Rajoni

Kosova 12 vjet shtet/ Albin Kurti dhe Vjosa Osmani homazhe në varrin e Ibrahim Rugovës, në Kuvend ngrihet flamuri i UÇK-së

  • Fjalimi i Ibrahim Rugovës që ngriti në këmbë deputetët e Parlamentit Evropian (VD)
  • Politologu serb nuk kursen urimet: Paçi fat, Kurti të mos përsërisë gabime
  • Kosova feston sot 12-vjetorin e Pavarësisë. Më 17 shkurt të vitit 2008, Kosova u njoh si shtet nga  116 vende të botës. Në Kuvendin e Kosovës ngrihet flamuri i UÇk-së.
    Featured image of article: Kosova 12 vjet shtet/ Albin Kurti dhe Vjosa Osmani homazhe në varrin e Ibrahim Rugovës, në Kuvend ngrihet flamuri i UÇK-së Albin Kurti dhe Vjosa Osmani

    Kosovë- Sot Kosova feston 12-vjetorin e Pavarësisë. Më 17 shkurt të vitit 2008, Kosova u njoh si shtet nga  116 vende të botës.  Kosova po shënon këtë përvjetor të pavarësisë me një qeveri të re të udhëhequr nga Albin Kurti nga Lëvizja Vetëvendosje (LVV), e cila është në koalicion qeverisës me Lidhjen Demokratike të Kosovës (LDK).

    Ditën e sotme institucionet shtetërore po zhvillojnë disa aktivitete, të cilat filluan  me ngritjen e flamurit nga dy udhëheqësit shtetërorë, kryeministri Albin Kurti dhe kryeparlamentarja Vjosa Osmani. Po kështu Albin Kurti së bashku me Vjosa Osmanin kanë bërë homazhe tek varri i Ibrahim Rugovës.  Kurti e Osmani më pas vendosën kurora lulesh te kompleksi memorial Adem Jashari dhe te varri i veprimtarit Adem Demaçi.

    Ndërkohë po zhvillohet edhe një seancë solemne në Kuvendin e Republikës së Kosovës, nën kujdesin e kryeparlamentares Vjosa Osmani. Të pranishëm në seancë janë  kryeministri Kurti, përfaqësues të Familjes Jashari, familjes Rugova, deputetë të këtij legjislacioni dhe të ftuar ndërkombëtarë e vendorë. Ajo që vihet re është se në këtë seancë është vendosur edhe fotoja e flamurit të UÇK-së. Ka qenë deputetja e PDK-së, Ganimete Musliu e cila ka vendosur këtë flamur në kuvendin e Kosovës.

    Flamuri i UÇK-së në Kuvendin e Kosovës

    Gjithashtu kanë nisur edhe urimet në rrjetet sociale për Pavarësinë e Kosovës. Nëpërmjet një videoje në rrjetet sociale, Rama e ka quajtur këtë ditë si një ditë mjaft të bekuar për të gjithë shqiptarët. Ndër të tjera kryeministri shqiptar shkruan se kujtimi i atyre personave që dhanë jetën për këtë ditë do të jetë i përjetshëm. “Urime ditën e bekuar të pavarësisë së Kosovës me ditën e bekuar të pavarësisë së Kosovës të gjithë shqiptarëve kudo që ndodhen dhe i përjetshëm qoftë kujtimi i atyre që dhanë jetën për këtë ditë,”- shkruan kryeministri Edi Rama. Ndërsa kreu i PD-së, Lulzim Basha është shprehur:  “Kosova dhe aspirata jonë e përbashkët drejt integrimit europian do të jetë misioni ynë i madh”.

    10 fakte interesante për pavarësinë e Kosovës:

    1) Pavarësia e Kosovës është shpallur me datën 17 shkurt 2008, në orën 15:39 minuta

    2) Dizajnues i flamurit dhe i stemës së Kosovës: Muhamer Ibrahimi

    3) Të parët që nënshkruan deklaratën e pavarësisë së Kosovës, ishin: presidenti Fatmir Sejdiu, kryetari i kuvendit, Jakup Krasniqi, si dhe kryeministri i vendit, Hashim Thaçi.

    4) Shtetet e para që njohën Kosovën si shtet pas shpalljes së pavarësisë ishin: Kosta Rika, SHBA, Franca, Afganistani, Shqipëria, Turqia, Britania e Madhe etj.

