Aktualitet

‘LOS BLANCOS’/ Goditet KARTELI i parë shqiptar i drogës, arrestohet në Dubai biznesmeni Eldi Dizdari, 20 të arrestuar, tonelata me kokainë dhe mln euro të sekuestruara, aksioni i shtrirë edhe në Holandë, Spanjë e Itali (VIDEO-DETAJE)

  • Djemtë e bukur, simbolika e veçantë e “kompania Bello”, anëtarët e grupit lidheshin me vajzat e showbizz-it
  • FT/ Kush është Eldi Dizdari, kreu i kartelit të parë shqiptar të drogës, ‘bossi’ i Los Blancos
  • KOKA E KARTELIT/ Zbardhen EMRAT, ja kush u arrestua bashkë me Eldi Dizdarin
  • PAMJET: Del FOTOJA e Denis Matoshit, momenti pas arrestimit në Dubai
  • Dalin DETAJE nga Policia e DUBAIT, e cilësojnë Eldi Dizdarin si “mbret droge”
  • Shkatërrohet karteli i parë i drogës i cili përbëhet dhe kryesohet nga një shqiptar. Policia e Shtetit bashkë me partnerët ndërkombëtarë kanë goditur kartelin "Los Blancos", i cili drejtohej nga biznesmeni Eldi Dizdari. Dizdari njihet në Shqipëri, por arrestimi i tij u bë në Dubai, për llogari të Interpol Roma. Ndërsa në Shqipëri janë arrestuar Gentjan Manaj, Rexhino Ibrahimi, Vladimir Lesaj, dhe Elvis Jaupaj.
    Featured image of article: ‘LOS BLANCOS’/ Goditet KARTELI i parë shqiptar i drogës, arrestohet në Dubai biznesmeni Eldi Dizdari, 20 të arrestuar, tonelata me kokainë dhe mln euro të sekuestruara, aksioni i shtrirë edhe në Holandë, Spanjë e Itali (VIDEO-DETAJE) Eldi Dizdari dhe pamje nga operacioni

    LOS-BLANCOS- Dhjetëra të arrestuar, tonelata me kokainë dhe miliona euro të sekuestruara. Ky është rezultati i një mega-operacioni të nisur nga policia italiane, i shtrirë në disa shtete. Itali, Spanjë, Holandë, Dubai dhe Shqipëri, kanë qenë zonat ku grupi ka patur të shtrirë aktivitetin e jashtëligjshëm të trafikut të drogës. Operacioni i koduar “Los Blancos”, ka shkatërruar një kartel që sipas mediave italiane është karteli shqiptar i trafikut të drogës në kontinent, me emrin LOS BLANCOS, (Të Bardhët). Hetimi ka nisur nga një skuadër hetimi “Florence Mobile Team”, një ekip gjerman dhe qendra evropiane për trafikun e drogës në bashkëpunim me Eurojust dhe Europol, Anti-Mafian italiane, qendrën kundër terrorizmit dhe qendrën kombëtare të policinë kriminale. Operacioni “Los Blancos” është shtrirë po ashtu edhe në vendin tonë, ku mësohet se deri më tani janë të arrestuar 5  persona, emrat e të cilëve, Dosja.al ka arritur t’i zbulojë dhe ata janë: Gentjan Manaj, Rexhino Ibrahimi, Vladimir Lesaj, dhe Elvis Jaupaj. Të 5 të arrestuarit do të ekstradohen në Itali për llogari të autoriteteve italiane. Po ashtu në pranga kanë rënë, Lek Colaj, 40 vjeç, i cili u arrestua në Rumani; Gjergj Lesaj, 38 vjeç, i cili u arrestua ne Holandë; Sokol Aliko (Memetaj), 36 vjeç, i cili u arrestua në Spanjë; Robert Varga, 44 vjeç, i cili u arrestua në Hungari. Gjithashtu iu komunikua masa e sigurisë “Arrest në burg” shtetasit Altin Velsula (Hoxha), 36 vjeç, i cili ndodhet në burg në Norvegji.

    Për më shumë bëhu pjesë e grupit më viral në Facebook, Dosja.al

    Ndërkohë që në Dubai është arrestuar biznesmeni Eldi Dizdari. Dizdari njihet në Shqipëri si bashkëshorti i ish-missit, Suada Sherifi. Dizdari alias Denis Matoshi, është një emër i njohur në Shqipëri  për përfshirje në trafikun e drogës, megjithëse autoritetet tona, kurrë nuk ia dolën të provonin përfshirjen e tij në trafikun e drogës. Ai u përfol si një nga emrat që morën pjesë edhe në përplasjen me armë në ish-bllok, por ngjarja u “mbulua” nga policia dhe prokuroria shqiptare. Emri i Dizdarit doli në skenë edhe pas arrestimit të Arbër Cekajt, i dënuar tashmë me 14 vite burg për trafikimin e 613 kilogramëve kokainë, që u kapën në Maminas më 2018. Dizdari është kushëri i afërt me Cekajn dhe tashmë ai pritet të ekstradohet në Shqipëri.

