Rajoni

Thirret si i dyshuar në Hagë, jep dorëheqjen kryeministri Haradinaj: Për të ruajtur nderin e Kosovës

Kryeministri i Kosovës Ramush Haradinaj ka dhënë dorëheqjen ditën e sotme pasi është thirrur për të dëshmuar në Hagë. Në një konferencë për shtyp, Haradinaj është shprehur se hoqi dorë nga posti pasi nuk mund ta cënonte nderin e Kosovës. Së shpjeti Kosova zhvillon zgjedhje të parakohshme parlamentare.

KOSOVË– Kryeministri i Kosovës, Ramush Haradinaj ka dhënë dorëheqjen nga posti i tij pasi është thirrur për t’u marrë në pyetje si i dyshuar në Gjykatën Speciale të Hagës.

Në një prononcim për mediat, me lot në sy, Haradinaj është shprehur se ka hequr dorë nga posti pasi nëse merrej në pyetje si kreu i qeverisë së Kosovës rrezikonte nderin e vendit.

Gjatë fjalës së tij para mediave, Haradinaj ka njoftuar se sërish do të marrë pjesë në zgjedhjet e parakohshme parlamentare që do të zhvillohën duke shprehur se sovrani do t’i japë sërish besimin për të drejtuar vendin. 

Përveç Haradinaj Gjykata Speciale ka ftuar për intervistim ish-shefin e Shtabit të UÇK-së, Bislim Zyrapi, njëherësh këshilltar i presidentit Thaçi dhe disa ish-eprorë të tjerë të UÇK-së.

FJALA E PLOTË:

Ramush Haradinaj: Sapo e informova qeverinë. Kam dhënë dorëheqjen e parevokueshme, arsyeja është sepse jam ftuar që të intervistohem si i dyshuar për pranë Gjykatës së Posatshme. Javën tjetër do të paraqiten dhe se nuk mund të shkoj si kryetar i qeverisë. Për ta ruajtur nderin e qeverisë dhe të shtetit kam menduar se është e drejtë që e mora këtë vendim. Unë do ta respektoj pjesën ligjore të një luftëtari shqiptar që ka mbrojtur vendin e tij. Ndërsa pjesa politike mendoj që është shumë gabim që Kosova të përballojë një çmim të papërballueshëm për njohjen e saj. Me këtë dorëheqje qeveria në dorëheqja i kryen detyrat e veta. Unë do t’i ofrohem sërish popullit për të më votuar. Do të garoj sërish në zgjedhje.

Pyetje: Jeni me lot në sy a keni qarë?

Ramush Haradinaj: Me lot në sy nuk jam. Unë nuk e di se di dukem atje. Jam i emocionuar por nuk kam qarë. Nuk është një vendim i lehtë kuptohet por ky është realiteti. Më thanë a do të shkosh në intervistë si kryetar i Kosovës, por mendoj se nuk duhet t’ja bëja Kosovës këtë gjë. Edhe nuk ia bëj!

Për më shumë bëhu pjesë e grupit më viral në Facebook, Dosja.al

Pyetje: A mendoni që ky vendim i Speciales lidhet me drejtësinë apo fshihet diçka pas?

Ramush Haradinaj: Më rëndësi është që Kosova duhet të bëhet gati për zgjedhje.  Edhe pse jemi vend i ri dhe vogël nuk do mundet askush që ta poshtërojë Kosovën asnjëherë.

Pyetje: Pse jeni kaq i sigurtë për zgjedhjet e reja?

Ramush Haradinaj: Unë vlerësoj që mandati t’i kthehet sovranit dhe ai më pas vendos.

Kjo nuk është hera e parë që Haradinaj jep dorëheqjen nga posti i kryeministrit. Më 8 mars, të vitit 2005, vetëm 100 ditë pasi kishte marrë detyrën, Haradinaj u dorëhoq pas aktakuzës së parë të ngritur ndaj tij nga Tribunali i Hagës për krime lufte në territorin e ish-Jugosllavisë.

Në vitin 2008, Gjykata e Hagës e shpalli atë të pafajshëm. Katër vjet pas u bë rigjykimi i tij, po në Tribunalin e Hagës. Por, në vitin 2012, Ramush Haradinaj sërish u shpall i pafajshëm për të gjitha akuzat që e ngarkonin atë për krime lufte.