    Për më shumë bëhu pjesë e grupit më viral në Facebook, Dosja.al

    5) Pergamena e vjetër 200 vjeçare në të cilën është nënshkruar deklarata e pavarësisë së Kosovës, gjendet në zyrën e kryetarit të Kuvendit.

    6) Përveç pergamenës, aty gjenden edhe lapsi me të cilin vënë nënshkrimet, listat e nënshkrimeve të deputetëve pjesëmarrës seancë, si dhe flamuri i vendosur në seancën e shpalljes së pavarësisë.

    7) Muzeu i Londrës ishte ai që ia fali Kosovës pergamenën për shpalljen e pavarësisë!

    8) Flamujt e parë të Republikës së Kosovës ishin shtypur në Turqi.

    9) Himni i Kosovës, i kompozuar nga kompozitori Mendi Mengjiqi, për herë të parë ishte intonuar në seancën e shpalljes së pavarësisë së Kosovës.

    10) Yjet e bardhë në flamurin e Kosovës simbolizojnë komunitetet e ndryshme që jetojnë në Kosovë, harta e verdhë simbolizon pasurinë e Kosovës, ndërsa ngjyyra e kaltër simbolizon Evropën.

    J.V;f.m/Dosja.al

    • 18:28

      Nuk ishte as Shqipëria as SHBA, ky është vendi i parë që njohu Kosovën si shtet i pavarur

      Foto ilustruese

      Ditën e sotme Kosova feston 12 vjetorin e pavarësisë. 12 vite më parë, më 17 shkurt, kryeministri i asokohe Hashim Thaçi nga foltorja e Kuvendit e shpalli vendin e pavarur.

      Por kush është vendi i parë që e njohu Kosovën si vend i pavarur?

      Të gjithë do të mendonim se do të ishte Shqipëria ose Shtetet e Bashkuara të Amerikës por jo! Vendi i parë që ka njohur Kosovën është Afganistani, një ditë më pas.
    • 16:42

      Kurti ndan videomesazhin: Është koha të marrim vendime përballë sfidave, shpresa e popullit detyra jonë

      Kryeministri i ri i Kosovës, Albin Kurti në 12-vjetorin e shpalljes së Pavarësisë së Kosovës ka shpërndarë në facebook, një videomesazh, me anë të të cilit shprehet se Pavarësia vijon të jetë sfida para popullit të Kosovës. Kurti thotë se Kosova është një hap prapa popullit të vet, duke shtuar se Kosova nuk është në ditët e saj më të mira, por populli ka shpresa më të mëdha se kurrë. Ai thekson se ka ardhur koha që të merren vendime, lidhur me ketë sfida.

      “Pavarësia vijon të jetë sfida para nesh. Pavarësia është përpjekja jonë e vazhdueshme për të cilën puna nuk përfundon asnjëherë. Ajo ishte ideali përbaëshkues i brezave para nesh dhe vazhdojn të jetë sfidë për ne. Sot Kosova është një hap prapa popullit të vet. Ajo nuk është në ditët e saj më të mira, por populli ka shpresa më të mëdha se kurrë. Shpresa e popullit është detyra jonë. Ne të gjithë kemi mospajtimet e dallimet e veta. Por si qeveri është koha të marrim vendime. Nuk do t;iu shmangemi vështirësive, por do t’u bëjmë balla atyre. Këto vendime do ta lartësojnë Kosovën në nivel me popullin e saj”, shprehet Kurti.

    • 12:36

      VIDEO/ I zemëruar se i hoqën foton, Thaçi nuk shkon në Kuvend, por kujton si lexoi deklaratën e pavarësisë së Kosovës, momentet kur ishte kryeministër

      Presidenti Hashim Thaçi nuk është shfaqur sot në seancën solemne të Kuvendit të Kosovës e cila po organizohet për nder të 12-vjetorit të Pavarësisë së shtetit të Kosovës. Mediat kosovare shkruajnë se Presidenti i shtetit ka kujtuar 12 vite më parë momentin kur ai si kryeministër i Kosovës e kishte lexuar deklaratën e pavarësisë, me anë të një videoje në rrjetet sociale.

