Politike

FOTOT/ Bashkia Tiranë hap 'thesin', tender 390 mijë euro për instalacion, Tirana Moons vendoset tek Politekniku

Në relacionin arkitektonik, struktura modulare “Hënë” është një pavijon sferik i bërë kryesisht prej druri dhe pëlhure.

7 Janar 2025, 12:38 Nga I.A
FOTOT/ Bashkia Tiranë hap 'thesin', tender 390 mijë euro
Instalacioni

TIRANË-Tirana pritet të ketë një tjetër instalacion, këtë herë të parashikuar te Sheshi Nënë Tereza përballë me Politeknikun. Bashkia e Tiranës njoftoi hapjen e një procedure për këtë instalacion, me vlerë 39 milionë lekë apo 390 mijë euro, që është titulluar si “Tirana Moons” apo “Hënët e Tiranës”. Në relacionin arkitektonik, struktura modulare “Hënë” është një pavijon sferik i bërë kryesisht prej druri dhe pëlhure.

Sipas shpjegimit të bërë në këtë dokument moduli i “hënës” është i përbërë nga elemente të cilat vendosen mbi njëra-tjetrën në tri faza montimi dhe konceptimi.

“Fillimisht në fazën 1 moduli përbëhet nga 5 unaza druri të laminuar me teknikë kryq të cilat bashkohen me nyje unazore me njëra-tjetrën dhe me bazamentin e betonit me anë të unazave me përshtatje. Ky bazament qëndron në mesin e çdo unaze dhe vendoset mbi tokë. Në këtë montim unazash më pas në fazën 2 vendosen platforma e dyshemesë e drunjtë mbi një strukturë kuadratike dhe lidhen me nyje kapëse me bazamentin.

Gjithashtu vendoset dhe moduli i shkallës së drunjtë në bazën e strukturës së drunjtë. Në krye të strukturës më pas në fazën 3, vendosen tenda e cila ka një material të papërshkrueshëm nga uji, e cila fiksohet në një strukturë alumini nëpërmjet nyjeve lidhëse në kulm dhe në fund të tendës” shpjegohet në dokument.

Koha e zbatimit të kontratës parashikohet të jetë 6 muaj teksa afati i fundit për paraqitjen e ofertave nga ana e operatorëve të interesuar është 21 janari./Monitor.al

tirana moons bashkia tiranë

Sondazh

Poll

MË SHUMË