Zbulohet laboratori me 205 bimë kanabisi në Kurbin! Shpallet në kërkim drejtori i Kadastrës Edmond Stojani, në pranga nipi i tij, SHÇBA nis hetimet për ‘dekonspirim’ (PAMJE NGA MAGAZINA)

Pamje nga operacioni i policisë dhe Etmond Stojani

KURBIN- Buzë rrugës, brenda një ferme bagëtish në Fushë-Gjormë të Kurbinit po rriteshin 205 bimë kanabisi. Policia e Shtetit ka finalizuar operacionin “Gjormë 2021”, gjatë së cilit në pranga ka rënë 24-vjeçari Vranicki Hisku dhe në kërkim është shpallur drejtori i Kadastres së Kurbinit, Edmond Stojani.

41-vjeçari së bashku me nipin 24-vjeçar, Vranicki Hiskun, i cili është arrestuar në flagrancë, kishin kthyer katin e dytë të stallës së bagëtive në një ambient të përshtatur për rritjen e bimëve narkotike.

Kati i tyre ishte mbushur me llampa, aspiratorë dhe filtra ajrimi, ndërsa ishin mbjellë 205 bimë. Ndërkohë që Policia ka sekuestruar në pronën e 21-vjeçarit një armë zjarri pushkë me dylbi të montuar. I gjithë operacioni, përfshirë edhe pamjet nga brenda magazinës, janë dokumentuar me pamje. 

Të dy, si Stojani dhe Hisku akuzohen për kryerjen e veprave penale: “Kultivimi i bimëve narkotike”, “Armëmbajtja pa leje” dhe “Vjedhja e energjisë elektrike”. Ndërkohë që hetimet vijojnë për identifikimin dhe kapjen e personave të tjerë që mund të jenë të përfshirë në kultivimin e kanabisit.

Po ashtu, një hetim paralel ka nisur edhe nga Shërbimi për Çështjet e Brendshme dhe Ankesat, të cilët dyshojnë se operacioni është dekonspiruar pasi Stojani ka mundur që t’i shpëtojë prangave të Policisë. Edhe nipi i drejtorit të Kadastrës po përgatitej për t’u larguar nga banesa por është kapur në kohë nga efektivët. 

(k.m/dosja.al)

• 19:43

  VIDEO/ Stalla e bagëtive që ishte kthyer në kanabisi në Kurbin

  Videoja e mëposhtme tregon stallën e bagëtive në Kurtin që ishte kthyer në laboratorë për rritjen e kanabis sativa. Në video shihet i gjithë laboratori, ku nga jashtë duket si një stallë e zakonshme bagëtish. Stalla është në afërsi të një kanali të ujrave të zeza.
• 13:45

  Ditën drejtor, natën ‘ustai’ i kanabisit, njihuni me shefin e Kadastrës në Kurbin, “fytyra” e Ramës që iu qante hallin qytetarëve për pronat

  Drejtori i Kadastrës së Kurbinit, Edmond Stojani është shpallur në kërkim pasi Policia e Shtetit i zbuloi laboratorin e kanabisit që kishte ndërtuar në katin e dytë të një stalle bagëtish. 41-vjeçari, bashkë me nipin e tij Vranicki Hisku, i cili u arrestua, kishin mbjellë 205 bimë narkotike, që u kishin siguruar të gjitha kushtet e nevojshme për t’u prodhuar. Burime për Dosja.al bëjnë me dije se Stojani e drejtonte prej tre vitesh Kadastrën e Kurbinit, dhe përfaqësonte shtetin si zyrtari më i lartë i të gjithë zonës, duke pritur qytetarë në zyrën e tij. Edhe në rrjetet sociale, Stojani është tepër aktiv, sidomos me shpërndarjen e fotove informuese për pandeminë e koronavirusit.

  1 / 4

  

  2 / 4

  

  3 / 4

  

  Etmond Stojani

  4 / 4

  

  Etmond Stojani
  

  

  

  

  “Io resto a casa (Unë rri në shtëpi),”-thotë ai në një foto por mesa duket herë pas herë kalonte edhe nga laboratori i ngritur në bashkëpunim me nipin 24-vjeçar.
• 11:21

  Kush dekonspiroi operacionin? Magazina e drogës në Gjormë, drejtori i Kadastrës ia mbathi, nipi nuk u largua dot në kohë. SHÇBA nis hetimet…

  

