Politike

Basha: S’e kemi braktisur ‘Zgjedhoren’, marrim pjesë në tryezë. SHBA, BE e Rama përshëndetin vendimin: Koha për konsensus

VIDEO
Kryedemokrati Lulzim Basha njoftoi rikthimin në tryezën e Reformës Zgjedhore dhe përfundimin e procesit. Yuri Kim, Luigi Soreca dhe Edi Rama përshëndesin vendimin. Ata shprehet se tani është koha për konsensus dhe reforma të mbarojë sa më shpejt.
Featured image of article: Basha: S’e kemi braktisur ‘Zgjedhoren’, marrim pjesë në tryezë. SHBA, BE e Rama përshëndetin vendimin: Koha për konsensus Basha, Rama, Yuri Kim dhe Soreca

TIRANË- Kreu i Partisë Demokratike, Lulzim Basha, në një deklaratë për mediat është shprehur sot se opozita e bashkuar do të vijojë të jetë në Këshillin Politik për të përfunduar Reformën Zgjedhore. Në fjalën e tij para gazetarëve, Basha u shpreh se opozita nuk e ka braktisur asnjëherë tryezën dhe është e gatshme për të vijuar dialogun.

Ai vijoi më tej duke thënë se largimi i opozitës nga tryeza është një ëndërr e Edi Ramës, duke e akuzuar për bllokim të procesit. Menjëherë pas këtij reagimi, Kryeministri Edi Rama në një deklaratë në mediat sociale e ka përshendetur vendimin e opozitës.

Kreu i qeverisë shprehet “më mirë vonë se kurrë dhe inshallah këtë herë deri në mbylljen e këtij procesi të stërzgjatur, sepse koha nuk pret dhe me vullnet të mirë mund të arrihet shpejt në konsensus”.

Për më shumë bëhu pjesë e grupit më viral në Facebook, Dosja.al

Fjalët të mira erdhën dhe nga SHBA e BE, të cilat përshendetën këtë vendim dhe thanë se Reforma Zgjedhore duhet të përfundojë sa më parë.  “Përshëndesim vendimin e kreut të PD, Lulzim Basha, për përmbylljen e reformës elektorale. Presim që edhe të tjerët të tregojnë të njëjtin lidership”, shkruan Kim.

Një një reagim në mediat sociale dhe ambasadori i BE, shprehet i lumtur duke shtuar se rikthimi në tavolinë “kontribuon për të përfunduar këtë reformë të rëndësishme pa vonesë, në mënyrë që të përmbushë kushtin e vendosur marsin e kaluar Komisioni Europian”. Nuk kanë munguar reagimet edhe nga kritikët e Bashës, një prej tyre edhe deputetja e dalë nga lista e tij për Tiranën, Rudina Hajdari. Bashkëkryetarja e Reformës Zgjedhore, u shpreh se pas rikthimit në tryezë të opozitës duhet gjendur një konsensus për sistemin zgjedhor. 

Tryeza e Reformës Zgjedhore u rrezikua pas shembjes së Teatrit Kombëtar. Lulzim Basha pas protestës që u mbajt tek sheshi i teatrit u shrpeh se nuk do të kishte Reformë Zgjedhore dhe përfaqësuesit e opozitës në Këshillin Politik nuk morën pjesë në mbledhjen e së hënës. Basha në një reagim tjetër një ditë më vonë u shpreh se opozita nuk e ka braktisur reformën dhe sot njoftoi rikthimin në tavolinë.

(A.B. Dosja.al)

  • 19:07

    Rikthimi tek Reforma Zgjedhore, Kryemadhi: LSI me qëndrim të njëjtë si PD, të vendosur të largojmë Ramën nga pushteti

    Monika Kryemadhi

    Kryetarja e LSI-së, Monika Kryemadhi ka reaguar për rikthimin e opozitës në tryezën e Reformës Zgjedhore. Me anë të një postimi në Facebook, Kryemadhi tha se PD dhe LSI janë të vendosur që të realizojnë ndryshimet në ‘Zgjedhore’. Më tej, Kryemadhi shtoi se LSI nuk ka asnjë qëndrim të ndryshëm nga kryedemokrati Lulzim Basha. 

    Por pavarësisht dhunës policore, pavarësisht gjuhës fyese, provokuese dhe urrejtjes së Edi Ramës, e ritheksoj edhe një herë se ne jemi të vendosur të realizojmë reformën zgjedhore dhe largimin përfundimtar të tij nga pushteti, si kusht për rikthimin e demokracisë në vend,”-shkruan ajo. 

    POSTIMI I PLOTË:

    LSI nuk ka asnjë qëndrim të ndryshëm nga qëndrimi që ka bërë të njohur në emër të Opozitës së Bashkuar kryetari i PD-së zoti Lulzim Basha. Përmbushja e të gjitha detyrimeve ndaj reformës zgjedhore ka qenë dhe mbetet prioriteti im si Kryetare e LSI-së, ndaj do të vazhdoj të bëj të gjithë presionin e nevojshëm, që ajo të realizohet me konsensus dhe sa më parë, si kusht i rëndësishëm për të rikthyer legjitimitetin e vullnetit të qytetarëve shqiptarë. Shembja e paligjshme e Teatrit Kombëtar dhe përdorimi i dhunës policore mbi artistët, mbi gazetarët, mbi veprimtarët e shoqërisë civile dhe përfaqësuesit e opozitës, është provokimi i rradhës së Edi Ramës ndaj opozitës dhe qytetarëve shqiptarë, i cili edhe në sallën e Kuvendit vazhdoi me të njejtën gjuhë fyese dhe provokative, për të na detyruar të largohemi nga tryeza e reformës zgjedhore. Por pavarësisht dhunës policore, pavarësisht gjuhës fyese, provokuese dhe urrejtjes së Edi Ramës, e ritheksoj edhe një herë se ne jemi të vendosur të realizojmë reformën zgjedhore dhe largimin përfundimtar të tij nga pushteti, si kusht për rikthimin e demokracisë në vend.