    (f.g/dosja.al)

    • 20:17

      Goditja e kartelit të drogës, prokurori italian: Kriminelët shqiptarë aftësi të jashtëzakonshme, ja çfarë i veçon nga të tjerët. Paratë i riciklojnë në Angli e Holandë

      Federico Cafiero De Raho

      Prokurori kombëtar i antimafias, Federico Cafiero De Raho, ka vënë në pah rolin e madh që, sipas tij, luajnë trafikantët shqiptarë të drogës. Në një konferencë për mediat në Firence, të mbajtur pas shkatërrimit të kartelit shqiptar të drogës, i kryesuar nga Eldi Dizdari, De Raho u shpreh se kriminelët shqiptarë kanë shfaqur aftësi të mëdha për të drejtuar organizata të mëdha të trafikut të drogës, kjo për shkak të marrëdhënieve të mira që kanë me grupet e Amerikës Latinë.

      “Ndonjëherë mendojmë se organizatat kriminale shqiptare janë të nivelit të dytë. Operacioni Los Blancos demonstron se kriminelët shqiptarë kanë aftësi të mëdha, që vijnë për t’u marrë vetë me kartelet e trafikut të drogës në Amerikën Latine, duke mbajtur marrëdhënie të qëndrueshme me ta.”

      Hetuesi më pas shtoi se organizatat kriminale shqiptare i riciklojnë paratë përmes kompanive kineze që veprojnë në Holandë dhe Angli, duke i “pastruar”.
    • 18:22

      “E pamundur ta hakosh!”/ Eldi Dizdari i kujdesshëm në detaje, pajisi gjithë grupin me “BlackBerry”, DY aplikacionet aziatike që përdorin për të komunikuar

      Eldi Dizdari

      Karteli i drogës drejtohej nga një…telefon “BlackBerry”. Hetimet ndërkombëtare kanë zbuluar se koka e grupit të drogës, Eldi Dizdari komunikonte me anëtarët e tjerë të grupit në rrjete të huaja sociale. Grupi përdorte platformat, “SKYecc” dhe një tjetër për të diskutuar lidhur me porositë dhe me itinerarin e sasive të drogës. Aplikacionet janë gjetur në çdo telefon celular të anëtarve të grupit, të cilët kanë rënë në prangat e Policisë ndërkombëtare. Megjithatë deri më tani asnjë detaj nuk është zbuluar nga bisedat e bëra mes “Djemve të bukur”. Sheran Gunasekera, shef i kërkimit dhe zhvillimit në ZenConsult në një konferencë është shprehur se një telefon “BlackBerry” është i pamundur që të hackohet dhe përgjohet.

      “Nuk ka asnjë mënyrë teknike për të hakuar një BlackBerry, është e pamundur”, tha Gunasekera, gjatë një prezantimi në konferencën për sigurinë celulare “Hack In The Box”. Mesa duket Dizdari i ka bërë mirë kërkimet e tij dhe nuk ka rrezikur në përdorimin e telefonave më “in” të momentit, të cilët sigurinë e të dhënave e kanë pikën e tyre më të dobët.

    • 17:51

      Në heshtje pa shumë bujë! Si nisi megaoperacioni në Greqi, atje u arrestuan dy shqiptarët e parë të kartelit “Bello”

      Foto ilustruese

      Operacioni “Los Blancos” kishte nisur prej ditësh. Në heshtje, fillimisht në prangat e Policisë ranë dy të rinj shqiptarë, të cilët jetonin në shtetin fqinjë. Më 15 shtator, dy shqiptarët janë prangosur në Atikë dhe janë vendosur pas hekurave në kuandër të operacionit ndërkombëtar për shkatërrimin e kartelit shqiptar të drogës. Por ç’do gjë është zhvilluar në heshtje për të mos alarmuar anëtarët e tjerë të grupit. Edhe pse arrestimi është bërë disa ditë më parë, mediat greke e kanë pasqyruar lajmin sot, por pa publikuar emrat e shqiptarëve. 

    • 17:28

      Fisi i HAKLAJVE i vrau babanë, dajën dhe xhaxhain/ Historia e Eldi Dizdarit që u rrit pa baba dhe e nisën jashtë që t’i shpëtonte plumbit

