Politike

Hapen listat dhe kufizohen koalicionet/ Kuvendi kalon me 106 vota PRO ndryshimet Kushtetuese, Rama: Vendosim ne, jo ndërkombëtarët!

  • Rama sulmon nga foltorja e Kuvendit ambasadoren amerikane: S'më vjen hiç mirë!
  • Meta çon paralajmërimin e fundit, kujton 2 marsin: Ja kështu do ta…
  • ME EMRA: Kush janë “rebelët” që dolën kundër, 10 deputetët që s'e dhanë votën
  • Rama “shpëlan” Gjuzin dhe Roshin: Jeni bashkësi karikaturash, politika s’është për ty
  • FOTO-LAJM/ Kryeministri Edi Rama me kollare “Revolution” në Kuvend
  • Votohet me 106 vota pro nisma për ndryshimet kushtetuese. 10 deputetë votuan kundër, ndërsa 6 kanë munguar. Kryeministri Edi Rama foli për 50 minuta në foltore, ku etiketoi opozitën e re si vagon mallrash, dhe deputetët si "bishta lopatash". Sesioni është përmbyllur sot dhe pritet që parlamenti të rikthehet në muajin shtator. 
    Featured image of article: Hapen listat dhe kufizohen koalicionet/ Kuvendi kalon me 106 vota PRO ndryshimet Kushtetuese, Rama: Vendosim ne, jo ndërkombëtarët! Pamje nga seanca plenare sot

    TIRANË– Me 106 vota pro dhe 10 kundër, parlamenti shqiptar ka miratuar ndryshimet Kushteutese të propozuara nga opozita e re dhe të mbështetura fort nga kryeministri Edi Rama dhe partia Socialiste. Listat e deputetëve në zgjedhjet e vitit 2021 do të jenë të hapura ndërsa koalicionet parazgjedhore nuk do të jenë si në zgjedhjet e shkuara. Deputetët u mblodhën sot në “paradën” e fundit parlamentare, një ditë para nisjes zyrtarisht të pushimeve, për t’u rikthyer në shtator në sesionin e ri parlamentar.

    Ashtu siç edhe ishte njoftuar, e vetmja çështje e rendit të ditës ishin ndryshimet kushtetuese, ku edhe për të marrë fjalën ishin regjistruar shumë pak deputetë. Kujtim Gjuzi, Erion Piciri, Fatjona Dhimitri, Gjetan Gjetani, Lefter Maliqi, Adriatik Alimadhi, Suzana Topi, Zef Shtjefni, Elda Hoti, ishin deputetët që votuan kundër nismës. Ndërsa, nga ata që munguan përshëndetja erdhi nga deputeti Ralf Gjoni, i cili nuk ishte në sallë për shkak të infektimit me COVID-19 por siguroi se vota e tij do ishte pro ndryshimeve kushtetuese. 

    Ndërkohë që “one man show” në Kuvend ishte për kryeministrin Edi Rama, i cili foli në sallë për gati 50 minuta. Rama iu dërgoi një mesazh ndërkombëtarëve, e konkret ambasadores amerikane për të cilën tha se “nuk më vjen mirë kur e dëgjoj të thotë se do t’ju shohim nëse do të mbani fjalën”. Kryeministri tha se për çështjet që lidhen me Shqipërinë, vendi është sovran dhe vendos vetë, duke iu treguar kështu “derën” partnerëve ndërkombëtarë. Teksa foli për listat me një mungesë optimizmi por i detyruar nga “dëshira” e popullit, Rama tha se kjo është një zgjedhje për shqiptarët.

    Për më shumë bëhu pjesë e grupit më viral në Facebook, Dosja.al

    “Koalicionet nuk do t’i ndalojmë, s’duam të ndajmë Lulin nga Mona”,-tha Rama, duke mos dhënë sqarime të mëtejshme mbi metodën sesi do të funksionojnë koalicionet. Por ai iu dha një mesazh të qartë shumë prej deputetëve të opozitës së re që janë në Kuvend se koha për ta ka mbaruar. “Në 2021 nuk do të ketë më bashkësi karikaturash, mbetje të lodhura, e bishta lopatash”,-tha Rama teksa replikoi në distancë me Kujtim Gjuzin dhe Artur Roshin. 

    Vendimi i sotëm në Kuvend, pritet të sjellë një tjetër debat në skenën politike në Shqipëri. Presidenti Ilir Meta ka paralajmëruar se ndryshimet e njëanshme kushtetuese rrezikojnë njohjen nga ana e tij të rezultatit dhe qeverisë që do të dalë nga zgjedhjet e vitit 2021. E njëjta deklarata u riprodhua në formë elegante nga ambasadori i Bashkimit Evropian, Luigi Soreca. Soreca tha se qeveria duhet të punojë në mënyrë që rezultati i zgjedhjeve të 2021, të njihet nga të gjithë.

