVE: Shqipëria vishet me të bardha/ Dëbora mbulon edhe Tiranën, MAS mbyll shkollat për 3 ditë: Mësim online! ARRSH-shoferëve: Mbani zinxhirë! (VD-FT) Reshjet e debores ne Shqiperi
Përditësuar:

SHQIPËRI– Vendi ynë është mbuluar sot nga reshjet e dëborës. Që nga mesdita e të shtunës, reshjet e dëborës kanë nisur të dendura në qarkun e Korçës, Shkodrës, Kukësit, Dibrës, Lezhës e Elbasanit. Si rrallë herë edhe në Tiranë ka nisur të zbardhë prej dëborës, dhe sipas parashikimeve reshjet do të vijojnë edhe gjatë natës. 

Por bashkë me motin kanë ardhur edhe problematikat për shkak të temperaturave të ulëta dhe reshjeve të shiut e dëborës. Shkollat, ato që kishin mbetur të hapura nga pandemia e koronavirusit, do të mbyllen nga data 15-19 shkurt, ndërsa mësimi do të zhvillohet online.

Ndërkohë edhe Policia Rrugore dhe ARRSH-ja kanë shpërndarë edhe disa këshilla për shoferët duke u markuar edhe zonat me rrezik prej borës e ngricave. Të gjithë ata që do të qarkullojnë me makinë, duhet të mbajnë me vete zinxhirët dhe gomat e dëborës. 

Deri më tani në Lezhë dëbora ka kapur 4 cm, duke mos munguar as në plazh, ku në Shëngjin është shtruar “tapeti i bardhë”. Reshjet e dëborës janë të shoqëruara me një erë të fortë. Por përveç peizazhit që nuk duhet humbur, moti i ftohtë dhe reshjet e dëborës sjellin rreziqe, ku dy automjete janë përplasur në Lezhë, për fat të mirë pa dëme. Dëbora e dendur në Lezhë ka sjellë edhe pezullimin e ndeshjes BesëLidhja-Partizani.

Situata është e rënduar edhe në Korçë duke disa akse janë të bllokuara dhe autoritetet bëjnë thirrje që drejtuesit e mjeteve të mbajnë zinxhirë dhe kushdo që i drejtohet qytetit ti ketë të vendosura në makinë.

Për më shumë bëhu pjesë e grupit më viral në Facebook, Dosja.al

Reshjet e dëborës kanë mbuluar edhe Dibrën, po ashtu edhe Peshkopinë, duke penguar edhe ndeshjet sportive. Ndeshja Korabi-Veleciku është shtyrë pasi fusha e blertë e qytetit është mbuluar nga dëbora. Reshjet e shumta të borës si dhe era e madhe kanë krijuar disa probleme në energji elektrike në Dibër.

Dëbora ka mbërritur edhe në Tiranë në mesditë.  Zonat që janë të mbuluar me borë në Tiranë janë akset Qafë Priskë-Qafë Mollë, Qafë Priskë-Shëngjergj, Trau Dajt-Teleferik, ku autoritetet apelojnë për përdorimin e zinxhirëve.

Reshjet e dëborës pritet të vijojnë edhe në mbrëmje ku nga dëbora do të përfshihet edhe Tirana, Gjirokastra, por më të pakëta do të jenë reshjet e dëborës në Vlorë apo Sarandë.

(A.K;I.A;F.G/Dosja.al)

  • 22:51

    Moti i keq në vend, ministrja Manastirliu shkon në spital: Qëndroni në shtëpi, pacienti e përshëndet me “Rama ik!”


    Ministrja Ogerta Manastirliu ka vizituar spitalin Universitar të Traumës, për të inspektuar gatishmërinë e përforcuar në situatën e kushteve ekstreme të motit. Ajo u ka bërë apel qytetarëve që të telefojnë numrin “127” nëse kanë probleme, duke u kërkuar që të qëndrojnë në banesat e tyre. Mirëpo teksa fliste, një prej pacientëve që ndodhej në godinë ka thënë me zë të ultët, shprehjen “Rama ik”. Por ministrja duket se nuk e ka vënë re dhe ka vijuar me fjalimin. “Kemi një situatë të agravuar të motit. Kam qenë në komunikim me drejtorët e spitaleve rajonale. Qyetarët të telefonojnë në numrin 127 nëse kanë një problematikë. Sistemi është në gadishmëri. Kemi kryer shumë operacione të rëndësishme. Jemi përgatitur që të përgjigjemi me gadishmëri të shtuar. Mos lëvizni nga shtëpitë! Shmangni daljet. Jemi në situatë delikate dhe duhet të kemi kujdes maksimal,”-tha ministrja.

  • 22:26

    Stuhia e dëborës në Elbasan, Balla i përgjigjet opozitës: Komentoni nga divani i ngrohtë…

    Foto ilustruese

    Sekretari i Përgjithshëm i Partisë Socialiste, Taulant Balla i është përgjigjur akuzave të opozitës për akset e bllokuara dhe problemet në qarkun e Elbasanit. Balla garanton se autoritetet po ndjekin nga afër punën për hapjen e rrugëve, riparimin e defekteve dhe rrjetin e energjisë elektrike.

    STATUSI NGA TAULANT BALLA

    Kjo stuhi dëbore nuk është parë asnjëherë në Qarkun Elbasan dhe duket se reshjet do të vazhdojnë edhe gjatë natës dhe nesër paradite. Ndërsa ndjekim nga afër punën që vazhdon për hapjen e rrugëve, riparimin e defekteve në rrjetin e energjisë elektrike, garantimin e shërbimit të urgjencës në çdo shtëpi, na duhet të dëgjojmë edhe gaztorët e opozitës që komentojnë punën nga divani i ngrohtë i vilave që shtohen në kohë pandemie.

     

  • 22:26

    Situata me akset kombëtare/ Bardhi: Mijëra qytetarë të bllokuar! Rama na premtoi 500 borëpastruese

    Foto ilustruese

    Sekretari i Përgjithshëm i Partisë Demokratike, Gazment Bardhi ka denoncuar bllokimin e qytetarëve në akset kombëtare sot prej motit të keq. Bardhi kujton premtimin e Ramës për 500 borëpastruese, ndërkohë që thotë se momentalisht ato numërohen me gishtat e dorës në gjithë vendin.

