Aktualitet

OFL godet në Kurbin, formulari dërgohet tek ‘bossi’ i kumarit Ervis Martinaj dhe 2 vëllezërit Kaçorri

  • Avokati i Martinajt: Klienti im s’është i dënuar, kërkesë ‘nul’
  • Ervis Martinaj dhe dy vëllezërit Kaçorri, Arben dhe Valentino, janë tre subjektet e radhës, që janë vënë në shënjestrën e OFL-së.
    Featured image of article: OFL godet në Kurbin, formulari dërgohet tek ‘bossi’ i kumarit Ervis Martinaj dhe 2 vëllezërit Kaçorri OFL dhe Ervis Martinaj
    Përditësuar:

    TIRANË– Operacioni Forca e Ligjit ka zbarkuar sot në qytetin e Kurbinit dhe të Tiranës ku i është dërguar formulari për deklarimin e burimit të pasurisë tre subjekteve të radhës, të cilët do të duhet të bëjnë vetëdeklarimin e të ardhurave të tyre. Ervis Martinaj, i njohur ndryshe edhe si “bosi” i lojërave të fatit, dhe dy vëllezërit Kaçorri, Arben dhe Valentino, janë tre subjektet e radhës, që janë vënë në shënjestrën e OFL-së.

    Ervis Martinaj, është aktualisht nën hetim për ngjarjen e ndodhur në zonën e ish-bllokut në 4 tetor 2018, ku mbeti i vdekur në vend Fabian Gaxha, dhe u plagos vetë bashkë me mikun e tij, Eljo Hato. Paralelisht, prokuroria e Tiranës ka nisur një hetim tjetër për Martinajn, për akuzën e “Pastrimit të produkteve të veprës penale”.

    Ndërsa vëllezërit, Arben dhe Valentino Kaçorri rezultojnë të dënuar në Itali për vepra të ndryshme penale. Valentino Kaçorri, banues në Tiranë, rezulton i dënuar në Itali për vrasje dhe për trafik armësh. Arben Kaçorri, gjithashtu banues në Tiranë është i dënuar në Itali për vrasje me paramendim. Brenda 48 orësh, këta individë, si subjekt i Ligjit Special, duhet t’u përgjigjen me shkrim të gjitha pyetjeve të OFL-së. Më pas, përgjigjet e marra do t’i dërgohen SPAK-ut, për veprime të mëtejshme.

    Për më shumë bëhu pjesë e grupit më viral në Facebook, Dosja.al

    Deklarat e OFL, 19 shkurt

    Vijon operacioni Forca e Ligjit, në bashkëpunim me strukturat vendore të Policisë, në zbatim të detyrave të përcaktuara në Aktin Normativ të datës 31 janar 2020, për dërgimin e kërkesave për vetëdeklarim të pasurisë, personave që janë subjekt i këtij ligji. Në këtë kuadër, OFL u ka dërguar kërkesat për vetëdeklarim të pasurisë, shtetasve:

    – E. M., me banim në Kurbin, person në hetim për veprën penale “Vrasja me paramendim”;
    – A. K., me banim në Tiranë, i dënuar në Itali për vrasje;
    – V. K., me banim në Tiranë, i dënuar në Itali për vrasje dhe trafik armësh; Brenda 48 orësh, këta individë, si subjekt i Ligjit Special, duhet t’u përgjigjen me shkrim të gjitha pyetjeve të OFL-së. Më pas, përgjigjet e marra do t’i dërgohen SPAK-ut, për veprime të mëtejshme. Me qëllim evidentimin dhe dërgimin në SPAK, të të gjithë personave që janë subjekt i Ligjit Special, OFL është në veprim të pandërprerë dhe në kryerje të veprimeve komplekse. Për të gjitha nismat procedurale dhe operacionet ekzekutive që do të kryejë, OFL do të informojë publikun në vijimësi.

    Që prej 3 shkurtit, OFL ka nisur goditjen dhe sekuestrimin e pasurive të emrave të njohur të botës së krimit. OFL ka dërguar tashmë formularin tek Suel Cela dhe Plarent Dervishaj, Dash Gjoka, Emiljano Hysenaj, Lulzim Berisha, Edlir Hysenaj, Altin Hajri, Ardian Capja, grupi i Dukagjinit, Saimir Taullau, Ben Qimja, Durim Bami, Landi Muharremi, Bardhok Pllanaj, Alberto Lamaj, Dritan Dajtit, Xhevdet Troplinit, Emiljano Shullazit, Gjergj Cukalit, Orges Jahelezi dhe Pajtim Serjanit, Gazmend Mahmutajt dhe Edison Çobos.

    (f.m;f.g/dosja.al)

    Shto Koment