      Vëllezrit Haklaj dhe Eldi Dizdari

      Eldi Dizdari alias Denis Matoshi, i arrestuar sot dhe i konsideruar si një nga krerët e kokainës në Shqipëri, ka pasur një fëmijëri të vështirë. I rritur në Tropojë në vitet e vështira të ’98 ka përjetuar vrasjen e të atit.  Në vitin 1998, babai i Dizdarit, Naimi është ekzekutuar nga fisi i Haklajve. Bashkë me të në momentin e pritës ishte dhe daja e Eldit, Avdyl Matoshi, i cili pësoi të njëjtin fat me kunatin. Nuk kaloi shumë kohë dhe nga e njëjta dorë edhe xhaxhai i tij, Qazim Dizdari për arsye që ende nuk janë zbardhur nga Policia dhe Prokuroria. Ajo që bie në sy është fakti që babai Eldit është vrarë në janar të vitit 1998, një ditë pas vrasjes së Shkëlqim Haklajt dhe Demirit në aksion që lidh Sopotin dhe Qafën e Lushës. Po atë periudhë është vrarë edhe Gjin Kolbuçaj dhe Naim Dizdari. Tropoja numëron qindra të vdekur gjatë periudhës 1997-2000, për motive që nuk janë zbardhur edhe sot. Po e njëjta gjë vlen dhe për autorët. Për vrasjen e trefishtë në familjen e Dizdarit, akuzohen vëllezërit Haklaj, por nuk ka një emër cili nga ta ka qëlluar dhe ka vrarë. Gjithashtu nuk përjashtohet mundësia që në ekzekutimin ta kenë kryer njerëz të tjerë pranë familjes që vendoste “ligjin” në Tropojën e atyre viteve.  Në atë kohë pas vrasjes së Shkëlqim Haklaj, në Tropojë u tha se vetë Fatmiri, ende shef i Komisariatit, kishte shkuar në spital dhe kishte thënë vetëm: Bukur të paskan qëndis vëlla! Në këtë moment, Fatmiri u largua dhe u rishfaq sërish vetëm të nesërmen, kur në shtëpi po përgatiteshin që të vëllain ta dërgonin për në banesën e fundit. Thuhej se Fatmiri ishte betuar për hakmarrje, të cilën mesa duket ishte kujdesur vetë që ta kryente pa asnjë gabim. Ndoshta kjo është edhe arsyeja e ekzektutimit, por tanimë dosja ka zënë “pluhur” pa u zbardhur kurrë. Për të shmangur ndonjë hakmarrje tjerër, në moshë të re Dizdari emigroi jashtë vendit dhe nuk dihet se si, por krijoi lidhjet më të fuqishme me protagonistët amerikano-jugor të trafikut të kokainës duke u bërë një nga “të plotfuqishmit” e vendit.

    • 17:21

      “Kush e thyen ligjin e heshtjes, e pret vdekja”/ Djemtë e bukur me në krye Dizdarin zbatonin kodin e Omerta-së,

      Vito Corleone, Eldi Dizdari dhe Michael Corleone

      Ai që nuk e respekton kodin e ‘Omertës’, do të ekzekutohet”. Ky ishte një rregull i prerë për grupin e djemve të “Kompania Bello” që u shkatërrua sot në një operacion ndërkombëtar. Mësohet se të gjithë anëtarët e këtij grupi, që sot ranë në pranga, zbatonin kodin e “Omertës” që nënkuptonte heshtjen e çdo të bashkëpunëtori. Kush guxonte të nxirrte sekretet e grupit, pasi të arrestohej e priste vetëm vdekja.

      Por çfarë është fjala Omerta dhe nga rrjedh?

      Omertà është një qëndrim popullor dhe kod nderi, i zakonshëm në zonat e Italisë së Jugut, të tilla si Siçilia, Kalabria dhe Campania, ku organizatat kriminale si Mafia, ‘Ndrangheta dhe Camorra janë të forta. Një përkufizim më i zakonshëm i kësaj fjale është “kodi i heshtjes”. Omertà nënkupton “ndalimin kategorik të bashkëpunimit me autoritetet shtetërore ose mbështetjen në shërbimet e tij, edhe kur dikush ka qenë viktimë e një krimi”. Edhe nëse dikush dënohet për një krim që nuk e ka kryer, ai supozohet të vuajë dënimin pa i dhënë policisë ndonjë informacion në lidhje me kriminelin e vërtetë, edhe nëse ai kriminel nuk ka asnjë lidhje me vetë Mafien. Brenda kulturës mafioze, thyerja e Omertà-së dënohet me vdekje.

      Kodi u miratua nga Sicilianët shumë kohë para shfaqjes së Cosa Nostra.

      Fjalë për fjalë, fjala përkthehet “burrëri” dhe nënkupton se nuk je ‘burrë’ kur bashkëpunon me drejtësinë kundër mafias.

      Ju kurrë nuk duhet të nxirrni sekretet e kësaj shoqërie, duke respektuar traditën e lashtë të Omertà-së. Dënimi për shkeljen e këtij ligji është vdekja,”- thoshte Michael Corleone (Marlon Brando) pjesë e filmit të njohur “The Godfather” (Il Padrino).