Një proces tjetër ndaj tij u ndoq edhe më 2017, por kësaj radhe në Colmar të Francës,ku autoritetet franceze, më 4 janar, e ndaluan atë mbi bazën e një urdhër-arresti të lëshuar nga Serbia për krime lufte. Por, pas një procesi gjyqësor ndaj tij, drejtësia franceze e kishte liruar atë më 27 prill.

Ramush Haradinaj u zgjodh për herë të dytë në postin e kryeministrit të Kosovës më 9 shtator, 2017. Ditën e djeshme në Vjenë u ndalua për pak minuta vëllai i tij, deputeti i AAK-së Daut Haradinaj. 

(k.m/dosja.al)

  • 22:14

    Me lot në sy lajmëroi dorëheqjen, Ngjela: Kosova do ta presë si triumfues heroin e saj,Haradinajn

    Spartak Ngjela

    Ashtu sikurse politikanë të shumtë, edhe avokati Spartak Ngjela ka reaguar për dorëheqjen e kryeministrit të Kosovës, Ramush Haradinaj.

    Në një postim në Facebook, Ngjela shprehet se kishin kaluar tash njëqind vjet që shqiptarët nuk e kishin parë një personalitet të tillë atdhedashës, si rilindasit tanë të mëdhenj.

    Ngjela gjithashtu mendon se Kosova do ta presë si triumfues heroin e saj Ramush Haradinaj pasi nuk ka kurrë një akuzë që të mundë një njeri kaq të lartë.

    Postimi i plotë i Spartak Ngjelës:

    Ramush Haradinaj, burrë i vërtetë shteti dhe një shqiptar i madh.

    Ramush Haradinaj dha dorëheqjen si kryeministër për të shkuar në Gjykatën Speciale të Hagës si qytetar i thjeshtë, duke theksuar se: “këtë e bëj për të ruajtur të paprekur dinjitetin dhe personalitetin e shtetit të Kosovës”.

    Kishin kaluar tash njëqind vjet që shqiptarët nuk e kishin parë një personalitet të tillë atdhedashës, si rilindasit tanë të mëdhenj.
    Nuk ka kurrë një akuzë që të mundë një njeri kaq të lartë.
    Kosova do ta presë si triumfues heroin e saj Ramush Haradinaj.

     

  • 21:25

    Meta për dorëheqjen e Haradinajt: Krenar për pafajësinë e heroit të kombit

    Ilir Meta dhe Ramush Haradinaj

    Presdienti i vendit, Ilir Meta ka reaguar pas dorëheqjes së kryministrit të Kosovës, Ramush Hardianjt.

    Kreu i shtetit në një postim në Facebook, shprehet se ndihet krenar për pafajësinë e Haradinajt. Meta shkruan se: “Nuk ka pabesi dhe presion që e thyen Burrin e Shtetit dhe Heroin e Kombit!”

    “Krenar për Ramush Haradinajn dhe i bindur në pafajësinë e tij!
    Nuk ka pabesi dhe presion që e thyen Burrin e Shtetit dhe Heroin e Kombit!
    Nga sot të gjithë duhet të flemë më pak, të shqetësohemi më shumë dhe të bashkohemi më fort që Kosova dhe rajoni ynë të jenë të pacënuar në paqen dhe sigurinë tonë, si dhe në të ardhmen europiane”, shkruan Meta.

  • 19:55

    Dorëheqja e Haradinajt, Berisha: Vlerësim për aktin dinjitoz, trim që luftoi me heroizëm

    Sali Berisha

    Ish-kryeminstri Sali Berisha ka reaguar pas dorëheqjes së kryeminstrit të Kosovës, Ramush Haradinaj.

    Berisha vlerëson aktin dinjitoz të Haradianjt, duke e qyuajtur trim që luftoi me heroizëm kundër pushtuesve.

    Postimi i plotë i Sali Berishës: 

    Nje akt shtetar dinjitoz!

    Miq, sot Kryeministri i Kosoves, Ramush Haradinaj dha doreheqjen pasi thirret per t’u intervistuar nga Gjykata Speciale e Hages.

