Aktualitet

Dosja Babale/ Shtyhet gjyqi për deputetin Salianji, PD 'bashkohet' për të, seanca tjetër mbahet më 9 nëntor

Para se çështja të nisë në Gjykatë, kolegët e tij, gjithashtu deputetë demokratë janë mbledhur sot duke lënë pas ndasitë që të mbështesin demokratin.

17 Tetor 2022, 10:25 Nga k.m.

Dosja Babale/ Shtyhet gjyqi për deputetin Salianji, PD
Ervin Salianji

TIRANË- Gjykata e Apelit në Tiranë ka shtyrë gjyqin ndaj deputetit të Partisë Demokratike, Ervin Salianji, i cili akuzohet se Prokuroria se ka kryer kallëzim të rremë në të ashtuquajturën "dosja Babale" së bashku me Fredi Alizotin, Albert Veliun dhe gazetarin Jetmir Olldashi. Për shkak se avokati mbrojtës i Geron Xhafës mungoi për shkak të një arsyeje familjare, mësohet se gjyqi i radhës do të mbahet më 9 nëntor ora 14:00. Por para se të niste seanca gjyqësore, Salianji nuk ishte i vetëm. Kolegët e tij, gjithashtu deputetë demokratë janë mbledhur në mbështetje të tij, duke lënë pas ndasitë që të mbështesin demokratin në seancën gjyqësore.

Të gjithë janë ulur në kafen jashtë Gjykatës duke shkëmbyer edhe batuta me njëri-tjetrin. 

Dosja Babale/ Shtyhet gjyqi për deputetin Salianji, PD

Çfarë është dosja “Babale”?

Pranverën e 2018-ës, PD botoi 2 audioregjistrime, përmes së cilave supozonte se vëllai i ministrit të Brendshëm aso kohe, Fatmir Xhafaj, Agroni ishte i përfshirë në trafikimin e lëndëve narkotike. E tërë çështja u emërua “Babalja”, pasi dëshmitari X i Partisë Demokratike, i cili ishte i përfshirë në audioregjistrime, thirrej në to me pseudonimin “Babale”.

Në përgjimet e publikuara por edhe në të tjera që Prokuroria dispononte, Alizoti komunikonte me asokohe shefin e Polisisë së Fierit, Albert Nushin (emri i del edhe tek vrasja e Pjerin Xhuvani) për shpërblime/pako që duhet të merrte, e gjithashtu flitej edhe për një “shef të madh”. Ekspertët e huaj vlerësuan se zëri në përgjime ishte i ngjashëm me atë të Geron Xhafës. Por ekspertiza nuk mund ta thoshte me siguri për shkak të cilësisë së audio-regjistrimit.

Gjykata Penale dënoi me 1 vit burg deputetin e Partisë Demokratike, Ervin Salianji për akuzën e “kallëzimit të rremë”, në lidhje me dosjen “Babalja”. Bashkë me Salianjin u dënuan edhe personat e tjerë të përfshirë në këtë dosje. Fredi Alizoti, (i njohur si kunati i Babales), u dënua me 2 vite burg për kallëzim të rremë, Albert Veliu, i njohur ndryshe edhe si “Babalja” u dënua me 3 vite e 5 muaj burg, ndërsa gazetari Jetmir Olldashi u dënua me 5 muaj burg, që iu konvertua në 100 orë punë në komunitet.

ervin salianji dosja babale geron xhafaj gjyqi për dosjen babale

Sondazh

Poll

MË SHUMË