    (k.m;f/g/dosja.al)

    • 13:04

      ME EMRA: Kush janë “rebelët” që dolën kundër, 10 deputetët që nuk e dhanë votën për të ndryshuar Kushtetutën e Shqipërisë

      Miratohen ndryshimet Kushtetuese me 106 vota pro dhe 10 kundër. Votën e tyre kundër e kanë dhënë deputetët: Adriatik Alimadhi – Fatjona Dhimitri – Lefter Maliqi-  Erion Piciri- Artur Roshi-Suzana Topi- gjetan gjetani- Kujtim Gjuzi- Elda Hoti- Lefter Maliqi. Ndërsa 6 të tjerë kanë munguar, tre prej tyre për shkak të koronavirusit. Në seancën e sotme munguan: Enada Kapllani- Ligoraq Karamelo- Ambra Borova- Ralf Gjoni- Elio Hysko dhe Enver Roshi.

    • 13:01

      Kuvendi miratoi listat e hapura/ Gjoni: Vota ime është është totalisht pro ndryshimeve kushtetuese

      Ralf Gjoni

      Deputeti Ralf Gjoni ka deklaruar se vota e tij është pro ndryshimeve kushtetuese, që mundësojnë hapjen e listave. Në pamundësi për të qenë pjesë e Kuvendit, në një postim  në Facebook ai shprehet se  ka mirënjoje ndaj të gjithë kolegëve që votuan pro listave të hapura.

      Reagimi i plotë:

      Në pamundësi të dhimbshme për të votuar sot fizikisht në seancë plenare, vota ime, të paktën moralisht, është totalisht pro ndryshimeve kushtetuese që mundësojnë hapjen e listave zgjedhore. Sot nuk është dita për protagonizëm. Ky është vetëm një hap pozitiv në drejtimin e duhur. Beteja vazhdon dhe i takon vetëm qytetarëve shqiptarë. Hapat e tjerë? Ndryshim sistemi e depolitizim i numërimit të votës. Mirënjohje për të gjithë kolegët deputetë që votuan pro sot.

    • 12:50

      ‘Ata që kanë votuar sot bënë gjënë e duhur’/ Rama ironi me opozitën: Nuk e heqim të drejtën të mos bashkohet Luli dhe Mona, ai çift na duhet bashkë

      Kryeministri Edi Rama nuk i ka kursyer ironitë në drejtim të kundërshtarëve të tij politikë nga Kuvendi i Shqipërisë. Teksa po fliste për koalicionet, Rama tha se nuk ishte kundër tyre, duke marrë si shembull një bashkim të mundshëm, Basha-Kryemadhi me ndihmën e presidentit Ilir Meta. 

      Ne e votuam një për një 5 qershorin. I pyeta në sallë kur shkova edhe ekspertët e pavarur, janë sot ashtu se ishin të varur tek PD-ja dje, na tregoni një vend që e ka këtë sistem. Më thanë: në një libër të La Sapiencas. Mbase shkruhet që nuk duhet të jetë kështu. Nuk po heqim të drejtën që të mos bashkohet Luli dhe Mona. Ai çift ne na duhet bashkë. Duke i patur ata kemi edhe baba Xhiken bashkë me ta edhe ‘dixhitalin e Lalzit’ dhe kemi bandën e të kartëtëve që do ia tregojmë shqiptarëve mirë.  Syriza është fiks kjo që themi ne. Një grumbullim partish në një sigël, që t’i tregosh njerëzve për kë do votojnë. Ai vjen tek ty dhe thotë të jap votën, pastaj kur shkon në shtëpi sheh që të ka vjedhur ballisti pulën. Myslimi kupton por bën sikur nuk e kupton. *Ndërhyn Kujtim Gjuzi. Hë më boll tani o Kujte! Edhe ti bisht lopate je. Jo lopatën se ke ti. Lopata jote është kurora e ëndërruar e monarkisë. Kjo vlen për ata që thonë që nuk bëhen këto ndryshime një vit para zgjedhjeve. Po 5 qershori ça ishte? Apo 7×7! Ju nuk dini asgjë. Sa herë dilni këtu s’dini asgjë. Pragu elektoral nuk është vendosur në Kushtetutë si përqindje. Kur erdhi nisma, ajo kërkonte ndalimin e koalicioneve parazgjedhore në Kushtetutë. Pse? Se nuk do të bënim dot votat apo se u trëmb diktatorin? Ranë sepse PS kërkoi heqjen e tyre. Ne nuk kemi lidhje me ato që flisni ju. Ju ngaqë nuk shkrehët një pushkë në luftë, e doni tani. Duhet të mbani qeleshen me shqipojnë, doni luftë, doni diktaturë. S’po i hyj farë unë se nuk merrem me dosje, merret Myslimi. Po të hapeshin ato dosje. Jo mo jo nuk merrem me ty, as nuk të njoh kush je. Ti mua më njeh se më akuzon. Ça ballisti je ti? Cili ball? Të thuash ne të ballit, është si të thuash ne të ikurit? Ndryshimet Kushtetuese përcaktojnë për shumë kohë se nuk mund të jenë më pak se 2/3, nëse kjo është hile e jona si shpjegohet që i hapim më shumë se të tjerët? Si shpjegohet që duam hapjen më të madhe? Kjo me dakordësi mund të shkojë 100%…por duhet të ulemi dhe të flasim. Kemi dy javë që kërkojmë diskutime ata vijnë dhe na lexojnë parulla. Faleminderit për durimin dhe qëndrueshmërinë. Faleminderit miqve dhe partnerëve europianë. Edhe opozitës faleminderit. Ata që kanë votuar sot se kanë bërë gjënë e duhur. Ata që nuk kanë votuar kanë penguar zbatimin e sistemit. Kanë penguar kufizimin e arsyeshëm të deputetëve dhe kanë penguar përfaqësimin e komuniteteve në Parlament. Kanë sabotuar sigurimin e një përfaqësimi të drejtë të të gjithëve bashkë dhe veçanërisht të gjinive por nuk kemi bërë asgjë. Treni me fantazma ka ikur në lum dhe përzgjedhja do të jetë reale. Kaq! Futeni gjithmonë në anën e gabuar për të kapur ndonjë pulë, pula më nuk ka!,”-tha Rama. 