    STATUSI NGA GAZMENT BARDHI

    Me mijëra qytetarë janë bllokuar në rrugët kombëtare në të gjithë Shqipërinë. Edi Rama na kishte premtuar se ka në dispozicion 500 borëpastruese, por, si gjithmonë, ai gënjen dhe dështon. Borëpastrueset numërohen me gishtat e dorës në të gjithë vendin dhe dalin vetëm për të ndihmuar Taualant Ballën ose Belinda Ballukun të bëjë ndonjë video propagandistike për të na thënë se kjo ishte një dëborë që bie 1 herë në 100 vjet. Makinat kanë ngecur në rrugë në Librazhd, sepse rruga është e bllokuar prej disa orësh. Teatri i Taulant Ballës dhe i Edi Ramës nuk i ndihmon njerëzit. Ata i lanë qytetarët në baltë në këtë të ftohtë të acartë. Propaganda me rrugët e Edi Ramës, Taulant Ballës dhe Belinda Ballukut na kushton çdo vit rreth 50 milionë euro vetëm për mirëmbajtjen e rrugëve. Kur qytetarët kanë nevojë, Edi Rama zhduket, njësoj siç zhduken milionat e taksave të qytetarëve. Me Edi Ramën kemi ngecur në vendnumëro, njesoj si mijëra njerëz kanë ngecur sot në rrugët e bllokuara! Duhet të ndryshojmë

  • 22:20

    Moti i keq në vend! Meta APEL institucioneve: Zbrisni në terren. Prokuroria të nisë hetimet, procedoni shkaktarët!

    Foto ilustruese

    Presidenti Ilir Meta ka ngritur alarmin mbi gjendjen në të cilën ndodhet vendi për shkak të motit të keq. Me anë të një reagimi në Facebook, Meta kërkon nga Prokuroritë e rretheve që të nisin hetimet lidhur me bllokimin e rrugëve, ndërsa kërkon nga stafi i Mbrojtjes Civile që të zbresë në terren për të ndihmuar qytetarët.

    Nga strukturat përgjegjëse në Ministrinë e Mbrojtjes, Ministrinë e Brendshme, Ministrinë e Infrastrukturës e Energjisë dhe Ministrinë e Bujqësisë nuk po komunikohet me strukturat vendore për të vlerësuar paralajmërimet e IGJEUM, për përmbushjen e detyrimeve ligjore në ndihmë të popullatës në nevojë dhe drejtuesve të automjeteve dhe familjeve të bllokuara.Bllokimi i rrugëve nga dëbora dhe mos reagimi i strukturave qendrore e vendore, si dhe i kompanive private me detyrime kontraktore, duhet të zgjojë Prokuroritë e Rretheve për të proceduar penalisht përgjegjësit e braktisjes së qytetarëve në mëshirë të fatit. Është e patolerueshme dhe e dënueshme, që me dhjetëra familje me të moshuar e fëmijë, të kalojnë natën në makina të bllokuara nga dëbora, vetëm se strukturat qeveritare e vendore nuk kanë marrë asnjë masë. Ju bëj thirrje të gjithë zyrtarëve përgjegjës, të cilët kanë detyrime për Mbrojtjen Civile, të angazhohen maksimalisht për përmbushjen e detyrës shtetërore duke ju shkuar në ndihmë të gjithë qytetarëve në nevojë,”-shkruan ndër të tjera Meta.

    REAGIMI I PLOTË:

    TË NDIHMOHEN QYTETARËT DHE FAMILJET E IZOLUARA NGA DËBORA! PROKURORIA TË REAGOJË NDAJ ZYRTARËVE, QË BRAKTISIN NJERËZIT NË NEVOJË!

    Për më shumë bëhu pjesë e grupit më viral në Facebook, Dosja.al

    Dëbora, që po bie në të gjithë Shqipërinë, për fat të keq nuk ka gjetur asnjë strukturë operacionale të pushtetit qendror e vendor dhe kompani me detyrime kontraktore në krye të detyrës për të garantuar funksionimin normal të akseve rrugore. Dhjetëra drejtues mjetesh raportohet nga terreni të jenë të bllokuar në segmente rrugore, si dhe shumë familje janë izoluar në Dibër, Kukës, Has, Tropojë, Malësi e Madhe, Shkodër, Mirditë, Librazhd, Skrapar, Korçë, Devoll, Ersekë, Përmet e Vlorë. Temperaturat po shkojnë drejt uljes ekstreme dhe vështirësitë po shtohen, ndërkohë Qendra Kombëtare e Mbrojtjes Civile dhe Sallat e Policisë nuk po ju përgjigjen telefonatave të qytetarëve në nevojë. Strukturat qeveritare përgjegjëse për Mbrojtjen Civile jo vetëm nuk njoftojnë publikun për alarmin e dhënë nga Instituti i Gjeoshkencës, Energjisë, Ujit dhe Mjedisit, por nuk angazhojnë asnjë strukturë operacionale për ndihmë në zonat e bllokuara. Disa ditë më parë IGJEUM, ashtu si edhe gjatë gjithë periudhës janar-shkurt ka dhënë alarmin, për përkeqësim të motit me reshje intensive shiu dhe dëbore me stuhi, në të gjithë territorin, në datat 12-13 shkurt, duke shkaktuar përmbytje në zonat e Ultësirës Perëndimore e konkretisht në rajonin e NënShkodrës, por dhe bllokime të segmenteve rrugore nga dëbora, si dhe izolime të rajoneve të ndryshme në veri, verilindje dhe juglindje të Shqipërisë. Nga strukturat përgjegjëse në Ministrinë e Mbrojtjes, Ministrinë e Brendshme, Ministrinë e Infrastrukturës e Energjisë dhe Ministrinë e Bujqësisë nuk po komunikohet me strukturat vendore për të vlerësuar paralajmërimet e IGJEUM, për përmbushjen e detyrimeve ligjore në ndihmë të popullatës në nevojë dhe drejtuesve të automjeteve dhe familjeve të bllokuara. Është përgjegjësi e strukturave shtetërore për informimin në kohë dhe menaxhimin e situatave problematike për shkak të motit. Bllokimi i rrugëve nga dëbora dhe mos reagimi i strukturave qendrore e vendore, si dhe i kompanive private me detyrime kontraktore, duhet të zgjojë Prokuroritë e Rretheve për të proceduar penalisht përgjegjësit e braktisjes së qytetarëve në mëshirë të fatit. Është e patolerueshme dhe e dënueshme, që me dhjetëra familje me të moshuar e fëmijë, të kalojnë natën në makina të bllokuara nga dëbora, vetëm se strukturat qeveritare e vendore nuk kanë marrë asnjë masë. Ju bëj thirrje të gjithë zyrtarëve përgjegjës, të cilët kanë detyrime për Mbrojtjen Civile, të angazhohen maksimalisht për përmbushjen e detyrës shtetërore duke ju shkuar në ndihmë të gjithë qytetarëve në nevojë.