      Kështu, frymëzuar nga grupet më të vjetra dhe të sofistikuar kriminalë, Eldi Dizdari dhe Dritan Rexhepi, dy kokat e kartelit të parë shqiptar që u shkatërrua, ishin të qartë me bashkëpunëtorët e tyre. Nuk dimë të themi nëse ka ndonjë anëtar të këtij grupi që mund të jetë bërë shembull, për t’u treguar të tjerëve që kodi i heshtjes nuk ishte vetëm një fjalë për ta….

    • 16:28

      Dalin DETAJE nga Policia e DUBAIT, e cilësojnë Eldi Dizdarin si “mbret droge”: Kur morëm sinjalin “KODI I KUQ”…

      Foto të komandatit nga Dubai dhe Edli Dizdarit

      Policia e Dubait ka dhënë detaje lidhur me megaoperacionin ‘Los Blancos’, ku në pranga kanë përfunduar dhjetra persona, mes tyre dhe Eldi Dizdari. Për mediat vendase ka folur gjenerali Abdullah Khalifa Al Marri, Komandanti i Përgjithshëm i Policisë së Dubait, u shpreh se operacioni është tregues për bashkëpunimin e frtyshëm me agjensitë ndërkombëtare.

      “Pas shkëmbimit të informacionit me autoritetet italiane, ne identifikuam vendin ku qëndronte “mbreti i drogës” dhe monitoruam lëvizjet e tij të përditshme. Pasi morëm sinjalin “Kodi i Kuq” e prangosëm. Së bashku me udhëheqësit e tjerë të bandave, i dyshuari arriti të kontrabandonte dhe transportonte qindra ton drogë në Evropë përmes porteve detare dhe t’i shiste ato te “porositësit“,”-shpjegoi komandanti.

    • 15:47

      Del FOTOJA e Denis Matoshit, momenti pas arrestimit në Dubai

      Personi që po shikoni në foto është Denis Matoshi alias Eldi Dizdari, koka e kartelit të parë të drogës që u shkatërrua sot në kuadër të një operacioni ndërkombëtar të koduar “Los Blancos”. Kjo foto është shkrepur nga policia e Dubait, në momentin që Matoshi është vënë në pranga. Kjo foto është shkrepur nga policia e Dubait, në momentin që Matoshi është vënë në pranga.

      Denis Matoshi alias Eldi Dizdari
    • 14:14

      Karteli shqiptar i drogës… pjesë edhe Dritan Rexhepi/ “Zoti” i Drogës në Ekuador siguronte kokainën dhe ia kalonte grupit të Eldi Dizdarit (DETAJET)

      Dritan Rexhepi dhe Eldi Dizdari

      Goditja e kartelit të parë të kokainës në Shqipëri tregon sesi grupet shqiptare të trafikut të drogës janë modernizuar dhe perfeksionuar. Burime për Dosja.al bëjnë me dije se pjesë e kartelit Los Blancos, ishte edhe Dritan Rexhepi, (i përfshirë në rrëmbimin e Jan Prengës), (Lexo këtu).

      Po të njëjtat burime bëjnë me dije, se ishte Rexhepi që siguronte kokainën në Ekuador, e cila ilegalisht kalonte në Evropë, e më pas shpërndahej nga karteli i Denis Matoshit alias Eldi Dizdari.

      Sot, Policia e Shtetit, Europol, Eurojust dhe partnerët ndërkombëtarë kanë goditur kartelin e parë shqiptar të drogës. Ai është “Los Blancos” dhe dyshohet se kryesohet nga biznesmeni Eldi Dizdari. Ai është arrestuar në Dubai dhe pritet që të sillet në Shqipëri. Gjatë operacionit janë sekuestruar 5.5 milionë euro cash dhe 4 ton kokainë. Po ashtu, janë arrestuar edhe 20 persona jashtë vendit, 5 prej të cilëve janë shqiptarë. Të arrestuar ka edhe në Shqipëri, ku 5 persona, pjesë e kartelit që në vendin tonë njihej si “Kompania Bello”, ranë në prangat e policisë.

    • 12:48

      KOKA E KARTELIT/ Zbardhen EMRAT, ja kush u arrestua bashkë me Eldi Dizdarin jashtë vendit, Policia: Biznesmeni me rekorde kriminale të theksuara në fushën e trafikimit të drogave të forta dhe krimeve ndaj personit

      Policia e Shtetit

      Në vijim të informacionit të dhënë për operacionin mjaft të suksesshëm ndërkombëtar të koduar “LOS BLANCOS”, zhvilluar me homologët ndërkombëtar, si rezultat i të cilit, në Shqipëri, nga ana e strukturave të Policisë së Shtetit u kapën dhe u arrestuan 5 persona, bëjmë me dije se janë ekzekutuar masat e sigurisë “Arrest në burg”, për veprën penale “Pjesëmarrja në organizatë kriminale” edhe për disa shtetas të tjerë, pjesëmarrës të organizatës kriminale, të cilët janë rezidentë jashtë shtetit.