    • 12:48

      VOTOHEN ndryshimet/ Hapen pjesërisht listat dhe hiqen koalicionet parazgjedhore tradicionale

      Kuvendi ka miratuar me 106 vota pro dhe 10 kundër ndryshimet Kushtetuese për hapjen e listave dhe kufizimin e koalicioneve parazgjedhore. Deputeti socialist Alket Hyseni lexoi nominalisht, (hapur), votimin. 116 deputetë morën pjesë në votim, pasi 6 prej tyre kanë munguar. 3 prej deputetëve që nuk ishin në sallë janë të prekur me COVID1-9. Të gjithë deputetët që ishin në Kuvend morën pjesë  në votim. Kujtim Gjuzi, Erion Piciri, Fatjona Dhimitri, Gjetan Gjetani, Lefter Maliqi, Adriatik Alimadhi, Suzana Topi, Zef Shtjefni, Elda Hoti, ishin deputetët që votuan kundër nismës. Me 106 vota pro dhe 10 kundër, parlamenti shqiptar ka miratuar ndryshimet Kushteutese të propozuara nga opozita e re dhe të mbështetura fort nga kryeministri Edi Rama dhe partia Socialiste.  Listat e deputetëve në zgjedhjet e vitit 2021 do të jenë të hapura ndërsa koalicionet parazgjedhore nuk do të jenë si në zgjedhjet e shkuara.

    • 12:47

      Rama nuk njeh hapa pas, miratohen me 106 vota pro ndryshimet Kushteutese

      Kuvendi ka miratuar me 106 vota pro dhe 10 kundër ndryshimet Kushtetuese për hapjen e listave dhe kufizimin e koalicioneve parazgjedhore. Deputeti socialist Alket Hyseni lexoi nominalisht, (hapur), votimin. 116 deputetë morën pjesë në votim, pasi 6 prej tyre kanë munguar. 3 prej deputetëve që nuk ishin në sallë janë të prekur me COVID1-9. Të gjithë deputetët që ishin në Kuvend morën pjesë  në votim.

    • 12:19

      "Mbetje e lodhur"/ Rama "shpëlan" Gjuzin dhe Roshin: Jeni bashkësi karikaturash, politika s'është për ty është sport i vështirë, ballist, je bisht lopate... mos më ngacmo dellin oratorik (DEKLARATA)

      Edi Rama, Kujtim Gjuzi dhe Artur Roshi

      Kryeministri Edi Rama nuk i ka kursyer etiketimet për dy deputetë në Kuvend. Kujtim Gjuzi dhe Artur Roshi ishin dy “viktimat” e preferuara të Ramës sot, që i quajti “bishta” lopate të vagonave të mallrave, “mbetje të lodhura”, e duke vijuar më tej me të tjera etiketime. Rama gjithashtu tha se nuk ka lidhje me komunizmin, por pranoi se i ati ka qenë pjesë e nomenklaturës, dhe sqaroi se ai ka qenë në anën e duhur të historisë. 

      PJESË NGA FJALA E RAMËS:

      Kolegët tanë në rrugë dhe ndërkombëtarët ta dëgjojnë këtë që thotë KE. Ligjvënësi të garantojë elementët kryesorë të sistemit zgjedhor, subjekteve zgjedhorë. Në të gjithë hapësirën e OSBE nuk ka asnjë vend nga Vankuveri në Rusi, nuk e ka asnjë vend formulën tonë të koalicioneve. Është tipikisht një hile. Kjo është një hile. Hile allashqiptare. Ca është kjo? Këtë se ka askush. Ne këtë sot do e fshijmë dhe është fshirje e vonuar e një hileje që ka karakterizuar zgjedhjet për vite të tëra. 