  • 21:47

    Po udhëtoni? Kujdes me këto akse! Policia e Shtetit cakton zonat e rrezikut: Janë bllokuar nga bora e akulli

    Policia e Shtetit ka përditësuar të dhënat duke njoftuar shoferët lidhur me rrugët problematike në vend, të cilat kanë probleme për shkak të reshjeve të shiut. Në njoftimin zyrtar, Policia Rrugore u ka bërë apel të gjithë drejtuesit të mjeteve që të zbatojnë udhëzimet e shërbimeve, duke shmangur lëvizjen në akset me dëborë apo ngrica, si dhe përdorimin e zinxhirëve aty ku është e domosdoshme.

    NJOFTIMI I PLOTË:

    Strukturat e Policise së Shtetit, në shërbim të përforëcuar, për t’iu ardhur në ndihmë qytetarëve dhe drejtuesve të mjeteve në nevojë, në situatën e krijuar si pasojë e motit me reshje bore dhe shiu. Policia e Shtetit dhe autoritetet e tjera janë të angazhuara me shërbime të përforcuara, për të menaxhuar vështirësitë e krijuara nga moti i keq i orëve të fundit, në disa akse rrugore. Policia Rrugore apelon për të gjithë drejtuesit e mjeteve që të zbatojnë udhëzimet e shërbimeve, duke shmangur lëvizjen në akset me dëborë apo ngrica, si dhe përdorimin e zinxhirëve aty ku është e domosdoshme.

    1. Aksi rrugor Milot – Lezhë – Shkodër vazhdon të jetë i bllokuar për shkak të erës së fortë që po fryn dhe të një kamioni me targa të Malit të Zi që është spostuar për shkak të akullit dhe erës së fortë. Po punohet per kthimin e mjeteve në akse alternative dhe dhënien e ndihmës drejtuesve të mjeteve.

    2. Aksi rrugor Milot – Kukës – Morinë është i kalueshëm, por me prezencë të shtresave të akullit, për shkak të temperaturave mjaft të ulëta (poshtë -12 gradë). Nga koncensionari vazhdon shpërndarja e kripës dhe pastrimi i karrexhatës prej dëborës dhe akullit.

    3. Aksi rrugor Elbasan – Librazhd është i kalueshëm me zinxhirë. Aksi Elbasan – Pogradec është i kalueshëm dhe i hapur vetëm për mjete autovetura me zinxhirë dhe me goma dimërore;

    4. Aksi rrugor Korçë – Pogradec është i kalueshëm me zinxhirë.

    5. Aksi rrugor Korçë – Devoll dhe Korçë- Ersekë të kalueshëm vetëm me zinxhirë. Në këto segmentet ka stuhi dëbore dhe temperatura mjaft të ulëta. Është pezulluar kalimi i mjeteve kamionë dhe autobuzë.

    6. Akset rrugore të qarkut Vlore dhe Fier janë të kalueshme pa probleme;

    7. Aksi rrugor Burrel – Bulqizë – Dibër është i kalueshëm me vështirësi me zinxhirë vetëm për mjetet autovetura.

    8. Aksi rrugor Peshkopi – Kukës është me prezencë të madhe dëbore dhe i kalueshëm vetëm me zinxhirë.

    9. Akset rrugore Shkodër-Hani i Hotit dhe Shkodër-Muriqan janë të hapura dhe të kalueshme.

    10. Aksi rrugor Vau i Dejës – Pukë është i hapur.

    11. Akset rrugore të Qarkut Gjirokaster të kalueshme pa probleme.

    Në të gjitha akset e mësipërme ka prezencë të shtuar të Policisë Rrugore, e cila po drejton trafikun dhe qarkullimin e mjeteve. Mjetet pa zinxhirë nuk do të lejohen nga Policia Rrugore që të kalojnë në akset me akull dhe me deborë. Drejtuesit e mjeteve mund të informohen përmes faqeve zyrtare në rrjetet sociale të Policisë së Shtetit ose në media, për situatën e lëvizjes në akset rrugore. #UdhëtonitëSigurt

  • 21:43

    “Po zgjati edhe 1 orë, po vdesim”, qytetarët e bllokuar në autostradën Lezhë-Milot apel për ndihmë: A ka shtet kund? Policia s’na hap telefonin

    Autostrada Lezhë – Milot është bllokuar tërësisht për shkak të situatës së krijuar nga reshjet e dendura të borës. Një qytetar i bllokuar në automjet i bën thirrje Policisë që t’u përgjigjet telefonateve, pasi pretendon se njerëzit e mbetur në trafik janë në gjendje të rëndë.

    “Kemi dy orë në Zajmen të Lezhës. I biem Policisë, i biem emergjencës, askush nuk ka përgjigjet. Kena fëmijë, gra, autobusi është plot me pasagjerë…i bllokum në të gjitha mënyrat…Këtu nuk merret vesh! A ka shtet? Me ba me zgjat edhe një orë këtu njerëzit po vdesin, si është koha e tillë. Kamionat kthy në mes të rrugës, a ka ushtri, a ekziston shteti ynë kund? Çohuni more në këmbë,”-shprehet ai.

  • 20:53

    Situata nga moti i keq, bllokohet plotësisht superstrada Lezhë-Milot/ Policia ka nisur procedimin për neglizhencë ndaj kompanive mirëmbajtëse

    Foto ilustruese

    Superstrada Lezhë-Milot është bllokuar plotësisht si pasojë e reshjeve të dendura të dëborës dhe ngricës së krijuar nga temperaturat e ulëta, duke paralizuar lëvizjen e automjeteve. Procedimi vjen për shkak të neglizhencës së kompanive, të cilat nuk kanë punuar me borëpastrueset dhe nuk kanë hedhur në kripë për të ndihmuar me qarkullimin e mjeteve. Po ashtu, policia po u bën apel qytetarëve që të zgjedhin rrugën e vjetër Lezhë-Milot në mënyrë që të shmangin trafikun e krijuar.