      Si rezultat i koordinimit të informacionit mes Policisë së Shtetit dhe policive të përfshira në operacion u bë arrestimi me qëllim ekstradimi drejt Italisë, i shtetasit Denis Matoshi alias Elti Dizdari, 31 vjeç, person me rekorde kriminale të theksuara në fushën e trafikimit të drogave të forta dhe krimeve ndaj personit.

      Gjithashtu, si rezultat i bashkëpunimit të Policisë së Shtetit me autoritetet policore italiane, rumune, holandeze, spanjolle dhe hungareze, në kuadër të operacionit “LOS BLANCOS”, u bë u kapja dhe ekzekutimi i masave të sigurisë për shtetasit:

      Lek Colaj, 40 vjeç, i cili u arrestua në Rumani;

      Gjergj Lesaj, 38 vjeç, i cili u arrestua ne Holandë;

      Sokol Aliko (Memetaj), 36 vjeç, i cili u arrestua në Spanjë;

      Robert Varga, 44 vjeç, i cili u arrestua në Hungari.

      Gjithashtu iu komunikua masa e sigurisë “Arrest në burg” shtetasit Altin Velsula (Hoxha), 36 vjeç, i cili ndodhet në burg në Norvegji.

      Policia e Shtetit ka një bashkëpunim solid me partnerët dhe është e angazhuar maksimalisht dhe me profesionalizëm në finalizimin e shumë operacioneve të rëndësishme në kuadër të goditjes së krimit të organizuar dhe trafiqeve të paligjshme që do bëhen prezent në kohën e duhur.

    • 12:48

      KARTELI i djemve të bukur, simbolika e veçantë e "kompania Bello", anëtarët e grupit lidheshin me bukuroshet e showbizz-it, frymëzuar nga Dizdari dhe missi-i i tij, Suada Sherifi

      Eldi Dizdari dhe Suada Sherifi
      Shqipëria për herë të parë zë vendin kryesor në goditjen e trafikut të drogës, e kësaj here me një kartel të mirëfilltë, njësoj si në Kolumbi dhe vende të tjera të Amerikës Latine. Burime për Dosja.al bëjnë me dije se jashtë vendit, grupi njihej si “Los Blancos”, por në Shqipëri karteli vepronte nën emrin “Kompania Bello”. Kj sepse, pjestarët e grupit njiheshin si “djemtë e bukur” që lidheshin me vajza të famshme dhe misse. Një shembull frymëzimi për ta është edhe koka e kartelit, Eldi Dizdari. Ai është i martuar me një vajzë ish-miss, Suada Sherifin, dhe kanë edhe një fëmijë bashkë.
    • 12:24

      Katër ton kokainë dhe 5.5 mln euro në cash/ Si u godit karteli i fuqishëm shqiptar me emrin ‘Kompania Bello’. Çfarë thotë Europol

      Një operacion ndërkombëtar i shtrirë në 10 shtete, përfshirë këtu edhe Shqipërinë, për të cilin u hetua për 5 vite, ka rezultuar me shkatërrimin e kartelit të parë të drogës që drejtohej dhe përbëhej nga një shqiptar. Në Shqipëri karteli vepronte nën emrin, ‘Kompania Bello’, dhe merrej me import kokaine nga Amerika e Jugut në vendet e Evropës. Mbi 4 tonë kokainë janë sekuestruar, janë sekuestruar mbi 5.5 milionë euro cash, nga policia ndërsa të arrestuarit janë mbi 20. Ndërkohë që EUROPOL në një deklaratë për mediat thotë se  bëhet fjalë për “një operacion policor i koordinuar me përpikmëri në 10 vende ka shkatërruar një grup të krimit të organizuar shqiptar që kontrabandonte kokainë nga Amerika e Jugut në Evropë duke çuar në arrestimin e 20 të dyshuarve. Europol tha të enjten se banda, e njohur si Kompania Bello, ishte një nga rrjetet më aktive të trafikut të kokainës në Evropë.

      Europol ndihmoi në koordinimin e një serie bastisjesh nga qindra oficerë policie të martën që çuan në arrestime pas një hetimi pesë-vjeçar, të udhëhequr nga Italia. flitet për një bandë të pazakontë në tregtinë ndërkombëtare të drogës pasi kontrollonte çdo aspekt të zinxhirit të furnizimit – nga rregullimi i dërgesave të drogës nga Amerika e Jugut deri te shpërndarja e tij në të gjithë Evropën”,- siç shkruan Associated Press.

    • 12:13

      FOTOT/ Arrestohet kreu i kokainës së Shqipërisë, Eldi Dizdari kapet në Dubai/ Kush është i kërkuari nga Interpoli, i përfshirë në ngjarjen në ish-Bllok, bashkëshorti i ish-Missit Shqiptar (JETA E LUKSIT)

      Eldi Dizdari është një prej personave të arrestuar në operacionin e madh antidrogë të zhvilluar në Itali ditën e sotme, me bashkëpunimin e Policive të disa shteteve europiane. Operacioni i quajtur ‘Los Blancos’ vuri në pranga dhjetëra persona, mes tyre shumë shqiptarë, të cilët nga mediat italiane cilësohen si drejtus të kartelit. Emri i Eldit, i cili ishte në mesin e të arrestuarve nuk është i panjohur në vendin tonë. Ai flitej si person i përfshirë në ngjarjen që ndodhi në ish-bllok, aty ku mbeti i vdekur Fabiol Gaxha.