      Ballist, Curçilli thotë kush nuk ndryshon mendim është budalla. Unë jam shumë i qetë sot, se pavarësisht se nuk kam të njëjtin mendim të lartë për listat si Myslymi e Rudina, ama…

      Naltmadhni, të lutem. Të lutem sa për komunistin, s’kam asnjë lidhje emocionale apo intelektuale me komunizmin. Im atë ka qenë komunist si shumë të tjerë dhe kanë qenë në anën e duhur të historisë, kur ju, kur thua ju është fyerje në fakt. Se unë s’kam asnjë problem me komunistë e me ballistë si persona. Ju e mësuat nga Enver Hoxha se ju bëri ai më të zi sesa veten. Se ju mësoi Enveri që mos u merr me mesazhin por me mesazherin, mos u merr me mendimin por me kokën që mendon. Po të kishit gjë, do të ishit më zi se Enveri. Këtu është ndarja anti-demokratike. Socialistët dhe demokratët janë demokratë. Socialistët janë anti-fashistë dhe anti-komunistë. S’merremi me personat por me ideologjitë. Jeni kopja e zezë, ti e Saliu. (Artur Roshit) Ndërkohë që politika është ndarje opinionesh e idesh. Është sport i vështirë nuk është për ty.(Gjuzit). Ty të sollën këtu aksidentalisht. I ke parasysh vagonat e mallrave? Vagona mallrash të mbushura me lopata. Ti je bishti i një lopate. Nuk ka më parlament për ty dhe bishtat e lopatave. Me votimin e lodhur vagonat me lopata do të shkëputen. Këtë sistem do e fshijmë që këtij parlamenti të mos i bien më qafë më karikatura politike si puna jote. Na tregoni hajdutët e kriminelët, komunistët në vitin 2020, jeni një bashkësi karikaturash. Ky parlament boll ka qenë revistë Hosteni për 30 vite. Ti s’merr dot as klasën e 9-të. As të nëntën me mik komunist. S’kam ç’të bëj se më ngacmon dellin oratorik ballisti. 

    • 12:19

      Rama sulmon nga foltorja e Kuvendit ambasadoren amerikane: Kur thotë se po i vëzhgoj, s’më vjen mirë hiç! Jam kryeministri i një vendi sovran

      Kryeministri Edi Rama ka sulmuar nga Kuvendi, ambasadoren amerikane në Shqipëri, Yuri Kim. Duke cituar deklaratën e saj të djeshme se: Ne do të shohim nëse drejtuesit do ta mbajnë fjalën e tyre, Rama tha se nuk i kishte ardhur fare mirë për fjalën e Kim duke u shprehur se Shqipëria ishte vend sovran. 

      “Sot po mbyllim një fazë jo të lehtë, ne e bëmë Reformë. Deri në qershor ishte formalinë. I falenderoj të gjithë për kontributin e dhënë për ta sjellë në Parlament. Falenderoj edhe miqtë e partnerët për përfshrijen. Dua t’i dërgoj një mesazh dhe ta dëgjojnë ashtu siç është; mesazh nga një parlament sovran dhe një kryeministri përfaqëson një parlament sovran. Komisioni i Venecias thotë se shtetet kanë marzh të gjerë vlerësimi, gëzojnë këtë marzh, Komisioni i Venecias dhe OSBE nuk rekomandojnë ndonjë sistem të veçantë, nuk ka standarde në lidhje me shpërndarjen e mandateve, Këtë mesazh kanë shpërndarë në unison Venecia, OSBE dhe Gjykata e Strasburgut. Ky është vendim i Republikës së Shqipërisë dhe na takon ne të vendosim ç’do të bëjmë. Nuk është vendim që e ndajmë me ambasadoren amerikane, edhe pse i respektojmë shumë. U bënë 30 vjet dhe nuk mund të bëhen edhe 30 të tjera nëse vazhdojmë të mos i themi gjërat siç janë. Nuk është përgjegjësia e SHBA, BE etj që prej 30 vjetësh kërkojmë në anglisht zgjedhjen e problemeve shqiptare. Nuk është përgjegjësia e tyre, prandaj meritojnë respekt, por kur thotë ambasadorja amerikane që thotë do të vëzhgoj nga larg liderët e partivë nëse do ta mbajnë fjalën, nuk më vjen më mirë. Fare!,”-u shpreh Rama. 

    • 12:05

      Rama në Kuvend: Alimadhi është në formë nga shëndetësia jonë...po të ishte këtu Mit'hat Frashëri do të ishte me Myslym Murrizin 

      Pjesë nga fjala e Ramës: 

      Kam pasur një respekt të madh për Mit’hat Frashërin, po ai po t;ju dëgjonte sot do ishte me Myslimin. Ki besim tek fjala ime. Mit’hati është i imi jo i yti, e njoh më shumë se ti prandaj të them se sot do të ishte me Myslimin. Nuk ka vetëm një Ballë Kombëtar se s’ka një por disa. U bë një ball’ me shtatë ballë. Pashë një ballist që turpëron Mit’hat Frashërin. Ndërkohë pashë edhe disa zonja që klithën për diktaturë dhe ilegjimitetin e parlamentit. Si lidhen këto dy gjëra? Nuk po shkoj më tutje por kam keqardhje për ç’edukimin që përcillni me ato klithma dhe fjalë të ulta. Janë karakteristikë për shumë burra jashtë. Po vij tek tema se është shumë më e rëndësishme se klithmat tuaja. Dëgjova një thirrje; nuk kam frikë nga asnjë prej jush; është shprehje tipike se kush nuk ka frikë nuk e thotë.