  • 16:37

    Rikthimi tek ‘Zgjedhorja’/ Rudina Hajdari përshëndet vendimin e Bashës: Është gjë pozitive! Duhet konsensus për sistemin zgjedhor

    Rudina Hajdari dhe Lulzim Basha

    Deputetja Rudina Hajdari ka përshëndetur vendimin e opozitës për t’u rikthyer në tryezën e Reformës Zgjedhore. Me anë të një statusi në rrjetet sociale, bashkë kryetarja e Reformës Hajdari shkruan se duhet të gjendet një konsensus për ndryshimin e sistemit zgjedhore.

    E vlerësoj faktin që Lulzim Basha u shpreh i gatshëm për përfundimin e reformës zgjedhore. Është gjë pozitive që ai kthehet në KP, por gjithashtu duhet të pranojmë gjetjen e konsensusit mbi çështjen e ndryshimit të sistemit, në mënyrë që të arrijmë rezultate nga kjo tryezë,”-shkruan ajo. 

  • 15:41

    Soreca: Vendim i mirë, ‘Zgjedhorja’ të mbyllet pa vonesa

    Ambasadori i BE në Shqipëri, Luigi Soreca, ka reaguar pas vendimin të bërë publik nga Lulzim Basha se opozita do të rikthehet në Reformën Zgjedhore. Në një reagim në mediat sociale, Soreca shkruan se e mirëpret këtë vendim dhe duhet të rifillojë menjëherë puna për përfundimin e Reformës Zgjedhore.

    Luigi Soreca, ambasador i BE në Shqipëri

    Mirëpresim vendimin e Lulzim Bashës për të rifilluar punën ndër-partiake për Reformën Zgjedhore në Këshillin Politik. Ajo shërben për interesin më të lartë të Shqipërisë dhe kontribuon për të përfunduar këtë reformë të rëndësishme pa vonesë, në mënyrë që të përmbushë kushtin e vendosur marsin e kaluar Komisioni Europian“, shkruan ai.

  • 15:26

    Rama: Koha nuk pret, me vullnet të mirë arrijmë konsensusin

    Kryeministri Edi Rama ka përshendetur rikthimin në tryezën e Reformës Zgjedhore të opozitës jashtë parlamentare. Në një reagim në mediat sociale, Rama shkruan se koha nuk pret dhe vullnet të mirë mund të arrihet shpejt në konsensus.

    Edi Rama, Kryeministër i Shqipërisë

    “Kthimi i opozitës jashtëparlamentare në tryezën e Reformës Zgjedhore një kthesë për t’u përshëndetur! Më mirë vonë se kurrë dhe inshallah këtë herë deri në mbylljen e këtij procesi të stërzgjatur, sepse koha nuk pret dhe me vullnet të mirë mund të arrihet shpejt në konsensus”, shkruan Rama.

  • 15:26

    Yuri Kim përshëndet vendimin e Bashës: Presim edhe të tjerët të tregojnë të njëjtin lidership

    Ambasadorja e ShBA në Tiranë Yuri Kim, ka përshëndetur vendimin e kreut të Partisë Demokratike, Lulzim Basha për rikthimin në tryezën e bisedimeve për reformën zgjedhore. Në reagimin në Twitter, Kim shkruan, shpreson që edhe liderët e partive të tjerë të ndjekin të njëjtin drejtim si Basha.

    Yuri Kim, ambasadore e e SHBA në Shqipëri

    Përshëndesim vendimin e kreut të PD, Lulzim Basha, për përmbylljen e reformës elektorale. Presim që edhe të tjerët të tregojnë të njëjtin lidership“, shkruan Kim.

  • 15:16

    Basha bën hapa pas: Jemi pjesë e Reformës Zgjedhore, nuk do lejojmë Ramën që shkatërrojë procesin

    Kreu i Partisë Demokratike, Lulzim Basha, është shprehur sot se opozita e bashkuar nuk do lejojë lojën e Edi Ramës dhe shkatërrimin e Reformës Zgjedhore. Në një deklaratë për mediat, Basha u shpreh se Rama donte që të shkatërronte reformën dhe këtë opozita nuk do lejojë këtë. Kreu i PD më tej u shpreh se PD dhe opozita nuk do të braktisë tryezën e Reformës Zgjedhore.

    Loja e Edi Ramës me shpresën se duke shkatërruar TK do të shkatërronte dhe Reformën Zgjedhore dhe të merrte peng procesin e integrimit tani doli zbuluar. Të gjithë e kanë parë këtë plan mafioz që ka për qëllim të pengojë Reformës Zgjedhore dhe integrimin e vendit.

    Ne jemi të vendosur që të mos e lejojmë këtë. PD dhe opozita e bashkuar është e vendosur që ti japë mundësinë shqiptarëve një orë e më parë garancitë për t’iu drejtuar kutive të votimit dhe për tu bashkuar në jë votë plebishitare për të larguar këtë të keqe. Ne nuk dol ta braktisim Reformën Zgjedhore. Nuk jemi larguar asnjëherë që tani të rikthehemi. Nuk e kemi braktisur asnjëherë tryezën”, tha Basha.

Shto Koment