      Martesa me ish- Missin Shqiptar, Suada Sherifin

      Eldi Dizdari është bashkëshorti i ish-misit Suada Sherifi, të cilin ajo ka preferuar që ta mbajë të fshehtë nga media. Fotot e tij me familjen numërohen me gishtat e dorës mirëpio jo pak herë ajo është shprehur për të publikisht. Në vitin 2016, Sherifi, deklaroi në një intervistë se kishte gjetur djalin ideal me të cilin ishte gati të martohej, duke u shkëputur kështu pak nga bota e televizionit e duke iu përkushtuar më shumë partnerit të saj, i cili për të ishte ‘bota’ e për të tjerët ‘Bossi’ i drogës.

      “Unë isha një vajzë single, kisha kohë që isha vetëm dhe në të gjithë morinë e njerëzve që tentonin, nuk kisha asnjë lloj interesi. Mirëpo nuk e di pse, por që në momentin e parë që ai erdhi në jetën time, më ka pëlqyer. Ishte ai entuziazmi që mendoja se nuk do ta kisha kurrë, apo buzëqeshja dhe sytë me zemra që kisha humbur, shpresat se mund t’i kisha. Çdo gjë filloi natyrshëm, sepse kur është dëshira e mirë, gjërat janë shumë të thjeshta, shumë të lehta dhe shumë të bukura”.- është shprehur vite me pare Suada.

      Ashtu sikurse Dizdari fshihej nga policia për të mos u kapur, duket se dhe dasma e tyre është bërë në të njëjtën formë.

      “Në fakt, në fakt, unë e kam mbajtur pak të fshehtë, po unë jam martuar”, ka thene ish-Missi shqiptar në një intervistë vite me parë.

      Biznesmeni shumë i pasur, Tropojani i larë në para u sigurua që ti jepte Suadës jetën që donte, të mbushur me veshje luksi, makina të shtrenjta e sidomos udhëtime në çdo cep të botës.

      E gjjthë kjo dashuri u përbush me ardhjen në jetë të një vajze të cilën Suada e tregonte herë pas here në Instagram. Tashmë nuk kemi se si ta ndjekim në këtë rrjet social pasi vajza e cila është ‘llastuar’ me paratë që vinin nga bota e krimit, e ka bërë profilin privat.

      E vogla ka marrë karakteristikat e të dy prindërve, kështu ka treguart Suada në një interviste.

      ‘Herë është kopja ime, herë duket kopja e të atit. Mendoj se është shumë miks prandaj na bën lëmsh edhe neve. Përsa i përket karakterit është shumë e vogël akoma’.

      Jeta nuk i ka shkuar ‘vaj’ Suadës me partnerin e saj. Përveç se është stresuar nga lajmet e drogës, kokainës, bandave, ku bashkëshorti i saj bën pjesë, ky i fundit ia ka vështirësuar jetën pasi ia llaston shumë vajzën.

      ‘Bashkëshorti nuk më ndihmon fare, madje ma vështirëson punën sepse ai e llaston dhe kur ai vjen në shtëpi, e vogla tërbohet nga lumturia. Ata luajnë bashkë dhe ajo lodhet pak më shpejt dhe bëhet gati për gjumë. Kjo është njëfarë ndihme po ta mendosh. Unë mendoj se i takon nënës të kujdeset për fëmijët sidomos kur është akoma bebe.’

      Tashmë Suada do të duhet ta rrisë e vetme vajzën e saj, pasi bashkëshorti do të duhet të përballet me shumë vite burg. A do ti rikthehet rrjeteve sociale ashtu si më parë? A do ta shikojmë në gjykatë në mbrojtje të partnerit…na mbetet të presim se çfarë lëvizje do bëjë tashmë Suada.

    • 12:01

      ZBARDHEN EMRAT, kush janë 5 të arrestuarit e operacionit LOS BLANCOS, bashkë me Eldi Dizdarin dhe kompaninë BELLO dërgonin kokainë nga Afrika e Jugut në Evropë

      Në Tiranë është kapur dhe arrestuar me qëllim ekstradimi shtetasi Gentjan Manaj. Në Vlorë janë kapur dhe arrestuar me qëllim ekstradimi shtetasit Elvis Jaupaj dhe Jorin Llambro. Në Durrës është kapur dhe arrestuar me qëllim ekstradimi, shtetasi Rexhino Ibrahimi. Në Lezhë është kapur dhe arrestuar me qëllim ekstradimi shtetasi Vladimir Lesaj

    • 11:32

      Shkatërrimi i kartelit LOS BLANCOS, policia e Shtetit jep detaje: Kokaina merrej nga KOMPANIA BELLO në Afrikën e Jugut

      Policia e Shtetit ka zbardhur të dhënat e operacionit “Los Blancos”, ku u arrestua edhe biznesmeni Eldi Dizdari. Policia thotë se droga kalohej nga vendet e Afrikës së Jugut, përmes një kompanie të njohur si “Kompani Bello”, që merrej me kalimin e drogës tek grupet e trafikut në Evropë. 5 persona janë arrestuar në Shqipëri.