    • 12:14

      FOTO-LAJM/ Kryeministri Edi Rama me kollare "Revolution" në Kuvend

      Kryeministri Edi Rama njihet për pasionin e tij për veshjen dhe kombinimet e tij të shumta të ngjyrave. Kështu ka bërë edhe sot. Pak minuta para votimit në Kuvend të ndryshimeve Kushtetuese, përveç fjalës së gjatë për mbi 50 minuta në foltore, Rama iu lëshoi një mesazh kundërshtarëve. Kësaj here, kishte zgjedhur një kollare ngjyrë blu me yje, ku shkruhej në gërma të qendisura me ngjyra fjala “Revolution”, “Revolucion”. Përse po flet Rama?!

      Edi Rama
    • 12:07

      Kujt i shpreh dashurinë nga Kuvendi? Një romantik si Kujtim Gjuzi, sa here e kap kamera i çon mesazh dikujt, i hap zemrën por në..anglisht

      Kreu i Partisë Konservatore, Kujtim Gjuzi ka shkuar sot në Kuvend me një mesazh të fshehtë dhe të veçantë.  Teksa në dorë mbante mbante një fletë me disa prej emrave të deputetëve të opozitës së re, Gjuzi kishte shprehur “talentin” e tij me stilolapsin. Duke e mbajtur letrën lart çdo herë që merrte fjalën, në fletën e bardhë lexohet qartë fjala “LOVE” ose ndryshe në shqip “dashuri”.

    • 11:58

      BATUTAT/ Alimadhi me zemër të thyer nga Balla.... Gjuzi i thotë "të dua Ruçit", kryeparlamentari i ngrysur: Merr mikrofon, dil tek dera e sqarohu

      Kujtim Gjuzi, Adreatik Alimadhi dhe Gramoz Ruçi

      Ndryshimet historike të Kushtetutës që votohen sot në parlament, nuk i kanë penguar deputetët të jenë edhe krijues në batuta mes tyre. I pari që e nisi ishte deputeti Adriatik Alimadhi, i cili u ndie i fyer nga kreu i grupit parlamentar të Partisë Socialiste, Taulant Balla. Balla i tha Alimadhit se “unë nuk kam parë në jetën time si ti”, e kjo frazë duket se e ka trishtuar Alimadhin i cili tha se kishte raporte miqësore të veçanta me Ballën.

      Adriatik Alimadhi-Ballës: Nuk e prisja nga ti që të më thoje që jam i çuditshëm se kemi patur koefidenca bashkë. Këtë nuk e prisja dhe ndihem i fyer. S’jam servil unë.

      Një tjetër moment interesant ishte sfida që Alimadhi i hapi deputetit Myslym Murrizi, i cili e akuzoi se ka qenë bashkëpunëtor i sigurimit.

      Adriatik Alimadhi-Murrizit: E ke thënë nja shumë herë që kam qenë zv/ministër, kam qenë dhe jam krenar. Se flisni edhe për të shkuarën time, që e shkuarë komuniste. Ejani të shkojmë ta shohim.  Ejani të shohim edhe tuajën dhe kush është tërhequr zvarrë nga diktatura komuniste.

      Por teksa deputetët po replikonin nga vendi, Gramoz Ruçit ia mori vëmendjen ndërhyrja e Kujtim Gjuzit, i cili donte të sqaronte një problem.

      Me një fletë formati ku shkruhej “I love u”, “të dua”, Gjuzi kërkoi fjalën, që nuk iu dha nga Ruçi pasi sipas tij, ky moment kishte skaduar.

      Gramoz Ruçi: Kap një mikrofon aty tek dera e parlamentit dhe ik sqarohu. IT-ja hapja pak Gjuzit.

      Kujtim Gjuzi: Zoti kryetar, ku është fjala ime si i pavarur?

      Gramoz Ruçi: E kishe radhën por të iku se s’ishe këtu, Të kishe qëndruar të merrje fjalën. Vazhdojmë tjetri.

    • 11:56

      ‘Mos kakaris!’/ Murrizi dhe Alimadhi kapen keq në Kuvend, ndërhyn Vasilika Hysi: S’mund t’i thuash ashtu një deputeti

      Debate mes Myslim Murrizit dhe Adriatik Alimadhi në sallën e Kuvendit. Teksa Murrizi po fliste për arritjen e opozitës së re për kalimin e ndryshimeve në Kushtetutë, nga vendi ndërhyri Alimadhi. Kaq mjaftoi që të dy të përplaseshin me njëri-tjetrin, duke bërë që të ndërhynte zv.kryeparlamentarja, Vasilika Hysi.  

      PJESË NGA DEBATI NË SALLË: 

      Myslim Murrizi: Do të kandidoj prapë, do të kandidoj për deputet jo për hajdut administrate. Të flasësh me mua më sill një copë letër se çfarë përfaqëson

      Adriatik Alimadhi: Ti nuk krahasohesh me mua

      Myslim Murrizi: Unë nuk kam ardhur këtu nga PPSH-ja. Kjo sallë nuk do të ketë më  vemje. Mbaje mend.

      Adriatik Alimadhi: Mos kakaris.