    Duke shprehur vleresimin tim per aktin e tij prej shtetari te vertet shtoj ketu se kjo eshte hera e dyte qe z. Ramush Haradinaj jep ne menyre dinjitoze doreheqjen si Kryeminister i Kosoves dhe hera e trete qe ai paraqitet para Gjykates se Hages ne pergjigje te thirrjes se drejtesise nderkombetare. Ne dy rastet e mpareshme ai eshte gjetur i pafajshem. Komandant trim qe luftoi me heroizem kunder pushtuesve dhe ndihmoi dhe shpetoi qindra familje shqiptare nga barabarite serbe gjate luftes, shtetar me integritet dhe kryminister efiçent e adhetar i flakte, Ramush Haradinaj kundershtoj me guxim te madh projektin e Serbise se Madhe te Vuçiç, Zografit Bis, Miladinit shqipfoles dhe Baton Stanishiqit per çka dhe fitoi admirimin, mbeshtetjen e madhe te qytetareve te Kosoves dhe mbare kombit shqiptar.

    Me kete rast une shpreh nderimin tim te palekundur per vepren dhe aktin e tij burreror te kryeministrit te Kosoves dhe kryetarit te AAK Ramush Haradinajt dhe besimin e palekundur ne drejtesine nderkombetare, e cila e ka shpallur ate dy here te pafajshem.

    Une gjithashtu iu bej thirrje forcave politike ne Kosove, qytetareve te saj dhe mbare kombit shqiptar te kundershtojne me vendosmeri te palekundur te gjitha perpjekjet, prapaskenat per ndarjen dhe coptimin e Kosoves te projektit te Serbise se Madhe te Vuçiç, argateve te tij shqipfoles, albanofobe, Zografit Bis, Miladinit shqipfoles Baton Stanishiqit qe festojne sonte doreheqjen e Kryeministrit Ramush Haradinaj dhe thirrjen e tij nga Gjykata e Hages mbasi kishin tek ai nje dige te pakapercyeshme.sb

  • 18:04

    Reagon Thaçi: Besoj në pastërtinë e luftës së Ushtrisë Çlirimtare të Kosovës

    Presidenti i Kosovës Hashim Thaçi ka reaguar lidhur me dorëheqjen e kryeministrit të Kosovës, Ramush Haradinajt.

    Në një status në Facebook, Thaçi shkruan se beson në pastërtinë e luftës së Ushtrisë Çlirimtare të Kosovës dhe në vlerat e larta morale të ushtarëve të lirisë.

    “Me keqardhje mësova që Gjykata Speciale ka ftuar për intervistim ish-shefin e Shtabit të UÇK-së, Bislim Zyrapi, njëherësh këshilltar i imi, ish-komandantin e Zonës Operative të Dukagjinit, kryeministrin Ramush Haradinaj, si dhe disa ish-eprorë të tjerë të UÇK-së. Nga mediat tani u informova edhe për vendimin e Kryeministrit të Republikës së Kosovës, Ramush Haradinaj, për dorëheqjen e parevokueshme nga pozita e tij. Unë e respektoj vendimin e tij dhe si President i Republikës së Kosovës ju siguroj se do të veprojë bazuar në kompetencat e mia kushtetuese dhe ligjore, për të cilat qytetarët e Kosovës do të njoftohen me kohë. Unë besoj në pastërtinë e luftës së Ushtrisë Çlirimtare të Kosovës dhe besoj në vlerat e larta morale të ushtarëve të lirisë,”-shkruan Thaçi.

  • 17:54

    Largohet Haradinaj, Kurti: Dorëheqje e vonuar dhe me arsye të gabuar

    Albin Kurti

    Kreu i Vetëvendosjes, Albin Kurti ka reaguar lidhur me dorëheqjen e Ramush Haradinajt.

    Me anë të një postimi në Facebook Kurti shkruan se dorëheqja e Haradinaj nga posti i kryeministrit është një akt i vonuar.