    “Asnjë nga firmat, duke përjashtuar firmen mirëmbajtëse të aksit të vjetër Lezhë-Pllanë, nuk morën masa për të shmangur këtë situatë të krijuar. Për shkak të situates së krijuar me bllokimin e rrugëve si pasojë e dëborës, drejtoria vendore e policisë Lezhë do të procedojë të gjitha firmat mirëmbajtëse të rrugëve që nuk ndërhyn në kohë për të mbajtur akset e kalueshme,”-shkruhet në njoftim.

  • 20:58

    Moti i keq në Korçë, në disa rrugë mund të lëvizet vetëm me zinxhirë

    Reshjet e dëborës në Korçë, vijojnë të bien prej mëngjesit. Mësohet se të gjitha akset nacionale janë të hapur por qarkullimi bëhet vetëm me zinxhirë. Në rrugët që duhet të lëvizet me zinxhirë janë:Qafëthanë-Pogradec-Plloçë Qafë Plloçë-Korçë Korçë-Kapshticë Korçë-Dardhë Korçë-Voskopojë Korçë-Dogana Goricë Korçë-Qafë Qarr-Ersekë.  Në zonën e Voskopojës dhe në Dardhë dëbora kalon 40 cm, në njësinë Vithkuq fshati Shtyllë 70 cm në Mashkullorë drejt Panaritit 1.5 m dëborë, si pasojë qarkullimi është i kufizuar. Po ashtu, në Mokër dëbora ka kaluar 50 cm dhe fshatrat mund të lidhen me njëra-tjetrën vetëm me mjete të larta të pajisura me zinxhirë.

  • 20:15

    Moti i keq në Librazhd, qindra automjete dhe mijëra njerëz kanë mbetur të bllokuar për dy orë

    Pamje nga vendi

    Reshjet e dëborës, që kanë përfshirë ditë e sotme, pothuajse gjithë vendin, kanë bllokuar rrugën nacionale në dalje të Librazhdit. Sipas, newsbomb, kalimi është bërë i vështirë dhe qindra automjete dhe mijëra njerëz kanë ngelur të bllokuar prej 2 orësh. Mësohet, se trashësia e dëborës ka arritur në disa centimetër, dhe qytetarëve qytetarët po përballen me temperatura të ulëta.

  • 18:32

    “Bie dëbora me ngadalë, e papushim…!”/ Djemtë s’pyesin për të ftohtin në Pogradec, me kitarë e fizarmonikë këndojnë serenatë

    Reshjet e borës kanë përfshirë sot një pjesë të vendit. Ndërkohë, disa të rinjë nga Pogradeci kanë sfiduar të ftohtin dhe borën. Me kitare dhe fizarmonikë, ata kanë dalë në borë dhe kanë kënduar serenata, me temë dashurie, në kohën që ajo bie pa pushim.

  • 18:56

    Bllokohen rrugët në Shkopet, makinat e kanë të vështirë të lëvizin pa zinxhirë

    Reshjet e shumta të borës kanë bërë që disa makina të bllokohen në Shkopet. Sipas burimeve të siguruara nga Dosja.al, Shkopeti gjatë ditës së sotme është mbuluar nga disa cm borë, duke bërë të vështirë qarkullin e automjeteve. Në video, shihet që rrugët janë mbuluar nga bora dhe automjetet po mundohen të kalojnë, por lëvizja është shumë e vështirë pa zinxhirë.

  • 18:21

    PAMJET: Aksident në aksin rrugor Fushë Dukagjin-Kalimash


    Moti i keq në vend ka sjell probleme në disa rrugë të kryesore. Sipas burimeve për Dosja.al, si pasoj e reshjeve të borës ka ndodhur një aksident në aksin rrugor Fushë-Dukagjin, në tunelin e Kalimashit. Në videon e siguruar, shihet një kamioçinë e përplasur me bordurën dhe policia, e cila ka mbërritur në vendin e ngjarjes.

  • 20:29

    Reshjet e dëborës, Balluku: Ndalohet qarkullimi i mjeteve të rënda në akset kombëtare, nga sot deri të hënën në 08:00

    Ministrja e Infrastrukturës dhe Energjitikës, Belinda Balluku, duke folur nga zona e Urës së Milotit, njoftoi se nga ora 20:00 e kësaj të shtune, deri në orën 08:00 të së hënës do të bllokohet qarkullimi i mjeteve të tonazhit të rëndë në akset kombëtare. Sipas saj, përkeqësimi i kushteve atmosferike, dhe reshjet e dëborës me intensitet të lartë, kanë shtyrë në marrjen e vendimit, pasi këto mjete pengojnë borëpastrueset.

    Ndodhem në aksin nga nyja e Milotit në drejtim të Shkodrës, në këto momente jemi në situatën e një moti ekstrem jo vetëm për shkak të reshjeve të dëborës, por edhe për shkak të erës që është e një shpejtësie mjaft të lartë. Ju bëjmë thirrje të gjithë drejtuesve të automjeteve të evitojnë qarkullimet në akset rrugore si ato kombëtare dhe ato që lidhin pjesët e qyteteve apo të fshatrave. Situata është ekstreme, pavarësisht se të gjitha borëpastruset, të gjitha kompanitë që kryejnë mirëmbajtjen në të gjithë territorin e Shqipërisë janë në krye të detyrës. Por është situatë që nuk përballohet lehtë. Të gjitha ato zona që kemi deklaruar se duhet të përdoren zinxhirët, nuk lejohet nga policia rrugore kalimi pa zinxhirë në automjete. Ndërkohë duke nisur sot nga ora 8 e darkës do të ndalohet qarkullimi i automjeteve të rënda, të cilat krijojnë probleme dhe bllokojnë borëpastruset, e parë këtë në aksin e Librazhdit në drejtim të Qafë Thanës. Deri të hënën në mëngjes në orën 08;00 të gjitha automjetet e tonazhit të rëndë nuk do lejohet të qarkullojnë në akset kombëtare,”-tha Balluku.

