Sport

Ancelotti shpjegon kombinimin që pak besuan, Mbappe-Vinicius Jr!

Ndryshuam pak pozicionin e sulmuesve: Mbappé qëndroi në krahun e majtë, ku bëri shumë mirë, dhe Vinicius në qendër. Të dy luajtën shumë mirë dhe duhet theksuar aksioni i Vinicius në golin e parë që hapi ndeshjen.

24 Nëntor 2024, 22:28 Nga DOSJA

Ancelotti shpjegon kombinimin që pak besuan, Mbappe-Vinicius Jr!

SPANJE - Mision i kryer për Real Madridin, i cili mposhti 3-0 Leganesin dhe tani është vetëm 4 pikë larg Barcelonës me një ndeshje për të rikuperuar. Këto janë fjalët e Carlo Ancelottit në konferencë për shtyp:

"Ishte një ndeshje e bukur, nga fillimi deri në fund. Pashë një skuadër solide dhe të përqendruar. Ndryshuam pak pozicionin e sulmuesve: Mbappé qëndroi në krahun e majtë, ku bëri shumë mirë, dhe Vinicius në qendër. Të dy luajtën shumë mirë dhe duhet theksuar aksioni i Vinicius në golin e parë që hapi ndeshjen. Më pas kontrolluam gjithçka shumë mirë, duke konfirmuar ndjesitë pozitive pas sfidës me Osasunën: jemi më kompaktë, më të përqendruar. Gjërat po shkojnë mirë".

A është vendosja e Mbappésë në të majtë një zgjidhje e përkohshme?
Ai është më i mësuar të luajë aty, dhe sot, për ekipin dhe për të, ishte zgjedhja më e mirë. Sepse të luash larg portës të lodh më shumë, dhe Vinicius u kthye të enjten, ndërsa Kylian u stërvit këtu dhe ishte më i freskët. Bëri shumë mirë dhe shënoi, falë një asistimi fantastik nga Vinicius. Dalëngadalë të dy po përmirësohen.

Çfarë mendoni për Güler?
Kur ekipi luan mirë, të gjithë kanë kontribuar. Edhe Ceballos në dyshen me Camavingan. Arda shtoi kreativitet dhe ishte afër shënimit të një goli. Loja e tij ishte e plotë. Kërkesat janë shumë të larta tani dhe kemi nevojë për të gjithë. Është e rëndësishme të mund të mbështetemi tek ata.

Valverde, si mbrojtës i djathtë?
Bëri shumë mirë. Ashtu si Asensio, i cili luajti me pjekuri. Më pëlqeu shumë. Valverde... është një mbrojtës fantastik (qesh). Pas Carvajal dhe Lucas Vázquez, është mbrojtësi i tretë më i mirë i djathtë në botë. Problemi i tij është se mund të luajë në këtë nivel në shumë role dhe problemi i trajnerit është të zgjedhë rolin më të mirë për ekipin. Por më pëlqeu prapa, ka një shpejtësi të pabesueshme. Do të shohim nëse Lucas dhe Tchouaméni do të rikuperohen. Nëse jo, do të marrim vendime."

A është një rrezik shumë i madh të heqësh dorë nga Valverde në mesfushë?
Kjo është diçka për të cilën duhet të mendoj. Në mesfushë jemi mirë të mbuluar, sepse Camavinga është në nivelin e tij maksimal, Ceballos bëri një ndeshje shumë të mirë dhe kemi edhe Modriçin, i cili gjithmonë luan shumë mirë. Do të vlerësoj këtë kur të di nëse mund të rikuperojmë ndonjë lojtar.

Dy zëvendësime radhazi për Mendy. Çfarë po ndodh?
Janë zgjedhje teknike. Asgjë më shumë. Fran po luan shumë mirë tani, por të mërkurën Mendy do të jetë shumë i rëndësishëm.

A të ka befasuar përshtatja e Asensios?
Më ka befasuar në kuptimin që është shumë i pjekur. Nuk shoh asnjë shqetësim tek ai. Gjithmonë është shumë mirë i pozicionuar. Kjo do të thotë që sektori i të rinjve ka bërë një punë të shkëlqyer me të.

B.T (Dosja.al)