Sport

Ministria Publike dakord që Robinho të vuajë dënimin me burg në Brazil për përdhunim në Milano, pritet arrestimi...

Ish-futbollisti i kuqezinjve, është dënuar në Itali me nëntë vite burg, për përdhunimin në grup të një vajze 23-vjeçare shqiptare në Milano

28 Shkurt 2023, 19:19 Nga DOSJA
Ministria Publike dakord që Robinho të vuajë dënimin me burg

BRAZIL - Ministria Federale Publike e Brazilit ra dakord këtë të hënë me kërkesën e sistemit gjyqësor italian, i cili dënoi Robinho me nëntë vite burg, për përdhunimin në grup dhe kërkoi që ish-futbollisti i Milanit, të vuante dënimin në Brazil.

“Për organin nuk ka asnjë pengesë ligjore për transferimin e ekzekutimit të dënimit”, thuhet në një letër të zv.prokurorit të Përgjithshëm të Republikës, Carlos Frederico Santos, e cila i është dërguar Gjykatës së Lartë të Drejtësisë (STJ).

Deklarata e Ministrisë Publike, me kërkesë të gjyqtares Maria Thereza de Assis, hetuese e STJ-së në këtë çështje, është hapi i parë për miratimin e dënimit në Brazil. “Duke pasur parasysh pamundësinë e ekstradimit të Robinhos në Itali”, për shkak të një parimi kushtetues në Brazil, më 17 shkurt, sistemi gjyqësor italian zyrtarizoi kërkesën për “homologim të dënimit”, sipas Ministrisë Publike.

Zv.prokurori bëri me dije se ratifikimi bazohet “në respektimin e parimit të moszbatimit të dy dënimeve për të njëjtën vepër”. Në rastin e Robinhos, ish-lojtari “do të njoftohet në adresën e shtëpisë së treguar” në proces,- shtoi Santos. 

Në tetor, Italia kishte kërkuar ekstradimin e ish-sulmuesit të Real Madridit dhe Milanit, pas dënimit të tij për përdhunimin në grup të një vajze të re shqiptare në Milano në vitin 2013.

Robinho, sipas hetimeve, dyshohet se e ka detyruar femrën, asokohe 23-vjeçare, të pijë derisa ajo ka rënë pa ndjenja dhe më pas e ka detyruar, me një grup shokësh, të kryejë marrëdhënie seksuale në dhomën e zhveshjes së një klubi nate, pa mundur të rezistojë.

Ngjarjet ndodhën në kohën kur futbollisti ishte nën kontratë me Milanin, ku ishte për katër sezone (2010-2014).

Gjykata e Lartë italiane vendosi në formë të prerë dënimin nëntëvjeçar të dhënë nga Gjykata e Milanos dhe të lënë në fuqi nga Gjykata e Apelit. Përveç Robinhos, edhe miku i tij Ricardo Falco, është i dënuar gjithashtu me nëntë vjet burg në Itali dhe katër burra të tjerë të paidentifikuar që ishin përfshirë në atë përdhunim.

B.T (Dosja.al)

Sondazh

Poll

MË SHUMË