      Myslim Murrizi: Unë nuk kakaris

      Vasilika Hysi: Ju lutem vini maskën. Nuk mund t’i thoni kakaris një deputeti. Vini maskën

      Myslim Murrizi: Jam shumë krenar që firmën tënde e kam në tenxheren e fasules. Është zierë me fasule. O Korab, O Halit. *u tërheq vëmendjen kolegëve të nxehur me Alimadhin. 

    • 11:44

      U infektua me COVID-19/ Deputeti Enver Roshi në gjendje të rëndë shëndetësore, Balla apel nga Kuvendi: Shërim të shpejtë… (Sherri me Alimadhin)

      Kryetari i grupit parlamentar të Partisë Socialiste, Taulant Balla ka njoftuar sot në Kuvend, se gjendja e deputetit të prekur me COVID-19, Enver Roshi është jo e mirë. Teksa mori fjalën në foltore për të dhënë qëndrimin e PS për ndryshimet kushteutese, Balla tha se është e habitshme sesi Adriatik Alimadhi, i cili ka kaluar vetë COVID-19 është i pandjeshëm për të penguar përhapjen e COVID-19.

      Taulant Balla: Një kolegu ynë këtu, i prekur me COVID-19 nuk është në gjendje të mirë. Po flas për deputetin Enver Roshi. Gjendja e tij, nuk është e mirë. Unë nuk kam parë njeri si ti (i drejtohet Alimadhit). Unë në jetën time si ti nuk kam parë. Ai po kalon një situatë si ajo që ke kaluar ti. Unë nuk e di sesi.

      (Alimadhi flet nga vendi).

      Balla: Një ballist nuk mund të pengojë fjalën time, nuk më pengon dot të shpreh mendimet e mia. (Socialistët duartrokasin).

      Alimadhi i pret fjalën: Pse unë çfarë bëra.

      Balla: Maskën, maskën. Kuvendi i Shqipërisë duhet të jetë shembull. I urojmë deputetit shërim të shpejtë.

      Përveç Enver Roshi, edhe dy deputetët Ralf Gjoni e Elio Hyska janë të prekur me COVID-19. Po ashtu, edhe kreu i bashkisë Tiranë, Erion Veliaj është infektuar prej ditësh nga virusi, por gjendja e tyre është e mirë.

    • 11:43

      VIDEOLAJM/ Xhemal Qefalia provokon keq fare Erion Braçen, i shkon tek vendi në sallën e Kuvendit dhe i bën dhuratën “pikante”

      Kreu i Grupit Parlamentar të Partisë Socialiste, Taulant Balla ka postuar një moment ‘pikant’ nga seanca e Kuvendit, teksa deputetët socialist, tifozë të skuadrës së Tiranës i kanë bërë një dhuratë simbolike zv.kryeministrit Erion Braçe, me rastin e shpalljes së ekipit kryeqytetas si Kampion.

      Socialistët i kanë dhuruar Erion Braçes një kapele me ngjyrat e Tiranës dhe këtë ja kanë dhënë gjatë seancës plenare në Kuvend. Në video dëgjohet teksa deputeti Ervin Bushati thërret “Forca Tirona”. Ndërkohë që Braçe i njohur si tifoz i flaktë i Partizanit e ka pranuar këtë dhuratë simbolike, teksa ka përplasur dhe ‘grushtin’ me deputetin Xhemal Qefalia.

      Ndërkohë që Balla shkruan mesazhin e tij: “Forca Tirona! Edhe Erion Braçe pranon dhuratën e tifozave të Tironës në Grupin tonë, Xhemali, Sadi, Ervini e plot të tjerë. Tirona kampion për 💯 vjetor!”.

    • 11:32

      Murrizi: Ta shohin të gjithë, na nënqeshët e ne iu hoqëm lakun nga fyti shqiptarëve. PS e opozita jashtë të ulen me ne për depolitizimin (DEKLARATA)

      Deputeti Myslym Murrizi ka marrë sot përsipër meritën për hapjen e listave. Në fjalën e tij në foltoren e Kuvendit, në kohën që deputetët votojnë për hapjen e listave dhe kufizimin e koalicioneve parazgjedhore, Murrizi tha se “ata që nuk e prisnin sot do të shohin sesi deputetët e përqeshur nga të gjithë, ndryshuan Kushtetutën”. Deputeti i shtriu dorën e bashkëpunimit, PS dhe PD-së për t’u ulur për të biseduar edhe për depolitizimin e administratës.

      PJESË NGA FJALA E MURRIZIT: 

      PD e LSI-ja zihen sot kush do i hapë më shumë… listat Korab, jo ato që mendon ti…po hapjen e listave. Iu bëj thirrje partive të mos mbajnë në parti kriminelë, unë do të garoj vetë. Unë ftoj z. Rama dhe Z.Balla të ulemi për depolitizimin. Arrestimet e SPAK më duken si operacionet e zborit. 7 hajdutë nga PS, 7 nga PD e 7 nga LSI. Damian, paska ik Damiani do jetë me Oerdin. Të përgëzoj Damian, paske kaluar nga opozita. 7 hajdutët tuaj, dhe të sivëllezërve tuaj, s’do të kenë më të drejtë të numërojnë votat e subjekteve të tjera. E di që është e vështirë. Baballarët e 2008-ës e ka shumë të vështirë. Ju këtu e papagallët tuajë na kanë përqeshur. Vemje, kërmij, etj. E ja, ne që na nënqeshët erdhëm këtu në këtë seancë të 30-korrikut, do të mbahemi mend që iu hoqëm shqiptarëve lakun nga fyti. Shqiptarët do të ndëshkojnë këdo me votë. Ftoj edhe opozitën të bëhet pjesë e bisedimeve pas 20 gushtit të flasim për administratën zgjedhore. 