  • 20:03

    Dëbora në Lezhë! Bardh Spahia denoncon me VIDEO: S’ka borëpastruese! i Rama thotë se paguan 20 milionë euro për mirëmbajtje

    Ish-deputeti i Partisë Demokratike Bardh Spahia ka denoncuar situtatën e vështirë në rrugën kombëtare në Lezhë, ku vihet re mungesa e borëpastrueseve. Ai ka shpërndarë një video nga rruga, krahas të cilës shkruan se makinat mezi ecin, për shkak të dëborës. Ndërsa shton se kryeministri Edi Rama pretendon se paguan 20 milionë euro për mirëmbajtjen e aksit të Veriut.

    “Pamjet nuk janë në malësinë e Pukës, Kjo është rruga kombëtare në Lezhë, e ngrirë nga ulja e paralajmëruar e temperaturave. Nuk ka asnjë borëpastruese, asnjë mjet që hedh kripë. Makinat mezi ecin në ketë rrugë për të cilën Edi Rama thotë se paguan 20 milionë euro për mirëmbajtjen e aksit të Veriut. Ka dështuar të sigurojë për rrugët edhe standardin e Kosovës, ku çdo segment është nën kontroll, pavarësisht sasisë së dëborës. Kur qytetarëve u duhet që qeveria të tregojë se taksat nuk shkojnë dëm, Edi Rama i lë në baltë qytetarët në qarkun e Shkodrës dhe në të gjithë Shqipërinë. Edi Rama nuk do t’ia dijë për qytetarët,”-shkruan ndër të tjera ai. 

  • 18:49

    Dëbora në zonën e nën Shkodrës, drejtuesi politik i PD-së: Qeveria duhet të kthejë sytë nga ne

    Drejtuesi politik i Partisë Demokratike, Helidon Bushati ka reaguar lidhur me situatën  e krijuar nga reshjet e shiut dhe të dëborës në zonën e Shkodrës. Përmes një postimi në Facebook, ai i bën apel qeverisë që të kthejë sytë nga zona e nënShkodrës e cila, përveç reshjeve të shiut, tashmë duhet të përballet dhe me dëborës dhe të ftohtin.

    POSTIMI: 

    Pse heshtni z. Kryeministër?! Duke mos mjaftuar fakti që zona e Nënshkodrës ka 38 ditë që zgjohet dhe fle në ujë, situatën ditën e sotme e ka rënduar më shumë edhe fillimi i reshjeve të dëborës. Çfare duhet të ndodhë më tepër që të ktheni sytë dhe vëmendjen tuaj nga Nënshkodra?! Ju rikujtoj se Shkodra vazhdon të jetë pjesë e Republikës së Shqipërisë, e si rredhojë nën përgjegjësinë tuaj totale.

  • 18:46

    Moti i keq, pezullohen lundrimet e trageteve në portin e Durrësit

    Foto ilustruese

    Moti i keq ka sjellë edhe pezullimin e lundrimeve nga porti i Durrësit në drejtim të Italisë. Deri më tani janë anuluar të gjitha lundrimet nga Durrësi për në Bari, që ishte planifikuar për t’u nisur rreth orës 20:30. Ndërkohë edhe anijet e tonazhit të vogël dhe peshkarexhat nga sot në drekë kanë anuluar lundrimet. Kjo pasi është parashikuar që dallgët të kapin 7 deri 8 ballë.

  • 17:48

    ME VIDEO: Situata nga moti i keq në qytetin e Elbasanit, bllokohet qarkullimi i mjeteve në 11 fshatra

    Situata është përkeqësuar nga moti i keq në qytetin e Elbasanit, ku është bllokuar edhe qarkullimi i mjeteve në 11 fshatra, ndër to: Gracen, Funar, Labinot Mal dhe Qerret. 

    Autoritetet rrugore kanë nisur nga puna për të hedhur kripë në rrugë në mënyrë që të lehtësojnë qarkullimin e automjeteve për të shmangur edhe aksidentet. 

  • 17:13

    Mos e humbisni! Nis dëbora edhe në Tiranë, pas 4 vitesh kryeqyteti “zbardhet” sërish

    Nis dëbora edhe në Tiranë! Pas më shumë se katër vitesh, kryeqyteti është zbardhur sërish nga flokët e dëborës që raportohen se do të vijojnë edhe gjatë natës.

  • 17:14

    Moti i keq pushton vendin! Policia Rrugore ‘markon’ zonat e rrezikshme, apel shoferëve: Kujdes maksimal, ka dëborë e ngrica!

    Foto ilustruese

    Policia e Shtetit ka bërë me dije zonat e “kuqe” që kanë krijuar probleme me motin e keq në Shqipëri. Të gjithë ata që qarkullojnë në Dajt, në Fushë Labinot, Qafë Plloç, Pogradec, Korçë, Dibër, Kukës, Lezhë, Llogara e Qafë Muzinë duhet të tregojnë kujdes në drejtimin e mjetit për shkak të dëborës dhe ngricave të krijuara nga akulli.

    Policia e Shtetit u bën thirrje të gjithë përdoruesve të rrugës që të shmangin lëvizjet e panevojshme në rrugë, të tregojnë kujdes maksimal dhe të përdorin zinxhirët e gomave për automjetet, sidomos në akset rrugore me deborë dhe me ngrica. Shërbimet e përforcuara të Policisë Rrugore po monitorojnë trafikun edhe në qendrat e banuara, ku prezenca e ujit ka sjellë ngadalësim të trafikut dhe bllokim të përkohshëm të qarkullimit,”-thuhet në njoftim.

