Aktualitet

Ekzekutimi i Andi Malokut në Shkozet, dëshmon në GJKKO bashkëjetuesja e Arben Mërkurit: S’di gjë fare për shokët e burrit as me kë shoqërohej, djali më tha kanë vrarë babin...

Është paraqitur në gjykatë për të dhënë dëshminë e saj edhe bashkëjetuesja e Arben Mërkurit alias Ismaili, i cili është ekzekutuar që në maj të vitit 2022.

3 Tetor 2025, 11:56 Nga M.L
Ekzekutimi i Andi Malokut në Shkozet, dëshmon në GJKKO
Foto ilustruese

TIRANA- Në Gjykatën e Posaçme të Apelit për Korrupsionin dhe Krimin e Organizuar, po zhvillohet seanca e radhës për të pandehurit Plaurent Dervishaj dhe Julian Meçe, të cilët akuzohen për vrasjen e Andi Malokut në atentatin e Shkozetit kundrejt ish-prokurorit Arian Ndoja. Është paraqitur në gjykatë për të dhënë dëshminë e saj edhe bashkëjetuesja e Arben Mërkurit alias Ismaili, i cili është ekzekutuar që në maj të vitit 2022.

Shtetasja Sh, ka dëshmuar se nuk i ka njohur kurrë shokët e bashkëshortit të saj dhe se nuk ka pasur dijeni për aktivitetin kriminal të tij. Më tej ajo deklaron se bashkëshorti i saj nuk ka pasur ndonjëherë probleme me drejtësinë dhe se ditën kur ky i Andi Maloku u ekzekutua, kishin qenë bashkë. 

Shtetasja Sh: Unë banoj në Sukth Durrës. Arben Merkuri ishte bashkëjetuesi im. Unë nuk i kam njohur asnjë shok të tij. Arben Merkuri ka ndërruar jetë në Maj 2022. Kemi një dyqan në Sukth. Ka punuar edhe në bashki. Ka pasur më përpara mbiemrin Ismaili. Në vitin 2020 ka vdekur motra e burrit në Itali. Plaurent Derivshaj nuk e njoh. Ne nuk dimë asgjë se si është vrarë. Kam 15 vite qe kam bashkëjetuar me Arben Mërkurin. S’di gjë fare për shokët e burrit as me kë shoqërohej. Kam dy fëmijë nga bashkëjetesa. Mbaj mend që ka pas një telefon. Nuk ka pasur asnjëherë probleme me drejtësinë. Ditën kur u vra Arbeni kemi qenë bashkë, dikush e mori në telefon dhe sa zbriti shkallët dëgjuam zhurmë armësh. Djali më tha kanë vrarë babin. Nuk di gjë kush e ka bërë vrasjen. Biznesin e kam të rregullt me dokumente.

Plaurent Dervishaj: A ke marr vesh ca është fol për burrin tënd? Burri jot flitet se ka qenë vrasës me pagesë. S’ka grua që i thotë burrit “shko vrit”

Shtetësja SH: Nuk është e vërtetë

Plaurent Dervishaj: Burri jot dhunonte dy gazetare, e ke parë

Shtetësja SH: Nuk e kam parë

Atentanti ndaj Prokurorit Arjan Ndoja ndodhi më 1 nëntor të vitit 2019. Ndoja, bashkë me Landi Muharremin (Aleksandër Laho), dhe Andi Maloku ishin duke drekuar në zonën e plazhit në Durrës. Të tre, u nisën drejt Tiranës pas drekës dhe në zonën e mbikalimit të Shkozetit, u qëlluan nga një makinë Benz, në ecje, ku dyshohet se ka qenë brenda Redjan Rraja. Për pasojë u plagosën të tre, por në gjendje më të rëndë ishte Andi Maloku, i cili u bë mbrojtja e prokurorit Ndoja në atentat. Për shkak të plagëve të shumta, ai ndërroi jetë dy ditë më vonë në spitalin e Traumës në Tiranë./Dosja.al

gjkko andi maloku arben merkuri plaurent dervishaj julian meçe

Sondazh

Poll