      Popullit të Kosovës, të gjithë shqiptarëve kudo që janë, nga zemra ju uroj dymbëdhjetë vjetorin e Shpalljes së Kosovës shtet të pavarur dhe Sovran,”- dëgjohet të thotë Thaëi në video. Mediat lokale shkrujnë se Thaçi është zemruar pasi kryeparlamentarja Vjosa Osmani, me të marrë detyrën, e zhvendosi fotografinë e tij nga kabineti i saj.

    • 11:25

      Bushati: Gjenerata e re e udhëheqësve të çojë para ëndrrën e atyre që dhanë gjithçka për këtë shtet

      Ditmir Bushati

      Ish-ministri i Jashtëm, Ditmir Bushati ka uruar 12-vjetorin e pavarësisë së Kosovës, duke theksuar se gjenerata e re e udhëheqësve në Kosovë duhet të çojë me vendosmëri para ëndrrën e atyre që dhanë gjithçka për Kosovën shtet, pa vendosur në diskutim arritjet e mëdha historike. Në një urim në rrjetet sociale, Bushati thotë se “nuk duhet ta harrojmë për asnjë çast se Kosova shtet është produkt i sakrificës për liri dhe rendit ndërkombëtar të bazuar mbi respektin për të drejtat e njeriut”, duke u shprehur se 17 shkurti 2008 shënoi realizimin e dëshirës së hershme për një Kosovë të lirë dhe të pavarur.

      Reagimi i plotë

      Kosova si shtet i pavarur lindi nga sakrificat, mundi dhe mençuria e disa gjeneratave. Ajo u ngrit në këmbë nga gjaku i dëshmorëve dhe dhimbja e popullit, i cili e pati në krahë mbështetjen e SHBA-ve dhe të aleatëve tanë në NATO. 17 shkurti i vitit 2008 shënon realizimin e dëshirës së hershme për një Kosovë të lirë, të pavarur dhe të drejtë që respekton dinjitetin e qytetarëve të saj, që garanton barazinë, që synon mirëqenien dhe që është e hapur për marrëdhënie të mira e bashkëpunuese me të gjitha shtetet, sidomos në rajon.
      Në këto 12 vite rrugëtimi jo të lehtë, Kosova ka shënuar hapa përpara në procesin e shtetndërtimit demokratik. Këtë e treguan edhe zgjedhjet e mirëorganizuara parlamentare të 6 tetorit, të cilat u vlerësuan edhe nga organizatat ndërkombëtare. Gjenerata e re e udhëheqësve të Kosovës dhe qytetarët e saj duhet të çojnë me vendosmëri përpara ëndrrën e atyre që dhanë gjithçka për Kosovën shtet, pa vendosur në diskutim arritjet e mëdha historike.
      Ne shqiptarët nuk duhet ta harrojmë për asnjë çast se shteti i Kosovës është rezultat i sakrificës për liri dhe rendit ndërkombëtar të bazuar mbi respektimin e të drejtave të njeriut. Ndaj, sot është dita gjithashtu që të shprehim mirënjohjen për SHBA-të dhe aleatët tanë në NATO! Gëzuar jetë e mot Pavarësinë Kosovë!

    • 9:14

      Kosova 12 vjet shtet/ Basha: Gëzuar, do të jemi bashkë në rrugëtimin drejt Europës

      Urimi i Bashës për 12 vjetorin e Pavarësisë së Kosovës

      Kryetari i Partisë Demokratike, Lulzim Basha nëpërmjet një postimi në Facebook ka uruar shtetin e Kosovës për 12-vjetorin e Pavarësisë. Basha është shprehur se, “Kosova dhe aspirata jonë e përbashkët drejt integrimit europian do të jetë misioni ynë i madh”.

      Reagimi:

      Të dashur vëllezër e motra të Kosovës, në ditën e dytë më të rëndësishme të historisë sonë kombëtare, ju uroj nga zemra gëzuar përvjetorin e 12-të të shtetit të Kosovës! Këto nuk kanë qenë vite të lehta për Kosovën,sikundër dhe rruga e së ardhmes është e mbushur me sfida. Por si përherë, jam i bindur se me pjekuri, durim, forcë e mençuri do t’i përballni me sukses të gjitha sfidat përgjatë rrugës së vështirë të shtetformimit. Në këtë ditë kaq të bukur dhe të rëndësishme për kombin, dua të shpreh angazhimin tim se çdo ditë të jetës dhe punës time, sot në krye të opozitës e nesër në krye të qeverisjes së vendit, Kosova dhe aspirata jonë e përbashkët drejt integrimit do të jetë misioni ynë i madh. Ne do të jemi bashkë në këtë rrugëtim, prandaj edhe më të fortë edhe më të qartë se asnjeherë më parë për të sotmen dhe të ardhmen tonë. Gëzuar Kosovë!