    NJOFTIMI I PLOTË:

    Policia e Shtetit

    Nisur nga moti i keq me reshje shiu pothuaj në të gjithë akset rrugore të vendit dhe reshjet e borës në zonat malore, Policia Rrugore tërheq vëmendjen e të gjithë drejtuesve të mjeteve, sidomos atyre që qarkullojnë në zonën e Dajtit, në Fushë Labinot, në Qafë Plloç, në Pogradec, Korçë, Dibër, Kukës, Lezhë, Llogara e Qafë Muzinë, për kujdes të shtuar gjatë drejtimit të mjeteve. Shërbimet e Policisë Rrugore në të gjithë vendin ndodhen në shërbim 24 orë, në të gjitha akset rrugore kryesore, për të drejtuar qarkullimin rrugor, me qëllim parandalimin e çdo aksidenti sado i vogël të jetë ai, si dhe për t’i ardhur në ndihmë çdo drejtuesi mjeti që mund të ketë probleme. Policia e Shtetit u bën thirrje të gjithë përdoruesve të rrugës që të shmangin lëvizjet e panevojshme në rrugë, të tregojnë kujdes maksimal dhe të përdorin zinxhirët e gomave për automjetet, sidomos në akset rrugore me deborë dhe me ngrica. Shërbimet e përforcuara të Policisë Rrugore po monitorojnë trafikun edhe në qendrat e banuara, ku prezenca e ujit ka sjellë ngadalësim të trafikut dhe bllokim të përkohshëm të qarkullimit. E gjithë situata po monitorohet në bashkëpunim me shërbimet e tjera të Policisë së Shtetit dhe me Emergjencat Civile, për të evituar ngjarjet rrugore dhe për të siguruar qarkullimin normal të mjeteve dhe të mallrave. 

  • 16:09

    Mjetet lëvizin pa goma dimërore e zinxhirë/ ARRSH apel për drejtuesit: Po bëheni pengesë për borëpastruset e kripëhedhëset

    Pamje nga aksioni i ARRSH

    Autoriteti Rrugor Shqiptar ka shpërndarë një apel për të gjithë drejtuesi e mjeteve, të cilët udhëtojnë në një kohë kur moti i keq ka pushtuar vendin. Me anë të një postimi në Facebook, ARRSH kërkon nga shoferët që të lëvizin me goma dimërore dhe me zinxhirë për të shmangur incidentet gjatë rrugës.

    “Bllokimi i tyre në rrugë nga ky shkak po bëhet pengesë për borëpastrueset, kripëhedhëset e mjetet e tjera që po punojnë në rrugë. Në këto kushte, ju bëjmë thirrje të gjithë drejtusëve, që të lëvizet vetëm me goma dimri ose zinxhirë, me qëllim që të mos pengohemi për të mbajtur të hapura akset në shërbim të të gjithë përdoruesve të rrugës,”-shkruhet ndër të tjera në njoftim.

    NJOFTIM I RËNDËSISHËM:

    Autoriteti Rrugor Shqiptar kërkon vëmendjen e të gjithë drejtuesve të mjeteve, të cilët janë të detyruar të lëvizin në këto ditë, kur moti është përkeqësuar ndjeshëm dhe situata e lëvizjes në rrugë është vështirësuar. Reshjet e dendura të borës, shoqëruar edhe me erë të fortë kanë mbuluar gjithë vendin. Kontraktorët e mirëmbajtjes së rrjetit rrugor kombëtar, që administrohet nga Autoriteti Rrugor Shqiptar, janë në terren me forca të shtuara me mjete, staf dhe materiale kripë, që gjatë natës së kaluar e gjatë ditës pa pushim. Me gjithë njoftimet e dhëna në media për motin e keq që do përfshinte vendin, mjetet lëvizin të papërgatitur me goma dimërore e pa zinxhirë. Bllokimi i tyre në rrugë nga ky shkak po bëhet pengesë për borëpastrueset, kripëhedhëset e mjetet e tjera që po punojnë në rrugë. Në këto kushte, ju bëjmë thirrje të gjithë drejtusëve, që të lëvizet vetëm me goma dimri ose zinxhirë, me qëllim që të mos pengohemi për të mbajtur të hapura akset në shërbim të të gjithë përdoruesve të rrugës. Ju lutem zbatoni sinjalistikën rrugore, lëvizni me shpejtësi të reduktuar për të shmangur aksidentet!

  • 15:39

    Moti i keq në vend! Ministria e Arsimit nxjerr UDHËZIMIN: Mbyllen shkollat! Nga data 15 deri në 19 shkurt 2021, online!

    Evis Kushi

    Ministria e Arsimit, Rinisë së Sporteve ka vendosur mbyllen e të gjithë shkollave në vend për shkak të motit të keq. Ministrja Evis Kushi ka shpërndarë udhëzimin në rrjetin e saj social Facebook, duke shtuar se vendimi është marrë për shkak të reshjeve të dendura të shiur e dëborës dhe temperaturave të ulëta. Ndaj mësimi do të vijojë online edhe në ato shkolla që nuk ishin mbyllur deri më tani për shkak të pandemisë së koronavirusit.

    NJOFTIMI I PLOTË:

    Sipas parashikimeve të IGJEUM, në vendin tonë pritet një rënie shumë e theksuar e temperaturave dhe reshje të dendura dëbore në pjesën më të madhe të territorit. Për këtë arsye, Ministria e Arsimit, Sportit dhe Rinisë vendosi të kalojë të gjitha institucionet tona të arsimit parauniversitar në skenarin e tretë të mësimit online për javën e ardhshme, nga data 15 deri në 19 shkurt 2021. Në bashkëpunim me Drejtorinë e Përgjithshme të Arsimit Parauniversitar, si dhe të gjitha zyrat arsimore dhe drejtoritë rajonale në vend, po punojmë intensivisht për të marrë të gjitha masat e nevojshme që të garantojmë mbarëvajtjen e këtij procesi.

  • 15:24

    Rruga nacionale Burrel – Skuraj prej disa orësh është e bllokuar, automjete të shumta kanë mbetur në vend

    Moti i keq në vend ka sjell probleme në disa akse të rrugëve. Sipas burime për Dosja.al, bëhet e ditur se prej orësh në aksin rrugor nacionale Burrel – Skuraj dhjetëra automjeteve kanë mbetur të bllokuara. Situatë problematike paraqitet në disa segmente si në Baz, Qafën e Ulzës dhe Skuraj. Po ashtu, në mungesë të borëpastrueseve, shumë automjete e kanë pasur të pamundur qarkullimin duke bllokuar totalisht lëvizjen. Ndër mjetet e bllokuara është edhe një kortezh mortor i cili po lëvizte në drejtim të Burrelit. Ndërsa, autobusë të transportit publik, mjete familjare me gra e fëmijë, po qëndrojnë në rrugë prej disa orësh. Ende nuk ka pasur asnjë ndërhyrje nga autoritetet.