  Shërbimi për Çështjet e Brendshme dhe Ankesat ka nisur një hetim për zhvillimin dhe finalizimin e operacionit “Gjormë 2021”. Burime për Dosja.al bëjnë me dije se oficerët kanë nisur një hetim për dekonspirim të aksionit.  Kjo pasi, Policia e Shtetit nuk ka mundur që të arrestojë Edmond Stojanin, i cili mbante postin e drejtorit të Kadastrës së Kurbinit, edhe pse po gjurmohej prej kohësh. Ndërkohë “çuditërisht” vetëm natën e operacionit nuk është gjetur askush, pasi është arratisur. Në prangat e Policisë ka përfunduar nipi i tij Vranicki Hisku, vetëm 24 vjeç. Dyshohet se edhe ky i fundit është njoftuar në momentin e fundit për operacionin që po kryente policia, por nuk ka mundur që të lirohet në kohë.
• 10:42

  Llampa, aspiratorë dhe filtra ajrimi/ Dalin PAMJET nga brenda laboratorit të drogës në Gjormë, si ishte planifikuar gjithçka për të rritur 205 bimë

  Dalin pamjet e para nga magazina e laboratorit të kanabisit, i cili u zbulua nga Polici e Shtetit gjatë operacionit “Gjormë 2021”. Siç duket brenda magazinës, kati i dytë i së cilës ishte shndërruar në një “kopshët”, i kishin vendosur llampa, aspiratorë dhe filtra ajrimi. Kështu brenda magazinës po rriteshin 205 bimë kanabisi.
• 9:30

  Kthyen magazinën në laborator kanabisi, shpallet në kërkim drejtori i Kadastrës së Kurbinit

  

  Detaje të reja janë mësuar lidhur me operacionin “Gjormë 2021”. (Shiko këtu) Burime nga grupi hetimor bëjnë me dije se i shpalluri në kërkim për magazinën e kanabisit është Edmond Stojani, drejtor i Kadastrës së Kurbinit. Stojani e drejtonte prej tre vitesh Kadastrën e Kurbinit.
• 8:59

  Laboratori i drogës, njoftimi i Policisë

  NJOFTIMI I PLOTË:

  Kurbin

  Goditet një tjetër rast i tentativës për kultivim të bimëve narkotike. Finalizohet me sukses nga Komisariati i Policisë Kurbin, operacioni policor antikanabis i koduar “Gjormë 2021”. Policia zbulon brenda një magazine, një ambient të përshtatur si laborator që shërbente për kultivimin e bimëve narkotike, nëpërmjet ngrohjes me llamba.

  Sekuestrohen një armë zjarri pushkë me dylbi të montuar dhe pajisje të ndryshme elektrike që shërbenin për kultivimin e bimëve narkotike. Vihet në pranga 1 shtetas, shpallet në kërkim 1 tjetër. Nga shërbimet e Komisariatit të Policisë Kurbin, në vijim të kontrolleve të pandërprera dhe punës për parandalimin e kultivimit të bimëve narkotike, pas informacioneve të siguruara në rrugë policore, u bë i mundur finalizimi me sukses i operacionit antikanabis të koduar “Gjormë 2021”.

  Gjatë operacionit u bë arrestimi në flagrancë i shtetasit V. H., 24 vjeç, banues në Katund i Ri, Kurbin, si dhe është shpallur në kërkim shtetasi E. S., 41 vjeç, banues në Kurbin. Këta shtetas, në bashkëpunim me njëri-tjetrin, në fshatin Fushë Gjormë, Kurbin, kishin përshtatur katin e dytë të një magazine të marrë me qira, me aparatura që shërbejnë për kultivimin e bimëve narkotike.

  Gjatë kontrollit të ambientit u gjetën dhe u sekuestruan 205 bimë të dyshuara narkotike cannabis sativa të kultivuara në vazo. Gjithashtu, gjatë kontrollit, në ndërtesë u konstatua një lidhje e paligjshme e energjisë elektrike, e cila shërbente për furnizimin me energji të pajisjeve si llamba, aspirator, filtra ajrimi etj, që ndihmonin në kultivimin dhe rritjen e bimëve narkotike. Gjithashtu, në cilësinë e provës materiale u sekuestruan të gjitha pajisjet që kanë shërbyer për kultivimin e bimëve narkotike, si: pajisje elektrike, llamba elektrike termale, bidonë me lëndë ushqyese për bimët narkotike.

  Po gjatë operacionit, në banesën e shtetasit V. H. është gjetur dhe sekuestruar dhe një armë zjarri pushkë me dylbi të montuar. Materialet për veprime të mëtejshme i kaluan Prokurorisë pranë Gjykatës së Shkallës së Parë Kurbin, për veprat penale “Kultivimi i bimëve narkotike”, “Armëmbajtja pa leje” dhe “Vjedhja e energjisë elektrike”.