      NJOFTIMI I PLOTË: 

      Policia e Shtetit

      Finalizohet një tjetër operacion ndërkombëtar antidrogë, në bashkëpunim me homologët, i koordinuar nga Europol, Eurojust dhe Shërbimi i Bashkëpunimit Ndërkombëtar Policor.

      Operacioni ndërkombëtar antidrogë i koduar “LOS BLANCOS”, i shtrirë në disa shtete, si Itali, Shqipëri, Belgjikë, Emiratet e Bashkuara Arabe, Gjermani, Greqi, Holandë, Rumani, Hungari dhe Ekuador, për goditjen e një grupi kriminal në fushën e trafikimit të drogave të forta.

      Në Shqipëri operacioni është zhvilluar nga Departamenti i Policisë Kriminale, në bashkëpunim me Drejtoritë Vendore të Policisë Tiranë, Vlorë, Lezhë, Durrës e Shkodër, me mbështetjen e Forcës së Posaçme Operacionale në Policinë e Shtetit, të Njësisë së Kërkimit “Fast” dhe të Zyrës së Interforcës në Shqipëri.

      Si rezultat i operacionit, në Tiranë, Vlorë, Lezhë e Durrës, janë kapur dhe arrestuar me qëllim ekstradimi, 5 të kërkuar, konkretisht:

      Në Tiranë është kapur dhe arrestuar me qëllim ekstradimi shtetasi G. M., 35 vjeç, banues në Tiranë, Gjykata e Firences, Itali, i ka caktuar masën e sigurisë “Arrest në burg”, për kryerjen e veprës penale “Pjesëmarrja në organizatë kriminale, me qëllim trafikimin e lëndëve narkotike”.

      Në Vlorë janë kapur dhe arrestuar me qëllim ekstradimi shtetasit E. J., 27 vjeç dhe J. Ll., 31 vjeç, pasi Gjykata e Firences, Itali, iu ka caktuar masën e sigurisë “Arrest në burg”, për kryerjen e veprës penale “Pjesëmarrja në organizatë kriminale, me qëllim trafikimin e lëndëve narkotike”.

      Në Durrës është kapur dhe arrestuar me qëllim ekstradimi, shtetasi R. I., 33 vjeç, pasi Gjykata e Firences, Itali, i caktuar masën e sigurisë “Arrest në burg”, për veprën penale “Pjesëmarrja në organizatë kriminale”.

      Në Lezhë është kapur dhe arrestuar me qëllim ekstradimi shtetasi V. L., 40 vjeç, pasi Gjykata e Firences Itali, e ka dënuar me 24 vite burg, për veprën penale “Shkelje e ligjit mbi drogat“.

      Gjatë operacionit, Skuadra Mobile e Firences dhe Shërbimi Central Operativ i Policisë, në bashkëpunim me skuadrat e tjera kompetente lëvizëse, organet e policisë të shteteve të Bashkimit Evropian në fjalë dhe Policinë e Shtetit shqiptar, kanë ekzekutuar masat e sigurisë “Arrest në burg”, për 30 shtetas, për veprën penale “Pjesëmarrja në organizatë kriminale, me qëllim trafikimin e lëndëve narkotike”.

      Nga hetimet ka rezultuar se një shtetas shqiptar drejtonte një kompani të quajtur “KOMPANIA BELLO”, që merrej me importimin e ngarkesave të mëdha të kokainës nga Amerika e Jugut, të financuara nga grupe të rëndësishme të trafikantëve të drogës që veprojnë në të gjithë Evropën.

       

      Hetimet kanë nisur në vitin 2015 dhe gjatë kësaj periudhe janë mbi pesë milionë e gjysmë euro dhe pothuajse 4 tonë kokainë që janë kapur dhe sekuestruar nga Policia. Edhe gjatë këtij operacioni mjaft të rëndësishëm, Policia e Shtetit tregoi profesionalizëm në përmbushjen e detyrave gjatë gjithë fazave të operacionit, çka tregon edhe njëherë vendosmërinë dhe seriozitetin e Policisë së Shtetit për të luftuar bashkërisht me homologët, krimin e organizuar dhe terrorizmin.

