Sport

Plas në Instagram: “Pyesni arbitrin sa lekë ka marrë!”

1 Mars 2021, 10:28 Nga DOSJA

TIRANE – Humbja gjithmonë është e vështirë të pranohet dhe akoma më tepër në sportin tonë, ku ngjarje edhe rastësore, lidhen me dyshime të forta. Kështu ndodhi edhe në këtë fundjavë në Kategorinë e Parë, ku Burreli fitoi në fushën Internacionalit përballë Partizanit B me shifra 3-1.

Skuadra e kuqe nuk pajtohet me rezultatin dhe për këtë ia ka drejtuar gishtin arbitrit të sfidës Elidon Halo, i cili sipas disa lojtarëve të klubit të Partizanit B, ka ndikuar në këtë takim.

Një faqe në rrjetin social “Instagram”, e cila është për Kategorinë e Parë, ka risjellë një rast nga ndeshja, ku portieri i Burrelit, Miraka ka prekur topin jashtë zone me dorë.
Në këtë postim ka komentuar dhe mbrojtësi i Partizanit B, Florian Peqini, i cili shkruan: “Pyesni arbitrin sa lekë ka marrë”, duke akuzuar gjyqtarin e sfidës për atë episod.

Ndërkohë komentet nuk mungonin teksa shkruan dhe ish-portieri Mario Bytyçi, i cili mbulon rolin e trajnerit të portierëve te skuadra e Dinamos:
“O Peqin, më kënaqe përzotin. Duhet ta bënit gol, mirë e ka patur ai”. Ndërkohë përsëri Peqini i kthehet ish-portierit Bytyçi: “E lashë avantazh tha, pse nuk e bëtë gol.”

B.T (Dosja.al)