    • 8:59

      Kosova 12 vjet shtet, Kryemadhi: Gëzuar ditën e shënuar, martirja e përgjakur në Evropën e kohëve moderne

      Monika Kryemadhi

      Kryetarja e Lëvizjes Socialiste për Integrim ka uruar shtetin e Kosovës për 12-vjetorin e Pavarësisë. Në një status në rrjetet sociale, Kryemadhi shkruan se kjo është një ëndërr e të rënëve për liri dhe se kjo ngjarje i jep rastin fatlum që në emër të Lëvizjes Socialiste për Integrim, të urojë me gjithë zemër motrat dhe vëllezërit shqiptarë të Kosovës për ketë ditë të shënuar.

      “Gëzuar Ditën e Pavarësisë Kosova jonë e dashur, martirja e përgjakur në Evropën e kohëve moderne, ëndrra e realizuar e të rënëve për liri! 12-vjetori i Pavarësisë së Republikës së Kosovës, më jep rastin fatlum që në emër të Lëvizjes Socialiste për Integrim, të uroj me gjithë zemër motrat dhe vëllezërit shqiptarë, e bashkë me ta edhe të gjithë qytetarët e tjerë të Kosovës për ketë ngjarje të shënuar, e njëkohësisht të shpreh bindjen time të palëkundur se kjo ditë e veçantë, do të gjenerojë më shumë energji dhe besim, më shumë përkushtim dhe vendosmëri, për të punuar pa u lodhur asnjëherë për Kosovën europiane. 12 vjet në jetën e një vendi nuk janë shumë, por 12 vjet të shtetit të pavarur të Kosovës, kanë shënuar arritje me përmasa epokale po të kemi parasysh se sa shumë luftë e përpjekje, sa shumë sakrifica dhe privacione janë dashur të përballohen. Ndaj, është e natyrshme që sot një nderim i veçantë të shkojë për të gjithë ata djem dhe vajza, për të gjithë ata luftëtarë të lirisë që i dhanë Kosovës, lirisë e pavarësisë së saj, jetën e tyre. Gjithashtu dua të shpreh mirënjohjen e thellë ndaj Shteteve te Bashkuara te Amerikës, Britanisë së Madhe, Gjermanisë, që ishin krah Kosovës si në ditët e luftës së përgjakshme, ashtu edhe në procesin politik për shpalljen e pavarësisë së saj. Kosova është amaneti i shenjtë i gjakut të të rënëve, por po aq është edhe ëndrra e bukur e djemve dhe vajzave të saj, ndaj përparimi dhe mirëqenia, prosperiteti dhe zhvillimi i pandalshëm, do ta bëjnë Kosovën edhe më të fortë, edhe më të begatë, edhe më europiane. Edhe një herë: Gëzuar Ditën e Pavarësisë Kosova jonë e dashur!”- shkruan Kryemadhi nw Facebook.

    • 8:23

      VIDEO/ Kosova 12 vjet shtet, Rama: I përjetshëm qoftë kujtimi i atyre që dhanë jetën për këtë ditë

      Kryeministri Edi Rama ka uruar Kosovën për 12-vjetorin e Pavarësisë. Nëpërmjet një videoje në Facebook, Rama e ka quajtur këtë ditë si një ditë mjaft të bekuar për të gjithë shqiptarët. Ndër të tjera kryeministri shqiptar shkruan se kujtimi i atyre personave që dhanë jetën për këtë ditë do të jetë i përjetshëm. “Urime ditën e bekuar të pavarësisë së Kosovës me ditën e bekuar të pavarësisë së Kosovës të gjithë shqiptarëve kudo që ndodhen dhe i përjetshëm qoftë kujtimi i atyre që dhanë jetën për këtë ditë,”- shkruan kryeministri Edi Rama.

    Shto Koment