Aktualitet

Moti i keq, pezullohet lundrimi në Vlorë, ‘mbytet’ Durrësi, shumë fshatra pa drita

27 Dhjetor 2021, 06:30 Nga DOSJA

Moti i keq, pezullohet lundrimi në Vlorë, ‘mbytet’

SHQIPËRI – Që në orët e vona të mbrëmjes së djeshme, i gjjithë territori i vendit është përfshirë nga reshje të dendura shiu, të cilat kanë shkaktuar edhe problematikat e para në disa zona të vendit.

Kështu, raportohet se në Vlorë, ka pasur probleme me lundrimin e anijeve të vogla, si pasojë e dallgëve të mëdha të cilat arrijnë deri në 2.5 metra. Në lidhje me këtë situatë, Autoriteti Portual i Vlorës ka marrë vendimin që të anulohen të gjitha lundrimet e anijeve të vogla dhe atyre të peshkimit, deri në një njoftim të dytë. Ndërkohë, për tragetin e linjës Vlorë-Brindisi-Vlorë nuk ka pezullime për kryerjen e lundrimit.

Probleme si pasojë e motit të keq ka pasur edhe në Gjirokastër dhe në fshatrat përreth saj, ku raportohet se është krijuar situatë e vështirë mëngjesin e së hënës për shkak të daljes së ujërave nëpër rrugë.

Reshjet e dendura të shiut të rëna gjatë natës dhe mëngjesit të sotëm kanë bërë që disa lagje dhe rrugë të qytetit të Durrësit të jenë nën pushtetin e ujit. Situata më e rëndë paraqitet në lagjen nr.18, pranë stadiumit. Sikurse shihet në video, uji i cili ka depërtuar mbi trotuare ka vështirësuar lëvizjen e këmbësorëve dhe qarkullimin e automjeteve.

Shirat e rrëmbyer përgjatë 24 orëve të fundit, kanë krijuar probleme seriozore në furnizimin e energjisë elektrike në disa zona në Gjirokastër. Burime zyrtare konfirmojnë se OSHEE Rajoni Gjirokastër ka konstatuar defekte serioze në katër fidëra të linjës 10 kV. Konkretisht ka mungesë energjie në Kordhocë të Lazaratit, në fshatin Bulo, disa fshatra të Njësisë Administrative Zagorie dhe Grapsh në Njësinë Administrative Dropull, si dhe në fshatin Maricaj Njesia Administrative Buz.

Përkeqësimi i kushteve të motit në orët e para të ditës së sonte, 27 dhjetor, ka shkaktuar dëme në rrjetin elektrik të Operatorit të Sistemit të Shpërndarjes. Referuar raportimit të orës 09:30, OSSH njofton se, zonat në Fier, Fushë Krujë, Lezhë dhe rreth Tiranës, kanë mungesë të energjisë elektrike.

Në territorin e Prefekturës së Qarkut Shkodër kanë vijuar reshjet e shiut gjatë gjithë natës, ku në zonat malore kanë rifilluar dhe reshjet e dëborës. Nga strukturat e Drejtorisë Vendore Rrugore bëhet me dije se ka rënie gurësh e inertesh nga skarpatet e malit, të cilat pastrohen nga kontraktorët. Aktualisht nuk raportohet për bllokim të qarkullimit në asnjë aks rrugor. Probleme ka pasur edhe me furnizimin me energji elektrike.

I gjithë Qarku i Lezhës është përfshirë nga reshjet e dendura të shiut, të cilat kanë krijuar problematika të shumta në qytet. Ujërat kanë vërshuar në rrugët e qytetit duke krijuar vështirësi në lëvizjen e qytetarëve dhe automjeteve, kryesisht në bulevardin ‘Gjergj Fishta’.

Reshjet e pandërprera të shiut kanë krijuar probleme në rrugën e Arbrit nga Tirana në Klos. Më problematike situata paraqitet në Bypassin e Murrizit ku ka rënie të shumta të gurëve. Rrëshiqtja e tokës si pasojë e fryrjes nga shiu ka bërë që në një gjatësi të konsiderueshme ky segment të bëhet i vështirë për qarkullimin e automjeteve si rezultat i pranisë së gurëve. Po ashtu në pjesën e Qaf Murrizit ka reshje dëbore me intensitet të ulët, ndërsa momentalisht problemi i vetëm është prania e gurëve në rrugë.

Sipas meteorologëve, kjo situatë e motit pritet të vijojë gjatë natës dhe deri mëngjesin e ditës së nesërme, ndërkohë që temperaturat do të ulen lehtë gjatë orëve të mesditës duke luhatur vlerat ditore nga 1°C deri në 18 °C.

ZHVILLIMET ORË PAS ORE:

Përmbyten rrugët në Gjirokastër, Policia apelon: Bëni kujdes, ruani distancën!

Kaos në Rrugën e Arbrit, masive gurësh bllokojnë qarkullimin e automjeteve

Reshjet e dendura të shiut, probleme në Lezhë, rrugët e qytetit mbulohen nga uji

Moti i keq, rënie gurësh dhe disa fshatra pa energji elektrike në Shkodër

Moti i keq me reshje shiu e erë të fortë, OSSH: Disa qytete kanë mungesë energjie

Moti i keq / Probleme edhe me energjinë elektrike në disa zona të Gjirokastrës

VIDEO/Reshjet e shiut, disa lagje e rrugë të Durrësit nën ujë, përmbytet ‘Lagja 18’

VIDEO / Përroi del nga shtrati në Lazarat, izolohen dhjetëra familje

Furtunë dhe dallgë deri në 2.5 metra, pezullohet lundrimi në Vlorë

(E.H/Dosja.al)

Cila mendoni se është alternativa më e mirë: