Sport

Ukraina ose Uellsi, vetëm njëri do të shkojë në botërorin “Katar 2022”

Këtë të dielë, Zinchenko do të përballet me Gareth Bale për një vend në Kupën e Botës 2022. Kombëtarja e Ukrainës dhe Uellsit, në orën 18:00, do të garojnë në Cardiff për vendin e fundit europian në festivalin e madh të futbollit

5 Qershor 2022, 07:24 Nga DOSJA
Ukraina ose Uellsi, vetëm njëri do të shkojë në

UELLS - Kjo e diel është dita, kur Ukraina ose Uellsi, do të bashkohen me ekipet pjesëmarrëse në finalet e Kupës së Botës “Katar 2022”. Ëndrra e Oleksandr Zinchenko (ManCity) dhe shokëve të tij të skuadrës është të jetë Ukraina, çka do t'i sillte pak gëzim vendit të tij në momente kaq të vështira pas pushtimit të Rusisë. Por, gjithashtu edhe Gareth Bale dhe shokët e tij dëshirojnë që Uellsi të jetë në Katar.

Uellsi ka luajtur vetëm një Botëror dhe ishte në vitin 1958. Ata arritën në çerekfinale. “Zemrat tona janë te fëmijët, familjet, populli i Ukrainës. Por kjo është një ndeshje dhe ne duam të fitojmë”,- tha lojtari i Real Madridit, Bale, kapiteni i Uellsit. 

Ukraina mundi Skocinë të mërkurën në gjysmëfinale (1-3). Për skuadrën e drejtuar nga Oleksandr Petrakov, në lojë është më shumë se futbolli. “Lojtarët tanë u shkruan ushtarëve dhe morën një flamur, që premtuan ta varnin në dhomat e zhveshjes”,- tha dje trajneri i Ukrainës. “Situata është shumë e vështirë në Ukrainë dhe jo të gjithë mund të shikojnë futboll, por ne do të përpiqemi të përqendrohemi dhe të luajmë mirë”. 

Ukraina kishte 3500 tifozë në tribunat në Glasgow, ndërsa këtë të diel, mes mbështetësve të saj në Cardiff, do të jenë edhe 100 refugjatë ukrainas të ftuar nga Uellsi.

Ukraina ose Uellsi do të jenë skuadra e 30-të që do të kualifikohet në Kupën e Botës. Mbetet të dihet vetëm emri i dy finalistëve të fundit, fituesit e dy ‘play-off’-eve ndërkontinentale. Të martën do të luhet ‘play-off’-i aziatik (Emiratet Arabe-Australi), fituesi i të cilit do të përballet me Perunë më 13 qershor për një vend në Kupën e Botës. Në datën 14 do të luhet ‘play-off’-i Kosta Rika-Zelanda e Re.

B.T (Dosja.al)

Sondazh

Poll

MË SHUMË