    • 11:29

      ‘Vije, se e kalove ti duhet patjetër dhe ne…?’/ Alimadhi hoqi maskën, Ruçin e zë meraku: Ne u shqetësuam për ty…

      Deputeti Adriatik Alimadhi ka hequr maskën e vendosur për t’u mbrojtur nga koronavirusi gjatë seancës së sotme plenare. Menjëherë gjesti është vënë re nga kryeparlamentari Gramoz Ruçi, i cili i ka kërkuar që të rivendosë maskën në mënyrë që të mbronte kolegët e tij nga një infektim i mundshëm.

      Vije maskën, vije maskën. Po se e ke kaluar ti duhet ta kalojmë dhe ne? Ne të kemi uruar me gjithë shpirt shërim të shpejtë. Ne u shqetësuam për ty, u interesuam, të telefonuan. Të lutem vër maskën,”-tha Ruçi nga foltorja.

      Deputeti Alimadhi ishte politikani i parë në vend që u infektua nga pandemia e koronavirusit në vend.

    • 11:24

      “Njëra votoi 5 herë”, Ruçi merr masa, u ZBULON votat të gjithëve: Do lexohen me zë, në emër të transparencës…

      Kryeparlamentari Gramoz Ruçi ka bërë me dije se votimi i sotëm me letër për ndryshimin e Kushtetutës do të lexohet në mënyrë nominale. Pas denoncimit të deputetit Halit Valteri, se një deputete votoi plot 5 herë, Ruçi mori sërish fjalën dhe tha se të gjitha votat do të lexohen me zë me emër dhe qëndrimin e gjithësecilit.

      Në fund të debatit, në emër të transparencës, sekretariati i votimit, do të bëhet votim nominal në sallë me emër dhe mënyra si ka votuar,”-u shpreh Ruçi.

    • 11:11

      DEGJENERON votimi në Kuvend, deputetja voton 5 herë… Ruçi: E pashë edhe unë, çoi fletët e të tjerëve!

      Deputeti Halit Valteri ka bërë një denoncim ndaj koleges së tij gjatë seancës plenare. Pasi ka marrë fjalën nga vendi, Valteri ka “denoncuar” kolegen e tij se ka votuar disa herë duke i kërkuar kryeparlamentarit Gramoz Ruçi që të marrë masa. “Një deputete ka votuar 5 fletë votimi. Ju lutem merrni masa,“-u shpreh Valteri. Ndërsa denoncimi i tij është përkrahur edhe nga Ruçi, i cili është shprehur se e ka konstatuar edhe ai të njëjtën gjë.

      “Është e drejtë, e konstatova dhe unë. Do vërtetohet nga Komisioni përkatës,”-tha Ruçi.

    • 10:54

      Nis votimi për ndryshimet Kushtetuese, deputeti Kujtim Gjuzi ikën nga salla, Rama merr 50 minuta kohë për të bindur "audiencën"

      Ka nisur prej disa minutash votimi në Kuvend për miratimin e ndryshimeve kushtetuese, ku përfshihet hapja e listave dhe kufizimi i koalicioneve parazgjedhore. Votimi njësoj edhe si në seancat e shkuara është me letër, dhe deputetët po votojnë nga karriget e tyre. Në këtë seancë, kryeministri Edi Rama ka marrë rreth 50 minuta për të folur në foltore. Kjo është koha që kryeministri do të shfrytëzojë për të bindur shqiptarët por edhe ndërkombëtarët për këto ndryshime, që pritet të miratohen me 94 vota, nga PS dhe nga opozita parlamentare.

    • 10:45

      Ndryshimet Kushtetuese/ Gjuzi denoncon nga foltorja: Do braktis seancën, janë 4 vota deputetësh të falsifikuara

      Deputeti Kujtim Gjuzi ka denoncuar se janë 4 vota deputetësh të falsifikuara në grupin prej 28 deputetë që kanë firmosur pro ndryshimeve Kushtetuese, ku përfshihet hapja e listave dhe kufizimi i koalicioneve parazgjedhore. “Nuk mund të lejoj që të firmos. Jam kundër, janë 4 firma deputetësh të falsifikuara në këtë Kuvend. Nuk votoj. Nuk mund të rri këtu ku falsifikohet vota në Kuvend. Kjo ju çon në burg, nga tani nis përgjegjësia juaj ligjore”,-tha ai.

      Kreu i Kuvendit, Gramoz Ruçi u mjaftua duke i thënë: Rrugë të mbarë!

