Aktualitet

Tërmeti i 26 nëntorit, Prokuroria e Durrësit dhe e Tiranës nisin hetimet: Bashkia të japë informacion për banesat e dëmtuara

  • Prokuroria Lezhë: S’kemi nisur hetime, pallatet e dëmtuar kanë qenë të viteve 70′
  • Prokuroria e Krujës: Të sekuestrohen të gjithë dokumentat lidhur me ndërtimet
  • Në një njoftim për mediat bëhet me dije se organi i akuzës në Durrës ka nisur hetimet, pasi ka dyshime se  nga tërmeti janë shkatërruar dnërtesa që kanë qenë pa leje, ose nga mos kryerja e inspektimeve të duhura nga inxhinierët.
    Featured image of article: Tërmeti i 26 nëntorit, Prokuroria e Durrësit dhe e Tiranës nisin hetimet: Bashkia të japë informacion për banesat e dëmtuara Prokuroria e Durrësit. Prokuroria e Tiranës dhe godinë e shmebur nga tërmeti

    DURRËS- Prokuroria e Durrësit dhe e Tiranës kanë nisur hetimet pas tërmetit shkatërrues të 26 nëntorit. Në një njoftim për mediat bëhet me dije se organi i akuzës në Durrës e Tiranë kanë hetimet, pasi ka dyshime se nga tërmeti janë shkatërruar ndërtesa që kanë qenë pa leje, ose nga mos kryerja e inspektimeve të duhura nga inxhinierët.

    Çështja është regjistruar për veprat penale; “Ndërtim pa leje”, dhe “Shpërdorim detyre”, parashikuar nga nenet 199/a, 3 dhe 248 k.penal”, shkruhet në njoftim dhe shtohet se çështja ndiqet nga një grup prokurorësh dhe një grup oficerësh të Policisë Gjyqësore.

    Ndërkohë Prokuroria e Tiranës ka nisur hetime më të thelluara pasi hetohet për tre vepra penale: “Ndërtim i paligjshëm”, parashikuar nga neni 199/a i Kodit penal, si dhe “Dhënia e ndihmës për ndërtim të paligjshëm”, neni 199/b i Kodit Penal

    PROKURORIA E DURRËSIT: Më datë 29.11.2019 Prok. Durrës ka regjistruar çështjen penale që i referohet tërmetit të datës 26.11.2019 ku si pasojë e tij janë shembur një numër ndërtesash që kanë shkaktuar vdekjen e një numri personash.

    Për këtë dyshohet se pasojat kanë ardhur si shkak i ndërtimeve pa leje dhe të moskryerjes së detyrës nga inxhinierët zbatues dhe personave pergjegjës si dhe nga mospërmbushja e rregullt e detyrës nga nepunësit shtetëror të ngarkuar me mbikqyerjen e këtyre ndërtimeve. Çështja është regjistruar për veprat penale; “Ndërtim pa leje”, dhe “Shpërdorim detyre”, parashikuar nga nenet 199/a, 3 dhe 248 k.penal.

    PROKURORIA E TIRANËS: Prokuroria e Rrethit Gjyqësor Tiranë ka filluar kryesisht hetimet në lidhje me situatën e krijuar nga fatkeqësia natyrore. Hetimi ka si objekt kryerjen e veprimeve të shpejta në drejtim të sqarimit të rrethanave konkrete, që kanë çuar në pasojat e ardhura dhe gjendjen e ndërtimeve. Veprat penale që po hetohen janë ato të “Shpërdorim detyre”, parashikuar nga neni 248 i Kodit Penal, ku do hetohet për organet qe kanë miratuar lejet e ndërtimit dhe nëse ato janë dhënë në mbështetje të ligjit, si dhe nëse ndërtuesit kanë respektuar lejen e marrë, “Ndërtim i paligjshëm”, parashikuar nga neni 199/a i Kodit penal, si dhe “Dhënia e ndihmës për ndërtim të paligjshëm”, neni 199/b i Kodit Penal. Në lidhje me këtë hetim Prokuroria e Rrethit Gjyqësor Tiranë, ka ngritur një grup hetimor. Në vijim të veprimeve të kryera, i kërkohet informacion Bashkisë së Tiranës për banesat e evidentuara tashmë si të prekura nga termeti dhe të klasifikuara jo në kushtet e duhura për banim. I njëjti informacion i është kërkuar dhe strukturave të tjera shtetërore.

    Hetimet kanë nisur 6 ditë pas tërmetit shkatërrues ku vdiqën 51 persona dhe 913 të tjetër mbetën të plagosur. Toka vijon të dridhet ndërsa viktimat u përcollën për në banesën e fundit. Mbi 400 efektivë të Forcave të Armatosura u angazhuan që në orët e para të ngjarjes së 26 nëntorit, ku shpëtuan më shumë se 50 perona nën rrënoja. Tashmë ka nisur puna për idenftifikimin e dëmeve dhe paralelisht po mblidhen fonde.

    (A.B. Dosja.al)

    Shto Koment