Politike

"Zjarrvënësi i Shqipërisë është Rama", Meta: Nuk shpenzoi asnjë cent për të blerë avionë zjarrfikës! Të shpresojmë që "Syri i Kaltër" të mos jenë preludi i ndërtimit të resortit të radhës

Ai thekson se Rama nuk ka shpenzuar asnjë cent për të blerë avionë zjarrfikës teksa e krahasoi me Maqedoninë e Veriut. Sipas tij Rama djeg miliona euro për inceneratorët që nuk ekzistojnë dhe lë qytetarët e braktisur mes zjarreve.

13 Gusht 2025, 22:12 Nga N.F
"Zjarrvënësi i Shqipërisë është Rama",
Zjarr

TIRANË- Presidenti i Lirisë, Ilir Meta përmes një postimi në "Facebook" ka reaguar në lidhje me situatën e zjarreve në vend. Meta e quan kryeministrin Edi Rama si zjarrvënësin e Shqipërisë pasi sipas tij në 12 vite në pushtet nuk ka marrë masa parandaluese për mbrojtjen nga zjarret.

Ai thekson se Rama nuk ka shpenzuar asnjë cent për të blerë avionë zjarrfikës teksa e krahasoi me Maqedoninë e Veriut. Sipas tij Rama djeg miliona euro për inceneratorët që nuk ekzistojnë dhe lë qytetarët e braktisur mes zjarreve. Presidenti i PL-së gjithashtu ka ngritur dyshime se pas zjarrit të rënë në "Syrin e Kaltër" mund fshihet ndonjë ndërtim resorti për ndonjë klient strategjik të qeverisë. 

"Zjarrvënësi i vërtetë i Shqipërisë është Edi Rama. Në 12 vite në pushtet i pati të gjitha mundësitë për të marrë masa efektive parandaluese për mbrojtjen nga zjarret, por bëri të kundërtën. Pyjet, kjo pasuri kombëtare, nuk kanë qenë kurrë prioritet i tij, por objekt i plaçkitjes, prerjes dhe kontrabandës nga deputetë dhe qeveritarë të tij.

Nuk shpenzoi asnjë cent për të blerë avionë zjarrfikës si Maqedonia e Veriut, por djeg çdo vit qindra milion euro për inceneratorë që nuk ekzistojnë, koncesione dhe "tigra" lundrues (TEC-e), që vetëm energji elektrike nuk prodhojnë. Në vend të angazhojë ushtrinë për të shuar flakët, e përdor për t'i fikur sinjalin dhe për të grabitur zyrat e dosjet investigative të NEëS 24.

Qytetarët janë braktisur pa mëshirë mes zjarreve ndërsa Rama shullehet në plazh, ndaj çdo propagandë e justifikim vetëm sa provon përgjegjësitë shumë të rënda penale dhe politike të kësaj Narkoqeverie. Le të shpresojmë që te "Syri i Kaltër", flakët, që përpinë këtë perlë të papërsëritshme të natyrës shqiptare të mos jenë preludi i ndërtimit të resortit të radhës për ndonjë oligark ose klient "strategjik" të Qeverisë," shkruan Meta.

meta rama zjarret ne vend

Sondazh

Poll