      Deputeti Kujtim Gjuzi u largua nga seanca plenare dhe deklaroi se nuk do të votojë pro ndryshimeve kushteutese, për shkak të falsifikimit të firmës për 4 deputetë.

    • 10:30

      Hajdari: Hapja e listave do të miratohet, është arma e duhur për zgjedhur deputetë të ndershëm e jo matrapazë

      Nis seanca plenare. Deputetja Rudina Hajdari ka deklaruar se në Kuvend sot do të votohet për lista të hapura. Ajo theksoi se miratimi i listave të hapura do të jetë një vendim historik për vendin tonë. Sipas deputetes tashmë qytetarë do të kenë mundësinë për të zgjedhur deputetë të ndershëm dhe jo matrapazë. “Hapja e listave është një vendim hisotrik për vendin tonë. Këtë fitore dua tja dedikoj qytetarëve shqiptarë. Do të miratohen listat e hapura dhe ndryshimi i koalicioneve.  Kjo është një çështje që mbështetet pa rezerva nga klasa politike. Sot dua tju them, që me këtë fitore që po korrim sot, do të administrojmë me pjekuri këtë armë që kemi në dorë. U heqim fuqinë kryetarëve dhe ua japim qytetarëve shqiptarë. Dua tu japin votën kandidatëve që vëretet e duan vendin e tyre. Në këtë parlament në vitin 2021 do të vijnë ata njerëz që janë të ndreshëm dhe të mirë dhe jo ata që janë matrapazë. Nëpërmjet votës tuaj ju do të sillni deputetët punëtorët dhe jo ata që janë lëpirës ndaj kryetarve të tyre. Nuk do të sillni kriminelë dhe matrapazë. Me listat e hapura, ju mundesi të vlerësoni njerëzit. Ndarja sot është mes atyre që jetojnë në luks dhe atyre shqiptarëve që rropaten nga mëngjesi deri në darkë. E ardhmja do të varet nga mënyra sesi ne do ta përdorim këtë armë që do të votohet sot. Sot e kemi këtë mundis ta përdorim këtë mundesi dhe ta bëjmë realitet. Unë besova se ndryshimi do të ndodhte. Nëse bashkohemi nesër kemi mundësinë të ndryshojmë të gjithë Shqipërinë. Sot kemi hedhur një hap të rëndësishëm drejt ndryshimit”. Ndarja sot është mes atyre që kanë gllabëruar pasurinë e këtij vendi dhe 2.8 milion shqiptarë që paguajnë taksa nuk marrin asnjë shërbim”, u shpreh Hajdari.

    • 10:00

      ‘Mos bërtit mo, ça je ti mo!’/ Opozita e re e përçarë! Ndizen ‘gjakrat’ në Kuvend, Alimadhi kapet keq me Arben Elezin, ndërhyn Ruçi t’i pajtojë

      Sherr në Kuvend! Opozita e re është e përçarë për ndryshimet në Kushtetutese. Deputetët Adriatik Alimadhi dhe Arben Elezi janë kapur me fjalë teksa në foltore po mbante një fjalim Korab Lita.

      Për shkak të distancës, nuk kuptohej qartë se çfarë po debatonin të dy deputetët por dëgjohej vetëm: Mos bërtit mo, ça je ti mo! Ndërsa për të shuar sherrin, ka ndërhyrë kryeparlamentari Gramoz Ruçi, i cili u ka tërhequr vëmendjen për të qetësuar gjakrat.

      “Kolegë deputetë iu tërheq vëmendjen,”-u shpreh Ruçi.

    • 10:31

      Nga momenti në moment/ Rama ndryshon sot Kushtetutën për të 'penguar' koalicionet tradicionale, opozita e bashkuar në një listë unike, "sforcot" e Bashës dhe ndërkombëtarëve të kota, gjithë nata s'i mjaftoi Gjiknurit për të bërë hapa pas

      Kuvendi i Shqipërisë do të kalojë gjatë seancës së sotme ndryshimet Kushtetuese, ku përfshihet hapja pjesore e listave dhe ndryshimi i koalicioneve tradicionale. Formula e koalicioneve të reja pritet të qartësohet në Kodin Zgjedhor, por votimi në parlament sot do të sjellë një pamje të re në politikën shqiptare. Me ndryshimin e koalicioneve, pritet që Partia Demokratike, Lëvizja Socialistë për Integrim dhe partitë e tjera të bëjnë një koalicion të përbashkët, me një listë të përbashkët emrash të kandidatëve për deputetë. Megjithëse opozita e bashkuar dhe ndërkombëtarët apeluan për konsensus dhe dialog, Partia Socialiste duket e vendosur. Janë 94 vota të nevojshme për të kaluar ndryshimet, por kryeministri Edi Rama nuk është i shqetësuar, pasi ka marrë “bekimin” e opozitës parlamentare. 5 orë bisedime në Këshillin Politik, pritja përgjatë gjithë natës e përfaqësuesve të opozitës në këtë këshill nuk ka marrë asnjë përgjigjie nga PS dhe përfaqësuesi i saj, Damian Gjiknuri.

    Shto Koment