  • 15:43

    Moti i keq në Kukës, rrugët mbulohen nga bora, bëhet i vështirë kalimi për automjetet


    Moti i keq, me reshje bore dhe shiu ka përfshirë një pjesë të vendit. Sipas burimeve të siguruara nga Dosja.al, Kuksi gjatë ditës së sotme është mbuluar nga disa cm borë. Ndërkohë, është bërë i vështirë qarkullimi i automjeteve në rrugët kryesore. Në pamjet e siguruara, shihet se përveç dëborës, vendi është përfshirë edhe nga era e fortë, dhe disa nga makina lëvizin me zinxhirë.

  • 14:58

    Moti i keq në Kolonjë, bllokohen disa makina në rrugë nga reshjet e shumta të borës

    Reshjet e shumta të borës kanë bërë që disa makina të bllokohen në Kolonjë. Në videon e siguruar nga Dosja.al shihen një furgon dhe disa makina të bllokuara në një aks rruge për shkak të trashësisë së borës që ka rënë në këtë qytezë.

  • 14:36

    Dëbora shtron petkun e saj edhe në Burrel, nuk bllokohet qarkullimi i automjeteve

    Dëbora ka shtruar petkun e saj edhe në Burrel. Siç shihet në videon e siguruar nga Dosja.al, dëborë ka rënë edhe në Burrel por megjithatë qarkullimi i automjeteve deri më tani nuk është bllokuar.  Shihet se në Burrel, dëbora vetëm sa e ka zbardhur sakaq deri më tani nuk ka probleme me rrugët apio energjinë elektrike.

    Ditën e sotme e gjithë Shqipëria është përfshirë nga reshjet e dendura të dëborës dhe shiut.

  • 13:45

    Dëbora mbulon Qafë- Thanën, vështirësohet qarkullimi i automjeteve, vendi përfshihet dhe nga era e fortë

    Dëbora ka përfshirë edhe Qafë Thanën. Siç shihet në videon e siguruarnda Dosja.al, disa cm borë kanë mbuluar vendin, ndërkohë që ëhstë bërë e vështirë edhe qarkullimi i automjeteve. Ndërkohë shihet se përveç dëborës, vendi është përfshirë edhe nga era e fortë, sakaq disa nga makina lëvizin me zinxhirë.

  • 14:33

    Moti i keq në vend, fillojnë reshjet e borës në Elbasan

     

    Reshjet e borës kanë nisur edhe në qytetin e Elbasanit. Në videon e siguruar nga Dosja.al shihen reshjet e borës të ndërthurura në erë. Në rrugët e qytetit të paktë janë banorët që kanë dalë ndërsa qarkullimi i makinave është normal dhe rrugët janë të pastërta.
  • 14:33

    Moti i keq në Korçë, vijojnë të bllokuar banorët e fshatit Panarit

    Fshati Panarit

    Banorët e fshatit Panarit në Korçë janë prej më shumë se një muaji të bllokuar për shkak të motit të keq. Burime për Dosja.al bëjnë të ditur se  në fshat kanë ngelur mbi 200 banorë të mbyllur për shkak të bllokimit të rrugës nga bora. Deri më tani askush nuk ka ndërhyrë për të hapur rrugën dhe lirimin e qarkullimit të mjeteve. Ndërkohë që me reshjet e sotme të borës situata në fashtin Panarit është rënduar edhe më shumë.

  • 12:49

    Nisin reshjet e para atë borës në Shkodër, situata rëndohet edhe më shumë

    Reshjet e para të borës në Shkodër kanë nisur. Lajmin e ka bërë të ditur vetë Bashkia Shkodër me anë të një njoftimi në Facebook. Bashkia shkruan se për shkak të me fillimin e reshjeve të borës situatë në vend është rënduar edhe më shumë. “Nisin reshjet e borës në Shkodër, rëndohet situata në zonat e përmbytura. Përveç problemeve me ujit, shtohen problemet me temperaturat e ulta që vështirësojnë situatën, mjaft të rënduar prej mëse 5 javësh”, shkruan Bashkia.

  • 13:09

    Bora mbulon parkun e Qafë Shtamës në Krujë, trashësia e saj mbi 10 cm

    Reshjet e dëborës kanë mbuluar edhe Parkun Kombëtar të Qafë Shtamës në Krujë. Nga pamjet e siguruara nga Dosja.al shihet i gjithë vendi i mbuluar nga bora. Në Qafë Shtamë bora ka arritur në trashësinë 10 centimetra. Borë gjithashtu ka rënë në Fushë-Krujë ku dhe kalimi në disa akse është bërë i pamundur, ndërsa në Krujë ende nuk ka nisur bora.

  • 13:18

    Moti i keq në rrugën e Kombit, bora e madhe shkakton një aksident

    Një aksident ka ndodhur ditën e sotme në Rrugën e Kombit për shkak të reshieve të shumta të borës. Në videon e siguruar nga Dosja.al shihet një aks në Rrugën e Kombit i mbuluar nga bora. Ndërkohë që në aksident ka shkruar policia për të siguruar zonën. Kalimi në Rrugën e Kombit sygjerohet të jetë më zinxhirë për shkak të vvështirësisë që bora ka bërë.

  • 10:30

    Moti i keq në qytetin e Lezhës dhe bregdetin e Shëngjinit, erëra të forta të shoqëruara më shi dhe reshje bore

    Moti i keq ka prekur edhe qytetin e Lezhës. Në pamjet e siguruara nga Dosja.al shihet i gjithë qyteti teksa mbulohet nga reshjet e borës. Në Lezhë moti i keq është sjoqëruar gjithashtu me erëra të forta si dhe reshje shiu. Ndërkohë që fatmirësisht dëbora e rënë është e imët dhe nuk ka krijuar probleme në qytet. Situara në Lezhë edhe pse nuk janë krijuar probleme, vijon të mbahet nën kontroll të vazhdueshëm, për të evituar problemet. Borë gjithashtu ka rënë edhe në bregdetin e Shëngjinit, ku i gjithë qyteti si dhe zona detarë janë mbuluar nga një “pluhur i bardhë”. Njësoi si në Lezhë dhe në Shënngjin së bashku me borë ka edhe erëra ta shumta, të cilat kanë bërë të pambundur daljen jashtë banesave.