    • 11:32

      Akuzohet për trafik kokaine/ Arrestohet në Dubai Eldi Dizdari, një nga krerët e drogës në Shqipëri, i përfshirë në vrasjen në ish-Bllok

      Eldi Dizdari dhe pamje nga operacioni

      Arrestohet në Dubai Eldi Dizdari, një nga krerët e kokainës në Shqipëri. Mësohet se Dizdari ra në prangat e Policisë gjatë një operacion ndërkombëtar anti-drogë  ‘Los Blancos’, i inicuar fillimisht nga Holanda. Dizdari është arrestuar në Dubai, për llogari të Interpol Tiranës, pasi akuzohet si nga krerët e drogës në Shqipëri. Ai pritet të ekstradohet drejt Shqipërisë.

      Pikërisht një kartel shqiptar i trafikut ndërkombëtar të drogës u shkatërrua edhe në Firence të Italisë, dhe duket se një prej drejtuesve apo bashkëpuntorëve ka qenë Eldi Dizdari, që fshihej në Dubai pasi ishte në kërkim nga shteti shqiptar.

      Dizdari është bashkëshort i ish- missit shqiptar, Suada Sherifi. Po kështu, ai është përmendur se ka qenë i pranishëm edhe në  vrasjen në ish-Bllok, që ndodhi më 4 tetor të vitit 2018.

      Vrasja në ish-bllok

      Në lokalin “Monopol”, më datë 4 tetor 2018, si pasojë e një përplasje me armë mbeti i vrarë Fabjol Gaxha, truprojë e Ervis Martinajt, ku ky i fundit mbeti i plagosur së bashku me shokun e tij Eljo Hato. I përfshirë në konflikt ishte edhe Ajaks Bonjaku, i cili u vetëdorëzua në polici vetëm disa ditë pas ngjarjes. Në kërkim u shpallën tre persona: ish-komandoja Merviol Bilo, Ervin Mata (i dashuri i Elvana Gjatës) dhe Fabjol Alushi. Ky i fundit u arrestua nga policia vetëm para disa ditësh dhe më pas u la në masën detyrim paraqitje.

      Si fillim u mendua se arsyeja e përleshjes ishte këngëtarja Elvana Gjata, por hetimet e mëtejshme zbuluan se bëhej fjalë për një sherr të mbartur të të fejuarit të saj, Ervin Mata, me disa persona të tjerë, ku përmendet emri i biznesmenit Eldi Dizdari (partneri i Suada Sherifit). Dizdari është gjithashtu kushëriri i Arbër Cekajt, pronarit të magazinës ku u kapën 613 kg kokainë në Maminas, i cili aktualisht është në Gjermani i arrestuar.

    • 09:13

      Shkatërrohet grupi i trafikut të drogës në Itali, arrestohen dhjetra shqiptarë, sekuestrohen tonelata kokainë e miliona euro

      Gjatë natës së shkuar, në kuadër të operacionit të  “Los Blancos” policia italiane ka shkatërruar bandën kriminale shqiptare që merrej me trafikimin e drogës. Mediat e huaja kanë bërë të ditur se operacioni ka përfshirë rajonin e Toskanës, disa qytete italiane si dhe disa vende të tjera, sakaq policia ka dhënë urdhër arresti per dhjetra persona që ishin të përfshirë në grupin kriminal. Po ashtu mësohet se në këtë opercacion janë sekuestruar tonelata kokainë e miliona euro. Grupi kriminal shqiptar konsiderohej kartellinder në trafikun e kokainës në Europë. Ndërkohë mediat shtojnë se ditën e sotme rreth orës  11:00 pritet të mbahet në Gjykatën e Firenzes ku nëpërmjet një konference për shtyp do të zbardhen dhe detajet e operacionit.

      Operacioni u zhvillua në koordinimin e Europol e Eurojust në bashkëpunim me Antimafian italiane, Drejtorinë Antidrògë e autoritetet policore holandeze.

    • 10:23

      Trafik droge drejt Italisë, Spanjës, Holandës dhe Dubait/ Arrestohen tre persona në Vlorë, dy të tjerë në kërkim

      Policia ne Vlore

      Në vijim të operacionit anti-drogë të zhvilluar në Vlorë, ku mbrëmjen e djeshme u shoqëruan 7 persona, të tjera detaje kanë dalë në dritë.

      Bëhet e ditur se me kërkesë të SPAK janë arrestuar dhe 3 persona të tjerë të cilët janë të dyshuar si të përfshirë në trafikun ndërkombëtar të drogës. Në kërkim policia ka shpallur edhe dy të tjerë të cilët janë bashkëpuntorë të grupit.

      Aksioni ka nisur pas disa hetimeve të përbashkëta të cilat kanë nisur në Itali, Spanjë, Holandë dhe Dubai, pasi trafiku i drogës dyshohet se është shtrirë deri në këto shtete.

      Gjatë operacionit janë shoqëruar disa persona të cilët do t’i nënshtrohen verifikimeve.

    Shto Koment