Politike

Presidenti/ Nesër negociata me kamera. Alibeaj këmbëngul: Propozimi na takon ne. Balla: Bëjeni nëse keni 20 firma

Balla tha se maxhoranca nuk ka vendosur ‘vija të kuqe’. Deputeti i PD-së u shpreh se salla e konferencës së kryetarëve do të jetë e hapur për çdo aleat që dëshiron të diskutojë në lidhje me çështjen e Presidentit, por nuk dinte të thoshte nëse Mesila Doda e Fatmir Mediu do të ishin prezent.

17 Maj 2022, 19:54 Nga DOSJA
Presidenti/ Nesër negociata me kamera. Alibeaj këmbëngul:
Taulant Balla, Enkelejd Alibeaj

TIRANË- Negociatat për Presidentin e ri do të vijojnë nesër në Kuvend, në sallën ku do të mblidhet Konferenca e Kryetarëve, në orën 10:00. Ndryshe nga herët e tjera, nesër, gjithçka do të zhvillohet para syrit të mediave. Kryetari i Grupit Parlamentar të Partisë Socialiste, Taulant Balla priti këtë pasdite në një takim Enkelejd Alibeaj me të cilin diskutoi rreth çështjes së Presidentit. Pas takimit, në një prononcim për mediat, Balla tha se maxhoranca nuk ka vendosur ‘vija të kuqe’. Ai sfidoi Partinë Demokratike dhe tha se nëse ata i kanë 20 firma për kandidatin për President, atëherë mund të vijonin me procedurat. I pyetur nëse kjo marrëveshja e tij me Alibeajn do të finalizohet si 17 Maji mes Lulzim Bashës e Kryeministrit Edi Rama, Balla qeshi dhe tha se gjithçka do të zhvillohet para syrit të mediave, siç e kërkoi vetë deputeti i PD-së.

Pas Ballës foli edhe Alibeaj. Ai tha se për çështjen e presidentit, transparenca është ilaçi kundër pazareve dhe u kërkoi të gjithë gazetarëve që të ishin prezent. Deputeti i PD-së u shpreh se salla e konferencës së kryetarëve do të jetë e hapur për çdo aleat që dëshiron të diskutojë në lidhje me çështjen e Presidentit, por nuk dinte të thoshte nëse Mesila Doda e Fatmir Mediu do të ishin prezent. Aibeaj këmbëngul në kushtin e tij që propozimin ta ketë Opozita. I pyetur për emra, ai tha se si fillim duhen vendosura rregullat dhe se nëse maxhoranca është serioze në këtë proces, do ta tregojë takimi i nesërm.

Në mbledhjen e sotme të Konferencës së Kryetarëve, Partia Socialiste ka propozuar që më 23 maj, ora 18:00 të nisë raundi i dytë për presidentin e ri të vendit që do të zëvendësojë në detyrë Ilir Metën. Propozimi erdhi nga kreu i grupit parlamentar socialist, Taulant Balla, i cili tha se ky është afati maksimal, por që në fund u miratua nga të gjitha palët. Edhe sot, për më shumë se një orë, maxhoranca dhe opozita janë përplasur në mbledhje, por nuk kanë dalë në asnjë emër konkret. Raundi i parë u ezauarua të dielën pa asnjë emër konkret për presidentin e ri të Republikës së Shqipërisë dhe u votua dje në Kuvend në seancën e jashtëzakonshme që zgjati 3 minuta.

Përfaqësuesit e Partisë Demokratike janë të bindur që maxhoranca e ka tashmë të zgjedhur emrin e Kreut të ri të Shtetit dhe se ky dialog me ta është thjesht një ‘buzëkuq’ për tu dukur mirë në sytë e Evropës. Gjithsej janë parashikuar pesë raunde votimi. Në tre të parat nevojitet një shumicë prej tre të pestash, ndërsa në dy raundet e fundit presidenti zgjidhet me shumicë të thjeshtë.

(f.m/dosja.al)

Sondazh

Poll

MË SHUMË