  • 12:30

    Moti i keq, pastrohet aksi Korçë-Voskopojë, qarkullimi i mjeteve mund të bëhet pa zinxhirë


    Aksi Korçë-Voskopojë është pastruar nga shërbimet rrugore. Lajmin e ka bërë të ditur Autoriteti Rrugor i Shqipërisë me anë të një postimi në Facebook. ARRSH-ja shkruan se aksi është pastruar i gjithi nga bora si dhe është bërë shpërndarja e kripës. Ata gjithashtu kanë njoftuar se qarkullimi në këtë aks mund të bëhet pa zinxhirë. ” Korcçë-Voskopojë. Aksi tashmë është i pastruar, është bërë shpërndarja e kripës dhe qarkullimi kryhet pa zinxhirë”, shkruan ARRSH-ja.

  • 12:10

    Reshje bore në Tiranë, Autoriteti Rrugor bën thirrje për mbajtjen e zinxhirave gjatë udhëtimit në disa zona

    Reshjet e borës kanë mbërritur edhe në disa zona të Tiranës. Autoriteti Rrugor Shqiptarë u ka bërë thirrje të gjithë drejtuesve të mjeteve që të mbajnë zinxhirë gjatë udhëtimit. Zonat që janë të mbuluar me borë në Tiranë janë akset Qafë Priskë-Qafë Mollë, Qafë Priskë-Shëngjergj, Trau Dajt-Teleferik.

  • 10:26

    Moti i keq në vend, bora mbulon qytetin e Dibrës

    Reshjet e dëborës kanë mbuluar qytetin e Dibrës. I gjithë qarku i Dibrës është përfshirë nga reshje të shumta bore, e shoqeruar edhe me erëra të forta. Reshjet e shumta të borës si dhe era e madhe kanë krijuar disa probleme në energji elektrike në Dibër. Gjithashtu pa energi elektrike janë edhe disa fshatra të Dibrës dhe Bulqizës për shkak të dëmtimit të rrjetit përcjellës.

  • 9:43

    Korça mbulohet nga dëbora. Në Qafën e Qarrit, rrugën e Dardhës, dhe Voskopojës qarkullimi vetëm me zingjirë


    Në orët e para të mëngjesit të sotëm qarku i Korçës është përfshirë nga reshjet e dendura të dëborës. Bëhet e ditur se reshjet reshjet në disa zona janë  të shoqëruara edhe me erë, ndërkohë që  kontraktorët janë në rrugë për pastrim dhe kriposje. Ndërkohë, qarkullimi rekomandohet me zinxhirë në Qafën e Qarrit, rrugën e Dardhes, rrugën Voskop Voskopoje për mjetet e vogla. Udhëtarët që i zgjedhin këto destinacione për të pushuar duhet ta kenë parasysh. Sakaq  që rruga rurale Shtylle-Panarit vijon të mbetet e bllokuar.

  • 9:36

    Rreth 3 mijë hektarë tokë dhe 9 shtëpi nën pushtetin e ujit/ Përmbytet Dajçi dhe Bërdica, ‘paralizohet ‘ qarkullimi i automjeteve


    Fshatrat Darragjat, Shirq ,Mushan, Suka-Dajç, Belaj, Rrushkull, Samrish i Ri, Pentar-zona fushore në Shkodër janë nën pushtetin e ujit.  Bashkia bën me dije se 1900 ha tokë janë nën ujë, ndërkohë që janë bllokuar rrugët në Darragjat, Shirq, dhe vendi i quajtur Urrelat e Shirqit ku lartësia e ujit arrin 150 cm në rrugë. Aktualisht ndodhen 9 shtëpi të përmbytura ndërkohë që në disa akse rrugore lëvizja me automjete është bërë e pamundur. Raportohet se në disa bujqësore lartësia e ujit arrin 2m, ndërsa nevoja për bazë ushqimore për gjënë e gjallë është e madhe.

    Situata e përmbytjeve në Shkodër: 

    Hidrometri shënon 6.80 cm. 1900 ha tokë bujqësore e përmbytur fshatrat Darragjat, Shirq ,Mushan, Suka-Dajç, Belaj, Rrushkull, Samrish i Ri, Pentar-zona fushore. Rrugë të bllokuara Darragjat, Shirq, vendi i quajtur Urrelat e Shirqit lartësie e ujit arrin 150 cm në rrugë. Shtëpi të përmbytura 9 Prezencë uji në oborre 131 shtëpi, Shirq 70, Mushan 10, Darragjat 11, Belaj 30, Rrushkull 1, Suka 9. Është bërë e pamundur lëvizja me vetura në lagjen Mazija- Suka Dajç. Është e pakalueshme rruga Belaj- Pentar, vetëm me mjete të larta të ushtrisë kalohet. Rruga kryesore e Darragjatit kalohet vetëm me mjete të tonazhit të lartë. Rruga kryesore Dajç është vështirësuar jashtëzakonist lëvizja me vetura, në drejtimin Dajç rruga nacione Shkodër- Velipojë. Kërkohet që të lihet në dispozicion një mjet ushtrie për komunikimin e banorëve me rrugën kryesore. Makina e Ushtrisë në gatishmëri ora 07:45- 16:00 tek Dispeçeri Mushan. SPZ e zonës në gatishmëri . Qendrat shëndetësore në gatishmëri Energji elektrike kemi, ndërprerje të hërëpashershme. Në disa toka bujqësore lartësia e ujit arrin 2m. Nevoja për bazë ushqimore për gjënë e gjallë është e madhe.

    Situata e përmbytjeve në Nj.A. Berdicë vazhdon të jetë e njëjtë si një ditë më parë:

    1200 ha tokë bujqësore e përmbytur në fshatrat Trush- Berdicë e Madhe, Berdicë e Mesme, Berdicë e Sipërme. Janë rreth 50 shtëpi banimi të rrethuara nga uji (kryesisht në fshatin Trush). Janë 5 shtëpi në fshatin Berdicë e Mesme dhe Berdicë e Madhe. Prezencë uji ka në lagjen Maksuti ,Qokthi ,Tula ,Xhurreta dhe tek rruga e Bostanishtes (e pakalueshme me vetura).

Shto Koment