TIRANË– Tentativa për arratisjen nga burgu ‘313’ në Tiranë, nën hetim edhe 3 të burgosur të tjerë. 3 të burgosurit kanë pasur dijeni për planin e arratisjes, nën hetim për moskallëzim krimi. Nën hetim nga Prokuroria për “Moskallëzim krimi”, janë Dritan Sinani, Elvis Fajzullahu dhe Bekim Bulica.
Bekim Bulica ka rënë në pranga pasi në shtator të vitit 2019, ka qëlluar me armë zjarri në drejtim të mjetit të një personi me iniciale F. C. Dritan Sinani është arrestuar si pjestar i grabitjes së Rinasit. Ai është dënuar me 20 vite burg.
Arbër Çekaj, Fatmir Pjetri dhe Lulzim Çepele u lanë në burg ditën e djeshme nga Gjykata e Tiranës. Ishte fillimisht Arbër Çekaj ai i cili tha se plani për tu arratisur nga burgu 313 në Tiranë ishte ideuar nga Fatmir Pjetri, e më pas ky i fundit pranoi se e gjitha ishte plani i tij. Nga ana tjetër Lulzim Çepele u pa në Gjykatë me dorën e fashuar pasi preu damarët. Ai tha se prerja e damarëve nuk kishte lidhje me tentativën e arratisjes por me vetëvrasjen.
SI DËSHTOI PLANI I ARRATISJES?
Ka qënë Çepele ai që ka tentuar të presë damarët e dorës, duke tërhequr kështu vëmendjen e forcave të sigurisë, të cilat po merrnin masa për ta shoqëruar në spital për të marrë shërbimin e duhur shëndetësor. Ky moment është shfrytëzuar nga Çekaj dhe Pjetri, të cilët kanë qenë në ambientet e ajrosjes kur kanë tentuar që të arratisen duke përdorur trukun më të vjetër në histori: atë me çarçafë. Gjatë tentativës për të dalë kanë goditur dhe një prej policëve të burgut, i cili është dërguar për marrjen e ndihmës shëndetësore. Megjithatë aventura e tyre mori fund shpejt pasi u kapën dhe u dërguan sërish në qeli.
Mbi të tre tashmë rëndon dhe akuza e arratisjes përveç dënimeve që vuajnë tashmë: 14 vite Arbër Çekaj për trafik droge dhe grup kriminal pasi iu kapën 613 kg kokainë, Fatmir Pjetri për grabitje me armë e dhunë në ‘grupin e babagjyshërve, dhe Çepele i dënuar për shfrytëzim prostitucioni.
Pjetri, nga Puka, është pjesë e bandës së ‘Babagjyshërve’ dhe vetëm pak vite më parë është ekstraduar nga Holanda, pasi është i dënuar me 30 vjet burg. Çekaj është i dënuar me 14 vite burg si pjesë e grupit kriminal të trafikut të kokainës pasi iu kap sasia prej 613 kg kokainë më 27 shkurt 2018 që e kishte fshehur në dyshemenë e konteinerit me banane. Të dy vendosën që të arratiseshin nga vendi ku po vuanin dënimin ditën e dielë, më 8 gusht, por tentativa e tyre dështoi pa u finalizuar.
(a.b)/dosja.al