    “Dorëheqje e vonuar me arsye të gabuar. Z.Haradinaj dha dorëheqje nga pozita e kryeministrit. Moti është dashur të japë dorëheqje. Psh. kur e ndërroi qëndrimin për demarkacionin me Malin e Zi, kur ia rriti pagën vetvetes, kur emëronte nëpër borde e menaxhmente ndërmarrjesh me mbiemra familjesh e librezë partie, kur me 13 dhjetor 2018 e dha propozimin për marrëveshje “Ahtisaari Plus” me Serbinë, kur e paloi e rrafshoi buxhetin me asfalt, kur e kërcënoi prokurorin Blakaj, kur delegacioni për bisedime me Serbinë i doli anti-kushtetues etj.etj. Së fundi e pa që mocionin e mosbesimit të opozitës do ta votonin edhe disa prej deputetëve që e kishin mbështetur fillimisht. E kuptoi atë që ia kishim thënë dikur: kryeministrinë e ka pasur si biçikletë hua nga PDK-ja për të bërë ndonjë xhiro… Ne ishim e jemi kundër Gjykatës Speciale. Kemi nevojë për gjykata normale kundër krimit e korrupsionit në paqe dhe jo për edhe një gjykatë speciale kundër kinse krimeve të luftës së UÇK-së. Ata që e votuan, e vunë veten e tyre dhe gjithë Kosovën nën shantazhin e interesave gjeopolitike jashtë kontrollit tonë. Për drejtësi të vërtetë, zhvillim të qëndrueshëm, progres shoqëror, demokraci institucionale, menjëherë nevojiten zgjedhje të reja parlamentare. Duhet të flasë populli, të cilin aq shumë e shtypën dhe e zhvatën,”-shkruan Kurti.

  • 17:25

    Dorëheqja e Haradinajt, Basha: Akti i një njeriu që ve Atdheun mbi gjithçka, askush nuk e përdhos dot luftën

    Lulzim Basha

    Kryedemokrati Lulzim Basha ka reaguar lidhur me dorëheqja e kryeministrit të Kosovës, Ramush Haradinajt. 

    “Është akti i një njeriu që ve Atdheun mbi gjithçka. Ramushi i ka shërbyer gjithmonë me vetëmohim Kosovës, në ditë të mira dhe në ditë të këqija. Ramush Haradinaj është Kosova – Kosova e lirë, Kosova e pavarur, Kosova europiane. Askush dhe asgjë nuk e përdhos dot luftën çlirimtare të Kosovës dhe sakrificën sublime të familjes Haradinaj në altarin e lirisë!”

  • 17:06

    Haradinaj dha dorërheqjen, vjen reagimi i parë nga Shqipëria, Majko: Burrë shteti!

    Pandeli Majko

    Ministri për Diasporën Pandeli Majko ka qënë zyrtari i parë shqiptar që ka reaguar lidhur me dorëheqjen e kryeministrit të Kosovës, Ramush Haradinaj.

    Ramush Haradinaj ka dhënë dorëheqjen nga posti i kryeministrit si një burrë shteti. Ai kreu një akt që i bën nder Kosovës shtet që drejtohet nga shtetarë të cilët bëjnë dallimin e fatit personal me atë të sigurisë kombëtare.
    Veprat e një njeriu vlejnë më shumë se dobësitë e tij.
    Sot jam me Ramushin! Të falenderoj komandant për shembullin e luftës, dhe sot në atë të paqes.”

  • 17:06

    Haradinaj u dorëhoq, ambasadorja e Kosovës në SHBA: Kjo nuk është drejtësi

    Vlora Çitaku

    Ambasadorja e Kosovës në SHBA, Vlora Çitaku ka reaguar pas dorëheqjes së kryeministrit Ramush Haradinaj.

    Me anë të një postimi në Facebook, Çitaku shkruan se kjo nuk është drejtësi duke i dalë në krah Haradinajt.

    Kjo nuk është drejtësi.#RamushHaradinaj”, ka shkruar Çitaku.

     

  • 16:50

    Intervista në Hagë/ Si e lajmëroi Haradinaj dorëheqjen me lot në sy: Jam i emocionuar

    Ramush Haradinaj

    Teksa dha lajmin për dorëheqjen e tij, kryeministri i Kosovës Ramush Haradinaj është përlotur para kamerave. 

    Edhe pse i përlotur, ai nuk e ka pranuar gjestin duke e kaluar me të qeshur dhe duke u shprehur se thjesht ishte emocionuar. 

    Me lot në sy nuk jam. Unë nuk e di se di dukem atje. Jam i emocionuar por nuk kam qarë. Nuk është një vendim i lehtë kuptohet por ky është realiteti,”-tha Haradinaj. 

     

Shto Koment